Chapter 16

vaiśaṃpāyana uvāca |
evamuktvā tu gāndhārī kurūṇāmāvikartanam |
apaśyattatra tiṣṭhantī sarvaṃ divyena cakṣuṣā || 1 ||
[Analyze grammar]

pativratā mahābhāgā samānavratacāriṇī |
ugreṇa tapasā yuktā satataṃ satyavādinī || 2 ||
[Analyze grammar]

varadānena kṛṣṇasya maharṣeḥ puṇyakarmaṇaḥ |
divyajñānabalopetā vividhaṃ paryadevayat || 3 ||
[Analyze grammar]

dadarśa sā buddhimatī dūrādapi yathāntike |
raṇājiraṃ nṛvīrāṇāmadbhutaṃ lomaharṣaṇam || 4 ||
[Analyze grammar]

asthikeśaparistīrṇaṃ śoṇitaughapariplutam |
śarīrairbahusāhasrairvinikīrṇaṃ samantataḥ || 5 ||
[Analyze grammar]

gajāśvarathayodhānāmāvṛtaṃ rudhirāvilaiḥ |
śarīrairaśiraskaiśca videhaiśca śirogaṇaiḥ || 6 ||
[Analyze grammar]

gajāśvanaravīrāṇāṃ niḥsattvairabhisaṃvṛtam |
sṛgālabaḍakākolakaṅkakākaniṣevitam || 7 ||
[Analyze grammar]

rakṣasāṃ puruṣādānāṃ modanaṃ kurarākulam |
aśivābhiḥ śivābhiśca nāditaṃ gṛdhrasevitam || 8 ||
[Analyze grammar]

tato vyāsābhyanujñāto dhṛtarāṣṭro mahīpatiḥ |
pāṇḍuputrāśca te sarve yudhiṣṭhirapurogamāḥ || 9 ||
[Analyze grammar]

vāsudevaṃ puraskṛtya hatabandhuṃ ca pārthivam |
kurustriyaḥ samāsādya jagmurāyodhanaṃ prati || 10 ||
[Analyze grammar]

samāsādya kurukṣetraṃ tāḥ striyo nihateśvarāḥ |
apaśyanta hatāṃstatra putrānbhrātṝnpitṝnpatīn || 11 ||
[Analyze grammar]

kravyādairbhakṣyamāṇānvai gomāyubaḍavāyasaiḥ |
bhūtaiḥ piśācai rakṣobhirvividhaiśca niśācaraiḥ || 12 ||
[Analyze grammar]

rudrākrīḍanibhaṃ dṛṣṭvā tadā viśasanaṃ striyaḥ |
mahārhebhyo'tha yānebhyo vikrośantyo nipetire || 13 ||
[Analyze grammar]

adṛṣṭapūrvaṃ paśyantyo duḥkhārtā bharatastriyaḥ |
śarīreṣvaskhalannanyā nyapataṃścāparā bhuvi || 14 ||
[Analyze grammar]

śrāntānāṃ cāpyanāthānāṃ nāsītkācana cetanā |
pāñcālakuruyoṣāṇāṃ kṛpaṇaṃ tadabhūnmahat || 15 ||
[Analyze grammar]

duḥkhopahatacittābhiḥ samantādanunāditam |
dṛṣṭvāyodhanamatyugraṃ dharmajñā subalātmajā || 16 ||
[Analyze grammar]

tataḥ sā puṇḍarīkākṣamāmantrya puruṣottamam |
kurūṇāṃ vaiśasaṃ dṛṣṭvā duḥkhādvacanamabravīt || 17 ||
[Analyze grammar]

paśyaitāḥ puṇḍarīkākṣa snuṣā me nihateśvarāḥ |
prakīrṇakeśāḥ krośantīḥ kurarīriva mādhava || 18 ||
[Analyze grammar]

amūstvabhisamāgamya smarantyo bharatarṣabhān |
pṛthagevābhyadhāvanta putrānbhrātṝnpitṝnpatīn || 19 ||
[Analyze grammar]

vīrasūbhirmahābāho hataputrābhirāvṛtam |
kvacicca vīrapatnībhirhatavīrābhirākulam || 20 ||
[Analyze grammar]

