Chapter 27

saṃjaya uvāca |
tasminpravṛtte saṃgrāme naravājigajakṣaye |
śakuniḥ saubalo rājansahadevaṃ samabhyayāt || 1 ||
[Analyze grammar]

tato'syāpatatastūrṇaṃ sahadevaḥ pratāpavān |
śaraughānpreṣayāmāsa pataṃgāniva śīghragān |
ulūkaśca raṇe bhīmaṃ vivyādha daśabhiḥ śaraiḥ || 2 ||
[Analyze grammar]

śakunistu mahārāja bhīmaṃ viddhvā tribhiḥ śaraiḥ |
sāyakānāṃ navatyā vai sahadevamavākirat || 3 ||
[Analyze grammar]

te śūrāḥ samare rājansamāsādya parasparam |
vivyadhurniśitairbāṇaiḥ kaṅkabarhiṇavājitaiḥ |
svarṇapuṅkhaiḥ śilādhautairā karṇātprahitaiḥ śaraiḥ || 4 ||
[Analyze grammar]

teṣāṃ cāpabhujotsṛṣṭā śaravṛṣṭirviśāṃ pate |
ācchādayaddiśaḥ sarvā dhārābhiriva toyadaḥ || 5 ||
[Analyze grammar]

tataḥ kruddho raṇe bhīmaḥ sahadevaśca bhārata |
ceratuḥ kadanaṃ saṃkhye kurvantau sumahābalau || 6 ||
[Analyze grammar]

tābhyāṃ śaraśataiśchannaṃ tadbalaṃ tava bhārata |
andhakāramivākāśamabhavattatra tatra ha || 7 ||
[Analyze grammar]

aśvairviparidhāvadbhiḥ śaracchannairviśāṃ pate |
tatra tatra kṛto mārgo vikarṣadbhirhatānbahūn || 8 ||
[Analyze grammar]

nihatānāṃ hayānāṃ ca sahaiva hayayodhibhiḥ |
varmabhirvinikṛttaiśca prāsaiśchinnaiśca māriṣa |
saṃchannā pṛthivī jajñe kusumaiḥ śabalā iva || 9 ||
[Analyze grammar]

yodhāstatra mahārāja samāsādya parasparam |
vyacaranta raṇe kruddhā vinighnantaḥ parasparam || 10 ||
[Analyze grammar]

udvṛttanayanai roṣātsaṃdaṣṭauṣṭhapuṭairmukhaiḥ |
sakuṇḍalairmahī channā padmakiñjalkasaṃnibhaiḥ || 11 ||
[Analyze grammar]

bhujaiśchinnairmahārāja nāgarājakaropamaiḥ |
sāṅgadaiḥ satanutraiśca sāsiprāsaparaśvadhaiḥ || 12 ||
[Analyze grammar]

kabandhairutthitaiśchinnairnṛtyadbhiścāparairyudhi |
kravyādagaṇasaṃkīrṇā ghorābhūtpṛthivī vibho || 13 ||
[Analyze grammar]

alpāvaśiṣṭe sainye tu kauraveyānmahāhave |
prahṛṣṭāḥ pāṇḍavā bhūtvā ninyire yamasādanam || 14 ||
[Analyze grammar]

etasminnantare śūraḥ saubaleyaḥ pratāpavān |
prāsena sahadevasya śirasi prāharadbhṛśam |
sa vihvalo mahārāja rathopastha upāviśat || 15 ||
[Analyze grammar]

sahadevaṃ tathā dṛṣṭvā bhīmasenaḥ pratāpavān |
sarvasainyāni saṃkruddho vārayāmāsa bhārata || 16 ||
[Analyze grammar]

nirbibheda ca nārācaiḥ śataśo'tha sahasraśaḥ |
vinirbhidyākaroccaiva siṃhanādamariṃdama || 17 ||
[Analyze grammar]

tena śabdena vitrastāḥ sarve sahayavāraṇāḥ |
prādravansahasā bhītāḥ śakuneśca padānugāḥ || 18 ||
[Analyze grammar]

prabhagnānatha tāndṛṣṭvā rājā duryodhano'bravīt |
nivartadhvamadharmajñā yudhyadhvaṃ kiṃ sṛtena vaḥ || 19 ||
[Analyze grammar]

iha kīrtiṃ samādhāya pretya lokānsamaśnute |
prāṇāñjahāti yo vīro yudhi pṛṣṭhamadarśayan || 20 ||
[Analyze grammar]

evamuktāstu te rājñā saubalasya padānugāḥ |
pāṇḍavānabhyavartanta mṛtyuṃ kṛtvā nivartanam || 21 ||
[Analyze grammar]

