Chapter 68

yudhiṣṭhira uvāca |
kimāhurdaivataṃ viprā rājānaṃ bharatarṣabha |
manuṣyāṇāmadhipatiṃ tanme brūhi pitāmaha || 1 ||
[Analyze grammar]

bhīṣma uvāca |
atrāpyudāharantīmamitihāsaṃ purātanam |
bṛhaspatiṃ vasumanā yathā papraccha bhārata || 2 ||
[Analyze grammar]

rājā vasumanā nāma kausalyo dhīmatāṃ varaḥ |
maharṣiṃ paripapraccha kṛtaprajño bṛhaspatim || 3 ||
[Analyze grammar]

sarvaṃ vainayikaṃ kṛtvā vinayajño bṛhaspateḥ |
dakṣiṇānantaro bhūtvā praṇamya vidhipūrvakam || 4 ||
[Analyze grammar]

vidhiṃ papraccha rājyasya sarvabhūtahite rataḥ |
prajānāṃ hitamanvicchandharmamūlaṃ viśāṃ pate || 5 ||
[Analyze grammar]

kena bhūtāni vardhante kṣayaṃ gacchanti kena ca |
kamarcanto mahāprājña sukhamatyantamāpnuyuḥ || 6 ||
[Analyze grammar]

iti pṛṣṭo mahārājñā kausalyenāmitaujasā |
rājasatkāramavyagraḥ śaśaṃsāsmai bṛhaspatiḥ || 7 ||
[Analyze grammar]

rājamūlo mahārāja dharmo lokasya lakṣyate |
prajā rājabhayādeva na khādanti parasparam || 8 ||
[Analyze grammar]

rājā hyevākhilaṃ lokaṃ samudīrṇaṃ samutsukam |
prasādayati dharmeṇa prasādya ca virājate || 9 ||
[Analyze grammar]

yathā hyanudaye rājanbhūtāni śaśisūryayoḥ |
andhe tamasi majjeyurapaśyantaḥ parasparam || 10 ||
[Analyze grammar]

yathā hyanudake matsyā nirākrande vihaṃgamāḥ |
vihareyuryathākāmamabhisṛtya punaḥ punaḥ || 11 ||
[Analyze grammar]

vimathyātikrameraṃśca viṣahyāpi parasparam |
abhāvamacireṇaiva gaccheyurnātra saṃśayaḥ || 12 ||
[Analyze grammar]

evameva vinā rājñā vinaśyeyurimāḥ prajāḥ |
andhe tamasi majjeyuragopāḥ paśavo yathā || 13 ||
[Analyze grammar]

hareyurbalavanto hi durbalānāṃ parigrahān |
hanyurvyāyacchamānāṃśca yadi rājā na pālayet || 14 ||
[Analyze grammar]

yānaṃ vastramalaṃkārānratnāni vividhāni ca |
hareyuḥ sahasā pāpā yadi rājā na pālayet || 15 ||
[Analyze grammar]

mamedamiti loke'sminna bhavetsaṃparigrahaḥ |
viśvalopaḥ pravarteta yadi rājā na pālayet || 16 ||
[Analyze grammar]

mātaraṃ pitaraṃ vṛddhamācāryamatithiṃ gurum |
kliśnīyurapi hiṃsyurvā yadi rājā na pālayet || 17 ||
[Analyze grammar]

patedbahuvidhaṃ śastraṃ bahudhā dharmacāriṣu |
adharmaḥ pragṛhītaḥ syādyadi rājā na pālayet || 18 ||
[Analyze grammar]

vadhabandhaparikleśo nityamarthavatāṃ bhavet |
mamatvaṃ ca na vindeyuryadi rājā na pālayet || 19 ||
[Analyze grammar]

antaścākāśameva syālloko'yaṃ dasyusādbhavet |
patecca narakaṃ ghoraṃ yadi rājā na pālayet || 20 ||
[Analyze grammar]

na yonipoṣo varteta na kṛṣirna vaṇikpathaḥ |
majjeddharmastrayī na syādyadi rājā na pālayet || 21 ||
[Analyze grammar]

