Chapter 26

vāsudeva uvāca |
uttiṣṭhottiṣṭha gāndhāri mā ca śoke manaḥ kṛthāḥ |
tavaiva hyaparādhena kuravo nidhanaṃ gatāḥ || 1 ||
[Analyze grammar]

yā tvaṃ putraṃ durātmānamīrṣumatyantamāninam |
duryodhanaṃ puraskṛtya duṣkṛtaṃ sādhu manyase || 2 ||
[Analyze grammar]

niṣṭhuraṃ vairaparuṣaṃ vṛddhānāṃ śāsanātigam |
kathamātmakṛtaṃ doṣaṃ mayyādhātumihecchasi || 3 ||
[Analyze grammar]

mṛtaṃ vā yadi vā naṣṭaṃ yo'tītamanuśocati |
duḥkhena labhate duḥkhaṃ dvāvanarthau prapadyate || 4 ||
[Analyze grammar]

taporthīyaṃ brāhmaṇī dhatta garbhaṃ gaurvoḍhāraṃ dhāvitāraṃ turaṃgī |
śūdrā dāsaṃ paśupālaṃ tu vaiśyā vadhārthīyaṃ tvadvidhā rājaputrī || 5 ||
[Analyze grammar]

vaiśaṃpāyana uvāca |
tacchrutvā vāsudevasya punaruktaṃ vaco'priyam |
tūṣṇīṃ babhūva gāndhārī śokavyākulalocanā || 6 ||
[Analyze grammar]

dhṛtarāṣṭrastu rājarṣirnigṛhyābuddhijaṃ tamaḥ |
paryapṛcchata dharmātmā dharmarājaṃ yudhiṣṭhiram || 7 ||
[Analyze grammar]

jīvatāṃ parimāṇajñaḥ sainyānāmasi pāṇḍava |
hatānāṃ yadi jānīṣe parimāṇaṃ vadasva me || 8 ||
[Analyze grammar]

yudhiṣṭhira uvāca |
daśāyutānāmayutaṃ sahasrāṇi ca viṃśatiḥ |
koṭyaḥ ṣaṣṭiśca ṣaṭcaiva ye'sminrājamṛdhe hatāḥ || 9 ||
[Analyze grammar]

alakṣyāṇāṃ tu vīrāṇāṃ sahasrāṇi caturdaśa |
daśa cānyāni rājendra śataṃ ṣaṣṭiśca pañca ca || 10 ||
[Analyze grammar]

dhṛtarāṣṭra uvāca |
yudhiṣṭhira gatiṃ kāṃ te gatāḥ puruṣasattamāḥ |
ācakṣva me mahābāho sarvajño hyasi me mataḥ || 11 ||
[Analyze grammar]

yudhiṣṭhira uvāca |
yairhutāni śarīrāṇi hṛṣṭaiḥ paramasaṃyuge |
devarājasamāṃllokāngatāste satyavikramāḥ || 12 ||
[Analyze grammar]

ye tvahṛṣṭena manasā martavyamiti bhārata |
yudhyamānā hatāḥ saṃkhye te gandharvaiḥ samāgatāḥ || 13 ||
[Analyze grammar]

ye tu saṃgrāmabhūmiṣṭhā yācamānāḥ parāṅmukhāḥ |
śastreṇa nidhanaṃ prāptā gatāste guhyakānprati || 14 ||
[Analyze grammar]

pīḍyamānāḥ parairye tu hīyamānā nirāyudhāḥ |
hrīniṣedhā mahātmānaḥ parānabhimukhā raṇe || 15 ||
[Analyze grammar]

chidyamānāḥ śitaiḥ śastraiḥ kṣatradharmaparāyaṇāḥ |
gatāste brahmasadanaṃ hatā vīrāḥ suvarcasaḥ || 16 ||
[Analyze grammar]

ye tatra nihatā rājannantarāyodhanaṃ prati |
yathā kathaṃcitte rājansaṃprāptā uttarānkurūn || 17 ||
[Analyze grammar]

dhṛtarāṣṭra uvāca |
kena jñānabalenaivaṃ putra paśyasi siddhavat |
tanme vada mahābāho śrotavyaṃ yadi vai mayā || 18 ||
[Analyze grammar]

yudhiṣṭhira uvāca |
nideśādbhavataḥ pūrvaṃ vane vicaratā mayā |
tīrthayātrāprasaṅgena saṃprāpto'yamanugrahaḥ || 19 ||
[Analyze grammar]

devarṣirlomaśo dṛṣṭastataḥ prāpto'smyanusmṛtim |
divyaṃ cakṣurapi prāptaṃ jñānayogena vai purā || 20 ||
[Analyze grammar]

dhṛtarāṣṭra uvāca |
ye'trānāthā janasyāsya sanāthā ye ca bhārata |
kaccitteṣāṃ śarīrāṇi dhakṣyanti vidhipūrvakam || 21 ||
[Analyze grammar]

