Chapter 55

vaiśaṃpāyana uvāca |
tato vāgyuddhamabhavattumulaṃ janamejaya |
yatra duḥkhānvito rājā dhṛtarāṣṭro'bravīdidam || 1 ||
[Analyze grammar]

dhigastu khalu mānuṣyaṃ yasya niṣṭheyamīdṛśī |
ekādaśacamūbhartā yatra putro mamābhibhūḥ || 2 ||
[Analyze grammar]

ājñāpya sarvānnṛpatīnbhuktvā cemāṃ vasuṃdharām |
gadāmādāya vegena padātiḥ prasthito raṇam || 3 ||
[Analyze grammar]

bhūtvā hi jagato nātho hyanātha iva me sutaḥ |
gadāmudyamya yo yāti kimanyadbhāgadheyataḥ || 4 ||
[Analyze grammar]

aho duḥkhaṃ mahatprāptaṃ putreṇa mama saṃjaya |
evamuktvā sa duḥkhārto virarāma janādhipaḥ || 5 ||
[Analyze grammar]

saṃjaya uvāca |
sa meghaninado harṣādvinadanniva govṛṣaḥ |
ājuhāva tataḥ pārthaṃ yuddhāya yudhi vīryavān || 6 ||
[Analyze grammar]

bhīmamāhvayamāne tu kururāje mahātmani |
prādurāsansughorāṇi rūpāṇi vividhānyuta || 7 ||
[Analyze grammar]

vavurvātāḥ sanirghātāḥ pāṃsuvarṣaṃ papāta ca |
babhūvuśca diśaḥ sarvāstimireṇa samāvṛtāḥ || 8 ||
[Analyze grammar]

mahāsvanāḥ sanirghātāstumulā romaharṣaṇāḥ |
petustatholkāḥ śataśaḥ sphoṭayantyo nabhastalam || 9 ||
[Analyze grammar]

rāhuścāgrasadādityamaparvaṇi viśāṃ pate |
cakampe ca mahākampaṃ pṛthivī savanadrumā || 10 ||
[Analyze grammar]

rūkṣāśca vātāḥ pravavurnīcaiḥ śarkaravarṣiṇaḥ |
girīṇāṃ śikharāṇyeva nyapatanta mahītale || 11 ||
[Analyze grammar]

mṛgā bahuvidhākārāḥ saṃpatanti diśo daśa |
dīptāḥ śivāścāpyanadanghorarūpāḥ sudāruṇāḥ || 12 ||
[Analyze grammar]

nirghātāśca mahāghorā babhūvū romaharṣaṇāḥ |
dīptāyāṃ diśi rājendra mṛgāścāśubhavādinaḥ || 13 ||
[Analyze grammar]

udapānagatāścāpo vyavardhanta samantataḥ |
aśarīrā mahānādāḥ śrūyante sma tadā nṛpa || 14 ||
[Analyze grammar]

evamādīni dṛṣṭvātha nimittāni vṛkodaraḥ |
uvāca bhrātaraṃ jyeṣṭhaṃ dharmarājaṃ yudhiṣṭhiram || 15 ||
[Analyze grammar]

naiṣa śakto raṇe jetuṃ mandātmā māṃ suyodhanaḥ |
adya krodhaṃ vimokṣyāmi nigūḍhaṃ hṛdaye ciram |
suyodhane kauravendre khāṇḍave pāvako yathā || 16 ||
[Analyze grammar]

śalyamadyoddhariṣyāmi tava pāṇḍava hṛcchayam |
nihatya gadayā pāpamimaṃ kurukulādhamam || 17 ||
[Analyze grammar]

adya kīrtimayīṃ mālāṃ pratimokṣyāmyahaṃ tvayi |
hatvemaṃ pāpakarmāṇaṃ gadayā raṇamūrdhani || 18 ||
[Analyze grammar]

adyāsya śatadhā dehaṃ bhinadmi gadayānayā |
nāyaṃ praveṣṭā nagaraṃ punarvāraṇasāhvayam || 19 ||
[Analyze grammar]

sarpotsargasya śayane viṣadānasya bhojane |
pramāṇakoṭyāṃ pātasya dāhasya jatuveśmani || 20 ||
[Analyze grammar]

sabhāyāmavahāsasya sarvasvaharaṇasya ca |
varṣamajñātavāsasya vanavāsasya cānagha || 21 ||
[Analyze grammar]

adyāntameṣāṃ duḥkhānāṃ gantā bharatasattama |
ekāhnā vinihatyemaṃ bhaviṣyāmyātmano'nṛṇaḥ || 22 ||
[Analyze grammar]

