Chapter 27

saṃjaya uvāca |
prayāneva tadā karṇo harṣayanvāhinīṃ tava |
ekaikaṃ samare dṛṣṭvā pāṇḍavaṃ paryapṛcchata || 1 ||
[Analyze grammar]

yo mamādya mahātmānaṃ darśayecchvetavāhanam |
tasmai dadyāmabhipretaṃ varaṃ yaṃ manasecchati || 2 ||
[Analyze grammar]

sa cettadabhimanyeta tasmai dadyāmahaṃ punaḥ |
śakaṭaṃ ratnasaṃpūrṇaṃ yo me brūyāddhanaṃjayam || 3 ||
[Analyze grammar]

sa cettadabhimanyeta puruṣo'rjunadarśivān |
anyaṃ tasmai punardadyāṃ sauvarṇaṃ hastiṣaḍgavam || 4 ||
[Analyze grammar]

tathā tasmai punardadyāṃ strīṇāṃ śatamalaṃkṛtam |
śyāmānāṃ niṣkakaṇṭhīnāṃ gītavādyavipaścitām || 5 ||
[Analyze grammar]

sa cettadabhimanyeta puruṣo'rjunadarśivān |
anyaṃ tasmai varaṃ dadyāṃ śvetānpañcaśatānhayān || 6 ||
[Analyze grammar]

hemabhāṇḍaparicchannānsumṛṣṭamaṇikuṇḍalān |
sudāntānapi caivāhaṃ dadyāmaṣṭaśatānparān || 7 ||
[Analyze grammar]

rathaṃ ca śubhraṃ sauvarṇaṃ dadyāṃ tasmai svalaṃkṛtam |
yuktaṃ paramakāmbojairyo me brūyāddhanaṃjayam || 8 ||
[Analyze grammar]

anyaṃ tasmai varaṃ dadyāṃ kuñjarāṇāṃ śatāni ṣaṭ |
kāñcanairvividhairbhāṇḍairācchannānhemamālinaḥ |
utpannānaparānteṣu vinītānhastiśikṣakaiḥ || 9 ||
[Analyze grammar]

sa cettadabhimanyeta puruṣo'rjunadarśivān |
anyaṃ tasmai varaṃ dadyāṃ yamasau kāmayetsvayam || 10 ||
[Analyze grammar]

putradārānvihārāṃśca yadanyadvittamasti me |
tacca tasmai punardadyāṃ yadyatsa manasecchati || 11 ||
[Analyze grammar]

hatvā ca sahitau kṛṣṇau tayorvittāni sarvaśaḥ |
tasmai dadyāmahaṃ yo me prabrūyātkeśavārjunau || 12 ||
[Analyze grammar]

etā vācaḥ subahuśaḥ karṇa uccārayanyudhi |
dadhmau sāgarasaṃbhūtaṃ susvanaṃ śaṅkhamuttamam || 13 ||
[Analyze grammar]

tā vācaḥ sūtaputrasya tathā yuktā niśamya tu |
duryodhano mahārāja prahṛṣṭaḥ sānugo'bhavat || 14 ||
[Analyze grammar]

tato dundubhinirghoṣo mṛdaṅgānāṃ ca sarvaśaḥ |
siṃhanādaḥ savāditraḥ kuñjarāṇāṃ ca nisvanaḥ || 15 ||
[Analyze grammar]

prādurāsīttadā rājaṃstvatsainye bharatarṣabha |
yodhānāṃ saṃprahṛṣṭānāṃ tathā samabhavatsvanaḥ || 16 ||
[Analyze grammar]

tathā prahṛṣṭe sainye tu plavamānaṃ mahāratham |
vikatthamānaṃ samare rādheyamarikarśanam |
madrarājaḥ prahasyedaṃ vacanaṃ pratyabhāṣata || 17 ||
[Analyze grammar]

