Chapter 57

bhīṣma uvāca |
nityodyuktena vai rājñā bhavitavyaṃ yudhiṣṭhira |
praśāmyate ca rājā hi nārīvodyamavarjitaḥ || 1 ||
[Analyze grammar]

bhagavānuśanā cāha ślokamatra viśāṃ pate |
tamihaikamanā rājangadatastvaṃ nibodha me || 2 ||
[Analyze grammar]

dvāvetau grasate bhūmiḥ sarpo bilaśayāniva |
rājānaṃ cāviroddhāraṃ brāhmaṇaṃ cāpravāsinam || 3 ||
[Analyze grammar]

tadetannaraśārdūla hṛdi tvaṃ kartumarhasi |
saṃdheyānapi saṃdhatsva virodhyāṃśca virodhaya || 4 ||
[Analyze grammar]

saptāṅge yaśca te rājye vaiparītyaṃ samācaret |
gururvā yadi vā mitraṃ pratihantavya eva saḥ || 5 ||
[Analyze grammar]

maruttena hi rājñāyaṃ gītaḥ ślokaḥ purātanaḥ |
rājyādhikāre rājendra bṛhaspatimataḥ purā || 6 ||
[Analyze grammar]

gurorapyavaliptasya kāryākāryamajānataḥ |
utpathapratipannasya parityāgo vidhīyate || 7 ||
[Analyze grammar]

bāhoḥ putreṇa rājñā ca sagareṇeha dhīmatā |
asamañjāḥ suto jyeṣṭhastyaktaḥ paurahitaiṣiṇā || 8 ||
[Analyze grammar]

asamañjāḥ sarayvāṃ prākpaurāṇāṃ bālakānnṛpa |
nyamajjayadataḥ pitrā nirbhartsya sa vivāsitaḥ || 9 ||
[Analyze grammar]

ṛṣiṇoddālakenāpi śvetaketurmahātapāḥ |
mithyā viprānupacaransaṃtyakto dayitaḥ sutaḥ || 10 ||
[Analyze grammar]

lokarañjanamevātra rājñāṃ dharmaḥ sanātanaḥ |
satyasya rakṣaṇaṃ caiva vyavahārasya cārjavam || 11 ||
[Analyze grammar]

na hiṃsyātparavittāni deyaṃ kāle ca dāpayet |
vikrāntaḥ satyavākkṣānto nṛpo na calate pathaḥ || 12 ||
[Analyze grammar]

guptamantro jitakrodho śāstrārthagataniścayaḥ |
dharme cārthe ca kāme ca mokṣe ca satataṃ rataḥ || 13 ||
[Analyze grammar]

trayyā saṃvṛtarandhraśca rājā bhavitumarhati |
vṛjinasya narendrāṇāṃ nānyatsaṃvaraṇātparam || 14 ||
[Analyze grammar]

cāturvarṇyasya dharmāśca rakṣitavyā mahīkṣitā |
dharmasaṃkararakṣā hi rājñāṃ dharmaḥ sanātanaḥ || 15 ||
[Analyze grammar]

na viśvasecca nṛpatirna cātyarthaṃ na viśvaset |
ṣāḍguṇyaguṇadoṣāṃśca nityaṃ buddhyāvalokayet || 16 ||
[Analyze grammar]

dviṭchidradarśī nṛpatirnityameva praśasyate |
trivargaviditārthaśca yuktacāropadhiśca yaḥ || 17 ||
[Analyze grammar]

kośasyopārjanaratiryamavaiśravaṇopamaḥ |
vettā ca daśavargasya sthānavṛddhikṣayātmanaḥ || 18 ||
[Analyze grammar]

abhṛtānāṃ bhavedbhartā bhṛtānāṃ cānvavekṣakaḥ |
nṛpatiḥ sumukhaśca syātsmitapūrvābhibhāṣitā || 19 ||
[Analyze grammar]

upāsitā ca vṛddhānāṃ jitatandrīralolupaḥ |
satāṃ vṛtte sthitamatiḥ santo hyācāradarśinaḥ || 20 ||
[Analyze grammar]

na cādadīta vittāni satāṃ hastātkadācana |
asadbhyastu samādadyātsadbhyaḥ saṃpratipādayet || 21 ||
[Analyze grammar]

svayaṃ prahartādātā ca vaśyātmā vaśyasādhanaḥ |
kāle dātā ca bhoktā ca śuddhācārastathaiva ca || 22 ||
[Analyze grammar]