na yajñāḥ saṃpravarteranvidhivatsvāptadakṣiṇāḥ |
na vivāhāḥ samājā vā yadi rājā na pālayet || 22 ||
[Analyze grammar]

na vṛṣāḥ saṃpravarteranna mathyeraṃśca gargarāḥ |
ghoṣāḥ praṇāśaṃ gaccheyuryadi rājā na pālayet || 23 ||
[Analyze grammar]

trastamudvignahṛdayaṃ hāhābhūtamacetanam |
kṣaṇena vinaśetsarvaṃ yadi rājā na pālayet || 24 ||
[Analyze grammar]

na saṃvatsarasatrāṇi tiṣṭheyurakutobhayāḥ |
vidhivaddakṣiṇāvanti yadi rājā na pālayet || 25 ||
[Analyze grammar]

brāhmaṇāścaturo vedānnādhīyeraṃstapasvinaḥ |
vidyāsnātāstapaḥsnātā yadi rājā na pālayet || 26 ||
[Analyze grammar]

hasto hastaṃ sa muṣṇīyādbhidyeransarvasetavaḥ |
bhayārtaṃ vidravetsarvaṃ yadi rājā na pālayet || 27 ||
[Analyze grammar]

na labheddharmasaṃśleṣaṃ hataviprahato janaḥ |
kartā svecchendriyo gacchedyadi rājā na pālayet || 28 ||
[Analyze grammar]

anayāḥ saṃpravarteranbhavedvai varṇasaṃkaraḥ |
durbhikṣamāviśedrāṣṭraṃ yadi rājā na pālayet || 29 ||
[Analyze grammar]

vivṛtya hi yathākāmaṃ gṛhadvārāṇi śerate |
manuṣyā rakṣitā rājñā samantādakutobhayāḥ || 30 ||
[Analyze grammar]

nākruṣṭaṃ sahate kaścitkuto hastasya laṅghanam |
yadi rājā manuṣyeṣu trātā bhavati dhārmikaḥ || 31 ||
[Analyze grammar]

striyaścāpuruṣā mārgaṃ sarvālaṃkārabhūṣitāḥ |
nirbhayāḥ pratipadyante yadā rakṣati bhūmipaḥ || 32 ||
[Analyze grammar]

dharmameva prapadyante na hiṃsanti parasparam |
anugṛhṇanti cānyonyaṃ yadā rakṣati bhūmipaḥ || 33 ||
[Analyze grammar]

yajante ca trayo varṇā mahāyajñaiḥ pṛthagvidhaiḥ |
yuktāścādhīyate śāstraṃ yadā rakṣati bhūmipaḥ || 34 ||
[Analyze grammar]

vārtāmūlo hyayaṃ lokastrayyā vai dhāryate sadā |
tatsarvaṃ vartate samyagyadā rakṣati bhūmipaḥ || 35 ||
[Analyze grammar]

yadā rājā dhuraṃ śreṣṭhāmādāya vahati prajāḥ |
mahatā balayogena tadā lokaḥ prasīdati || 36 ||
[Analyze grammar]

yasyābhāve ca bhūtānāmabhāvaḥ syātsamantataḥ |
bhāve ca bhāvo nityaḥ syātkastaṃ na pratipūjayet || 37 ||
[Analyze grammar]

tasya yo vahate bhāraṃ sarvalokasukhāvaham |
tiṣṭhetpriyahite rājña ubhau lokau hi yo jayet || 38 ||
[Analyze grammar]

yastasya puruṣaḥ pāpaṃ manasāpyanucintayet |
asaṃśayamiha kliṣṭaḥ pretyāpi narakaṃ patet || 39 ||
[Analyze grammar]

na hi jātvavamantavyo manuṣya iti bhūmipaḥ |
mahatī devatā hyeṣā nararūpeṇa tiṣṭhati || 40 ||
[Analyze grammar]

kurute pañca rūpāṇi kālayuktāni yaḥ sadā |
bhavatyagnistathādityo mṛtyurvaiśravaṇo yamaḥ || 41 ||
[Analyze grammar]

yadā hyāsīdataḥ pāpāndahatyugreṇa tejasā |
mithyopacarito rājā tadā bhavati pāvakaḥ || 42 ||
[Analyze grammar]

