Chapter 169

dhṛtarāṣṭra uvāca |
sāṅgā vedā yathānyāyaṃ yenādhītā mahātmanā |
yasminsākṣāddhanurvedo hrīniṣedhe pratiṣṭhitaḥ || 1 ||
[Analyze grammar]

tasminnākruśyati droṇe maharṣitanaye tadā |
nīcātmanā nṛśaṃsena kṣudreṇa gurughātinā || 2 ||
[Analyze grammar]

yasya prasādātkarmāṇi kurvanti puruṣarṣabhāḥ |
amānuṣāṇi saṃgrāme devairasukarāṇi ca || 3 ||
[Analyze grammar]

tasminnākruśyati droṇe samakṣaṃ pāpakarmiṇaḥ |
nāmarṣaṃ tatra kurvanti dhikkṣatraṃ dhigamarṣitam || 4 ||
[Analyze grammar]

pārthāḥ sarve ca rājānaḥ pṛthivyāṃ ye dhanurdharāḥ |
śrutvā kimāhuḥ pāñcālyaṃ tanmamācakṣva saṃjaya || 5 ||
[Analyze grammar]

saṃjaya uvāca |
śrutvā drupadaputrasya tā vācaḥ krūrakarmaṇaḥ |
tūṣṇīṃ babhūvū rājānaḥ sarva eva viśāṃ pate || 6 ||
[Analyze grammar]

arjunastu kaṭākṣeṇa jihmaṃ prekṣya ca pārṣatam |
sabāṣpamabhiniḥśvasya dhigdhigdhigiti cābravīt || 7 ||
[Analyze grammar]

yudhiṣṭhiraśca bhīmaśca yamau kṛṣṇastathāpare |
āsansuvrīḍitā rājansātyakiridamabravīt || 8 ||
[Analyze grammar]

nehāsti puruṣaḥ kaścidya imaṃ pāpapūruṣam |
bhāṣamāṇamakalyāṇaṃ śīghraṃ hanyānnarādhamam || 9 ||
[Analyze grammar]

kathaṃ ca śatadhā jihvā na te mūrdhā ca dīryate |
gurumākrośataḥ kṣudra na cādharmeṇa pātyase || 10 ||
[Analyze grammar]

yāpyastvamasi pārthaiśca sarvaiścāndhakavṛṣṇibhiḥ |
yatkarma kaluṣaṃ kṛtvā ślāghase janasaṃsadi || 11 ||
[Analyze grammar]

akāryaṃ tādṛśaṃ kṛtvā punareva guruṃ kṣipan |
vadhyastvaṃ na tvayārtho'sti muhūrtamapi jīvatā || 12 ||
[Analyze grammar]

kastvetadvyavasedāryastvadanyaḥ puruṣādhamaḥ |
nigṛhya keśeṣu vadhaṃ gurordharmātmanaḥ sataḥ || 13 ||
[Analyze grammar]

saptāvare tathā pūrve bāndhavāste nipātitāḥ |
yaśasā ca parityaktāstvāṃ prāpya kulapāṃsanam || 14 ||
[Analyze grammar]

uktavāṃścāpi yatpārthaṃ bhīṣmaṃ prati nararṣabham |
tathānto vihitastena svayameva mahātmanā || 15 ||
[Analyze grammar]

tasyāpi tava sodaryo nihantā pāpakṛttamaḥ |
nānyaḥ pāñcālaputrebhyo vidyate bhuvi pāpakṛt || 16 ||
[Analyze grammar]

sa cāpi sṛṣṭaḥ pitrā te bhīṣmasyāntakaraḥ kila |
śikhaṇḍī rakṣitastena sa ca mṛtyurmahātmanaḥ || 17 ||
[Analyze grammar]

pāñcālāścalitā dharmātkṣudrā mitragurudruhaḥ |
tvāṃ prāpya sahasodaryaṃ dhikkṛtaṃ sarvasādhubhiḥ || 18 ||
[Analyze grammar]

punaścedīdṛśīṃ vācaṃ matsamīpe vadiṣyasi |
śiraste pātayiṣyāmi gadayā vajrakalpayā || 19 ||
[Analyze grammar]

sātvatenaivamākṣiptaḥ pārṣataḥ paruṣākṣaram |
saṃrabdhaḥ sātyakiṃ prāha saṃkruddhaḥ prahasanniva || 20 ||
[Analyze grammar]

