Chapter 37

vaiśaṃpāyana uvāca |
evamukto bhagavatā dharmarājo yudhiṣṭhiraḥ |
cintayitvā muhūrtaṃ tu pratyuvāca tapodhanam || 1 ||
[Analyze grammar]

kiṃ bhakṣyaṃ kimabhakṣyaṃ ca kiṃ ca deyaṃ praśasyate |
kiṃ ca pātramapātraṃ vā tanme brūhi pitāmaha || 2 ||
[Analyze grammar]

vyāsa uvāca |
atrāpyudāharantīmamitihāsaṃ purātanam |
siddhānāṃ caiva saṃvādaṃ manoścaiva prajāpateḥ || 3 ||
[Analyze grammar]

siddhāstapovrataparāḥ samāgamya purā vibhum |
dharmaṃ papracchurāsīnamādikāle prajāpatim || 4 ||
[Analyze grammar]

kathamannaṃ kathaṃ dānaṃ kathamadhyayanaṃ tapaḥ |
kāryākāryaṃ ca naḥ sarvaṃ śaṃsa vai tvaṃ prajāpate || 5 ||
[Analyze grammar]

tairevamukto bhagavānmanuḥ svāyaṃbhuvo'bravīt |
śuśrūṣadhvaṃ yathāvṛttaṃ dharmaṃ vyāsasamāsataḥ || 6 ||
[Analyze grammar]

adattasyānupādānaṃ dānamadhyayanaṃ tapaḥ |
ahiṃsā satyamakrodhaḥ kṣamejyā dharmalakṣaṇam || 7 ||
[Analyze grammar]

ya eva dharmaḥ so'dharmo'deśe'kāle pratiṣṭhitaḥ |
ādānamanṛtaṃ hiṃsā dharmo vyāvasthikaḥ smṛtaḥ || 8 ||
[Analyze grammar]

dvividhau cāpyubhāvetau dharmādharmau vijānatām |
apravṛttiḥ pravṛttiśca dvaividhyaṃ lokavedayoḥ || 9 ||
[Analyze grammar]

apravṛtteramartyatvaṃ martyatvaṃ karmaṇaḥ phalam |
aśubhasyāśubhaṃ vidyācchubhasya śubhameva ca || 10 ||
[Analyze grammar]

etayoścobhayoḥ syātāṃ śubhāśubhatayā tathā |
daivaṃ ca daivayuktaṃ ca prāṇaśca pralayaśca ha || 11 ||
[Analyze grammar]

aprekṣāpūrvakaraṇādaśubhānāṃ śubhaṃ phalam |
ūrdhvaṃ bhavati saṃdehādiha dṛṣṭārthameva vā |
aprekṣāpūrvakaraṇātprāyaścittaṃ vidhīyate || 12 ||
[Analyze grammar]

krodhamohakṛte caiva dṛṣṭāntāgamahetubhiḥ |
śarīrāṇāmupakleśo manasaśca priyāpriye |
tadauṣadhaiśca mantraiśca prāyaścittaiśca śāmyati || 13 ||
[Analyze grammar]

jātiśreṇyadhivāsānāṃ kuladharmāṃśca sarvataḥ |
varjayenna hi taṃ dharmaṃ yeṣāṃ dharmo na vidyate || 14 ||
[Analyze grammar]

daśa vā vedaśāstrajñāstrayo vā dharmapāṭhakāḥ |
yadbrūyuḥ kārya utpanne sa dharmo dharmasaṃśaye || 15 ||
[Analyze grammar]

aruṇā mṛttikā caiva tathā caiva pipīlakāḥ |
śleṣmātakastathā viprairabhakṣyaṃ viṣameva ca || 16 ||
[Analyze grammar]

abhakṣyā brāhmaṇairmatsyāḥ śakalairye vivarjitāḥ |
catuṣpātkacchapādanyo maṇḍūkā jalajāśca ye || 17 ||
[Analyze grammar]

bhāsā haṃsāḥ suparṇāśca cakravākā bakāḥ plavāḥ |
kaṅko madguśca gṛdhrāśca kākolūkaṃ tathaiva ca || 18 ||
[Analyze grammar]

kravyādāḥ pakṣiṇaḥ sarve catuṣpādāśca daṃṣṭriṇaḥ |
yeṣāṃ cobhayato dantāścaturdaṃṣṭrāśca sarvaśaḥ || 19 ||
[Analyze grammar]

eḍakāśvakharoṣṭrīṇāṃ sūtikānāṃ gavāmapi |
mānuṣīṇāṃ mṛgīṇāṃ ca na pibedbrāhmaṇaḥ payaḥ || 20 ||
[Analyze grammar]

