Chapter 162

saṃjaya uvāca |
te tathaiva mahārāja daṃśitā raṇamūrdhani |
saṃdhyāgataṃ sahasrāṃśumādityamupatasthire || 1 ||
[Analyze grammar]

udite tu sahasrāṃśau taptakāñcanasaprabhe |
prakāśiteṣu lokeṣu punaryuddhamavartata || 2 ||
[Analyze grammar]

dvaṃdvāni yāni tatrāsansaṃsaktāni purodayāt |
tānyevābhyudite sūrye samasajjanta bhārata || 3 ||
[Analyze grammar]

rathairhayā hayairnāgāḥ pādātāścāpi kuñjaraiḥ |
hayā hayaiḥ samājagmuḥ pādātāśca padātibhiḥ |
saṃsaktāśca viyuktāśca yodhāḥ saṃnyapatanraṇe || 4 ||
[Analyze grammar]

te rātrau kṛtakarmāṇaḥ śrāntāḥ sūryasya tejasā |
kṣutpipāsāparītāṅgā visaṃjñā bahavo'bhavan || 5 ||
[Analyze grammar]

śaṅkhabherīmṛdaṅgānāṃ kuñjarāṇāṃ ca garjatām |
visphāritavikṛṣṭānāṃ kārmukāṇāṃ ca kūjatām || 6 ||
[Analyze grammar]

śabdaḥ samabhavadrājandivispṛgbharatarṣabha |
dravatāṃ ca padātīnāṃ śastrāṇāṃ vinipātyatām || 7 ||
[Analyze grammar]

hayānāṃ heṣatāṃ caiva rathānāṃ ca nivartatām |
krośatāṃ garjatāṃ caiva tadāsīttumulaṃ mahat || 8 ||
[Analyze grammar]

vivṛddhastumulaḥ śabdo dyāmagacchanmahāsvanaḥ |
nānāyudhanikṛttānāṃ ceṣṭatāmāturaḥ svanaḥ || 9 ||
[Analyze grammar]

bhūmāvaśrūyata mahāṃstadāsītkṛpaṇaṃ mahat |
patatāṃ patitānāṃ ca pattyaśvarathahastinām || 10 ||
[Analyze grammar]

teṣu sarveṣvanīkeṣu vyatiṣakteṣvanekaśaḥ |
sve svāñjaghnuḥ pare svāṃśca sve parāṃśca parānpare || 11 ||
[Analyze grammar]

vīrabāhuvisṛṣṭāśca yodheṣu ca gajeṣu ca |
asayaḥ pratyadṛśyanta vāsasāṃ nejaneṣviva || 12 ||
[Analyze grammar]

udyatapratipiṣṭānāṃ khaḍgānāṃ vīrabāhubhiḥ |
sa eva śabdastadrūpo vāsasāṃ nijyatāmiva || 13 ||
[Analyze grammar]

ardhāsibhistathā khaḍgaistomaraiḥ saparaśvadhaiḥ |
nikṛṣṭayuddhaṃ saṃsaktaṃ mahadāsītsudāruṇam || 14 ||
[Analyze grammar]

gajāśvakāyaprabhavāṃ naradehapravāhinīm |
śastramatsyasusaṃpūrṇāṃ māṃsaśoṇitakardamām || 15 ||
[Analyze grammar]

ārtanādasvanavatīṃ patākāvastraphenilām |
nadīṃ prāvartayanvīrāḥ paralokapravāhinīm || 16 ||
[Analyze grammar]

śaraśaktyarditāḥ klāntā rātrimūḍhālpacetasaḥ |
viṣṭabhya sarvagātrāṇi vyatiṣṭhangajavājinaḥ |
saṃśuṣkavadanā vīrāḥ śirobhiścārukuṇḍalaiḥ || 17 ||
[Analyze grammar]

yuddhopakaraṇaiścānyaistatra tatra prakāśitaiḥ |
kravyādasaṃghairākīrṇaṃ mṛtairardhamṛtairapi |
nāsīdrathapathastatra sarvamāyodhanaṃ prati || 18 ||
[Analyze grammar]

majjatsu cakreṣu rathānsattvamāsthāya vājinaḥ |
kathaṃcidavahañśrāntā vepamānāḥ śarārditāḥ |
kulasattvabalopetā vājino vāraṇopamāḥ || 19 ||
[Analyze grammar]

vihvalaṃ tatsamudbhrāntaṃ sabhayaṃ bhāratāturam |
balamāsīttadā sarvamṛte droṇārjunāvubhau || 20 ||
[Analyze grammar]

tāvevāstāṃ nilayanaṃ tāvārtāyanameva ca |
tāvevānye samāsādya jagmurvaivasvatakṣayam || 21 ||
[Analyze grammar]