adyāyurdhārtarāṣṭrasya durmaterakṛtātmanaḥ |
samāptaṃ bharataśreṣṭha mātāpitrośca darśanam || 23 ||
[Analyze grammar]

adyāyaṃ kururājasya śaṃtanoḥ kulapāṃsanaḥ |
prāṇāñśriyaṃ ca rājyaṃ ca tyaktvā śeṣyati bhūtale || 24 ||
[Analyze grammar]

rājā ca dhṛtarāṣṭro'dya śrutvā putraṃ mayā hatam |
smariṣyatyaśubhaṃ karma yattacchakunibuddhijam || 25 ||
[Analyze grammar]

ityuktvā rājaśārdūla gadāmādāya vīryavān |
avātiṣṭhata yuddhāya śakro vṛtramivāhvayan || 26 ||
[Analyze grammar]

tamudyatagadaṃ dṛṣṭvā kailāsamiva śṛṅgiṇam |
bhīmasenaḥ punaḥ kruddho duryodhanamuvāca ha || 27 ||
[Analyze grammar]

rājñaśca dhṛtarāṣṭrasya tathā tvamapi cātmanaḥ |
smara tadduṣkṛtaṃ karma yadvṛttaṃ vāraṇāvate || 28 ||
[Analyze grammar]

draupadī ca parikliṣṭā sabhāyāṃ yadrajasvalā |
dyūte ca vañcito rājā yattvayā saubalena ca || 29 ||
[Analyze grammar]

vane duḥkhaṃ ca yatprāptamasmābhistvatkṛtaṃ mahat |
virāṭanagare caiva yonyantaragatairiva |
tatsarvaṃ yātayāmyadya diṣṭyā dṛṣṭo'si durmate || 30 ||
[Analyze grammar]

tvatkṛte'sau hataḥ śete śaratalpe pratāpavān |
gāṅgeyo rathināṃ śreṣṭho nihato yājñaseninā || 31 ||
[Analyze grammar]

hato droṇaśca karṇaśca tathā śalyaḥ pratāpavān |
vairāgnerādikartā ca śakuniḥ saubalo hataḥ || 32 ||
[Analyze grammar]

prātikāmī tathā pāpo draupadyāḥ kleśakṛddhataḥ |
bhrātaraste hatāḥ sarve śūrā vikrāntayodhinaḥ || 33 ||
[Analyze grammar]

ete cānye ca bahavo nihatāstvatkṛte nṛpāḥ |
tvāmadya nihaniṣyāmi gadayā nātra saṃśayaḥ || 34 ||
[Analyze grammar]

ityevamuccai rājendra bhāṣamāṇaṃ vṛkodaram |
uvāca vītabhī rājanputraste satyavikramaḥ || 35 ||
[Analyze grammar]

kiṃ katthitena bahudhā yudhyasva tvaṃ vṛkodara |
adya te'haṃ vineṣyāmi yuddhaśraddhāṃ kulādhama || 36 ||
[Analyze grammar]

naiva duryodhanaḥ kṣudra kenacittvadvidhena vai |
śakyastrāsayituṃ vācā yathānyaḥ prākṛto naraḥ || 37 ||
[Analyze grammar]

cirakālepsitaṃ diṣṭyā hṛdayasthamidaṃ mama |
tvayā saha gadāyuddhaṃ tridaśairupapāditam || 38 ||
[Analyze grammar]

kiṃ vācā bahunoktena katthitena ca durmate |
vāṇī saṃpadyatāmeṣā karmaṇā mā ciraṃ kṛthāḥ || 39 ||
[Analyze grammar]

tasya tadvacanaṃ śrutvā sarva evābhyapūjayan |
rājānaḥ somakāścaiva ye tatrāsansamāgatāḥ || 40 ||
[Analyze grammar]

tataḥ saṃpūjitaḥ sarvaiḥ saṃprahṛṣṭatanūruhaḥ |
bhūyo dhīraṃ manaścakre yuddhāya kurunandanaḥ || 41 ||
[Analyze grammar]

taṃ mattamiva mātaṅgaṃ talatālairnarādhipāḥ |
bhūyaḥ saṃharṣayāṃ cakrurduryodhanamamarṣaṇam || 42 ||
[Analyze grammar]

taṃ mahātmā mahātmānaṃ gadāmudyamya pāṇḍavaḥ |
abhidudrāva vegena dhārtarāṣṭraṃ vṛkodaraḥ || 43 ||
[Analyze grammar]

bṛṃhanti kuñjarāstatra hayā heṣanti cāsakṛt |
śastrāṇi cāpyadīpyanta pāṇḍavānāṃ jayaiṣiṇām || 44 ||
[Analyze grammar]