Chapter 25

gāndhāryuvāca |
kāmbojaṃ paśya durdharṣaṃ kāmbojāstaraṇocitam |
śayānamṛṣabhaskandhaṃ hataṃ pāṃsuśu mādhava || 1 ||
[Analyze grammar]

yasya kṣatajasaṃdigdhau bāhū candanarūṣitau |
avekṣya kṛpaṇaṃ bhāryā vilapatyatiduḥkhitā || 2 ||
[Analyze grammar]

imau tau parighaprakhyau bāhū śubhatalāṅgulī |
yayorvivaramāpannāṃ na ratirmāṃ purājahat || 3 ||
[Analyze grammar]

kāṃ gatiṃ nu gamiṣyāmi tvayā hīnā janeśvara |
dūrabandhuranātheva atīva madhurasvarā || 4 ||
[Analyze grammar]

ātape klāmyamānānāṃ vividhānāmiva srajām |
klāntānāmapi nārīṇāṃ na śrīrjahati vai tanum || 5 ||
[Analyze grammar]

śayānamabhitaḥ śūraṃ kāliṅgaṃ madhusūdana |
paśya dīptāṅgadayugapratibaddhamahābhujam || 6 ||
[Analyze grammar]

māgadhānāmadhipatiṃ jayatsenaṃ janārdana |
parivārya praruditā māgadhyaḥ paśya yoṣitaḥ || 7 ||
[Analyze grammar]

āsāmāyatanetrāṇāṃ susvarāṇāṃ janārdana |
manaḥśrutiharo nādo mano mohayatīva me || 8 ||
[Analyze grammar]

prakīrṇasarvābharaṇā rudantyaḥ śokakarśitāḥ |
svāstīrṇaśayanopetā māgadhyaḥ śerate bhuvi || 9 ||
[Analyze grammar]

kosalānāmadhipatiṃ rājaputraṃ bṛhadbalam |
bhartāraṃ parivāryaitāḥ pṛthakpraruditāḥ striyaḥ || 10 ||
[Analyze grammar]

asya gātragatānbāṇānkārṣṇibāhubalārpitān |
uddharantyasukhāviṣṭā mūrchamānāḥ punaḥ punaḥ || 11 ||
[Analyze grammar]

āsāṃ sarvānavadyānāmātapena pariśramāt |
pramlānanalinābhāni bhānti vaktrāṇi mādhava || 12 ||
[Analyze grammar]

droṇena nihatāḥ śūrāḥ śerate rucirāṅgadāḥ |
droṇenābhimukhāḥ sarve bhrātaraḥ pañca kekayāḥ || 13 ||
[Analyze grammar]

taptakāñcanavarmāṇastāmradhvajarathasrajaḥ |
bhāsayanti mahīṃ bhāsā jvalitā iva pāvakāḥ || 14 ||
[Analyze grammar]

droṇena drupadaṃ saṃkhye paśya mādhava pātitam |
mahādvipamivāraṇye siṃhena mahatā hatam || 15 ||
[Analyze grammar]

pāñcālarājño vipulaṃ puṇḍarīkākṣa pāṇḍuram |
ātapatraṃ samābhāti śaradīva divākaraḥ || 16 ||
[Analyze grammar]

etāstu drupadaṃ vṛddhaṃ snuṣā bhāryāśca duḥkhitāḥ |
dagdhvā gacchanti pāñcālyaṃ rājānamapasavyataḥ || 17 ||
[Analyze grammar]

dhṛṣṭaketuṃ maheṣvāsaṃ cedipuṃgavamaṅganāḥ |
droṇena nihataṃ śūraṃ haranti hṛtacetasaḥ || 18 ||
[Analyze grammar]

droṇāstramabhihatyaiṣa vimarde madhusūdana |
maheṣvāso hataḥ śete nadyā hṛta iva drumaḥ || 19 ||
[Analyze grammar]

eṣa cedipatiḥ śūro dhṛṣṭaketurmahārathaḥ |
śete vinihataḥ saṃkhye hatvā śatrūnsahasraśaḥ || 20 ||
[Analyze grammar]

vitudyamānaṃ vihagaistaṃ bhāryāḥ pratyupasthitāḥ |
cedirājaṃ hṛṣīkeśa hataṃ sabalabāndhavam || 21 ||
[Analyze grammar]

dāśārhīputrajaṃ vīraṃ śayānaṃ satyavikramam |
āropyāṅke rudantyetāścedirājavarāṅganāḥ || 22 ||
[Analyze grammar]

asya putraṃ hṛṣīkeśa suvaktraṃ cārukuṇḍalam |
droṇena samare paśya nikṛttaṃ bahudhā śaraiḥ || 23 ||
[Analyze grammar]