mā sūtaputra mānena sauvarṇaṃ hastiṣaḍgavam |
prayaccha puruṣāyādya drakṣyasi tvaṃ dhanaṃjayam || 18 ||
[Analyze grammar]

bālyādiva tvaṃ tyajasi vasu vaiśravaṇo yathā |
ayatnenaiva rādheya draṣṭāsyadya dhanaṃjayam || 19 ||
[Analyze grammar]

parāsṛjasi mithyā kiṃ kiṃ ca tvaṃ bahu mūḍhavat |
apātradāne ye doṣāstānmohānnāvabudhyase || 20 ||
[Analyze grammar]

yatpravedayase vittaṃ bahutvena khalu tvayā |
śakyaṃ bahuvidhairyajñairyaṣṭuṃ sūta yajasva taiḥ || 21 ||
[Analyze grammar]

yacca prārthayase hantuṃ kṛṣṇau mohānmṛṣaiva tat |
na hi śuśruma saṃmarde kroṣṭrā siṃhau nipātitau || 22 ||
[Analyze grammar]

aprārthitaṃ prārthayase suhṛdo na hi santi te |
ye tvāṃ na vārayantyāśu prapatantaṃ hutāśane || 23 ||
[Analyze grammar]

kālakāryaṃ na jānīṣe kālapakvo'syasaṃśayam |
bahvabaddhamakarṇīyaṃ ko hi brūyājjijīviṣuḥ || 24 ||
[Analyze grammar]

samudrataraṇaṃ dorbhyāṃ kaṇṭhe baddhvā yathā śilām |
giryagrādvā nipatanaṃ tādṛktava cikīrṣitam || 25 ||
[Analyze grammar]

sahitaḥ sarvayodhaistvaṃ vyūḍhānīkaiḥ surakṣitaḥ |
dhanaṃjayena yudhyasva śreyaścetprāptumicchasi || 26 ||
[Analyze grammar]

hitārthaṃ dhārtarāṣṭrasya bravīmi tvā na hiṃsayā |
śraddhatsvaitanmayā proktaṃ yadi te'sti jijīviṣā || 27 ||
[Analyze grammar]

karṇa uvāca |
svavīrye'haṃ parāśvasya prārthayāmyarjunaṃ raṇe |
tvaṃ tu mitramukhaḥ śatrurmāṃ bhīṣayitumicchasi || 28 ||
[Analyze grammar]

na māmasmādabhiprāyātkaścidadya nivartayet |
apīndro vajramudyamya kiṃ nu martyaḥ kariṣyati || 29 ||
[Analyze grammar]

saṃjaya uvāca |
iti karṇasya vākyānte śalyaḥ prāhottaraṃ vacaḥ |
cukopayiṣuratyarthaṃ karṇaṃ madreśvaraḥ punaḥ || 30 ||
[Analyze grammar]

yadā vai tvāṃ phalgunaveganunnā jyācoditā hastavatā visṛṣṭāḥ |
anvetāraḥ kaṅkapatrāḥ śitāgrāstadā tapsyasyarjunasyābhiyogāt || 31 ||
[Analyze grammar]

yadā divyaṃ dhanurādāya pārthaḥ prabhāsayanpṛtanāṃ savyasācī |
tvāmardayeta niśitaiḥ pṛṣatkaistadā paścāttapsyase sūtaputra || 32 ||
[Analyze grammar]

bālaścandraṃ māturaṅke śayāno yathā kaścitprārthayate'pahartum |
tadvanmohādyatamāno rathasthastvaṃ prārthayasyarjunamadya jetum || 33 ||
[Analyze grammar]

triśūlamāśliṣya sutīkṣṇadhāraṃ sarvāṇi gātrāṇi nigharṣasi tvam |
sutīkṣṇadhāropamakarmaṇā tvaṃ yuyutsase yo'rjunenādya karṇa || 34 ||
[Analyze grammar]

siddhaṃ siṃhaṃ kesariṇaṃ bṛhantaṃ bālo mūḍhaḥ kṣudramṛgastarasvī |
samāhvayettadvadetattavādya samāhvānaṃ sūtaputrārjunasya || 35 ||
[Analyze grammar]

mā sūtaputrāhvaya rājaputraṃ mahāvīryaṃ kesariṇaṃ yathaiva |
vane sṛgālaḥ piśitasya tṛpto mā pārthamāsādya vinaṅkṣyasi tvam || 36 ||
[Analyze grammar]

