Chapter 1

janamejaya uvāca |
hate duryodhane caiva hate sainye ca sarvaśaḥ |
dhṛtarāṣṭro mahārājaḥ śrutvā kimakaronmune || 1 ||
[Analyze grammar]

tathaiva kauravo rājā dharmaputro mahāmanāḥ |
kṛpaprabhṛtayaścaiva kimakurvata te trayaḥ || 2 ||
[Analyze grammar]

aśvatthāmnaḥ śrutaṃ karma śāpaścānyonyakāritaḥ |
vṛttāntamuttaraṃ brūhi yadabhāṣata saṃjayaḥ || 3 ||
[Analyze grammar]

vaiśaṃpāyana uvāca |
hate putraśate dīnaṃ chinnaśākhamiva drumam |
putraśokābhisaṃtaptaṃ dhṛtarāṣṭraṃ mahīpatim || 4 ||
[Analyze grammar]

dhyānamūkatvamāpannaṃ cintayā samabhiplutam |
abhigamya mahāprājñaḥ saṃjayo vākyamabravīt || 5 ||
[Analyze grammar]

kiṃ śocasi mahārāja nāsti śoke sahāyatā |
akṣauhiṇyo hatāścāṣṭau daśa caiva viśāṃ pate |
nirjaneyaṃ vasumatī śūnyā saṃprati kevalā || 6 ||
[Analyze grammar]

nānādigbhyaḥ samāgamya nānādeśyā narādhipāḥ |
sahitāstava putreṇa sarve vai nidhanaṃ gatāḥ || 7 ||
[Analyze grammar]

pitṝṇāṃ putrapautrāṇāṃ jñātīnāṃ suhṛdāṃ tathā |
gurūṇāṃ cānupūrvyeṇa pretakāryāṇi kāraya || 8 ||
[Analyze grammar]

vaiśaṃpāyana uvāca |
tacchrutvā karuṇaṃ vākyaṃ putrapautravadhārditaḥ |
papāta bhuvi durdharṣo vātāhata iva drumaḥ || 9 ||
[Analyze grammar]

dhṛtarāṣṭra uvāca |
hataputro hatāmātyo hatasarvasuhṛjjanaḥ |
duḥkhaṃ nūnaṃ bhaviṣyāmi vicaranpṛthivīmimām || 10 ||
[Analyze grammar]

kiṃ nu bandhuvihīnasya jīvitena mamādya vai |
lūnapakṣasya iva me jarājīrṇasya pakṣiṇaḥ || 11 ||
[Analyze grammar]

hṛtarājyo hatasuhṛddhatacakṣuśca vai tathā |
na bhrājiṣye mahāprājña kṣīṇaraśmirivāṃśumān || 12 ||
[Analyze grammar]

na kṛtaṃ suhṛdāṃ vākyaṃ jāmadagnyasya jalpataḥ |
nāradasya ca devarṣeḥ kṛṣṇadvaipāyanasya ca || 13 ||
[Analyze grammar]

sabhāmadhye tu kṛṣṇena yacchreyo'bhihitaṃ mama |
alaṃ vaireṇa te rājanputraḥ saṃgṛhyatāmiti || 14 ||
[Analyze grammar]

tacca vākyamakṛtvāhaṃ bhṛśaṃ tapyāmi durmatiḥ |
na hi śrotāsmi bhīṣmasya dharmayuktaṃ prabhāṣitam || 15 ||
[Analyze grammar]

duryodhanasya ca tathā vṛṣabhasyeva nardataḥ |
duḥśāsanavadhaṃ śrutvā karṇasya ca viparyayam |
droṇasūryoparāgaṃ ca hṛdayaṃ me vidīryate || 16 ||
[Analyze grammar]

na smarāmyātmanaḥ kiṃcitpurā saṃjaya duṣkṛtam |
yasyedaṃ phalamadyeha mayā mūḍhena bhujyate || 17 ||
[Analyze grammar]

nūnaṃ hyapakṛtaṃ kiṃcinmayā pūrveṣu janmasu |
yena māṃ duḥkhabhāgeṣu dhātā karmasu yuktavān || 18 ||
[Analyze grammar]

