Chapter 28

vaiśaṃpāyana uvāca |
jñātiśokābhitaptasya prāṇānabhyutsisṛkṣataḥ |
jyeṣṭhasya pāṇḍuputrasya vyāsaḥ śokamapānudat || 1 ||
[Analyze grammar]

vyāsa uvāca |
atrāpyudāharantīmamitihāsaṃ purātanam |
aśmagītaṃ naravyāghra tannibodha yudhiṣṭhira || 2 ||
[Analyze grammar]

aśmānaṃ brāhmaṇaṃ prājñaṃ vaideho janako nṛpaḥ |
saṃśayaṃ paripapraccha duḥkhaśokapariplutaḥ || 3 ||
[Analyze grammar]

janaka uvāca |
āgame yadi vāpāye jñātīnāṃ draviṇasya ca |
nareṇa pratipattavyaṃ kalyāṇaṃ kathamicchatā || 4 ||
[Analyze grammar]

aśmovāca |
utpannamimamātmānaṃ narasyānantaraṃ tataḥ |
tāni tānyabhivartante duḥkhāni ca sukhāni ca || 5 ||
[Analyze grammar]

teṣāmanyatarāpattau yadyadevopasevate |
tattaddhi cetanāmasya haratyabhramivānilaḥ || 6 ||
[Analyze grammar]

abhijāto'smi siddho'smi nāsmi kevalamānuṣaḥ |
ityevaṃ hetubhistasya tribhiścittaṃ prasicyati || 7 ||
[Analyze grammar]

sa prasiktamanā bhogānvisṛjya pitṛsaṃcitān |
parikṣīṇaḥ parasvānāmādānaṃ sādhu manyate || 8 ||
[Analyze grammar]

tamatikrāntamaryādamādadānamasāṃpratam |
pratiṣedhanti rājāno lubdhā mṛgamiveṣubhiḥ || 9 ||
[Analyze grammar]

ye ca viṃśativarṣā vā triṃśadvarṣāśca mānavāḥ |
pareṇa te varṣaśatānna bhaviṣyanti pārthiva || 10 ||
[Analyze grammar]

teṣāṃ paramaduḥkhānāṃ buddhyā bheṣajamādiśet |
sarvaprāṇabhṛtāṃ vṛttaṃ prekṣamāṇastatastataḥ || 11 ||
[Analyze grammar]

mānasānāṃ punaryonirduḥkhānāṃ cittavibhramaḥ |
aniṣṭopanipāto vā tṛtīyaṃ nopapadyate || 12 ||
[Analyze grammar]

evametāni duḥkhāni tāni tānīha mānavam |
vividhānyupavartante tathā sāṃsparśakāni ca || 13 ||
[Analyze grammar]

jarāmṛtyū ha bhūtāni khāditārau vṛkāviva |
balināṃ durbalānāṃ ca hrasvānāṃ mahatāmapi || 14 ||
[Analyze grammar]

na kaścijjātvatikrāmejjarāmṛtyū ha mānavaḥ |
api sāgaraparyantāṃ vijityemāṃ vasuṃdharām || 15 ||
[Analyze grammar]

sukhaṃ vā yadi vā duḥkhaṃ bhūtānāṃ paryupasthitam |
prāptavyamavaśaiḥ sarvaṃ parihāro na vidyate || 16 ||
[Analyze grammar]

pūrve vayasi madhye vāpyuttame vā narādhipa |
avarjanīyāste'rthā vai kāṅkṣitāśca tato'nyathā || 17 ||
[Analyze grammar]

supriyairviprayogaśca saṃprayogastathāpriyaiḥ |
arthānarthau sukhaṃ duḥkhaṃ vidhānamanuvartate || 18 ||
[Analyze grammar]

prādurbhāvaśca bhūtānāṃ dehanyāsastathaiva ca |
prāptivyāyāmayogaśca sarvametatpratiṣṭhitam || 19 ||
[Analyze grammar]

gandhavarṇarasasparśā nivartante svabhāvataḥ |
tathaiva sukhaduḥkhāni vidhānamanuvartate || 20 ||
[Analyze grammar]