śrūyate śrūyate ceti kṣamyate ceti mādhava |
na cānārya śubhaṃ sādhuṃ puruṣaṃ kṣeptumarhasi || 21 ||
[Analyze grammar]

kṣamā praśasyate loke na tu pāpo'rhati kṣamām |
kṣamāvantaṃ hi pāpātmā jito'yamiti manyate || 22 ||
[Analyze grammar]

sa tvaṃ kṣudrasamācāro nīcātmā pāpaniścayaḥ |
ā keśāgrānnakhāgrācca vaktavyo vaktumicchasi || 23 ||
[Analyze grammar]

yaḥ sa bhūriśravāśchinne bhuje prāyagatastvayā |
vāryamāṇena nihatastataḥ pāpataraṃ nu kim || 24 ||
[Analyze grammar]

vyūhamāno mayā droṇo divyenāstreṇa saṃyuge |
visṛṣṭaśastro nihataḥ kiṃ tatra krūra duṣkṛtam || 25 ||
[Analyze grammar]

ayudhyamānaṃ yastvājau tathā prāyagataṃ munim |
chinnabāhuṃ parairhanyātsātyake sa kathaṃ bhavet || 26 ||
[Analyze grammar]

nihatya tvāṃ yadā bhūmau sa vikrāmati vīryavān |
kiṃ tadā na nihaṃsyenaṃ bhūtvā puruṣasattamaḥ || 27 ||
[Analyze grammar]

tvayā punaranāryeṇa pūrvaṃ pārthena nirjitaḥ |
yadā tadā hataḥ śūraḥ saumadattiḥ pratāpavān || 28 ||
[Analyze grammar]

yatra yatra tu pāṇḍūnāṃ droṇo drāvayate camūm |
kirañśarasahasrāṇi tatra tatra prayāmyaham || 29 ||
[Analyze grammar]

sa tvamevaṃvidhaṃ kṛtvā karma cāṇḍālavatsvayam |
vaktumicchasi vaktavyaḥ kasmānmāṃ paruṣāṇyatha || 30 ||
[Analyze grammar]

kartā tvaṃ karmaṇograsya nāhaṃ vṛṣṇikulādhama |
pāpānāṃ ca tvamāvāsaḥ karmaṇāṃ mā punarvada || 31 ||
[Analyze grammar]

joṣamāssva na māṃ bhūyo vaktumarhasyataḥ param |
adharottarametaddhi yanmā tvaṃ vaktumicchasi || 32 ||
[Analyze grammar]

atha vakṣyasi māṃ maurkhyādbhūyaḥ paruṣamīdṛśam |
gamayiṣyāmi bāṇaistvāṃ yudhi vaivasvatakṣayam || 33 ||
[Analyze grammar]

na caiva mūrkha dharmeṇa kevalenaiva śakyate |
teṣāmapi hyadharmeṇa ceṣṭitaṃ śṛṇu yādṛśam || 34 ||
[Analyze grammar]

vañcitaḥ pāṇḍavaḥ pūrvamadharmeṇa yudhiṣṭhiraḥ |
draupadī ca parikliṣṭā tathādharmeṇa sātyake || 35 ||
[Analyze grammar]

pravrājitā vanaṃ sarve pāṇḍavāḥ saha kṛṣṇayā |
sarvasvamapakṛṣṭaṃ ca tathādharmeṇa bāliśa || 36 ||
[Analyze grammar]

adharmeṇāpakṛṣṭaśca madrarājaḥ parairitaḥ |
ito'pyadharmeṇa hato bhīṣmaḥ kurupitāmahaḥ |
bhūriśravā hyadharmeṇa tvayā dharmavidā hataḥ || 37 ||
[Analyze grammar]

evaṃ parairācaritaṃ pāṇḍaveyaiśca saṃyuge |
rakṣamāṇairjayaṃ vīrairdharmajñairapi sātvata || 38 ||
[Analyze grammar]

durjñeyaḥ paramo dharmastathādharmaḥ sudurvidaḥ |
yudhyasva kauravaiḥ sārdhaṃ mā gāḥ pitṛniveśanam || 39 ||
[Analyze grammar]

evamādīni vākyāni krūrāṇi paruṣāṇi ca |
śrāvitaḥ sātyakiḥ śrīmānākampita ivābhavat || 40 ||
[Analyze grammar]

