Chapter 37

janamejaya uvāca |
saptasārasvataṃ kasmātkaśca maṅkaṇako muniḥ |
kathaṃ siddhaśca bhagavānkaścāsya niyamo'bhavat || 1 ||
[Analyze grammar]

kasya vaṃśe samutpannaḥ kiṃ cādhītaṃ dvijottama |
etadicchāmyahaṃ śrotuṃ vidhivaddvijasattama || 2 ||
[Analyze grammar]

vaiśaṃpāyana uvāca |
rājansapta sarasvatyo yābhirvyāptamidaṃ jagat |
āhūtā balavadbhirhi tatra tatra sarasvatī || 3 ||
[Analyze grammar]

suprabhā kāñcanākṣī ca viśālā mānasahradā |
sarasvatī oghavatī suveṇurvimalodakā || 4 ||
[Analyze grammar]

pitāmahasya mahato vartamāne mahītale |
vitate yajñavāṭe vai sameteṣu dvijātiṣu || 5 ||
[Analyze grammar]

puṇyāhaghoṣairvimalairvedānāṃ ninadaistathā |
deveṣu caiva vyagreṣu tasminyajñavidhau tadā || 6 ||
[Analyze grammar]

tatra caiva mahārāja dīkṣite prapitāmahe |
yajatastatra satreṇa sarvakāmasamṛddhinā || 7 ||
[Analyze grammar]

manasā cintitā hyarthā dharmārthakuśalaistadā |
upatiṣṭhanti rājendra dvijātīṃstatra tatra ha || 8 ||
[Analyze grammar]

jaguśca tatra gandharvā nanṛtuścāpsarogaṇāḥ |
vāditrāṇi ca divyāni vādayāmāsurañjasā || 9 ||
[Analyze grammar]

tasya yajñasya saṃpattyā tutuṣurdevatā api |
vismayaṃ paramaṃ jagmuḥ kimu mānuṣayonayaḥ || 10 ||
[Analyze grammar]

vartamāne tathā yajñe puṣkarasthe pitāmahe |
abruvannṛṣayo rājannāyaṃ yajño mahāphalaḥ |
na dṛśyate saricchreṣṭhā yasmādiha sarasvatī || 11 ||
[Analyze grammar]

tacchrutvā bhagavānprītaḥ sasmārātha sarasvatīm |
pitāmahena yajatā āhūtā puṣkareṣu vai |
suprabhā nāma rājendra nāmnā tatra sarasvatī || 12 ||
[Analyze grammar]

tāṃ dṛṣṭvā munayastuṣṭā vegayuktāṃ sarasvatīm |
pitāmahaṃ mānayantīṃ kratuṃ te bahu menire || 13 ||
[Analyze grammar]

evameṣā saricchreṣṭhā puṣkareṣu sarasvatī |
pitāmahārthaṃ saṃbhūtā tuṣṭyarthaṃ ca manīṣiṇām || 14 ||
[Analyze grammar]

naimiṣe munayo rājansamāgamya samāsate |
tatra citrāḥ kathā hyāsanvedaṃ prati janeśvara || 15 ||
[Analyze grammar]

tatra te munayo hyāsannānāsvādhyāyavedinaḥ |
te samāgamya munayaḥ sasmarurvai sarasvatīm || 16 ||
[Analyze grammar]

sā tu dhyātā mahārāja ṛṣibhiḥ satrayājibhiḥ |
samāgatānāṃ rājendra sahāyārthaṃ mahātmanām |
ājagāma mahābhāgā tatra puṇyā sarasvatī || 17 ||
[Analyze grammar]

naimiṣe kāñcanākṣī tu munīnāṃ satrayājinām |
āgatā saritāṃ śreṣṭhā tatra bhārata pūjitā || 18 ||
[Analyze grammar]

gayasya yajamānasya gayeṣveva mahākratum |
āhūtā saritāṃ śreṣṭhā gayayajñe sarasvatī || 19 ||
[Analyze grammar]

viśālāṃ tu gayeṣvāhurṛṣayaḥ saṃśitavratāḥ |
saritsā himavatpārśvātprasūtā śīghragāminī || 20 ||
[Analyze grammar]

auddālakestathā yajñe yajatastatra bhārata |
samete sarvataḥ sphīte munīnāṃ maṇḍale tadā || 21 ||
[Analyze grammar]

uttare kosalābhāge puṇye rājanmahātmanaḥ |
auddālakena yajatā pūrvaṃ dhyātā sarasvatī || 22 ||
[Analyze grammar]

ājagāma saricchreṣṭhā taṃ deśamṛṣikāraṇāt |
pūjyamānā munigaṇairvalkalājinasaṃvṛtaiḥ |
manohradeti vikhyātā sā hi tairmanasā hṛtā || 23 ||
[Analyze grammar]

suveṇurṛṣabhadvīpe puṇye rājarṣisevite |
kurośca yajamānasya kurukṣetre mahātmanaḥ |
ājagāma mahābhāgā saricchreṣṭhā sarasvatī || 24 ||
[Analyze grammar]

oghavatyapi rājendra vasiṣṭhena mahātmanā |
samāhūtā kurukṣetre divyatoyā sarasvatī || 25 ||
[Analyze grammar]

dakṣeṇa yajatā cāpi gaṅgādvāre sarasvatī |
vimalodā bhagavatī brahmaṇā yajatā punaḥ |
samāhūtā yayau tatra puṇye haimavate girau || 26 ||
[Analyze grammar]

ekībhūtāstatastāstu tasmiṃstīrthe samāgatāḥ |
saptasārasvataṃ tīrthaṃ tatastatprathitaṃ bhuvi || 27 ||
[Analyze grammar]

iti sapta sarasvatyo nāmataḥ parikīrtitāḥ |
saptasārasvataṃ caiva tīrthaṃ puṇyaṃ tathā smṛtam || 28 ||
[Analyze grammar]