na yeṣāṃ santi kartāro na ca ye'trāhitāgnayaḥ |
vayaṃ ca kasya kuryāmo bahutvāttāta karmaṇaḥ || 22 ||
[Analyze grammar]

yānsuparṇāśca gṛdhrāśca vikarṣanti tatastataḥ |
teṣāṃ tu karmaṇā lokā bhaviṣyanti yudhiṣṭhira || 23 ||
[Analyze grammar]

vaiśaṃpāyana uvāca |
evamukto mahāprājñaḥ kuntīputro yudhiṣṭhiraḥ |
ādideśa sudharmāṇaṃ dhaumyaṃ sūtaṃ ca saṃjayam || 24 ||
[Analyze grammar]

viduraṃ ca mahābuddhiṃ yuyutsuṃ caiva kauravam |
indrasenamukhāṃścaiva bhṛtyānsūtāṃśca sarvaśaḥ || 25 ||
[Analyze grammar]

bhavantaḥ kārayantveṣāṃ pretakāryāṇi sarvaśaḥ |
yathā cānāthavatkiṃciccharīraṃ na vinaśyati || 26 ||
[Analyze grammar]

śāsanāddharmarājasya kṣattā sūtaśca saṃjayaḥ |
sudharmā dhaumyasahita indrasenādayastathā || 27 ||
[Analyze grammar]

candanāgurukāṣṭhāni tathā kālīyakānyuta |
ghṛtaṃ tailaṃ ca gandhāṃśca kṣaumāṇi vasanāni ca || 28 ||
[Analyze grammar]

samāhṛtya mahārhāṇi dārūṇāṃ caiva saṃcayān |
rathāṃśca mṛditāṃstatra nānāpraharaṇāni ca || 29 ||
[Analyze grammar]

citāḥ kṛtvā prayatnena yathāmukhyānnarādhipān |
dāhayāmāsuravyagrā vidhidṛṣṭena karmaṇā || 30 ||
[Analyze grammar]

duryodhanaṃ ca rājānaṃ bhrātṝṃścāsya śatādhikān |
śalyaṃ śalaṃ ca rājānaṃ bhūriśravasameva ca || 31 ||
[Analyze grammar]

jayadrathaṃ ca rājānamabhimanyuṃ ca bhārata |
dauḥśāsaniṃ lakṣmaṇaṃ ca dhṛṣṭaketuṃ ca pārthivam || 32 ||
[Analyze grammar]

bṛhantaṃ somadattaṃ ca sṛñjayāṃśca śatādhikān |
rājānaṃ kṣemadhanvānaṃ virāṭadrupadau tathā || 33 ||
[Analyze grammar]

śikhaṇḍinaṃ ca pāñcālyaṃ dhṛṣṭadyumnaṃ ca pārṣatam |
yudhāmanyuṃ ca vikrāntamuttamaujasameva ca || 34 ||
[Analyze grammar]

kausalyaṃ draupadeyāṃśca śakuniṃ cāpi saubalam |
acalaṃ vṛṣakaṃ caiva bhagadattaṃ ca pārthivam || 35 ||
[Analyze grammar]

karṇaṃ vaikartanaṃ caiva sahaputramamarṣaṇam |
kekayāṃśca maheṣvāsāṃstrigartāṃśca mahārathān || 36 ||
[Analyze grammar]

ghaṭotkacaṃ rākṣasendraṃ bakabhrātarameva ca |
alambusaṃ ca rājānaṃ jalasaṃdhaṃ ca pārthivam || 37 ||
[Analyze grammar]

anyāṃśca pārthivānrājañśataśo'tha sahasraśaḥ |
ghṛtadhārāhutairdīptaiḥ pāvakaiḥ samadāhayan || 38 ||
[Analyze grammar]

pitṛmedhāśca keṣāṃcidavartanta mahātmanām |
sāmabhiścāpyagāyanta te'nvaśocyanta cāparaiḥ || 39 ||
[Analyze grammar]

sāmnāmṛcāṃ ca nādena strīṇāṃ ca ruditasvanaiḥ |
kaśmalaṃ sarvabhūtānāṃ niśāyāṃ samapadyata || 40 ||
[Analyze grammar]

te vidhūmāḥ pradīptāśca dīpyamānāśca pāvakāḥ |
nabhasīvānvadṛśyanta grahāstanvabhrasaṃvṛtāḥ || 41 ||
[Analyze grammar]

ye cāpyanāthāstatrāsannānādeśasamāgatāḥ |
tāṃśca sarvānsamānāyya rāśīnkṛtvā sahasraśaḥ || 42 ||
[Analyze grammar]

citvā dārubhiravyagraḥ prabhūtaiḥ snehatāpitaiḥ |
dāhayāmāsa viduro dharmarājasya śāsanāt || 43 ||
[Analyze grammar]

kārayitvā kriyāsteṣāṃ kururājo yudhiṣṭhiraḥ |
dhṛtarāṣṭraṃ puraskṛtya gaṅgāmabhimukho'gamat || 44 ||
[Analyze grammar]