īṣādantaṃ mahānāgaṃ prabhinnakaraṭāmukham |
śaśakāhvayase yuddhe karṇa pārthaṃ dhanaṃjayam || 37 ||
[Analyze grammar]

bilasthaṃ kṛṣṇasarpaṃ tvaṃ bālyātkāṣṭhena vidhyasi |
mahāviṣaṃ pūrṇakośaṃ yatpārthaṃ yoddhumicchasi || 38 ||
[Analyze grammar]

siṃhaṃ kesariṇaṃ kruddhamatikramyābhinardasi |
sṛgāla iva mūḍhatvānnṛsiṃhaṃ karṇa pāṇḍavam || 39 ||
[Analyze grammar]

suparṇaṃ patagaśreṣṭhaṃ vainateyaṃ tarasvinam |
laṭvevāhvayase pāte karṇa pārthaṃ dhanaṃjayam || 40 ||
[Analyze grammar]

sarvāmbhonilayaṃ bhīmamūrmimantaṃ jhaṣāyutam |
candrodaye vivartantamaplavaḥ saṃtitīrṣasi || 41 ||
[Analyze grammar]

ṛṣabhaṃ dundubhigrīvaṃ tīkṣṇaśṛṅgaṃ prahāriṇam |
vatsa āhvayase yuddhe karṇa pārthaṃ dhanaṃjayam || 42 ||
[Analyze grammar]

mahāghoṣaṃ mahāmeghaṃ darduraḥ pratinardasi |
kāmatoyapradaṃ loke naraparjanyamarjunam || 43 ||
[Analyze grammar]

yathā ca svagṛhasthaḥ śvā vyāghraṃ vanagataṃ bhaṣet |
tathā tvaṃ bhaṣase karṇa naravyāghraṃ dhanaṃjayam || 44 ||
[Analyze grammar]

sṛgālo'pi vane karṇa śaśaiḥ parivṛto vasan |
manyate siṃhamātmānaṃ yāvatsiṃhaṃ na paśyati || 45 ||
[Analyze grammar]

tathā tvamapi rādheya siṃhamātmānamicchasi |
apaśyañśatrudamanaṃ naravyāghraṃ dhanaṃjayam || 46 ||
[Analyze grammar]

vyāghraṃ tvaṃ manyase''tmānaṃ yāvatkṛṣṇau na paśyasi |
samāsthitāvekarathe sūryācandramasāviva || 47 ||
[Analyze grammar]

yāvadgāṇḍīvanirghoṣaṃ na śṛṇoṣi mahāhave |
tāvadeva tvayā karṇa śakyaṃ vaktuṃ yathecchasi || 48 ||
[Analyze grammar]

rathaśabdadhanuḥśabdairnādayantaṃ diśo daśa |
nardantamiva śārdūlaṃ dṛṣṭvā kroṣṭā bhaviṣyasi || 49 ||
[Analyze grammar]

nityameva sṛgālastvaṃ nityaṃ siṃho dhanaṃjayaḥ |
vīrapradveṣaṇānmūḍha nityaṃ kroṣṭeva lakṣyase || 50 ||
[Analyze grammar]

yathākhuḥ syādbiḍālaśca śvā vyāghraśca balābale |
yathā sṛgālaḥ siṃhaśca yathā ca śaśakuñjarau || 51 ||
[Analyze grammar]

yathānṛtaṃ ca satyaṃ ca yathā cāpi viṣāmṛte |
tathā tvamapi pārthaśca prakhyātāvātmakarmabhiḥ || 52 ||
[Analyze grammar]