śūrānbhaktānasaṃhāryānkule jātānarogiṇaḥ |
śiṣṭāñśiṣṭābhisaṃbandhānmānino nāvamāninaḥ || 23 ||
[Analyze grammar]

vidyāvido lokavidaḥ paralokānvavekṣakān |
dharmeṣu niratānsādhūnacalānacalāniva || 24 ||
[Analyze grammar]

sahāyānsatataṃ kuryādrājā bhūtipuraskṛtaḥ |
taistulyaśca bhavedbhogaiśchatramātrājñayādhikaḥ || 25 ||
[Analyze grammar]

pratyakṣā ca parokṣā ca vṛttiścāsya bhavetsadā |
evaṃ kṛtvā narendro hi na khedamiha vindati || 26 ||
[Analyze grammar]

sarvātiśaṅkī nṛpatiryaśca sarvaharo bhavet |
sa kṣipramanṛjurlubdhaḥ svajanenaiva bādhyate || 27 ||
[Analyze grammar]

śucistu pṛthivīpālo lokacittagrahe rataḥ |
na patatyaribhirgrastaḥ patitaścāvatiṣṭhate || 28 ||
[Analyze grammar]

akrodhano'thāvyasanī mṛdudaṇḍo jitendriyaḥ |
rājā bhavati bhūtānāṃ viśvāsyo himavāniva || 29 ||
[Analyze grammar]

prājño nyāyaguṇopetaḥ pararandhreṣu tatparaḥ |
sudarśaḥ sarvavarṇānāṃ nayāpanayavittathā || 30 ||
[Analyze grammar]

kṣiprakārī jitakrodhaḥ suprasādo mahāmanāḥ |
arogaprakṛtiryuktaḥ kriyāvānavikatthanaḥ || 31 ||
[Analyze grammar]

ārabdhānyeva kāryāṇi na paryavasitāni ca |
yasya rājñaḥ pradṛśyante sa rājā rājasattamaḥ || 32 ||
[Analyze grammar]

putrā iva piturgehe viṣaye yasya mānavāḥ |
nirbhayā vicariṣyanti sa rājā rājasattamaḥ || 33 ||
[Analyze grammar]

agūḍhavibhavā yasya paurā rāṣṭranivāsinaḥ |
nayāpanayavettāraḥ sa rājā rājasattamaḥ || 34 ||
[Analyze grammar]

svakarmaniratā yasya janā viṣayavāsinaḥ |
asaṃghātaratā dāntāḥ pālyamānā yathāvidhi || 35 ||
[Analyze grammar]

vaśyā neyā vinītāśca na ca saṃgharṣaśīlinaḥ |
viṣaye dānarucayo narā yasya sa pārthivaḥ || 36 ||
[Analyze grammar]

na yasya kūṭakapaṭaṃ na māyā na ca matsaraḥ |
viṣaye bhūmipālasya tasya dharmaḥ sanātanaḥ || 37 ||
[Analyze grammar]

yaḥ satkaroti jñānāni neyaḥ paurahite rataḥ |
satāṃ dharmānugastyāgī sa rājā rājyamarhati || 38 ||
[Analyze grammar]

yasya cāraśca mantraśca nityaṃ caiva kṛtākṛte |
na jñāyate hi ripubhiḥ sa rājā rājyamarhati || 39 ||
[Analyze grammar]

ślokaścāyaṃ purā gīto bhārgaveṇa mahātmanā |
ākhyāte rāmacarite nṛpatiṃ prati bhārata || 40 ||
[Analyze grammar]

rājānaṃ prathamaṃ vindettato bhāryāṃ tato dhanam |
rājanyasati lokasya kuto bhāryā kuto dhanam || 41 ||
[Analyze grammar]

tadrājanrājasiṃhānāṃ nānyo dharmaḥ sanātanaḥ |
ṛte rakṣāṃ suvispaṣṭāṃ rakṣā lokasya dhāraṇam || 42 ||
[Analyze grammar]

prācetasena manunā ślokau cemāvudāhṛtau |
rājadharmeṣu rājendra tāvihaikamanāḥ śṛṇu || 43 ||
[Analyze grammar]

ṣaḍetānpuruṣo jahyādbhinnāṃ nāvamivārṇave |
apravaktāramācāryamanadhīyānamṛtvijam || 44 ||
[Analyze grammar]

arakṣitāraṃ rājānaṃ bhāryāṃ cāpriyavādinīm |
grāmakāmaṃ ca gopālaṃ vanakāmaṃ ca nāpitam || 45 ||
[Analyze grammar]