śṛṇu maṅkaṇakasyāpi kaumārabrahmacāriṇaḥ |
āpagāmavagāḍhasya rājanprakrīḍitaṃ mahat || 29 ||
[Analyze grammar]

dṛṣṭvā yadṛcchayā tatra striyamambhasi bhārata |
snāyantīṃ rucirāpāṅgīṃ digvāsasamaninditām |
sarasvatyāṃ mahārāja caskande vīryamambhasi || 30 ||
[Analyze grammar]

tadretaḥ sa tu jagrāha kalaśe vai mahātapāḥ |
saptadhā pravibhāgaṃ tu kalaśasthaṃ jagāma ha |
tatrarṣayaḥ sapta jātā jajñire marutāṃ gaṇāḥ || 31 ||
[Analyze grammar]

vāyuvego vāyubalo vāyuhā vāyumaṇḍalaḥ |
vāyujvālo vāyuretā vāyucakraśca vīryavān |
evamete samutpannā marutāṃ janayiṣṇavaḥ || 32 ||
[Analyze grammar]

idamanyacca rājendra śṛṇvāścaryataraṃ bhuvi |
maharṣeścaritaṃ yādṛktriṣu lokeṣu viśrutam || 33 ||
[Analyze grammar]

purā maṅkaṇakaḥ siddhaḥ kuśāgreṇeti naḥ śrutam |
kṣataḥ kila kare rājaṃstasya śākaraso'sravat |
sa vi śākarasaṃ dṛṣṭvā harṣāviṣṭaḥ pranṛttavān || 34 ||
[Analyze grammar]

tatastasminpranṛtte vai sthāvaraṃ jaṅgamaṃ ca yat |
pranṛttamubhayaṃ vīra tejasā tasya mohitam || 35 ||
[Analyze grammar]

brahmādibhiḥ surai rājannṛṣibhiśca tapodhanaiḥ |
vijñapto vai mahādeva ṛṣerarthe narādhipa |
nāyaṃ nṛtyedyathā deva tathā tvaṃ kartumarhasi || 36 ||
[Analyze grammar]

tato devo muniṃ dṛṣṭvā harṣāviṣṭamatīva ha |
surāṇāṃ hitakāmārthaṃ mahādevo'bhyabhāṣata || 37 ||
[Analyze grammar]

bho bho brāhmaṇa dharmajña kimarthaṃ narinartsi vai |
harṣasthānaṃ kimarthaṃ vai tavedaṃ munisattama |
tapasvino dharmapathe sthitasya dvijasattama || 38 ||
[Analyze grammar]

ṛṣiruvāca |
kiṃ na paśyasi me brahmankarācchākarasaṃ srutam |
yaṃ dṛṣṭvā vai pranṛtto'haṃ harṣeṇa mahatā vibho || 39 ||
[Analyze grammar]

taṃ prahasyābravīddevo muniṃ rāgeṇa mohitam |
ahaṃ na vismayaṃ vipra gacchāmīti prapaśya mām || 40 ||
[Analyze grammar]

evamuktvā muniśreṣṭhaṃ mahādevena dhīmatā |
aṅgulyagreṇa rājendra svāṅguṣṭhastāḍito'bhavat || 41 ||
[Analyze grammar]

tato bhasma kṣatādrājannirgataṃ himasaṃnibham |
taddṛṣṭvā vrīḍito rājansa muniḥ pādayorgataḥ || 42 ||
[Analyze grammar]

ṛṣiruvāca |
nānyaṃ devādahaṃ manye rudrātparataraṃ mahat |
surāsurasya jagato gatistvamasi śūladhṛk || 43 ||
[Analyze grammar]

tvayā sṛṣṭamidaṃ viśvaṃ vadantīha manīṣiṇaḥ |
tvāmeva sarvaṃ viśati punareva yugakṣaye || 44 ||
[Analyze grammar]

devairapi na śakyastvaṃ parijñātuṃ kuto mayā |
tvayi sarve sma dṛśyante surā brahmādayo'nagha || 45 ||
[Analyze grammar]

sarvastvamasi devānāṃ kartā kārayitā ca ha |
tvatprasādātsurāḥ sarve modantīhākutobhayāḥ || 46 ||
[Analyze grammar]

evaṃ stutvā mahādevaṃ sa ṛṣiḥ praṇato'bravīt |
bhagavaṃstvatprasādādvai tapo me na kṣarediti || 47 ||
[Analyze grammar]

tato devaḥ prītamanāstamṛṣiṃ punarabravīt |
tapaste vardhatāṃ vipra matprasādātsahasradhā |
āśrame ceha vatsyāmi tvayā sārdhamahaṃ sadā || 48 ||
[Analyze grammar]

saptasārasvate cāsminyo māmarciṣyate naraḥ |
na tasya durlabhaṃ kiṃcidbhaviteha paratra ca |
sārasvataṃ ca lokaṃ te gamiṣyanti na saṃśayaḥ || 49 ||
[Analyze grammar]

etanmaṅkaṇakasyāpi caritaṃ bhūritejasaḥ |
sa hi putraḥ sajanyāyāmutpanno mātariśvanā || 50 ||
[Analyze grammar]