Chapter 20

gāndhāryuvāca |
adhyardhaguṇamāhuryaṃ bale śaurye ca mādhava |
pitrā tvayā ca dāśārha dṛptaṃ siṃhamivotkaṭam || 1 ||
[Analyze grammar]

yo bibheda camūmeko mama putrasya durbhidām |
sa bhūtvā mṛtyuranyeṣāṃ svayaṃ mṛtyuvaśaṃ gataḥ || 2 ||
[Analyze grammar]

tasyopalakṣaye kṛṣṇa kārṣṇeramitatejasaḥ |
abhimanyorhatasyāpi prabhā naivopaśāmyati || 3 ||
[Analyze grammar]

eṣā virāṭaduhitā snuṣā gāṇḍīvadhanvanaḥ |
ārtā bālā patiṃ vīraṃ śocyā śocatyaninditā || 4 ||
[Analyze grammar]

tameṣā hi samāsādya bhāryā bhartāramantike |
virāṭaduhitā kṛṣṇa pāṇinā parimārjati || 5 ||
[Analyze grammar]

tasya vaktramupāghrāya saubhadrasya yaśasvinī |
vibuddhakamalākāraṃ kambuvṛttaśirodharam || 6 ||
[Analyze grammar]

kāmyarūpavatī caiṣā pariṣvajati bhāminī |
lajjamānā purevainaṃ mādhvīkamadamūrchitā || 7 ||
[Analyze grammar]

tasya kṣatajasaṃdigdhaṃ jātarūpapariṣkṛtam |
vimucya kavacaṃ kṛṣṇa śarīramabhivīkṣate || 8 ||
[Analyze grammar]

avekṣamāṇā taṃ bālā kṛṣṇa tvāmabhibhāṣate |
ayaṃ te puṇḍarīkākṣa sadṛśākṣo nipātitaḥ || 9 ||
[Analyze grammar]

bale vīrye ca sadṛśastejasā caiva te'nagha |
rūpeṇa ca tavātyarthaṃ śete bhuvi nipātitaḥ || 10 ||
[Analyze grammar]

atyantasukumārasya rāṅkavājinaśāyinaḥ |
kaccidadya śarīraṃ te bhūmau na paritapyate || 11 ||
[Analyze grammar]

mātaṅgabhujavarṣmāṇau jyākṣepakaṭhinatvacau |
kāñcanāṅgadinau śeṣe nikṣipya vipulau bhujau || 12 ||
[Analyze grammar]

vyāyamya bahudhā nūnaṃ sukhasuptaḥ śramādiva |
evaṃ vilapatīmārtāṃ na hi māmabhibhāṣase || 13 ||
[Analyze grammar]

āryāmārya subhadrāṃ tvamimāṃśca tridaśopamān |
pitṝnmāṃ caiva duḥkhārtāṃ vihāya kva gamiṣyasi || 14 ||
[Analyze grammar]

tasya śoṇitasaṃdigdhānkeśānunnāmya pāṇinā |
utsaṅge vaktramādhāya jīvantamiva pṛcchati |
svasrīyaṃ vāsudevasya putraṃ gāṇḍīvadhanvanaḥ || 15 ||
[Analyze grammar]

kathaṃ tvāṃ raṇamadhyasthaṃ jaghnurete mahārathāḥ |
dhigastu krūrakartṝṃstānkṛpakarṇajayadrathān || 16 ||
[Analyze grammar]

droṇadrauṇāyanī cobhau yairasi vyasanīkṛtaḥ |
ratharṣabhāṇāṃ sarveṣāṃ kathamāsīttadā manaḥ || 17 ||
[Analyze grammar]

bālaṃ tvāṃ parivāryaikaṃ mama duḥkhāya jaghnuṣām |
kathaṃ nu pāṇḍavānāṃ ca pāñcālānāṃ ca paśyatām |
tvaṃ vīra nidhanaṃ prāpto nāthavānsannanāthavat || 18 ||
[Analyze grammar]

dṛṣṭvā bahubhirākrande nihataṃ tvāmanāthavat |
vīraḥ puruṣaśārdūlaḥ kathaṃ jīvati pāṇḍavaḥ || 19 ||
[Analyze grammar]

na rājyalābho vipulaḥ śatrūṇāṃ vā parābhavaḥ |
prītiṃ dāsyati pārthānāṃ tvāmṛte puṣkarekṣaṇa || 20 ||
[Analyze grammar]

tava śastrajitāṃllokāndharmeṇa ca damena ca |
kṣipramanvāgamiṣyāmi tatra māṃ pratipālaya || 21 ||
[Analyze grammar]

durmaraṃ punaraprāpte kāle bhavati kenacit |
yadahaṃ tvāṃ raṇe dṛṣṭvā hataṃ jīvāmi durbhagā || 22 ||
[Analyze grammar]

kāmidānīṃ naravyāghra ślakṣṇayā smitayā girā |
pitṛloke sametyānyāṃ māmivāmantrayiṣyasi || 23 ||
[Analyze grammar]

nūnamapsarasāṃ svarge manāṃsi pramathiṣyasi |
parameṇa ca rūpeṇa girā ca smitapūrvayā || 24 ||
[Analyze grammar]

prāpya puṇyakṛtāṃllokānapsarobhiḥ sameyivān |
saubhadra viharankāle smarethāḥ sukṛtāni me || 25 ||
[Analyze grammar]

etāvāniha saṃvāso vihitaste mayā saha |
ṣaṇmāsānsaptame māsi tvaṃ vīra nidhanaṃ gataḥ || 26 ||
[Analyze grammar]

ityuktavacanāmetāmapakarṣanti duḥkhitām |
uttarāṃ moghasaṃkalpāṃ matsyarājakulastriyaḥ || 27 ||
[Analyze grammar]

uttarāmapakṛṣyaināmārtāmārtatarāḥ svayam |
virāṭaṃ nihataṃ dṛṣṭvā krośanti vilapanti ca || 28 ||
[Analyze grammar]

droṇāstraśarasaṃkṛttaṃ śayānaṃ rudhirokṣitam |
virāṭaṃ vitudantyete gṛdhragomāyuvāyasāḥ || 29 ||
[Analyze grammar]

vitudyamānaṃ vihagairvirāṭamasitekṣaṇāḥ |
na śaknuvanti vivaśā nivartayitumāturāḥ || 30 ||
[Analyze grammar]

āsāmātapataptānāmāyāsena ca yoṣitām |
śrameṇa ca vivarṇānāṃ rūpāṇāṃ vigataṃ vapuḥ || 31 ||
[Analyze grammar]

uttaraṃ cābhimanyuṃ ca kāmbojaṃ ca sudakṣiṇam |
śiśūnetānhatānpaśya lakṣmaṇaṃ ca sudarśanam |
āyodhanaśiromadhye śayānaṃ paśya mādhava || 32 ||
[Analyze grammar]