dravadbhistatra rājendra kṛtaḥ śabdo'tidāruṇaḥ |
kṣubdhasāgarasaṃkāśaḥ kṣubhitaḥ sarvato'bhavat || 22 ||
[Analyze grammar]

tāṃstadāpatato dṛṣṭvā saubalasya padānugān |
pratyudyayurmahārāja pāṇḍavā vijaye vṛtāḥ || 23 ||
[Analyze grammar]

pratyāśvasya ca durdharṣaḥ sahadevo viśāṃ pate |
śakuniṃ daśabhirviddhvā hayāṃścāsya tribhiḥ śaraiḥ |
dhanuściccheda ca śaraiḥ saubalasya hasanniva || 24 ||
[Analyze grammar]

athānyaddhanurādāya śakuniryuddhadurmadaḥ |
vivyādha nakulaṃ ṣaṣṭyā bhīmasenaṃ ca saptabhiḥ || 25 ||
[Analyze grammar]

ulūko'pi mahārāja bhīmaṃ vivyādha saptabhiḥ |
sahadevaṃ ca saptatyā parīpsanpitaraṃ raṇe || 26 ||
[Analyze grammar]

taṃ bhīmasenaḥ samare vivyādha niśitaiḥ śaraiḥ |
śakuniṃ ca catuḥṣaṣṭyā pārśvasthāṃśca tribhistribhiḥ || 27 ||
[Analyze grammar]

te hanyamānā bhīmena nārācaistailapāyitaiḥ |
sahadevaṃ raṇe kruddhāśchādayañśaravṛṣṭibhiḥ |
parvataṃ vāridhārābhiḥ savidyuta ivāmbudāḥ || 28 ||
[Analyze grammar]

tato'syāpatataḥ śūraḥ sahadevaḥ pratāpavān |
ulūkasya mahārāja bhallenāpāharacchiraḥ || 29 ||
[Analyze grammar]

sa jagāma rathādbhūmiṃ sahadevena pātitaḥ |
rudhirāplutasarvāṅgo nandayanpāṇḍavānyudhi || 30 ||
[Analyze grammar]

putraṃ tu nihataṃ dṛṣṭvā śakunistatra bhārata |
sāśrukaṇṭho viniḥśvasya kṣatturvākyamanusmaran || 31 ||
[Analyze grammar]

cintayitvā muhūrtaṃ sa bāṣpapūrṇekṣaṇaḥ śvasan |
sahadevaṃ samāsādya tribhirvivyādha sāyakaiḥ || 32 ||
[Analyze grammar]

tānapāsya śarānmuktāñśarasaṃghaiḥ pratāpavān |
sahadevo mahārāja dhanuściccheda saṃyuge || 33 ||
[Analyze grammar]

chinne dhanuṣi rājendra śakuniḥ saubalastadā |
pragṛhya vipulaṃ khaḍgaṃ sahadevāya prāhiṇot || 34 ||
[Analyze grammar]

tamāpatantaṃ sahasā ghorarūpaṃ viśāṃ pate |
dvidhā ciccheda samare saubalasya hasanniva || 35 ||
[Analyze grammar]

asiṃ dṛṣṭvā dvidhā chinnaṃ pragṛhya mahatīṃ gadām |
prāhiṇotsahadevāya sā moghā nyapatadbhuvi || 36 ||
[Analyze grammar]

tataḥ śaktiṃ mahāghorāṃ kālarātrimivodyatām |
preṣayāmāsa saṃkruddhaḥ pāṇḍavaṃ prati saubalaḥ || 37 ||
[Analyze grammar]

tāmāpatantīṃ sahasā śaraiḥ kāñcanabhūṣaṇaiḥ |
tridhā ciccheda samare sahadevo hasanniva || 38 ||
[Analyze grammar]

sā papāta tridhā chinnā bhūmau kanakabhūṣaṇā |
śīryamāṇā yathā dīptā gaganādvai śatahradā || 39 ||
[Analyze grammar]

śaktiṃ vinihatāṃ dṛṣṭvā saubalaṃ ca bhayārditam |
dudruvustāvakāḥ sarve bhaye jāte sasaubalāḥ || 40 ||
[Analyze grammar]

athotkruṣṭaṃ mahaddhyāsītpāṇḍavairjitakāśibhiḥ |
dhārtarāṣṭrāstataḥ sarve prāyaśo vimukhābhavan || 41 ||
[Analyze grammar]

tānvai vimanaso dṛṣṭvā mādrīputraḥ pratāpavān |
śarairanekasāhasrairvārayāmāsa saṃyuge || 42 ||
[Analyze grammar]

tato gāndhārakairguptaṃ pṛṣṭhairaśvairjaye dhṛtam |
āsasāda raṇe yāntaṃ sahadevo'tha saubalam || 43 ||
[Analyze grammar]