āsanaṃ śayanaṃ yānamutthānaṃ pānabhojanam |
niyataṃ sarvabhūtānāṃ kālenaiva bhavantyuta || 21 ||
[Analyze grammar]

vaidyāścāpyāturāḥ santi balavantaḥ sudurbalāḥ |
strīmantaśca tathā ṣaṇḍhā vicitraḥ kālaparyayaḥ || 22 ||
[Analyze grammar]

kule janma tathā vīryamārogyaṃ dhairyameva ca |
saubhāgyamupabhogaśca bhavitavyena labhyate || 23 ||
[Analyze grammar]

santi putrāḥ subahavo daridrāṇāmanicchatām |
bahūnāmicchatāṃ nāsti samṛddhānāṃ viceṣṭatām || 24 ||
[Analyze grammar]

vyādhiragnirjalaṃ śastraṃ bubhukṣā śvāpadaṃ viṣam |
rajjvā ca maraṇaṃ jantoruccācca patanaṃ tathā || 25 ||
[Analyze grammar]

niryāṇaṃ yasya yaddiṣṭaṃ tena gacchati hetunā |
dṛśyate nābhyatikrāmannatikrānto na vā punaḥ || 26 ||
[Analyze grammar]

dṛśyate hi yuvaiveha vinaśyanvasumānnaraḥ |
daridraśca parikliṣṭaḥ śatavarṣo janādhipa || 27 ||
[Analyze grammar]

akiṃcanāśca dṛśyante puruṣāścirajīvinaḥ |
samṛddhe ca kule jātā vinaśyanti pataṃgavat || 28 ||
[Analyze grammar]

prāyeṇa śrīmatāṃ loke bhoktuṃ śaktirna vidyate |
kāṣṭhānyapi hi jīryante daridrāṇāṃ narādhipa || 29 ||
[Analyze grammar]

ahametatkaromīti manyate kālacoditaḥ |
yadyadiṣṭamasaṃtoṣāddurātmā pāpamācaran || 30 ||
[Analyze grammar]

striyo'kṣā mṛgayā pānaṃ prasaṅgānninditā budhaiḥ |
dṛśyante cāpi bahavaḥ saṃprasaktā bahuśrutāḥ || 31 ||
[Analyze grammar]

iti kālena sarvārthānīpsitānīpsitāni ca |
spṛśanti sarvabhūtāni nimittaṃ nopalabhyate || 32 ||
[Analyze grammar]

vāyumākāśamagniṃ ca candrādityāvahaḥkṣape |
jyotīṃṣi saritaḥ śailānkaḥ karoti bibharti vā || 33 ||
[Analyze grammar]

śītamuṣṇaṃ tathā varṣaṃ kālena parivartate |
evameva manuṣyāṇāṃ sukhaduḥkhe nararṣabha || 34 ||
[Analyze grammar]

nauṣadhāni na śāstrāṇi na homā na punarjapāḥ |
trāyante mṛtyunopetaṃ jarayā vāpi mānavam || 35 ||
[Analyze grammar]

yathā kāṣṭhaṃ ca kāṣṭhaṃ ca sameyātāṃ mahodadhau |
sametya ca vyatīyātāṃ tadvadbhūtasamāgamaḥ || 36 ||
[Analyze grammar]

ye cāpi puruṣaiḥ strībhirgītavādyairupasthitāḥ |
ye cānāthāḥ parānnādāḥ kālasteṣu samakriyaḥ || 37 ||
[Analyze grammar]

mātṛpitṛsahasrāṇi putradāraśatāni ca |
saṃsāreṣvanubhūtāni kasya te kasya vā vayam || 38 ||
[Analyze grammar]

naivāsya kaścidbhavitā nāyaṃ bhavati kasyacit |
pathi saṃgatamevedaṃ dārabandhusuhṛdgaṇaiḥ || 39 ||
[Analyze grammar]

