Chapter 8

saṃjaya uvāca |
te sene'nyonyamāsādya prahṛṣṭāśvanaradvipe |
bṛhatyau saṃprajahrāte devāsuracamūpame || 1 ||
[Analyze grammar]

tato gajā rathāścāśvāḥ pattayaśca mahāhave |
saṃprahāraṃ paraṃ cakrurdehapāpmapraṇāśanam || 2 ||
[Analyze grammar]

pūrṇacandrārkapadmānāṃ kāntitviḍgandhataḥ samaiḥ |
uttamāṅgairnṛsiṃhānāṃ nṛsiṃhāstastarurmahīm || 3 ||
[Analyze grammar]

ardhacandraistathā bhallaiḥ kṣuraprairasipaṭṭiśaiḥ |
paraśvadhaiścāpyakṛntannuttamāṅgāni yudhyatām || 4 ||
[Analyze grammar]

vyāyatāyatabāhūnāṃ vyāyatāyatabāhubhiḥ |
vyāyatā bāhavaḥ petuśchinnamuṣṭyāyudhāṅgadāḥ || 5 ||
[Analyze grammar]

taiḥ sphuradbhirmahī bhāti raktāṅgulitalaistadā |
garuḍaprahatairugraiḥ pañcāsyairiva pannagaiḥ || 6 ||
[Analyze grammar]

hayasyandananāgebhyaḥ peturvīrā dviṣaddhatāḥ |
vimānebhyo yathā kṣīṇe puṇye svargasadastathā || 7 ||
[Analyze grammar]

gadābhiranyairgurvībhiḥ parighairmusalairapi |
pothitāḥ śataśaḥ peturvīrā vīratarai raṇe || 8 ||
[Analyze grammar]

rathā rathairvinihatā mattā mattairdvipairdvipāḥ |
sādinaḥ sādibhiścaiva tasminparamasaṃkule || 9 ||
[Analyze grammar]

rathā vararathairnāgairaśvārohāśca pattibhiḥ |
aśvārohaiḥ padātāśca nihatā yudhi śerate || 10 ||
[Analyze grammar]

rathāśvapattayo nāgai rathairnāgāśca pattayaḥ |
rathapattidvipāścāśvairnṛbhiścāśvarathadvipāḥ || 11 ||
[Analyze grammar]

rathāśvebhanarāṇāṃ ca narāśvebharathaiḥ kṛtam |
pāṇipādaiśca śastraiśca rathaiśca kadanaṃ mahat || 12 ||
[Analyze grammar]

tathā tasminbale śūrairvadhyamāne hate'pi ca |
asmānabhyāgamanpārthā vṛkodarapurogamāḥ || 13 ||
[Analyze grammar]

dhṛṣṭadyumnaḥ śikhaṇḍī ca draupadeyāḥ prabhadrakāḥ |
sātyakiścekitānaśca draviḍaiḥ sainikaiḥ saha || 14 ||
[Analyze grammar]

bhṛtā vittena mahatā pāṇḍyāścauḍrāḥ sakeralāḥ |
vyūḍhoraskā dīrghabhujāḥ prāṃśavaḥ priyadarśanāḥ || 15 ||
[Analyze grammar]

āpīḍino raktadantā mattamātaṅgavikramāḥ |
nānāvirāgavasanā gandhacūrṇāvacūrṇitāḥ || 16 ||
[Analyze grammar]

baddhāsayaḥ pāśahastā vāraṇaprativāraṇāḥ |
samānamṛtyavo rājannanīkasthāḥ parasparam || 17 ||
[Analyze grammar]

kalāpinaścāpahastā dīrghakeśāḥ priyāhavāḥ |
pattayaḥ sātyakerandhrā ghorarūpaparākramāḥ || 18 ||
[Analyze grammar]

athāpare punaḥ śūrāścedipāñcālakekayāḥ |
karūṣāḥ kosalāḥ kāśyā māgadhāścāpi dudruvuḥ || 19 ||
[Analyze grammar]

teṣāṃ rathāśca nāgāśca pravarāścāpi pattayaḥ |
nānāvidharavairhṛṣṭā nṛtyanti ca hasanti ca || 20 ||
[Analyze grammar]

tasya sainyasya mahato mahāmātravarairvṛtaḥ |
madhyaṃ vṛkodaro'bhyāgāttvadīyaṃ nāgadhūrgataḥ || 21 ||
[Analyze grammar]

sa nāgapravaro'tyugro vidhivatkalpito babhau |
udayādryagryabhavanaṃ yathābhyuditabhāskaram || 22 ||
[Analyze grammar]

