Chapter 14

saṃjaya uvāca |
pratyāgatya punarjiṣṇurahansaṃśaptakānbahūn |
vakrānuvakragamanādaṅgāraka iva grahaḥ || 1 ||
[Analyze grammar]

pārthabāṇahatā rājannarāśvarathakuñjarāḥ |
vicelurbabhramurneduḥ peturmamluśca māriṣa || 2 ||
[Analyze grammar]

dhuryaṃ dhuryatarānsūtānrathāṃśca parisaṃkṣipan |
pāṇīnpāṇigataṃ śastraṃ bāhūnapi śirāṃsi ca || 3 ||
[Analyze grammar]

bhallaiḥ kṣurairardhacandrairvatsadantaiśca pāṇḍavaḥ |
cicchedāmitravīrāṇāṃ samare pratiyudhyatām || 4 ||
[Analyze grammar]

vāśitārthe yuyutsanto vṛṣabhā vṛṣabhaṃ yathā |
āpatantyarjunaṃ śūrāḥ śataśo'tha sahasraśaḥ || 5 ||
[Analyze grammar]

teṣāṃ tasya ca tadyuddhamabhavallomaharṣaṇam |
trailokyavijaye yādṛgdaityānāṃ saha vajriṇā || 6 ||
[Analyze grammar]

tamavidhyattribhirbāṇairdandaśūkairivāhibhiḥ |
ugrāyudhastatastasya śiraḥ kāyādapāharat || 7 ||
[Analyze grammar]

te'rjunaṃ sarvataḥ kruddhā nānāśastrairavīvṛṣan |
marudbhiḥ preṣitā meghā himavantamivoṣṇage || 8 ||
[Analyze grammar]

astrairastrāṇi saṃvārya dviṣatāṃ sarvato'rjunaḥ |
samyagastaiḥ śaraiḥ sarvānsahitānahanadbahūn || 9 ||
[Analyze grammar]

chinnatriveṇujaṅgheṣānnihatapārṣṇisārathīn |
saṃchinnaraśmiyoktrākṣānvyanukarṣayugānrathān |
vidhvastasarvasaṃnāhānbāṇaiścakre'rjunastvaran || 10 ||
[Analyze grammar]

te rathāstatra vidhvastāḥ parārdhyā bhāntyanekaśaḥ |
dhanināmiva veśmāni hatānyagnyanilāmbubhiḥ || 11 ||
[Analyze grammar]

dvipāḥ saṃbhinnamarmāṇo vajrāśanisamaiḥ śaraiḥ |
peturgiryagraveśmāni vajravātāgnibhiryathā || 12 ||
[Analyze grammar]

sārohāsturagāḥ peturbahavo'rjunatāḍitāḥ |
nirjihvāntrāḥ kṣitau kṣīṇā rudhirārdrāḥ sudurdṛśaḥ || 13 ||
[Analyze grammar]

narāśvanāgā nārācaiḥ saṃsyūtāḥ savyasācinā |
babhramuścaskhaluḥ peturnedurmamluśca māriṣa || 14 ||
[Analyze grammar]

aṇakaiśca śilādhautairvajrāśaniviṣopamaiḥ |
śarairnijaghnivānpārtho mahendra iva dānavān || 15 ||
[Analyze grammar]

mahārhavarmābharaṇā nānārūpāmbarāyudhāḥ |
sarathāḥ sadhvajā vīrā hatāḥ pārthena śerate || 16 ||
[Analyze grammar]

vijitāḥ puṇyakarmāṇo viśiṣṭābhijanaśrutāḥ |
gatāḥ śarīrairvasudhāmūrjitaiḥ karmabhirdivam || 17 ||
[Analyze grammar]

athārjunarathaṃ vīrāstvadīyāḥ samupādravan |
nānājanapadādhyakṣāḥ sagaṇā jātamanyavaḥ || 18 ||
[Analyze grammar]

uhyamānā rathāśvaiste pattayaśca jighāṃsavaḥ |
samabhyadhāvannasyanto vividhaṃ kṣipramāyudham || 19 ||
[Analyze grammar]

tadāyudhamahāvarṣaṃ kṣiptaṃ yodhamahāmbudaiḥ |
vyadhamanniśitairbāṇaiḥ kṣipramarjunamārutaḥ || 20 ||
[Analyze grammar]

sāśvapattidviparathaṃ mahāśastraughamaplavam |
sahasā saṃtitīrṣantaṃ pārthaṃ śastrāstrasetunā || 21 ||
[Analyze grammar]

athābravīdvāsudevaḥ pārthaṃ kiṃ krīḍase'nagha |
saṃśaptakānpramathyaitāṃstataḥ karṇavadhe tvara || 22 ||
[Analyze grammar]

tathetyuktvārjunaḥ kṣipraṃ śiṣṭānsaṃśaptakāṃstadā |
ākṣipya śastreṇa balāddaityānindra ivāvadhīt || 23 ||
[Analyze grammar]