śobhitaṃ puruṣavyāghrairbhīṣmakarṇābhimanyubhiḥ |
droṇadrupadaśalyaiśca jvaladbhiriva pāvakaiḥ || 21 ||
[Analyze grammar]

kāñcanaiḥ kavacairniṣkairmaṇibhiśca mahātmanām |
aṅgadairhastakeyūraiḥ sragbhiśca samalaṃkṛtam || 22 ||
[Analyze grammar]

vīrabāhuvisṛṣṭābhiḥ śaktibhiḥ parighairapi |
khaḍgaiśca vimalaistīkṣṇaiḥ saśaraiśca śarāsanaiḥ || 23 ||
[Analyze grammar]

kravyādasaṃghairmuditaistiṣṭhadbhiḥ sahitaiḥ kvacit |
kvacidākrīḍamānaiśca śayānairaparaiḥ kvacit || 24 ||
[Analyze grammar]

etadevaṃvidhaṃ vīra saṃpaśyāyodhanaṃ vibho |
paśyamānā ca dahyāmi śokenāhaṃ janārdana || 25 ||
[Analyze grammar]

pāñcālānāṃ kurūṇāṃ ca vināśaṃ madhusūdana |
pañcānāmiva bhūtānāṃ nāhaṃ vadhamacintayam || 26 ||
[Analyze grammar]

tānsuparṇāśca gṛdhrāśca niṣkarṣantyasṛgukṣitān |
nigṛhya kavaceṣūgrā bhakṣayanti sahasraśaḥ || 27 ||
[Analyze grammar]

jayadrathasya karṇasya tathaiva droṇabhīṣmayoḥ |
abhimanyorvināśaṃ ca kaścintayitumarhati || 28 ||
[Analyze grammar]

avadhyakalpānnihatāndṛṣṭvāhaṃ madhusūdana |
gṛdhrakaṅkabaḍaśyenaśvasṛgālādanīkṛtān || 29 ||
[Analyze grammar]

amarṣavaśamāpannānduryodhanavaśe sthitān |
paśyemānpuruṣavyāghrānsaṃśāntānpāvakāniva || 30 ||
[Analyze grammar]

śayanānyucitāḥ sarve mṛdūni vimalāni ca |
vipannāste'dya vasudhāṃ vivṛtāmadhiśerate || 31 ||
[Analyze grammar]

bandibhiḥ satataṃ kāle stuvadbhirabhinanditāḥ |
śivānāmaśivā ghorāḥ śṛṇvanti vividhā giraḥ || 32 ||
[Analyze grammar]

ye purā śerate vīrāḥ śayaneṣu yaśasvinaḥ |
candanāgurudigdhāṅgāste'dya pāṃsuṣu śerate || 33 ||
[Analyze grammar]

teṣāmābharaṇānyete gṛdhragomāyuvāyasāḥ |
ākṣipantyaśivā ghorā vinadantaḥ punaḥ punaḥ || 34 ||
[Analyze grammar]

cāpāni viśikhānpītānnistriṃśānvimalā gadāḥ |
yuddhābhimāninaḥ prītā jīvanta iva bibhrati || 35 ||
[Analyze grammar]

surūpavarṇā bahavaḥ kravyādairavaghaṭṭitāḥ |
ṛṣabhapratirūpākṣāḥ śerate haritasrajaḥ || 36 ||
[Analyze grammar]

apare punarāliṅgya gadāḥ parighabāhavaḥ |
śerate'bhimukhāḥ śūrā dayitā iva yoṣitaḥ || 37 ||
[Analyze grammar]

bibhrataḥ kavacānyanye vimalānyāyudhāni ca |
na dharṣayanti kravyādā jīvantīti janārdana || 38 ||
[Analyze grammar]

kravyādaiḥ kṛṣyamāṇānāmapareṣāṃ mahātmanām |
śātakaumbhyaḥ srajaścitrā viprakīrṇāḥ samantataḥ || 39 ||
[Analyze grammar]

ete gomāyavo bhīmā nihatānāṃ yaśasvinām |
kaṇṭhāntaragatānhārānākṣipanti sahasraśaḥ || 40 ||
[Analyze grammar]