yadā paśyati cāreṇa sarvabhūtāni bhūmipaḥ |
kṣemaṃ ca kṛtvā vrajati tadā bhavati bhāskaraḥ || 43 ||
[Analyze grammar]

aśucīṃśca yadā kruddhaḥ kṣiṇoti śataśo narān |
saputrapautrānsāmātyāṃstadā bhavati so'ntakaḥ || 44 ||
[Analyze grammar]

yadā tvadhārmikānsarvāṃstīkṣṇairdaṇḍairniyacchati |
dhārmikāṃścānugṛhṇāti bhavatyatha yamastadā || 45 ||
[Analyze grammar]

yadā tu dhanadhārābhistarpayatyupakāriṇaḥ |
ācchinatti ca ratnāni vividhānyapakāriṇām || 46 ||
[Analyze grammar]

śriyaṃ dadāti kasmaicitkasmāccidapakarṣati |
tadā vaiśravaṇo rājaṃlloke bhavati bhūmipaḥ || 47 ||
[Analyze grammar]

nāsyāpavāde sthātavyaṃ dakṣeṇākliṣṭakarmaṇā |
dharmyamākāṅkṣatā lābhamīśvarasyānasūyatā || 48 ||
[Analyze grammar]

na hi rājñaḥ pratīpāni kurvansukhamavāpnuyāt |
putro bhrātā vayasyo vā yadyapyātmasamo bhavet || 49 ||
[Analyze grammar]

kuryātkṛṣṇagatiḥ śeṣaṃ jvalito'nilasārathiḥ |
na tu rājñābhipannasya śeṣaṃ kvacana vidyate || 50 ||
[Analyze grammar]

tasya sarvāṇi rakṣyāṇi dūrataḥ parivarjayet |
mṛtyoriva jugupseta rājasvaharaṇānnaraḥ || 51 ||
[Analyze grammar]

naśyedabhimṛśansadyo mṛgaḥ kūṭamiva spṛśan |
ātmasvamiva saṃrakṣedrājasvamiha buddhimān || 52 ||
[Analyze grammar]

mahāntaṃ narakaṃ ghoramapratiṣṭhamacetasaḥ |
patanti cirarātrāya rājavittāpahāriṇaḥ || 53 ||
[Analyze grammar]

rājā bhojo virāṭsamrāṭkṣatriyo bhūpatirnṛpaḥ |
ya evaṃ stūyate śabdaiḥ kastaṃ nārcitumicchati || 54 ||
[Analyze grammar]

tasmādbubhūṣurniyato jitātmā saṃyatendriyaḥ |
medhāvī smṛtimāndakṣaḥ saṃśrayeta mahīpatim || 55 ||
[Analyze grammar]

kṛtajñaṃ prājñamakṣudraṃ dṛḍhabhaktiṃ jitendriyam |
dharmanityaṃ sthitaṃ sthityāṃ mantriṇaṃ pūjayennṛpaḥ || 56 ||
[Analyze grammar]

dṛḍhabhaktiṃ kṛtaprajñaṃ dharmajñaṃ saṃyatendriyam |
śūramakṣudrakarmāṇaṃ niṣiddhajanamāśrayet || 57 ||
[Analyze grammar]

rājā pragalbhaṃ puruṣaṃ karoti rājā kṛśaṃ bṛṃhayate manuṣyam |
rājābhipannasya kutaḥ sukhāni rājābhyupetaṃ sukhinaṃ karoti || 58 ||
[Analyze grammar]

rājā prajānāṃ hṛdayaṃ garīyo gatiḥ pratiṣṭhā sukhamuttamaṃ ca |
yamāśritā lokamimaṃ paraṃ ca jayanti samyakpuruṣā narendram || 59 ||
[Analyze grammar]

narādhipaścāpyanuśiṣya medinīṃ damena satyena ca sauhṛdena |
mahadbhiriṣṭvā kratubhirmahāyaśāstriviṣṭape sthānamupaiti satkṛtam || 60 ||
[Analyze grammar]

sa evamukto guruṇā kausalyo rājasattamaḥ |
prayatnātkṛtavānvīraḥ prajānāṃ paripālanam || 61 ||
[Analyze grammar]