Chapter 62

saṃjaya uvāca |
duḥśāsane tu nihate putrāstava mahārathāḥ |
mahākrodhaviṣā vīrāḥ samareṣvapalāyinaḥ |
daśa rājanmahāvīryo bhīmaṃ prācchādayañśaraiḥ || 1 ||
[Analyze grammar]

kavacī niṣaṅgī pāśī daṇḍadhāro dhanurdharaḥ |
alolupaḥ śalaḥ saṃdho vātavegasuvarcasau || 2 ||
[Analyze grammar]

ete sametya sahitā bhrātṛvyasanakarśitāḥ |
bhīmasenaṃ mahābāhuṃ mārgaṇaiḥ samavārayan || 3 ||
[Analyze grammar]

sa vāryamāṇo viśikhaiḥ samantāttairmahārathaiḥ |
bhīmaḥ krodhābhiraktākṣaḥ kruddhaḥ kāla ivābabhau || 4 ||
[Analyze grammar]

tāṃstu bhallairmahāvegairdaśabhirdaśabhiḥ śitaiḥ |
rukmāṅgado rukmapuṅkhaiḥ pārtho ninye yamakṣayam || 5 ||
[Analyze grammar]

hateṣu teṣu vīreṣu pradudrāva balaṃ tava |
paśyataḥ sūtaputrasya pāṇḍavasya bhayārditam || 6 ||
[Analyze grammar]

tataḥ karṇo mahārāja praviveśa mahāraṇam |
dṛṣṭvā bhīmasya vikrāntamantakasya prajāsviva || 7 ||
[Analyze grammar]

tasya tvākārabhāvajñaḥ śalyaḥ samitiśobhanaḥ |
uvāca vacanaṃ karṇaṃ prāptakālamariṃdama |
mā vyathāṃ kuru rādheya naitattvayyupapadyate || 8 ||
[Analyze grammar]

ete dravanti rājāno bhīmasenabhayārditāḥ |
duryodhanaśca saṃmūḍho bhrātṛvyasanaduḥkhitaḥ || 9 ||
[Analyze grammar]

duḥśāsanasya rudhire pīyamāne mahātmanā |
vyāpannacetasaścaiva śokopahatamanyavaḥ || 10 ||
[Analyze grammar]

duryodhanamupāsante parivārya samantataḥ |
kṛpaprabhṛtayaḥ karṇa hataśeṣāśca sodarāḥ || 11 ||
[Analyze grammar]

pāṇḍavā labdhalakṣāśca dhanaṃjayapurogamāḥ |
tvāmevābhimukhāḥ śūrā yuddhāya samupāsthitāḥ || 12 ||
[Analyze grammar]

sa tvaṃ puruṣaśārdūla pauruṣe mahati sthitaḥ |
kṣatradharmaṃ puraskṛtya pratyudyāhi dhanaṃjayam || 13 ||
[Analyze grammar]

bhāro hi dhārtarāṣṭreṇa tvayi sarvaḥ samarpitaḥ |
tamudvaha mahābāho yathāśakti yathābalam |
jaye syādvipulā kīrtirdhruvaḥ svargaḥ parājaye || 14 ||
[Analyze grammar]

vṛṣasenaśca rādheya saṃkruddhastanayastava |
tvayi mohasamāpanne pāṇḍavānabhidhāvati || 15 ||
[Analyze grammar]

etacchrutvā tu vacanaṃ śalyasyāmitatejasaḥ |
hṛdi mānuṣyakaṃ bhāvaṃ cakre yuddhāya susthiram || 16 ||
[Analyze grammar]

tataḥ kruddho vṛṣaseno'bhyadhāvadātasthivāṃsaṃ svarathaṃ hatārim |
vṛkodaraṃ kālamivāttadaṇḍaṃ gadāhastaṃ pothamānaṃ tvadīyān || 17 ||
[Analyze grammar]

tamabhyadhāvannakulaḥ pravīro roṣādamitraṃ pratudanpṛṣatkaiḥ |
karṇasya putraṃ samare prahṛṣṭaṃ jiṣṇurjighāṃsurmaghaveva jambham || 18 ||
[Analyze grammar]