sarveṣvapararātreṣu yānanandanta bandinaḥ |
stutibhiśca parārdhyābhirupacāraiśca śikṣitāḥ || 41 ||
[Analyze grammar]

tānimāḥ paridevanti duḥkhārtāḥ paramāṅganāḥ |
kṛpaṇaṃ vṛṣṇiśārdūla duḥkhaśokārditā bhṛśam || 42 ||
[Analyze grammar]

raktotpalavanānīva vibhānti rucirāṇi vai |
mukhāni paramastrīṇāṃ pariśuṣkāṇi keśava || 43 ||
[Analyze grammar]

ruditoparatā hyetā dhyāyantyaḥ saṃpariplutāḥ |
kurustriyo'bhigacchanti tena tenaiva duḥkhitāḥ || 44 ||
[Analyze grammar]

etānyādityavarṇāni tapanīyanibhāni ca |
roṣarodanatāmrāṇi vaktrāṇi kuruyoṣitām || 45 ||
[Analyze grammar]

āsāmaparipūrṇārthaṃ niśamya paridevitam |
itaretarasaṃkrandānna vijānanti yoṣitaḥ || 46 ||
[Analyze grammar]

etā dīrghamivocchvasya vikruśya ca vilapya ca |
vispandamānā duḥkhena vīrā jahati jīvitam || 47 ||
[Analyze grammar]

bahvyo dṛṣṭvā śarīrāṇi krośanti vilapanti ca |
pāṇibhiścāparā ghnanti śirāṃsi mṛdupāṇayaḥ || 48 ||
[Analyze grammar]

śirobhiḥ patitairhastaiḥ sarvāṅgairyūthaśaḥ kṛtaiḥ |
itaretarasaṃpṛktairākīrṇā bhāti medinī || 49 ||
[Analyze grammar]

viśiraskānatho kāyāndṛṣṭvā ghorābhinandinaḥ |
muhyantyanucitā nāryo videhāni śirāṃsi ca || 50 ||
[Analyze grammar]

śiraḥ kāyena saṃdhāya prekṣamāṇā vicetasaḥ |
apaśyantyo paraṃ tatra nedamasyeti duḥkhitāḥ || 51 ||
[Analyze grammar]

bāhūrucaraṇānanyānviśikhonmathitānpṛthak |
saṃdadhatyo'sukhāviṣṭā mūrchantyetāḥ punaḥ punaḥ || 52 ||
[Analyze grammar]

utkṛttaśirasaścānyānvijagdhānmṛgapakṣibhiḥ |
dṛṣṭvā kāścinna jānanti bhartṝnbharatayoṣitaḥ || 53 ||
[Analyze grammar]

pāṇibhiścāparā ghnanti śirāṃsi madhusūdana |
prekṣya bhrātṝnpitṝnputrānpatīṃśca nihatānparaiḥ || 54 ||
[Analyze grammar]

bāhubhiśca sakhaḍgaiśca śirobhiśca sakuṇḍalaiḥ |
agamyakalpā pṛthivī māṃsaśoṇitakardamā || 55 ||
[Analyze grammar]

na duḥkheṣūcitāḥ pūrvaṃ duḥkhaṃ gāhantyaninditāḥ |
bhrātṛbhiḥ pitṛbhiḥ putrairupakīrṇāṃ vasuṃdharām || 56 ||
[Analyze grammar]

yūthānīva kiśorīṇāṃ sukeśīnāṃ janārdana |
snuṣāṇāṃ dhṛtarāṣṭrasya paśya vṛndānyanekaśaḥ || 57 ||
[Analyze grammar]

ato duḥkhataraṃ kiṃ nu keśava pratibhāti me |
yadimāḥ kurvate sarvā rūpamuccāvacaṃ striyaḥ || 58 ||
[Analyze grammar]

nūnamācaritaṃ pāpaṃ mayā pūrveṣu janmasu |
yā paśyāmi hatānputrānpautrānbhrātṝṃśca keśava |
evamārtā vilapatī dadarśa nihataṃ sutam || 59 ||
[Analyze grammar]