Chapter 32

saṃjaya uvāca |
evaṃ duryodhane rājangarjamāne muhurmuhuḥ |
yudhiṣṭhirasya saṃkruddho vāsudevo'bravīdidam || 1 ||
[Analyze grammar]

yadi nāma hyayaṃ yuddhe varayettvāṃ yudhiṣṭhira |
arjunaṃ nakulaṃ vāpi sahadevamathāpi vā || 2 ||
[Analyze grammar]

kimidaṃ sāhasaṃ rājaṃstvayā vyāhṛtamīdṛśam |
ekameva nihatyājau bhava rājā kuruṣviti || 3 ||
[Analyze grammar]

etena hi kṛtā yogyā varṣāṇīha trayodaśa |
āyase puruṣe rājanbhīmasenajighāṃsayā || 4 ||
[Analyze grammar]

kathaṃ nāma bhavetkāryamasmābhirbharatarṣabha |
sāhasaṃ kṛtavāṃstvaṃ tu hyanukrośānnṛpottama || 5 ||
[Analyze grammar]

nānyamasyānupaśyāmi pratiyoddhāramāhave |
ṛte vṛkodarātpārthātsa ca nātikṛtaśramaḥ || 6 ||
[Analyze grammar]

tadidaṃ dyūtamārabdhaṃ punareva yathā purā |
viṣamaṃ śakuneścaiva tava caiva viśāṃ pate || 7 ||
[Analyze grammar]

balī bhīmaḥ samarthaśca kṛtī rājā suyodhanaḥ |
balavānvā kṛtī veti kṛtī rājanviśiṣyate || 8 ||
[Analyze grammar]

so'yaṃ rājaṃstvayā śatruḥ same pathi niveśitaḥ |
nyastaścātmā suviṣame kṛcchramāpāditā vayam || 9 ||
[Analyze grammar]

ko nu sarvānvinirjitya śatrūnekena vairiṇā |
paṇitvā caikapāṇena rocayedevamāhavam || 10 ||
[Analyze grammar]

na hi paśyāmi taṃ loke gadāhastaṃ narottamam |
yudhyedduryodhanaṃ saṃkhye kṛtitvāddhi viśeṣayet || 11 ||
[Analyze grammar]

phalgunaṃ vā bhavantaṃ vā mādrīputrāvathāpi vā |
na samarthānahaṃ manye gadāhastasya saṃyuge || 12 ||
[Analyze grammar]

sa kathaṃ vadase śatruṃ yudhyasva gadayeti ha |
ekaṃ ca no nihatyājau bhava rājeti bhārata || 13 ||
[Analyze grammar]

vṛkodaraṃ samāsādya saṃśayo vijaye hi naḥ |
nyāyato yudhyamānānāṃ kṛtī hyeṣa mahābalaḥ || 14 ||
[Analyze grammar]

bhīma uvāca |
madhusūdana mā kārṣīrviṣādaṃ yadunandana |
adya pāraṃ gamiṣyāmi vairasya bhṛśadurgamam || 15 ||
[Analyze grammar]

ahaṃ suyodhanaṃ saṃkhye haniṣyāmi na saṃśayaḥ |
vijayo vai dhruvaṃ kṛṣṇa dharmarājasya dṛśyate || 16 ||
[Analyze grammar]

adhyardhena guṇeneyaṃ gadā gurutarī mama |
na tathā dhārtarāṣṭrasya mā kārṣīrmādhava vyathām || 17 ||
[Analyze grammar]

sāmarānapi lokāṃstrīnnānāśastradharānyudhi |
yodhayeyaṃ raṇe hṛṣṭaḥ kimutādya suyodhanam || 18 ||
[Analyze grammar]

saṃjaya uvāca |
tathā saṃbhāṣamāṇaṃ tu vāsudevo vṛkodaram |
hṛṣṭaḥ saṃpūjayāmāsa vacanaṃ cedamabravīt || 19 ||
[Analyze grammar]

tvāmāśritya mahābāho dharmarājo yudhiṣṭhiraḥ |
nihatāriḥ svakāṃ dīptāṃ śriyaṃ prāpto na saṃśayaḥ || 20 ||
[Analyze grammar]

tvayā vinihatāḥ sarve dhṛtarāṣṭrasutā raṇe |
rājāno rājaputrāśca nāgāśca vinipātitāḥ || 21 ||
[Analyze grammar]

kaliṅgā māgadhāḥ prācyā gāndhārāḥ kuravastathā |
tvāmāsādya mahāyuddhe nihatāḥ pāṇḍunandana || 22 ||
[Analyze grammar]

hatvā duryodhanaṃ cāpi prayacchorvīṃ sasāgarām |
dharmarājāya kaunteya yathā viṣṇuḥ śacīpateḥ || 23 ||
[Analyze grammar]

tvāṃ ca prāpya raṇe pāpo dhārtarāṣṭro vinaṅkṣyati |
tvamasya sakthinī bhaṅktvā pratijñāṃ pārayiṣyasi || 24 ||
[Analyze grammar]

yatnena tu sadā pārtha yoddhavyo dhṛtarāṣṭrajaḥ |
kṛtī ca balavāṃścaiva yuddhaśauṇḍaśca nityadā || 25 ||
[Analyze grammar]

tatastu sātyakī rājanpūjayāmāsa pāṇḍavam |
vividhābhiśca tāṃ vāgbhiḥ pūjayāmāsa mādhavaḥ || 26 ||
[Analyze grammar]