tato dhvajaṃ sphāṭikacitrakambuṃ ciccheda vīro nakulaḥ kṣureṇa |
karṇātmajasyeṣvasanaṃ ca citraṃ bhallena jāmbūnadapaṭṭanaddham || 19 ||
[Analyze grammar]

athānyadādāya dhanuḥ suśīghraṃ karṇātmajaḥ pāṇḍavamabhyavidhyat |
divyairmahāstrairnakulaṃ mahāstro duḥśāsanasyāpacitiṃ yiyāsuḥ || 20 ||
[Analyze grammar]

tataḥ kruddho nakulastaṃ mahātmā śarairmaholkāpratimairavidhyat |
divyairastrairabhyavidhyacca so'pi karṇasya putro nakulaṃ kṛtāstraḥ || 21 ||
[Analyze grammar]

karṇasya putro nakulasya rājansarvānaśvānakṣiṇoduttamāstraiḥ |
vanāyujānsukumārasya śubhrānalaṃkṛtāñjātarūpeṇa śīghrān || 22 ||
[Analyze grammar]

tato hatāśvādavaruhya yānādādāya carma ruciraṃ cāṣṭacandram |
ākāśasaṃkāśamasiṃ gṛhītvā poplūyamānaḥ khagavaccacāra || 23 ||
[Analyze grammar]

tato'ntarikṣe nṛvarāśvanāgāṃściccheda mārgānvicaranvicitrān |
te prāpatannasinā gāṃ viśastā yathāśvamedhe paśavaḥ śamitrā || 24 ||
[Analyze grammar]

dvisāhasrā viditā yuddhaśauṇḍā nānādeśyāḥ subhṛtāḥ satyasaṃdhāḥ |
ekena śīghraṃ nakulena kṛttāḥ sārepsunevottamacandanāste || 25 ||
[Analyze grammar]

tamāpatantaṃ nakulaṃ so'bhipatya samantataḥ sāyakairabhyavidhyat |
sa tudyamāno nakulaḥ pṛṣatkairvivyādha vīraṃ sa cukopa viddhaḥ || 26 ||
[Analyze grammar]

taṃ karṇaputro vidhamantamekaṃ narāśvamātaṅgarathapravekān |
krīḍantamaṣṭādaśabhiḥ pṛṣatkairvivyādha vīraṃ sa cukopa viddhaḥ || 27 ||
[Analyze grammar]

tato'bhyadhāvatsamare jighāṃsuḥ karṇātmajaṃ pāṇḍusuto nṛvīraḥ |
tasyeṣubhirvyadhamatkarṇaputro mahāraṇe carma sahasratāram || 28 ||
[Analyze grammar]

tasyāyasaṃ niśitaṃ tīkṣṇadhāramasiṃ vikośaṃ gurubhārasāham |
dviṣaccharīrāpaharaṃ sughoramādhunvataḥ sarpamivograrūpam || 29 ||
[Analyze grammar]

kṣipraṃ śaraiḥ ṣaḍbhiramitrasāhaścakarta khaḍgaṃ niśitaiḥ sudhāraiḥ |
punaśca pītairniśitaiḥ pṛṣatkaiḥ stanāntare gāḍhamathābhyavidhyat || 30 ||
[Analyze grammar]

sa bhīmasenasya rathaṃ hatāśvo mādrīsutaḥ karṇasutābhitaptaḥ |
āpupluve siṃha ivācalāgraṃ saṃprekṣamāṇasya dhanaṃjayasya || 31 ||
[Analyze grammar]

nakulamatha viditvā chinnabāṇāsanāsiṃ virathamariśarārtaṃ karṇaputrāstrabhagnam |
pavanadhutapatākā hrādino valgitāśvā varapuruṣaniyattāste rathāḥ śīghramīyuḥ || 32 ||
[Analyze grammar]

drupadasutavariṣṭhāḥ pañca śaineyaṣaṣṭhā drupadaduhitṛputrāḥ pañca cāmitrasāhāḥ |
dviradarathanarāśvānsūdayantastvadīyānbhujagapatinikāśairmārgaṇairāttaśastrāḥ || 33 ||
[Analyze grammar]

