Chapter 3

nārada uvāca |
karṇasya bāhuvīryeṇa praśrayeṇa damena ca |
tutoṣa bhṛguśārdūlo guruśuśrūṣayā tathā || 1 ||
[Analyze grammar]

tasmai sa vidhivatkṛtsnaṃ brahmāstraṃ sanivartanam |
provācākhilamavyagraṃ tapasvī sutapasvine || 2 ||
[Analyze grammar]

viditāstrastataḥ karṇo ramamāṇo''śrame bhṛgoḥ |
cakāra vai dhanurvede yatnamadbhutavikramaḥ || 3 ||
[Analyze grammar]

tataḥ kadācidrāmastu carannāśramamantikāt |
karṇena sahito dhīmānupavāsena karśitaḥ || 4 ||
[Analyze grammar]

suṣvāpa jāmadagnyo vai visrambhotpannasauhṛdaḥ |
karṇasyotsaṅga ādhāya śiraḥ klāntamanā guruḥ || 5 ||
[Analyze grammar]

atha kṛmiḥ śleṣmamayo māṃsaśoṇitabhojanaḥ |
dāruṇo dāruṇasparśaḥ karṇasyābhyāśamāgamat || 6 ||
[Analyze grammar]

sa tasyorumathāsādya bibheda rudhirāśanaḥ |
na cainamaśakatkṣeptuṃ hantuṃ vāpi gurorbhayāt || 7 ||
[Analyze grammar]

saṃdaśyamāno'pi tathā kṛmiṇā tena bhārata |
guruprabodhaśaṅkī ca tamupaikṣata sūtajaḥ || 8 ||
[Analyze grammar]

karṇastu vedanāṃ dhairyādasahyāṃ vinigṛhya tām |
akampannavyathaṃścaiva dhārayāmāsa bhārgavam || 9 ||
[Analyze grammar]

yadā tu rudhireṇāṅge parispṛṣṭo bhṛgūdvahaḥ |
tadābudhyata tejasvī saṃtaptaścedamabravīt || 10 ||
[Analyze grammar]

aho'smyaśucitāṃ prāptaḥ kimidaṃ kriyate tvayā |
kathayasva bhayaṃ tyaktvā yāthātathyamidaṃ mama || 11 ||
[Analyze grammar]

tasya karṇastadācaṣṭa kṛmiṇā paribhakṣaṇam |
dadarśa rāmastaṃ cāpi kṛmiṃ sūkarasaṃnibham || 12 ||
[Analyze grammar]

aṣṭapādaṃ tīkṣṇadaṃṣṭraṃ sūcībhiriva saṃvṛtam |
romabhiḥ saṃniruddhāṅgamalarkaṃ nāma nāmataḥ || 13 ||
[Analyze grammar]

sa dṛṣṭamātro rāmeṇa kṛmiḥ prāṇānavāsṛjat |
tasminnevāsṛksaṃklinne tadadbhutamivābhavat || 14 ||
[Analyze grammar]

tato'ntarikṣe dadṛśe viśvarūpaḥ karālavān |
rākṣaso lohitagrīvaḥ kṛṣṇāṅgo meghavāhanaḥ || 15 ||
[Analyze grammar]

sa rāmaṃ prāñjalirbhūtvā babhāṣe pūrṇamānasaḥ |
svasti te bhṛguśārdūla gamiṣyāmi yathāgatam || 16 ||
[Analyze grammar]

mokṣito narakādasmi bhavatā munisattama |
bhadraṃ ca te'stu nandiśca priyaṃ me bhavatā kṛtam || 17 ||
[Analyze grammar]

tamuvāca mahābāhurjāmadagnyaḥ pratāpavān |
kastvaṃ kasmācca narakaṃ pratipanno bravīhi tat || 18 ||
[Analyze grammar]

so'bravīdahamāsaṃ prāggṛtso nāma mahāsuraḥ |
purā devayuge tāta bhṛgostulyavayā iva || 19 ||
[Analyze grammar]

so'haṃ bhṛgoḥ sudayitāṃ bhāryāmapaharaṃ balāt |
maharṣerabhiśāpena kṛmibhūto'pataṃ bhuvi || 20 ||
[Analyze grammar]

abravīttu sa māṃ krodhāttava pūrvapitāmahaḥ |
mūtraśleṣmāśanaḥ pāpa nirayaṃ pratipatsyase || 21 ||
[Analyze grammar]

śāpasyānto bhavedbrahmannityevaṃ tamathābruvam |
bhavitā bhārgave rāma iti māmabravīdbhṛguḥ || 22 ||
[Analyze grammar]

so'hametāṃ gatiṃ prāpto yathā nakuśalaṃ tathā |
tvayā sādho samāgamya vimuktaḥ pāpayonitaḥ || 23 ||
[Analyze grammar]

evamuktvā namaskṛtya yayau rāmaṃ mahāsuraḥ |
rāmaḥ karṇaṃ tu sakrodhamidaṃ vacanamabravīt || 24 ||
[Analyze grammar]

atiduḥkhamidaṃ mūḍha na jātu brāhmaṇaḥ sahet |
kṣatriyasyaiva te dhairyaṃ kāmayā satyamucyatām || 25 ||
[Analyze grammar]

tamuvāca tataḥ karṇaḥ śāpabhītaḥ prasādayan |
brahmakṣatrāntare sūtaṃ jātaṃ māṃ viddhi bhārgava || 26 ||
[Analyze grammar]

rādheyaḥ karṇa iti māṃ pravadanti janā bhuvi |
prasādaṃ kuru me brahmannastralubdhasya bhārgava || 27 ||
[Analyze grammar]

pitā gururna saṃdeho vedavidyāpradaḥ prabhuḥ |
ato bhārgava ityuktaṃ mayā gotraṃ tavāntike || 28 ||
[Analyze grammar]

tamuvāca bhṛguśreṣṭhaḥ saroṣaḥ prahasanniva |
bhūmau nipatitaṃ dīnaṃ vepamānaṃ kṛtāñjalim || 29 ||
[Analyze grammar]

yasmānmithyopacarito astralobhādiha tvayā |
tasmādetaddhi te mūḍha brahmāstraṃ pratibhāsyati || 30 ||
[Analyze grammar]

anyatra vadhakālātte sadṛśena sameyuṣaḥ |
abrāhmaṇe na hi brahma dhruvaṃ tiṣṭhetkadācana || 31 ||
[Analyze grammar]

gacchedānīṃ na te sthānamanṛtasyeha vidyate |
na tvayā sadṛśo yuddhe bhavitā kṣatriyo bhuvi || 32 ||
[Analyze grammar]

evamuktastu rāmeṇa nyāyenopajagāma saḥ |
duryodhanamupāgamya kṛtāstro'smīti cābravīt || 33 ||
[Analyze grammar]