saṃjaya uvāca |
adhikṣiptastu rādheyaḥ śalyenāmitatejasā |
śalyamāha susaṃkruddho vākśalyamavadhārayan || 53 ||
[Analyze grammar]

guṇānguṇavataḥ śalya guṇavānvetti nāguṇaḥ |
tvaṃ tu nityaṃ guṇairhīnaḥ kiṃ jñāsyasyaguṇo guṇān || 54 ||
[Analyze grammar]

arjunasya mahāstrāṇi krodhaṃ vīryaṃ dhanuḥ śarān |
ahaṃ śalyābhijānāmi na tvaṃ jānāsi tattathā || 55 ||
[Analyze grammar]

evamevātmano vīryamahaṃ vīryaṃ ca pāṇḍave |
jānannevāhvaye yuddhe śalya nāgniṃ pataṃgavat || 56 ||
[Analyze grammar]

asti cāyamiṣuḥ śalya supuṅkho raktabhojanaḥ |
ekatūṇīśayaḥ patrī sudhautaḥ samalaṃkṛtaḥ || 57 ||
[Analyze grammar]

śete candanapūrṇena pūjito bahulāḥ samāḥ |
āheyo viṣavānugro narāśvadvipasaṃghahā || 58 ||
[Analyze grammar]

ekavīro mahāraudrastanutrāsthividāraṇaḥ |
nirbhindyāṃ yena ruṣṭo'hamapi meruṃ mahāgirim || 59 ||
[Analyze grammar]

tamahaṃ jātu nāsyeyamanyasminphalgunādṛte |
kṛṣṇādvā devakīputrātsatyaṃ cātra śṛṇuṣva me || 60 ||
[Analyze grammar]

tenāhamiṣuṇā śalya vāsudevadhanaṃjayau |
yotsye paramasaṃkruddhastatkarma sadṛśaṃ mama || 61 ||
[Analyze grammar]

sarveṣāṃ vāsudevānāṃ kṛṣṇe lakṣmīḥ pratiṣṭhitā |
sarveṣāṃ pāṇḍuputrāṇāṃ jayaḥ pārthe pratiṣṭhitaḥ |
ubhayaṃ tatsamāsādya ko'tivartitumarhati || 62 ||
[Analyze grammar]

tāvetau puruṣavyāghrau sametau syandane sthitau |
māmekamabhisaṃyātau sujātaṃ śalya paśya me || 63 ||
[Analyze grammar]

pitṛṣvasāmātulajau bhrātarāvaparājitau |
maṇī sūtra iva protau draṣṭāsi nihatau mayā || 64 ||
[Analyze grammar]

arjune gāṇḍivaṃ kṛṣṇe cakraṃ tārkṣyakapidhvajau |
bhīrūṇāṃ trāsajananau śalya harṣakarau mama || 65 ||
[Analyze grammar]

tvaṃ tu duṣprakṛtirmūḍho mahāyuddheṣvakovidaḥ |
bhayāvatīrṇaḥ saṃtrāsādabaddhaṃ bahu bhāṣase || 66 ||
[Analyze grammar]

saṃstauṣi tvaṃ tu kenāpi hetunā tau kudeśaja |
tau hatvā samare hantā tvāmaddhā sahabāndhavam || 67 ||
[Analyze grammar]

pāpadeśaja durbuddhe kṣudra kṣatriyapāṃsana |
suhṛdbhūtvā ripuḥ kiṃ māṃ kṛṣṇābhyāṃ bhīṣayannasi || 68 ||
[Analyze grammar]

tau vā mamādya hantārau hantāsmi samare sthitau |
nāhaṃ bibhemi kṛṣṇābhyāṃ vijānannātmano balam || 69 ||
[Analyze grammar]

vāsudevasahasraṃ vā phalgunānāṃ śatāni ca |
ahameko haniṣyāmi joṣamāssva kudeśaja || 70 ||
[Analyze grammar]