pariṇāmaśca vayasaḥ sarvabandhukṣayaśca me |
suhṛnmitravināśaśca daivayogādupāgataḥ |
ko'nyo'sti duḥkhitataro mayā loke pumāniha || 19 ||
[Analyze grammar]

tanmāmadyaiva paśyantu pāṇḍavāḥ saṃśitavratam |
vivṛtaṃ brahmalokasya dīrghamadhvānamāsthitam || 20 ||
[Analyze grammar]

vaiśaṃpāyana uvāca |
tasya lālapyamānasya bahuśokaṃ vicinvataḥ |
śokāpahaṃ narendrasya saṃjayo vākyamabravīt || 21 ||
[Analyze grammar]

śokaṃ rājanvyapanuda śrutāste vedaniścayāḥ |
śāstrāgamāśca vividhā vṛddhebhyo nṛpasattama |
sṛñjaye putraśokārte yadūcurmunayaḥ purā || 22 ||
[Analyze grammar]

tathā yauvanajaṃ darpamāsthite te sute nṛpa |
na tvayā suhṛdāṃ vākyaṃ bruvatāmavadhāritam |
svārthaśca na kṛtaḥ kaścillubdhena phalagṛddhinā || 23 ||
[Analyze grammar]

tava duḥśāsano mantrī rādheyaśca durātmavān |
śakuniścaiva duṣṭātmā citrasenaśca durmatiḥ |
śalyaśca yena vai sarvaṃ śalyabhūtaṃ kṛtaṃ jagat || 24 ||
[Analyze grammar]

kuruvṛddhasya bhīṣmasya gāndhāryā vidurasya ca |
na kṛtaṃ vacanaṃ tena tava putreṇa bhārata || 25 ||
[Analyze grammar]

na dharmaḥ satkṛtaḥ kaścinnityaṃ yuddhamiti bruvan |
kṣapitāḥ kṣatriyāḥ sarve śatrūṇāṃ vardhitaṃ yaśaḥ || 26 ||
[Analyze grammar]

madhyastho hi tvamapyāsīrna kṣamaṃ kiṃciduktavān |
dhūrdhareṇa tvayā bhārastulayā na samaṃ dhṛtaḥ || 27 ||
[Analyze grammar]

ādāveva manuṣyeṇa vartitavyaṃ yathā kṣamam |
yathā nātītamarthaṃ vai paścāttāpena yujyate || 28 ||
[Analyze grammar]

putragṛddhyā tvayā rājanpriyaṃ tasya cikīrṣatā |
paścāttāpamidaṃ prāptaṃ na tvaṃ śocitumarhasi || 29 ||
[Analyze grammar]

madhu yaḥ kevalaṃ dṛṣṭvā prapātaṃ nānupaśyati |
sa bhraṣṭo madhulobhena śocatyeva yathā bhavān || 30 ||
[Analyze grammar]

arthānna śocanprāpnoti na śocanvindate sukham |
na śocañśriyamāpnoti na śocanvindate param || 31 ||
[Analyze grammar]

svayamutpādayitvāgniṃ vastreṇa pariveṣṭayet |
dahyamāno manastāpaṃ bhajate na sa paṇḍitaḥ || 32 ||
[Analyze grammar]

tvayaiva sasutenāyaṃ vākyavāyusamīritaḥ |
lobhājyena ca saṃsikto jvalitaḥ pārthapāvakaḥ || 33 ||
[Analyze grammar]

tasminsamiddhe patitāḥ śalabhā iva te sutāḥ |
tānkeśavārcirnirdagdhānna tvaṃ śocitumarhasi || 34 ||
[Analyze grammar]

yaccāśrupātakalilaṃ vadanaṃ vahase nṛpa |
aśāstradṛṣṭametaddhi na praśaṃsanti paṇḍitāḥ || 35 ||
[Analyze grammar]

visphuliṅgā iva hyetāndahanti kila mānavān |
jahīhi manyuṃ buddhyā vai dhārayātmānamātmanā || 36 ||
[Analyze grammar]

evamāśvāsitastena saṃjayena mahātmanā |
viduro bhūya evāha buddhipūrvaṃ paraṃtapa || 37 ||
[Analyze grammar]