svamaṃśamavaśiṣṭaṃ sa saṃsmṛtya śakuniṃ nṛpa |
rathena kāñcanāṅgena sahadevaḥ samabhyayāt |
adhijyaṃ balavatkṛtvā vyākṣipansumahaddhanuḥ || 44 ||
[Analyze grammar]

sa saubalamabhidrutya gṛdhrapatraiḥ śilāśitaiḥ |
bhṛśamabhyahanatkruddhastottrairiva mahādvipam || 45 ||
[Analyze grammar]

uvāca cainaṃ medhāvī nigṛhya smārayanniva |
kṣatradharme sthito bhūtvā yudhyasva puruṣo bhava || 46 ||
[Analyze grammar]

yattadā hṛṣyase mūḍha glahannakṣaiḥ sabhātale |
phalamadya prapadyasva karmaṇastasya durmate || 47 ||
[Analyze grammar]

nihatāste durātmāno ye'smānavahasanpurā |
duryodhanaḥ kulāṅgāraḥ śiṣṭastvaṃ tasya mātulaḥ || 48 ||
[Analyze grammar]

adya te vihaniṣyāmi kṣureṇonmathitaṃ śiraḥ |
vṛkṣātphalamivoddhṛtya laguḍena pramāthinā || 49 ||
[Analyze grammar]

evamuktvā mahārāja sahadevo mahābalaḥ |
saṃkruddho naraśārdūlo vegenābhijagāma ha || 50 ||
[Analyze grammar]

abhigamya tu durdharṣaḥ sahadevo yudhāṃ patiḥ |
vikṛṣya balavaccāpaṃ krodhena prahasanniva || 51 ||
[Analyze grammar]

śakuniṃ daśabhirviddhvā caturbhiścāsya vājinaḥ |
chatraṃ dhvajaṃ dhanuścāsya chittvā siṃha ivānadat || 52 ||
[Analyze grammar]

chinnadhvajadhanuśchatraḥ sahadevena saubalaḥ |
tato viddhaśca bahubhiḥ sarvamarmasu sāyakaiḥ || 53 ||
[Analyze grammar]

tato bhūyo mahārāja sahadevaḥ pratāpavān |
śakuneḥ preṣayāmāsa śaravṛṣṭiṃ durāsadām || 54 ||
[Analyze grammar]

tatastu kruddhaḥ subalasya putro mādrīsutaṃ sahadevaṃ vimarde |
prāsena jāmbūnadabhūṣaṇena jighāṃsureko'bhipapāta śīghram || 55 ||
[Analyze grammar]

mādrīsutastasya samudyataṃ taṃ prāsaṃ suvṛttau ca bhujau raṇāgre |
bhallaistribhiryugapatsaṃcakarta nanāda coccaistarasājimadhye || 56 ||
[Analyze grammar]

tasyāśukārī susamāhitena suvarṇapuṅkhena dṛḍhāyasena |
bhallena sarvāvaraṇātigena śiraḥ śarīrātpramamātha bhūyaḥ || 57 ||
[Analyze grammar]

śareṇa kārtasvarabhūṣitena divākarābhena susaṃśitena |
hṛtottamāṅgo yudhi pāṇḍavena papāta bhūmau subalasya putraḥ || 58 ||
[Analyze grammar]

sa tacchiro vegavatā śareṇa suvarṇapuṅkhena śilāśitena |
prāverayatkupitaḥ pāṇḍuputro yattatkurūṇāmanayasya mūlam || 59 ||
[Analyze grammar]

hṛtottamāṅgaṃ śakuniṃ samīkṣya bhūmau śayānaṃ rudhirārdragātram |
yodhāstvadīyā bhayanaṣṭasattvā diśaḥ prajagmuḥ pragṛhītaśastrāḥ || 60 ||
[Analyze grammar]

vipradrutāḥ śuṣkamukhā visaṃjñā gāṇḍīvaghoṣeṇa samāhatāśca |
bhayārditā bhagnarathāśvanāgāḥ padātayaścaiva sadhārtarāṣṭrāḥ || 61 ||
[Analyze grammar]

tato rathācchakuniṃ pātayitvā mudānvitā bhārata pāṇḍaveyāḥ |
śaṅkhānpradadhmuḥ samare prahṛṣṭāḥ sakeśavāḥ sainikānharṣayantaḥ || 62 ||
[Analyze grammar]

taṃ cāpi sarve pratipūjayanto hṛṣṭā bruvāṇāḥ sahadevamājau |
diṣṭyā hato naikṛtiko durātmā sahātmajo vīra raṇe tvayeti || 63 ||
[Analyze grammar]