ādadhatsaṃdadhanneṣūndṛṣṭaḥ kaiścidraṇe'rjunaḥ |
vimuñcanvā śarāñśīghraṃ dṛśyate sma hi kairapi || 24 ||
[Analyze grammar]

āścaryamiti govindo bruvannaśvānacodayat |
haṃsāṃsagaurāste senāṃ haṃsāḥ sara ivāviśan || 25 ||
[Analyze grammar]

tataḥ saṃgrāmabhūmiṃ tāṃ vartamāne janakṣaye |
avekṣamāṇo govindaḥ savyasācinamabravīt || 26 ||
[Analyze grammar]

eṣa pārtha mahāraudro vartate bharatakṣayaḥ |
pṛthivyāṃ pārthivānāṃ vai duryodhanakṛte mahān || 27 ||
[Analyze grammar]

paśya bhārata cāpāni rukmapṛṣṭhāni dhanvinām |
mahatāmapaviddhāni kalāpāniṣudhīstathā || 28 ||
[Analyze grammar]

jātarūpamayaiḥ puṅkhaiḥ śarāṃśca nataparvaṇaḥ |
tailadhautāṃśca nārācānnirmuktāniva pannagān || 29 ||
[Analyze grammar]

hastidantatsarūnkhaḍgāñjātarūpapariṣkṛtān |
ākīrṇāṃstomarāṃścāpāṃścitrānhemavibhūṣitān || 30 ||
[Analyze grammar]

varmāṇi cāpaviddhāni rukmapṛṣṭhāni bhārata |
suvarṇavikṛtānprāsāñśaktīḥ kanakabhūṣitāḥ || 31 ||
[Analyze grammar]

jāmbūnadamayaiḥ paṭṭairbaddhāśca vipulā gadāḥ |
jātarūpamayīścarṣṭīḥ paṭṭiśānhemabhūṣitān || 32 ||
[Analyze grammar]

daṇḍaiḥ kanakacitraiśca vipraviddhānparaśvadhān |
ayaskuśāntānpatitānmusalāni gurūṇi ca || 33 ||
[Analyze grammar]

śataghnīḥ paśya citrāśca vipulānparighāṃstathā |
cakrāṇi cāpaviddhāni mudgarāṃśca bahūnraṇe || 34 ||
[Analyze grammar]

nānāvidhāni śastrāṇi pragṛhya jayagṛddhinaḥ |
jīvanta iva lakṣyante gatasattvāstarasvinaḥ || 35 ||
[Analyze grammar]

gadāvimathitairgātrairmusalairbhinnamastakān |
gajavājirathakṣuṇṇānpaśya yodhānsahasraśaḥ || 36 ||
[Analyze grammar]

manuṣyagajavājīnāṃ śaraśaktyṛṣṭitomaraiḥ |
nistriṃśaiḥ paṭṭiśaiḥ prāsairnakharairlaguḍairapi || 37 ||
[Analyze grammar]

śarīrairbahudhā bhinnaiḥ śoṇitaughapariplutaiḥ |
gatāsubhiramitraghna saṃvṛtā raṇabhūmayaḥ || 38 ||
[Analyze grammar]

bāhubhiścandanādigdhaiḥ sāṅgadaiḥ śubhabhūṣaṇaiḥ |
satalatraiḥ sakeyūrairbhāti bhārata medinī || 39 ||
[Analyze grammar]

sāṅgulitrairbhujāgraiśca vipraviddhairalaṃkṛtaiḥ |
hastihastopamaiśchinnairūrubhiśca tarasvinām || 40 ||
[Analyze grammar]

baddhacūḍāmaṇivaraiḥ śirobhiśca sakuṇḍalaiḥ |
nikṛttairvṛṣabhākṣāṇāṃ virājati vasuṃdharā || 41 ||
[Analyze grammar]

kabandhaiḥ śoṇitādigdhaiśchinnagātraśirodharaiḥ |
bhūrbhāti bharataśreṣṭha śāntārcirbhirivāgnibhiḥ || 42 ||
[Analyze grammar]

rathānbahuvidhānbhagnānhemakiṅkiṇinaḥ śubhān |
aśvāṃśca bahudhā paśya śoṇitena pariplutān || 43 ||
[Analyze grammar]