āvignamabhavatsarvaṃ kauravāṇāṃ mahadbalam |
pāñcālānāṃ ca saṃsaktaṃ na prājñāyata kiṃcana || 22 ||
[Analyze grammar]

antakākrīḍasadṛśe bhīrūṇāṃ bhayavardhane |
pṛthivyāṃ rājavaṃśānāmutthite mahati kṣaye || 23 ||
[Analyze grammar]

na tatra karṇaṃ na droṇaṃ nārjunaṃ na yudhiṣṭhiram |
na bhīmasenaṃ na yamau na pāñcālyaṃ na sātyakim || 24 ||
[Analyze grammar]

na ca duḥśāsanaṃ drauṇiṃ na duryodhanasaubalau |
na kṛpaṃ madrarājaṃ vā kṛtavarmāṇameva ca || 25 ||
[Analyze grammar]

na cānyānnaiva cātmānaṃ na kṣitiṃ na diśastathā |
paśyāma rājansaṃsaktānsainyena rajasāvṛtān || 26 ||
[Analyze grammar]

saṃbhrānte tumule ghore rajomeghe samutthite |
dvitīyāmiva saṃprāptāmamanyanta niśāṃ tadā || 27 ||
[Analyze grammar]

na jñāyante kauraveyā na pāñcālā na pāṇḍavāḥ |
na diśo na divaṃ norvīṃ na samaṃ viṣamaṃ tathā || 28 ||
[Analyze grammar]

hastasaṃsparśamāpannānparānvāpyatha vā svakān |
nyapātayaṃstadā yuddhe narāḥ sma vijayaiṣiṇaḥ || 29 ||
[Analyze grammar]

uddhūtatvāttu rajasaḥ prasekācchoṇitasya ca |
praśaśāma rajo bhaumaṃ śīghratvādanilasya ca || 30 ||
[Analyze grammar]

tatra nāgā hayā yodhā rathino'tha padātayaḥ |
pārijātavanānīva vyarocanrudhirokṣitāḥ || 31 ||
[Analyze grammar]

tato duryodhanaḥ karṇo droṇo duḥśāsanastathā |
pāṇḍavaiḥ samasajjanta caturbhiścaturo rathāḥ || 32 ||
[Analyze grammar]

duryodhanaḥ saha bhrātrā yamābhyāṃ samasajjata |
vṛkodareṇa rādheyo bhāradvājena cārjunaḥ || 33 ||
[Analyze grammar]

tadghoraṃ mahadāścaryaṃ sarve praikṣansamantataḥ |
ratharṣabhāṇāmugrāṇāṃ saṃnipātamamānuṣam || 34 ||
[Analyze grammar]

rathamārgairvicitraiśca vicitrarathasaṃkulam |
apaśyanrathino yuddhaṃ vicitraṃ citrayodhinām || 35 ||
[Analyze grammar]

yatamānāḥ parākrāntāḥ parasparajigīṣavaḥ |
jīmūtā iva gharmānte śaravarṣairavākiran || 36 ||
[Analyze grammar]

te rathānsūryasaṃkāśānāsthitāḥ puruṣarṣabhāḥ |
aśobhanta yathā meghāḥ śāradāḥ samupasthitāḥ || 37 ||
[Analyze grammar]

spardhinaste maheṣvāsāḥ kṛtayatnā dhanurdharāḥ |
abhyagacchaṃstathānyonyaṃ mattā gajavṛṣā iva || 38 ||
[Analyze grammar]

na nūnaṃ dehabhedo'sti kāle tasminsamāgate |
yatra sarve na yugapadvyaśīryanta mahārathāḥ || 39 ||
[Analyze grammar]

bāhubhiścaraṇaiśchinnaiḥ śirobhiścārukuṇḍalaiḥ |
kārmukairviśikhaiḥ prāsaiḥ khaḍgaiḥ paraśupaṭṭiśaiḥ || 40 ||
[Analyze grammar]

nālīkakṣuranārācairnakharaiḥ śaktitomaraiḥ |
anyaiśca vividhākārairdhautaiḥ praharaṇottamaiḥ || 41 ||
[Analyze grammar]

citraiśca vividhākāraiḥ śarīrāvaraṇairapi |
vicitraiśca rathairbhagnairhataiśca gajavājibhiḥ || 42 ||
[Analyze grammar]

śūnyaiśca nagarākārairhatayodhadhvajai rathaiḥ |
amanuṣyairhayaistrastaiḥ kṛṣyamāṇaistatastataḥ || 43 ||
[Analyze grammar]

vātāyamānairasakṛddhatavīrairalaṃkṛtaiḥ |
vyajanaiḥ kaṅkaṭaiścaiva dhvajaiśca vinipātitaiḥ || 44 ||
[Analyze grammar]

chatrairābharaṇairvastrairmālyaiśca susugandhibhiḥ |
hāraiḥ kirīṭairmukuṭairuṣṇīṣaiḥ kiṅkiṇīgaṇaiḥ || 45 ||
[Analyze grammar]

urasyairmaṇibhirniṣkaiścūḍāmaṇibhireva ca |
āsīdāyodhanaṃ tatra nabhastārāgaṇairiva || 46 ||
[Analyze grammar]

tato duryodhanasyāsīnnakulena samāgamaḥ |
amarṣitena kruddhasya kruddhenāmarṣitasya ca || 47 ||
[Analyze grammar]

apasavyaṃ cakārātha mādrīputrastavātmajam |
kirañśaraśatairhṛṣṭastatra nādo mahānabhūt || 48 ||
[Analyze grammar]

apasavyaṃ kṛtaḥ saṃkhye bhrātṛvyenātyamarṣiṇā |
so'marṣitastamapyājau praticakre'pasavyataḥ || 49 ||
[Analyze grammar]

tataḥ praticikīrṣantamapasavyaṃ tu te sutam |
nyavārayata tejasvī nakulaścitramārgavit || 50 ||
[Analyze grammar]

sarvato vinivāryainaṃ śarajālena pīḍayan |
vimukhaṃ nakulaścakre tatsainyāḥ samapūjayan || 51 ||
[Analyze grammar]

tiṣṭha tiṣṭheti nakulo babhāṣe tanayaṃ tava |
saṃsmṛtya sarvaduḥkhāni tava durmantritena ca || 52 ||
[Analyze grammar]