pāñcālāḥ pāṇḍaveyāśca dharmarājapurogamāḥ |
tadvaco bhīmasenasya sarva evābhyapūjayan || 27 ||
[Analyze grammar]

tato bhīmabalo bhīmo yudhiṣṭhiramathābravīt |
sṛñjayaiḥ saha tiṣṭhantaṃ tapantamiva bhāskaram || 28 ||
[Analyze grammar]

ahametena saṃgamya saṃyuge yoddhumutsahe |
na hi śakto raṇe jetuṃ māmeṣa puruṣādhamaḥ || 29 ||
[Analyze grammar]

adya krodhaṃ vimokṣyāmi nihitaṃ hṛdaye bhṛśam |
suyodhane dhārtarāṣṭre khāṇḍave'gnimivārjunaḥ || 30 ||
[Analyze grammar]

śalyamadyoddhariṣyāmi tava pāṇḍava hṛcchayam |
nihatya gadayā pāpamadya rājansukhī bhava || 31 ||
[Analyze grammar]

adya kīrtimayīṃ mālāṃ pratimokṣye tavānagha |
prāṇāñśriyaṃ ca rājyaṃ ca mokṣyate'dya suyodhanaḥ || 32 ||
[Analyze grammar]

rājā ca dhṛtarāṣṭro'dya śrutvā putraṃ mayā hatam |
smariṣyatyaśubhaṃ karma yattacchakunibuddhijam || 33 ||
[Analyze grammar]

ityuktvā bharataśreṣṭho gadāmudyamya vīryavān |
udatiṣṭhata yuddhāya śakro vṛtramivāhvayan || 34 ||
[Analyze grammar]

tamekākinamāsādya dhārtarāṣṭraṃ mahābalam |
niryūthamiva mātaṅgaṃ samahṛṣyanta pāṇḍavāḥ || 35 ||
[Analyze grammar]

tamudyatagadaṃ dṛṣṭvā kailāsamiva śṛṅgiṇam |
bhīmasenastadā rājanduryodhanamathābravīt || 36 ||
[Analyze grammar]

rājñāpi dhṛtarāṣṭreṇa tvayā cāsmāsu yatkṛtam |
smara tadduṣkṛtaṃ karma yadvṛttaṃ vāraṇāvate || 37 ||
[Analyze grammar]

draupadī ca parikliṣṭā sabhāmadhye rajasvalā |
dyūte yadvijito rājā śakunerbuddhiniścayāt || 38 ||
[Analyze grammar]

yāni cānyāni duṣṭātmanpāpāni kṛtavānasi |
anāgaḥsu ca pārtheṣu tasya paśya mahatphalam || 39 ||
[Analyze grammar]

tvatkṛte nihataḥ śete śaratalpe mahāyaśāḥ |
gāṅgeyo bharataśreṣṭhaḥ sarveṣāṃ naḥ pitāmahaḥ || 40 ||
[Analyze grammar]

hato droṇaśca karṇaśca hataḥ śalyaḥ pratāpavān |
vairasya cādikartāsau śakunirnihato yudhi || 41 ||
[Analyze grammar]

bhrātaraste hatāḥ śūrāḥ putrāśca sahasainikāḥ |
rājānaśca hatāḥ śūrāḥ samareṣvanivartinaḥ || 42 ||
[Analyze grammar]

ete cānye ca nihatā bahavaḥ kṣatriyarṣabhāḥ |
prātikāmī tathā pāpo draupadyāḥ kleśakṛddhataḥ || 43 ||
[Analyze grammar]

avaśiṣṭastvamevaikaḥ kulaghno'dhamapūruṣaḥ |
tvāmapyadya haniṣyāmi gadayā nātra saṃśayaḥ || 44 ||
[Analyze grammar]

adya te'haṃ raṇe darpaṃ sarvaṃ nāśayitā nṛpa |
rājyāśāṃ vipulāṃ rājanpāṇḍaveṣu ca duṣkṛtam || 45 ||
[Analyze grammar]

duryodhana uvāca |
kiṃ katthitena bahudhā yudhyasvādya mayā saha |
adya te'haṃ vineṣyāmi yuddhaśraddhāṃ vṛkodara || 46 ||
[Analyze grammar]

kiṃ na paśyasi māṃ pāpa gadāyuddhe vyavasthitam |
himavacchikharākārāṃ pragṛhya mahatīṃ gadām || 47 ||
[Analyze grammar]

gadinaṃ ko'dya māṃ pāpa jetumutsahate ripuḥ |
nyāyato yudhyamānasya deveṣvapi puraṃdaraḥ || 48 ||
[Analyze grammar]

mā vṛthā garja kaunteya śāradābhramivājalam |
darśayasva balaṃ yuddhe yāvattatte'dya vidyate || 49 ||
[Analyze grammar]

tasya tadvacanaṃ śrutvā pāñcālāḥ sahasṛñjayāḥ |
sarve saṃpūjayāmāsustadvaco vijigīṣavaḥ || 50 ||
[Analyze grammar]

taṃ mattamiva mātaṅgaṃ talaśabdena mānavāḥ |
bhūyaḥ saṃharṣayāmāsū rājanduryodhanaṃ nṛpam || 51 ||
[Analyze grammar]

bṛṃhanti kuñjarāstatra hayā heṣanti cāsakṛt |
śastrāṇi saṃpradīpyante pāṇḍavānāṃ jayaiṣiṇām || 52 ||
[Analyze grammar]