tasyāyasaṃ varmavaraṃ vararatnavibhūṣitam |
tārodbhāsasya nabhasaḥ śāradasya samatviṣam || 23 ||
[Analyze grammar]

sa tomaraprāsakaraścārumauliḥ svalaṃkṛtaḥ |
caranmadhyaṃdinārkābhastejasā vyadahadripūn || 24 ||
[Analyze grammar]

taṃ dṛṣṭvā dviradaṃ dūrātkṣemadhūrtirdvipasthitaḥ |
āhvayāno'bhidudrāva pramanāḥ pramanastaram || 25 ||
[Analyze grammar]

tayoḥ samabhavadyuddhaṃ dvipayorugrarūpayoḥ |
yadṛcchayā drumavatormahāparvatayoriva || 26 ||
[Analyze grammar]

saṃsaktanāgau tau vīrau tomarairitaretaram |
balavatsūryaraśmyābhairbhittvā bhittvā vinedatuḥ || 27 ||
[Analyze grammar]

vyapasṛtya tu nāgābhyāṃ maṇḍalāni viceratuḥ |
pragṛhya caiva dhanuṣī jaghnaturvai parasparam || 28 ||
[Analyze grammar]

kṣveḍitāsphoṭitaravairbāṇaśabdaiśca sarvaśaḥ |
tau janānharṣayitvā ca siṃhanādānpracakratuḥ || 29 ||
[Analyze grammar]

samudyatakarābhyāṃ tau dvipābhyāṃ kṛtināvubhau |
vātoddhūtapatākābhyāṃ yuyudhāte mahābalau || 30 ||
[Analyze grammar]

tāvanyonyasya dhanuṣī chittvānyonyaṃ vinedatuḥ |
śaktitomaravarṣeṇa prāvṛṇmeghāvivāmbubhiḥ || 31 ||
[Analyze grammar]

kṣemadhūrtistadā bhīmaṃ tomareṇa stanāntare |
nirbibheda tu vegena ṣaḍbhiścāpyaparairnadan || 32 ||
[Analyze grammar]

sa bhīmasenaḥ śuśubhe tomarairaṅgamāśritaiḥ |
krodhadīptavapurmeghaiḥ saptasaptirivāṃśumān || 33 ||
[Analyze grammar]

tato bhāskaravarṇābhamañjogatimayasmayam |
sasarja tomaraṃ bhīmaḥ pratyamitrāya yatnavān || 34 ||
[Analyze grammar]

tataḥ kulūtādhipatiścāpamāyamya sāyakaiḥ |
daśabhistomaraṃ chittvā śaktyā vivyādha pāṇḍavam || 35 ||
[Analyze grammar]

atha kārmukamādāya mahājaladanisvanam |
riporabhyardayannāgamunmadaḥ pāṇḍavaḥ śaraiḥ || 36 ||
[Analyze grammar]

sa śaraughārdito nāgo bhīmasenena saṃyuge |
nigṛhyamāṇo nātiṣṭhadvātadhvasta ivāmbudaḥ || 37 ||
[Analyze grammar]

tāmabhyadhāvaddviradaṃ bhīmasenasya nāgarāṭ |
mahāvāteritaṃ meghaṃ vātoddhūta ivāmbudaḥ || 38 ||
[Analyze grammar]

saṃnivartyātmano nāgaṃ kṣemadhūrtiḥ prayatnataḥ |
vivyādhābhidrutaṃ bāṇairbhīmasenaṃ sakuñjaram || 39 ||
[Analyze grammar]

tataḥ sādhuvisṛṣṭena kṣureṇa puruṣarṣabhaḥ |
chittvā śarāsanaṃ śatrornāgamāmitramārdayat || 40 ||
[Analyze grammar]

tataḥ khajākayā bhīmaṃ kṣemadhūrtiḥ parābhinat |
jaghāna cāsya dviradaṃ nārācaiḥ sarvamarmasu || 41 ||
[Analyze grammar]

purā nāgasya patanādavaplutya sthito mahīm |
bhīmaseno ripornāgaṃ gadayā samapothayat || 42 ||
[Analyze grammar]

tasmātpramathitānnāgātkṣemadhūrtimavadrutam |
udyatāsimupāyāntaṃ gadayāhanvṛkodaraḥ || 43 ||
[Analyze grammar]

sa papāta hataḥ sāsirvyasuḥ svamabhito dvipam |
vajraprarugṇamacalaṃ siṃho vajrahato yathā || 44 ||
[Analyze grammar]

nihataṃ nṛpatiṃ dṛṣṭvā kulūtānāṃ yaśaskaram |
prādravadvyathitā senā tvadīyā bharatarṣabha || 45 ||
[Analyze grammar]