kvāsaṃ kvāsmi gamiṣyāmi ko nvahaṃ kimihāsthitaḥ |
kasmātkamanuśoceyamityevaṃ sthāpayenmanaḥ |
anitye priyasaṃvāse saṃsāre cakravadgatau || 40 ||
[Analyze grammar]

na dṛṣṭapūrvaṃ pratyakṣaṃ paralokaṃ vidurbudhāḥ |
āgamāṃstvanatikramya śraddhātavyaṃ bubhūṣatā || 41 ||
[Analyze grammar]

kurvīta pitṛdaivatyaṃ dharmāṇi ca samācaret |
yajecca vidvānvidhivattrivargaṃ cāpyanuvrajet || 42 ||
[Analyze grammar]

saṃnimajjajjagadidaṃ gambhīre kālasāgare |
jarāmṛtyumahāgrāhe na kaścidavabudhyate || 43 ||
[Analyze grammar]

āyurvedamadhīyānāḥ kevalaṃ saparigraham |
dṛśyante bahavo vaidyā vyādhibhiḥ samabhiplutāḥ || 44 ||
[Analyze grammar]

te pibantaḥ kaṣāyāṃśca sarpīṃṣi vividhāni ca |
na mṛtyumativartante velāmiva mahodadhiḥ || 45 ||
[Analyze grammar]

rasāyanavidaścaiva suprayuktarasāyanāḥ |
dṛśyante jarayā bhagnā nagā nāgairivottamaiḥ || 46 ||
[Analyze grammar]

tathaiva tapasopetāḥ svādhyāyābhyasane ratāḥ |
dātāro yajñaśīlāśca na taranti jarāntakau || 47 ||
[Analyze grammar]

na hyahāni nivartante na māsā na punaḥ samāḥ |
jātānāṃ sarvabhūtānāṃ na pakṣā na punaḥ kṣapāḥ || 48 ||
[Analyze grammar]

so'yaṃ vipulamadhvānaṃ kālena dhruvamadhruvaḥ |
naro'vaśaḥ samabhyeti sarvabhūtaniṣevitam || 49 ||
[Analyze grammar]

deho vā jīvato'bhyeti jīvo vābhyeti dehataḥ |
pathi saṃgatamevedaṃ dārairanyaiśca bandhubhiḥ || 50 ||
[Analyze grammar]

nāyamatyantasaṃvāso labhyate jātu kenacit |
api svena śarīreṇa kimutānyena kenacit || 51 ||
[Analyze grammar]

kva nu te'dya pitā rājankva nu te'dya pitāmahaḥ |
na tvaṃ paśyasi tānadya na tvāṃ paśyanti te'pi ca || 52 ||
[Analyze grammar]

na hyeva puruṣo draṣṭā svargasya narakasya vā |
āgamastu satāṃ cakṣurnṛpate tamihācara || 53 ||
[Analyze grammar]

caritabrahmacaryo hi prajāyeta yajeta ca |
pitṛdevamaharṣīṇāmānṛṇyāyānasūyakaḥ || 54 ||
[Analyze grammar]

sa yajñaśīlaḥ prajane niviṣṭaḥ prāgbrahmacārī pravibhaktapakṣaḥ |
ārādhayansvargamimaṃ ca lokaṃ paraṃ ca muktvā hṛdayavyalīkam || 55 ||
[Analyze grammar]

samyagghi dharmaṃ carato nṛpasya dravyāṇi cāpyāharato yathāvat |
pravṛttacakrasya yaśo'bhivardhate sarveṣu lokeṣu carācareṣu || 56 ||
[Analyze grammar]

vyāsa uvāca |
ityevamājñāya videharājo vākyaṃ samagraṃ paripūrṇahetuḥ |
aśmānamāmantrya viśuddhabuddhiryayau gṛhaṃ svaṃ prati śāntaśokaḥ || 57 ||
[Analyze grammar]

tathā tvamapyacyuta muñca śokamuttiṣṭha śakropama harṣamehi |
kṣātreṇa dharmeṇa mahī jitā te tāṃ bhuṅkṣva kuntīsuta mā viṣādīḥ || 58 ||
[Analyze grammar]