striyo bālāśca vṛddhāśca prāyaḥ krīḍāgatā janāḥ |
yā gāthāḥ saṃpragāyanti kurvanto'dhyayanaṃ yathā |
tā gāthāḥ śṛṇu me śalya madrakeṣu durātmasu || 71 ||
[Analyze grammar]

brāhmaṇaiḥ kathitāḥ pūrvaṃ yathāvadrājasaṃnidhau |
śrutvā caikamanā mūḍha kṣama vā brūhi vottaram || 72 ||
[Analyze grammar]

mitradhruṅmadrako nityaṃ yo no dveṣṭi sa madrakaḥ |
madrake saṃgataṃ nāsti kṣudravākye narādhame || 73 ||
[Analyze grammar]

durātmā madrako nityaṃ nityaṃ cānṛtiko'nṛjuḥ |
yāvadantaṃ hi daurātmyaṃ madrakeṣviti naḥ śrutam || 74 ||
[Analyze grammar]

pitā mātā ca putraśca śvaśrūśvaśuramātulāḥ |
jāmātā duhitā bhrātā naptā te te ca bāndhavāḥ || 75 ||
[Analyze grammar]

vayasyābhyāgatāścānye dāsīdāsaṃ ca saṃgatam |
puṃbhirvimiśrā nāryaśca jñātājñātāḥ svayecchayā || 76 ||
[Analyze grammar]

yeṣāṃ gṛheṣu śiṣṭānāṃ saktumanthāśināṃ sadā |
pītvā sīdhuṃ sagomāṃsaṃ nardanti ca hasanti ca || 77 ||
[Analyze grammar]

yāni caivāpyabaddhāni pravartante ca kāmataḥ |
kāmapralāpino'nyonyaṃ teṣu dharmaḥ kathaṃ bhavet || 78 ||
[Analyze grammar]

madrakeṣu vilupteṣu prakhyātāśubhakarmasu |
nāpi vairaṃ na sauhārdaṃ madrakeṣu samācaret || 79 ||
[Analyze grammar]

madrake saṃgataṃ nāsti madrako hi sacāpalaḥ |
madrakeṣu ca duḥsparśaṃ śaucaṃ gāndhārakeṣu ca || 80 ||
[Analyze grammar]

rājayājakayājyena naṣṭaṃ dattaṃ havirbhavet || 81 ||
[Analyze grammar]

śūdrasaṃskārako vipro yathā yāti parābhavam |
tathā brahmadviṣo nityaṃ gacchantīha parābhavam || 82 ||
[Analyze grammar]

madrake saṃgataṃ nāsti hataṃ vṛścikato viṣam |
ātharvaṇena mantreṇa sarvā śāntiḥ kṛtā bhavet || 83 ||
[Analyze grammar]

iti vṛścikadaṣṭasya nānāviṣahatasya ca |
kurvanti bheṣajaṃ prājñāḥ satyaṃ taccāpi dṛśyate |
evaṃ vidvañjoṣamāssva śṛṇu cātrottaraṃ vacaḥ || 84 ||
[Analyze grammar]

vāsāṃsyutsṛjya nṛtyanti striyo yā madyamohitāḥ |
mithune'saṃyatāścāpi yathākāmacarāśca tāḥ |
tāsāṃ putraḥ kathaṃ dharmaṃ madrako vaktumarhati || 85 ||
[Analyze grammar]

yāstiṣṭhantyaḥ pramehanti yathaivoṣṭrīdaśerake |
tāsāṃ vibhraṣṭalajjānāṃ nirlajjānāṃ tatastataḥ |
tvaṃ putrastādṛśīnāṃ hi dharmaṃ vaktumihecchasi || 86 ||
[Analyze grammar]

suvīrakaṃ yācyamānā madrakā kaṣati sphijau |
adātukāmā vacanamidaṃ vadati dāruṇam || 87 ||
[Analyze grammar]