atha tava rathamukhyāstānpratīyustvaranto hṛdikasutakṛpau ca drauṇiduryodhanau ca |
śakuniśukavṛkāśca krāthadevāvṛdhau ca dviradajaladaghoṣaiḥ syandanaiḥ kārmukaiśca || 34 ||
[Analyze grammar]

tava naravaravaryāstāndaśaikaṃ ca vīrānpravaraśaravarāgryaistāḍayanto'bhyarundhan |
navajaladasavarṇairhastibhistānudīyurgiriśikharanikāśairbhīmavegaiḥ kuṇindāḥ || 35 ||
[Analyze grammar]

sukalpitā haimavatā madotkaṭā raṇābhikāmaiḥ kṛtibhiḥ samāsthitāḥ |
suvarṇajālāvatatā babhurgajāstathā yathā vai jaladāḥ savidyutaḥ || 36 ||
[Analyze grammar]

kuṇindaputro daśabhirmahāyasaiḥ kṛpaṃ sasūtāśvamapīḍayadbhṛśam |
tataḥ śaradvatsutasāyakairhataḥ sahaiva nāgena papāta bhūtale || 37 ||
[Analyze grammar]

kuṇindaputrāvarajastu tomarairdivākarāṃśupratimairayasmayaiḥ |
rathaṃ ca vikṣobhya nanāda nardatastato'sya gāndhārapatiḥ śiro'harat || 38 ||
[Analyze grammar]

tataḥ kuṇindeṣu hateṣu teṣvatha prahṛṣṭarūpāstava te mahārathāḥ |
bhṛśaṃ pradadhmurlavaṇāmbusaṃbhavānparāṃśca bāṇāsanapāṇayo'bhyayuḥ || 39 ||
[Analyze grammar]

athābhavadyuddhamatīva dāruṇaṃ punaḥ kurūṇāṃ saha pāṇḍusṛñjayaiḥ |
śarāsiśaktyṛṣṭigadāparaśvadhairnarāśvanāgāsuharaṃ bhṛśākulam || 40 ||
[Analyze grammar]

rathāśvamātaṅgapadātibhistataḥ parasparaṃ viprahatāpatankṣitau |
yathā savidyutstanitā balāhakāḥ samāsthitā digbhya ivogramārutaiḥ || 41 ||
[Analyze grammar]

tataḥ śatānīkahatānmahāgajāṃstathā rathānpattigaṇāṃśca tāvakān |
jaghāna bhojaśca hayānathāpatanviśastrakṛttāḥ kṛtavarmaṇā dvipāḥ || 42 ||
[Analyze grammar]

athāpare drauṇiśarāhatā dvipāstrayaḥ sasarvāyudhayodhaketavaḥ |
nipetururvyāṃ vyasavaḥ prapātitāstathā yathā vajrahatā mahācalāḥ || 43 ||
[Analyze grammar]

kuṇindarājāvarajādanantaraḥ stanāntare patrivarairatāḍayat |
tavātmajaṃ tasya tavātmajaḥ śaraiḥ śitaiḥ śarīraṃ bibhide dvipaṃ ca tam || 44 ||
[Analyze grammar]

sa nāgarājaḥ saha rājasūnunā papāta raktaṃ bahu sarvataḥ kṣaran |
śacīśavajraprahato'mbudāgame yathā jalaṃ gairikaparvatastathā || 45 ||
[Analyze grammar]

kuṇindaputraprahito'paradvipaḥ śukaṃ sasūtāśvarathaṃ vyapothayat |
tato'patatkrāthaśarābhidāritaḥ saheśvaro vajrahato yathā giriḥ || 46 ||
[Analyze grammar]

rathī dvipasthena hato'pataccharaiḥ krāthādhipaḥ parvatajena durjayaḥ |
savājisūteṣvasanastathāpatadyathā mahāvātahato mahādrumaḥ || 47 ||
[Analyze grammar]