pretānnaṃ sūtikānnaṃ ca yacca kiṃcidanirdaśam |
abhojyaṃ cāpyapeyaṃ ca dhenvā dugdhamanirdaśam || 21 ||
[Analyze grammar]

takṣṇaścarmāvakartuśca puṃścalyā rajakasya ca |
cikitsakasya yaccānnamabhojyaṃ rakṣiṇastathā || 22 ||
[Analyze grammar]

gaṇagrāmābhiśastānāṃ raṅgastrījīvinaśca ye |
parivittinapuṃṣāṃ ca bandidyūtavidāṃ tathā || 23 ||
[Analyze grammar]

vāryamāṇāhṛtaṃ cānnaṃ śuktaṃ paryuṣitaṃ ca yat |
surānugatamucchiṣṭamabhojyaṃ śeṣitaṃ ca yat || 24 ||
[Analyze grammar]

piṣṭamāṃsekṣuśākānāṃ vikārāḥ payasastathā |
saktudhānākarambhāśca nopabhojyāścirasthitāḥ || 25 ||
[Analyze grammar]

pāyasaṃ kṛsaraṃ māṃsamapūpāśca vṛthā kṛtāḥ |
abhojyāścāpyabhakṣyāśca brāhmaṇairgṛhamedhibhiḥ || 26 ||
[Analyze grammar]

devānpitṝnmanuṣyāṃśca munīngṛhyāśca devatāḥ |
pūjayitvā tataḥ paścādgṛhastho bhoktumarhati || 27 ||
[Analyze grammar]

yathā pravrajito bhikṣurgṛhasthaḥ svagṛhe vaset |
evaṃvṛttaḥ priyairdāraiḥ saṃvasandharmamāpnuyāt || 28 ||
[Analyze grammar]

na dadyādyaśase dānaṃ na bhayānnopakāriṇe |
na nṛttagītaśīleṣu hāsakeṣu ca dhārmikaḥ || 29 ||
[Analyze grammar]

na matte naiva conmatte na stene na cikitsake |
na vāgghīne vivarṇe vā nāṅgahīne na vāmane || 30 ||
[Analyze grammar]

na durjane dauṣkule vā vratairvā yo na saṃskṛtaḥ |
aśrotriye mṛtaṃ dānaṃ brāhmaṇe'brahmavādini || 31 ||
[Analyze grammar]

asamyakcaiva yaddattamasamyakca pratigrahaḥ |
ubhayoḥ syādanarthāya dāturādātureva ca || 32 ||
[Analyze grammar]

yathā khadiramālambya śilāṃ vāpyarṇavaṃ taran |
majjate majjate tadvaddātā yaśca pratīcchakaḥ || 33 ||
[Analyze grammar]

kāṣṭhairārdrairyathā vahnirupastīrṇo na dīpyate |
tapaḥsvādhyāyacāritrairevaṃ hīnaḥ pratigrahī || 34 ||
[Analyze grammar]

kapāle yadvadāpaḥ syuḥ śvadṛtau vā yathā payaḥ |
āśrayasthānadoṣeṇa vṛttahīne tathā śrutam || 35 ||
[Analyze grammar]

nirmantro nirvrato yaḥ syādaśāstrajño'nasūyakaḥ |
anukrośātpradātavyaṃ dīneṣvevaṃ nareṣvapi || 36 ||
[Analyze grammar]

na vai deyamanukrośāddīnāyāpyapakāriṇe |
āptācaritamityeva dharma ityeva vā punaḥ || 37 ||
[Analyze grammar]

niṣkāraṇaṃ sma taddattaṃ brāhmaṇe dharmavarjite |
bhavedapātradoṣeṇa na me'trāsti vicāraṇā || 38 ||
[Analyze grammar]

yathā dārumayo hastī yathā carmamayo mṛgaḥ |
brāhmaṇaścānadhīyānastrayaste nāmadhārakāḥ || 39 ||
[Analyze grammar]

yathā ṣaṇḍho'phalaḥ strīṣu yathā gaurgavi cāphalā |
śakunirvāpyapakṣaḥ syānnirmantro brāhmaṇastathā || 40 ||
[Analyze grammar]

grāmadhānyaṃ yathā śūnyaṃ yathā kūpaśca nirjalaḥ |
yathā hutamanagnau ca tathaiva syānnirākṛtau || 41 ||
[Analyze grammar]

devatānāṃ pitṝṇāṃ ca havyakavyavināśanaḥ |
śatrurarthaharo mūrkho na lokānprāptumarhati || 42 ||
[Analyze grammar]

etatte kathitaṃ sarvaṃ yathā vṛttaṃ yudhiṣṭhira |
samāsena mahaddhyetacchrotavyaṃ bharatarṣabha || 43 ||
[Analyze grammar]