mā mā suvīrakaṃ kaścidyācatāṃ dayito mama |
putraṃ dadyāṃ pratipadaṃ na tu dadyāṃ suvīrakam || 88 ||
[Analyze grammar]

nāryo bṛhatyo nirhrīkā madrakāḥ kambalāvṛtāḥ |
ghasmarā naṣṭaśaucāśca prāya ityanuśuśruma || 89 ||
[Analyze grammar]

evamādi mayānyairvā śakyaṃ vaktuṃ bhavedbahu |
ā keśāgrānnakhāgrācca vaktavyeṣu kuvartmasu || 90 ||
[Analyze grammar]

madrakāḥ sindhusauvīrā dharmaṃ vidyuḥ kathaṃ tviha |
pāpadeśodbhavā mlecchā dharmāṇāmavicakṣaṇāḥ || 91 ||
[Analyze grammar]

eṣa mukhyatamo dharmaḥ kṣatriyasyeti naḥ śrutam |
yadājau nihataḥ śete sadbhiḥ samabhipūjitaḥ || 92 ||
[Analyze grammar]

āyudhānāṃ saṃparāye yanmucyeyamahaṃ tataḥ |
na me sa prathamaḥ kalpo nidhane svargamicchataḥ || 93 ||
[Analyze grammar]

so'haṃ priyaḥ sakhā cāsmi dhārtarāṣṭrasya dhīmataḥ |
tadarthe hi mama prāṇā yacca me vidyate vasu || 94 ||
[Analyze grammar]

vyaktaṃ tvamapyupahitaḥ pāṇḍavaiḥ pāpadeśaja |
yathā hyamitravatsarvaṃ tvamasmāsu pravartase || 95 ||
[Analyze grammar]

kāmaṃ na khalu śakyo'haṃ tvadvidhānāṃ śatairapi |
saṃgrāmādvimukhaḥ kartuṃ dharmajña iva nāstikaiḥ || 96 ||
[Analyze grammar]

sāraṅga iva gharmārtaḥ kāmaṃ vilapa śuṣya ca |
nāhaṃ bhīṣayituṃ śakyaḥ kṣatravṛtte vyavasthitaḥ || 97 ||
[Analyze grammar]

tanutyajāṃ nṛsiṃhānāmāhaveṣvanivartinām |
yā gatirguruṇā prāṅme proktā rāmeṇa tāṃ smara || 98 ||
[Analyze grammar]

sveṣāṃ trāṇārthamudyuktaṃ vadhāya dviṣatāmapi |
viddhi māmāsthitaṃ vṛttaṃ paurūravasamuttamam || 99 ||
[Analyze grammar]

na tadbhūtaṃ prapaśyāmi triṣu lokeṣu madraka |
yo māmasmādabhiprāyādvārayediti me matiḥ || 100 ||
[Analyze grammar]

evaṃ vidvañjoṣamāssva trāsātkiṃ bahu bhāṣase |
mā tvā hatvā pradāsyāmi kravyādbhyo madrakādhama || 101 ||
[Analyze grammar]

mitrapratīkṣayā śalya dhārtarāṣṭrasya cobhayoḥ |
apavādatitikṣābhistribhiretairhi jīvasi || 102 ||
[Analyze grammar]

punaścedīdṛśaṃ vākyaṃ madrarāja vadiṣyasi |
śiraste pātayiṣyāmi gadayā vajrakalpayā || 103 ||
[Analyze grammar]

śrotārastvidamadyeha draṣṭāro vā kudeśaja |
karṇaṃ vā jaghnatuḥ kṛṣṇau karṇo vāpi jaghāna tau || 104 ||
[Analyze grammar]

evamuktvā tu rādheyaḥ punareva viśāṃ pate |
abravīnmadrarājānaṃ yāhi yāhītyasaṃbhramam || 105 ||
[Analyze grammar]