vṛko dvipasthaṃ girirājavāsinaṃ bhṛśaṃ śarairdvādaśabhiḥ parābhinat |
tato vṛkaṃ sāśvarathaṃ mahājavaṃ tvaraṃścaturbhiścaraṇe vyapothayat || 48 ||
[Analyze grammar]

sa nāgarājaḥ saniyantṛko'patatparāhato babhrusuteṣubhirbhṛśam |
sa cāpi devāvṛdhasūnurarditaḥ papāta nunnaḥ sahadevasūnunā || 49 ||
[Analyze grammar]

viṣāṇapotrāparagātraghātinā gajena hantuṃ śakuneḥ kuṇindajaḥ |
jagāma vegena bhṛśārdayaṃśca taṃ tato'sya gāndhārapatiḥ śiro'harat || 50 ||
[Analyze grammar]

tataḥ śatānīkahatā mahāgajā hayā rathāḥ pattigaṇāśca tāvakāḥ |
suparṇavātaprahatā yathā nagāstathā gatā gāmavaśā vicūrṇitāḥ || 51 ||
[Analyze grammar]

tato'bhyavidhyadbahubhiḥ śitaiḥ śaraiḥ kuṇindaputro nakulātmajaṃ smayan |
tato'sya kāyānnicakarta nākuliḥ śiraḥ kṣureṇāmbujasaṃnibhānanam || 52 ||
[Analyze grammar]

tataḥ śatānīkamavidhyadāśugaistribhiḥ śitaiḥ karṇasuto'rjunaṃ tribhiḥ |
tribhiśca bhīmaṃ nakulaṃ ca saptabhirjanārdanaṃ dvādaśabhiśca sāyakaiḥ || 53 ||
[Analyze grammar]

tadasya karmātimanuṣyakarmaṇaḥ samīkṣya hṛṣṭāḥ kuravo'bhyapūjayan |
parākramajñāstu dhanaṃjayasya te huto'yamagnāviti taṃ tu menire || 54 ||
[Analyze grammar]

tataḥ kirīṭī paravīraghātī hatāśvamālokya narapravīram |
tamabhyadhāvadvṛṣasenamāhave sa sūtajasya pramukhe sthitaṃ tadā || 55 ||
[Analyze grammar]

tamāpatantaṃ naravīramugraṃ mahāhave bāṇasahasradhāriṇam |
abhyāpatatkarṇasuto mahāratho yathaiva cendraṃ namuciḥ purātane || 56 ||
[Analyze grammar]

tato'dbhutenaikaśatena pārthaṃ śarairviddhvā sūtaputrasya putraḥ |
nanāda nādaṃ sumahānubhāvo viddhveva śakraṃ namuciḥ purā vai || 57 ||
[Analyze grammar]

punaḥ sa pārthaṃ vṛṣasena ugrairbāṇairavidhyadbhujamūlamadhye |
tathaiva kṛṣṇaṃ navabhiḥ samārdayatpunaśca pārthaṃ daśabhiḥ śitāgraiḥ || 58 ||
[Analyze grammar]

tataḥ kirīṭī raṇamūrdhni kopātkṛtvā triśākhāṃ bhrukuṭiṃ lalāṭe |
mumoca bāṇānviśikhānmahātmā vadhāya rājansūtaputrasya saṃkhye || 59 ||
[Analyze grammar]

vivyādha cainaṃ daśabhiḥ pṛṣatkairmarmasvasaktaṃ prasabhaṃ kirīṭī |
ciccheda cāsyeṣvasanaṃ bhujau ca kṣuraiścaturbhiḥ śira eva cograiḥ || 60 ||
[Analyze grammar]

sa pārthabāṇābhihataḥ papāta rathādvibāhurviśirā dharāyām |
supuṣpitaḥ parṇadharo'tikāyo vāteritaḥ śāla ivādriśṛṅgāt || 61 ||
[Analyze grammar]

taṃ prekṣya bāṇābhihataṃ patantaṃ rathātsutaṃ sūtajaḥ kṣiprakārī |
rathaṃ rathenāśu jagāma vegātkirīṭinaḥ putravadhābhitaptaḥ || 62 ||
[Analyze grammar]