yodhānāṃ ca mahāśaṅkhānpāṇḍurāṃśca prakīrṇakān |
nirastajihvānmātaṅgāñśayānānparvatopamān || 44 ||
[Analyze grammar]

vaijayantīvicitrāṃśca hatāṃśca gajayodhinaḥ |
vāraṇānāṃ paristomānsuyuktāmbarakambalān || 45 ||
[Analyze grammar]

vipāṭitā vicitrāśca rūpacitrāḥ kuthāstathā |
bhinnāśca bahudhā ghaṇṭāḥ patadbhiścūrṇitā gajaiḥ || 46 ||
[Analyze grammar]

vaiḍūryamaṇidaṇḍāṃśca patitānaṅkuśānbhuvi |
baddhāḥ sādidhvajāgreṣu suvarṇavikṛtāḥ kaśāḥ || 47 ||
[Analyze grammar]

vicitrānmaṇicitrāṃśca jātarūpapariṣkṛtān |
aśvāstaraparistomānrāṅkavānpatitānbhuvi || 48 ||
[Analyze grammar]

cūḍāmaṇīnnarendrāṇāṃ vicitrāḥ kāñcanasrajaḥ |
chatrāṇi cāpaviddhāni cāmaravyajanāni ca || 49 ||
[Analyze grammar]

candranakṣatrabhāsaiśca vadanaiścārukuṇḍalaiḥ |
kḷptaśmaśrubhiratyarthaṃ vīrāṇāṃ samalaṃkṛtaiḥ |
vadanaiḥ paśya saṃchannāṃ mahīṃ śoṇitakardamām || 50 ||
[Analyze grammar]

sajīvāṃśca narānpaśya kūjamānānsamantataḥ |
upāsyamānānbahubhirnyastaśastrairviśāṃ pate || 51 ||
[Analyze grammar]

jñātibhiḥ sahitaistatra rodamānairmuhurmuhuḥ |
vyutkrāntānaparānyodhāṃśchādayitvā tarasvinaḥ |
punaryuddhāya gacchanti jayagṛddhāḥ pramanyavaḥ || 52 ||
[Analyze grammar]

apare tatra tatraiva paridhāvanti māninaḥ |
jñātibhiḥ patitaiḥ śūrairyācyamānāstathodakam || 53 ||
[Analyze grammar]

jalārthaṃ ca gatāḥ kecinniṣprāṇā bahavo'rjuna |
saṃnivṛttāśca te śūrāstāndṛṣṭvaiva vicetasaḥ || 54 ||
[Analyze grammar]

jalaṃ dṛṣṭvā pradhāvanti krośamānāḥ parasparam |
jalaṃ pītvā mṛtānpaśya pibato'nyāṃśca bhārata || 55 ||
[Analyze grammar]

parityajya priyānanye bāndhavānbāndhavapriya |
vyutkrāntāḥ samadṛśyanta tatra tatra mahāraṇe || 56 ||
[Analyze grammar]

paśyāparānnaraśreṣṭha saṃdaṣṭauṣṭhapuṭānpunaḥ |
bhrukuṭīkuṭilairvaktraiḥ prekṣamāṇānsamantataḥ || 57 ||
[Analyze grammar]

etattavaivānurūpaṃ karmārjuna mahāhave |
divi vā devarājasya tvayā yatkṛtamāhave || 58 ||
[Analyze grammar]

evaṃ tāṃ darśayankṛṣṇo yuddhabhūmiṃ kirīṭine |
gacchannevāśṛṇocchabdaṃ duryodhanabale mahat || 59 ||
[Analyze grammar]

śaṅkhadundubhinirghoṣānbherīpaṇavamiśritān |
rathāśvagajanādāṃśca śastraśabdāṃśca dāruṇān || 60 ||
[Analyze grammar]

praviśya tadbalaṃ kṛṣṇasturagairvātavegibhiḥ |
pāṇḍyenābhyarditāṃ senāṃ tvadīyāṃ vīkṣya dhiṣṭhitaḥ || 61 ||
[Analyze grammar]

sa hi nānāvidhairbāṇairiṣvāsapravaro yudhi |
nyahanaddviṣatāṃ vrātāngatāsūnantako yathā || 62 ||
[Analyze grammar]

gajavājimanuṣyāṇāṃ śarīrāṇi śitaiḥ śaraiḥ |
bhittvā praharatāṃ śreṣṭho videhāsūṃścakāra saḥ || 63 ||
[Analyze grammar]

śatrupravīrairastāni nānāśastrāṇi sāyakaiḥ |
bhittvā tānahanatpāṇḍyaḥ śatrūñśakra ivāsurān || 64 ||
[Analyze grammar]