tacchrutvā krodhatāmrākṣaḥ sātyakistvādade gadām |
viniḥśvasya yathā sarpaḥ praṇidhāya rathe dhanuḥ || 41 ||
[Analyze grammar]

tato'bhipatya pāñcālyaṃ saṃrambheṇedamabravīt |
na tvāṃ vakṣyāmi paruṣaṃ haniṣye tvāṃ vadhakṣamam || 42 ||
[Analyze grammar]

tamāpatantaṃ sahasā mahābalamamarṣaṇam |
pāñcālyāyābhisaṃkruddhamantakāyāntakopamam || 43 ||
[Analyze grammar]

codito vāsudevena bhīmaseno mahābalaḥ |
avaplutya rathāttūrṇaṃ bāhubhyāṃ samavārayat || 44 ||
[Analyze grammar]

dravamāṇaṃ tathā kruddhaṃ sātyakiṃ pāṇḍavo balī |
praskandamānamādāya jagāma balinaṃ balāt || 45 ||
[Analyze grammar]

sthitvā viṣṭabhya caraṇau bhīmena śinipuṃgavaḥ |
nigṛhītaḥ pade ṣaṣṭhe balena balināṃ varaḥ || 46 ||
[Analyze grammar]

avaruhya rathāttaṃ tu hriyamāṇaṃ balīyasā |
uvāca ślakṣṇayā vācā sahadevo viśāṃ pate || 47 ||
[Analyze grammar]

asmākaṃ puruṣavyāghra mitramanyanna vidyate |
paramandhakavṛṣṇibhyaḥ pāñcālebhyaśca mādhava || 48 ||
[Analyze grammar]

tathaivāndhakavṛṣṇīnāṃ tava caiva viśeṣataḥ |
kṛṣṇasya ca tathāsmatto mitramanyanna vidyate || 49 ||
[Analyze grammar]

pāñcālānāṃ ca vārṣṇeya samudrāntāṃ vicinvatām |
nānyadasti paraṃ mitraṃ yathā pāṇḍavavṛṣṇayaḥ || 50 ||
[Analyze grammar]

sa bhavānīdṛśaṃ mitraṃ manyate ca yathā bhavān |
bhavantaśca yathāsmākaṃ bhavatāṃ ca tathā vayam || 51 ||
[Analyze grammar]

sa evaṃ sarvadharmajño mitradharmamanusmaran |
niyaccha manyuṃ pāñcālyātpraśāmya śinipuṃgava || 52 ||
[Analyze grammar]

pārṣatasya kṣama tvaṃ vai kṣamatāṃ tava pārṣataḥ |
vayaṃ kṣamayitāraśca kimanyatra śamādbhavet || 53 ||
[Analyze grammar]

praśāmyamāne śaineye sahadevena māriṣa |
pāñcālarājasya sutaḥ prahasannidamabravīt || 54 ||
[Analyze grammar]

muñca muñca śineḥ pautraṃ bhīma yuddhamadānvitam |
āsādayatu māmeṣa dharādharamivānilaḥ || 55 ||
[Analyze grammar]

yāvadasya śitairbāṇaiḥ saṃrambhaṃ vinayāmyaham |
yuddhaśraddhāṃ ca kaunteya jīvitasya ca saṃyuge || 56 ||
[Analyze grammar]

kiṃ nu śakyaṃ mayā kartuṃ kāryaṃ yadidamudyatam |
sumahatpāṇḍuputrāṇāmāyāntyete hi kauravāḥ || 57 ||
[Analyze grammar]

atha vā phalgunaḥ sarvānvārayiṣyati saṃyuge |
ahamapyasya mūrdhānaṃ pātayiṣyāmi sāyakaiḥ || 58 ||
[Analyze grammar]

manyate chinnabāhuṃ māṃ bhūriśravasamāhave |
utsṛjainamahaṃ vainameṣa māṃ vā haniṣyati || 59 ||
[Analyze grammar]

śṛṇvanpāñcālavākyāni sātyakiḥ sarpavacchvasan |
bhīmabāhvantare sakto visphuratyaniśaṃ balī || 60 ||
[Analyze grammar]

tvarayā vāsudevaśca dharmarājaśca māriṣa |
yatnena mahatā vīrau vārayāmāsatustataḥ || 61 ||
[Analyze grammar]

nivārya parameṣvāsau krodhasaṃraktalocanau |
yuyutsavaḥ parānsaṃkhye pratīyuḥ kṣatriyarṣabhāḥ || 62 ||
[Analyze grammar]