pitaraṃ nūnamājisthaṃ yudhyamānaṃ paraiḥ saha |
nājahātpṛṣṭhato vīramadyāpi madhusūdana || 24 ||
[Analyze grammar]

evaṃ mamāpi putrasya putraḥ pitaramanvagāt |
duryodhanaṃ mahābāho lakṣmaṇaḥ paravīrahā || 25 ||
[Analyze grammar]

vindānuvindāvāvantyau patitau paśya mādhava |
himānte puṣpitau śālau marutā galitāviva || 26 ||
[Analyze grammar]

kāñcanāṅgadavarmāṇau bāṇakhaḍgadhanurdharau |
ṛṣabhapratirūpākṣau śayānau vimalasrajau || 27 ||
[Analyze grammar]

avadhyāḥ pāṇḍavāḥ kṛṣṇa sarva eva tvayā saha |
ye muktā droṇabhīṣmābhyāṃ karṇādvaikartanātkṛpāt || 28 ||
[Analyze grammar]

duryodhanāddroṇasutātsaindhavācca mahārathāt |
somadattādvikarṇācca śūrācca kṛtavarmaṇaḥ |
ye hanyuḥ śastravegena devānapi nararṣabhāḥ || 29 ||
[Analyze grammar]

ta ime nihatāḥ saṃkhye paśya kālasya paryayam |
nātibhāro'sti daivasya dhruvaṃ mādhava kaścana |
yadime nihatāḥ śūrāḥ kṣatriyaiḥ kṣatriyarṣabhāḥ || 30 ||
[Analyze grammar]

tadaiva nihatāḥ kṛṣṇa mama putrāstarasvinaḥ |
yadaivākṛtakāmastvamupaplavyaṃ gataḥ punaḥ || 31 ||
[Analyze grammar]

śaṃtanoścaiva putreṇa prājñena vidureṇa ca |
tadaivoktāsmi mā snehaṃ kuruṣvātmasuteṣviti || 32 ||
[Analyze grammar]

tayorna darśanaṃ tāta mithyā bhavitumarhati |
acireṇaiva me putrā bhasmībhūtā janārdana || 33 ||
[Analyze grammar]

vaiśaṃpāyana uvāca |
ityuktvā nyapatadbhūmau gāndhārī śokakarśitā |
duḥkhopahatavijñānā dhairyamutsṛjya bhārata || 34 ||
[Analyze grammar]

tataḥ kopaparītāṅgī putraśokapariplutā |
jagāma śauriṃ doṣeṇa gāndhārī vyathitendriyā || 35 ||
[Analyze grammar]

gāndhāryuvāca |
pāṇḍavā dhārtarāṣṭrāśca drugdhāḥ kṛṣṇa parasparam |
upekṣitā vinaśyantastvayā kasmājjanārdana || 36 ||
[Analyze grammar]

śaktena bahubhṛtyena vipule tiṣṭhatā bale |
ubhayatra samarthena śrutavākyena caiva ha || 37 ||
[Analyze grammar]

icchatopekṣito nāśaḥ kurūṇāṃ madhusūdana |
yasmāttvayā mahābāho phalaṃ tasmādavāpnuhi || 38 ||
[Analyze grammar]

patiśuśrūṣayā yanme tapaḥ kiṃcidupārjitam |
tena tvāṃ duravāpātmañśapsye cakragadādhara || 39 ||
[Analyze grammar]

yasmātparasparaṃ ghnanto jñātayaḥ kurupāṇḍavāḥ |
upekṣitāste govinda tasmājjñātīnvadhiṣyasi || 40 ||
[Analyze grammar]

tvamapyupasthite varṣe ṣaṭtriṃśe madhusūdana |
hatajñātirhatāmātyo hataputro vanecaraḥ |
kutsitenābhyupāyena nidhanaṃ samavāpsyasi || 41 ||
[Analyze grammar]

tavāpyevaṃ hatasutā nihatajñātibāndhavāḥ |
striyaḥ paripatiṣyanti yathaitā bharatastriyaḥ || 42 ||
[Analyze grammar]

vaiśaṃpāyana uvāca |
tacchrutvā vacanaṃ ghoraṃ vāsudevo mahāmanāḥ |
uvāca devīṃ gāndhārīmīṣadabhyutsmayanniva || 43 ||
[Analyze grammar]

saṃhartā vṛṣṇicakrasya nānyo madvidyate śubhe |
jāne'hametadapyevaṃ cīrṇaṃ carasi kṣatriye || 44 ||
[Analyze grammar]

avadhyāste narairanyairapi vā devadānavaiḥ |
parasparakṛtaṃ nāśamataḥ prāpsyanti yādavāḥ || 45 ||
[Analyze grammar]

ityuktavati dāśārhe pāṇḍavāstrastacetasaḥ |
babhūvurbhṛśasaṃvignā nirāśāścāpi jīvite || 46 ||
[Analyze grammar]