Chapter 161

saṃjaya uvāca |
tribhāgamātraśeṣāyāṃ rātryāṃ yuddhamavartata |
kurūṇāṃ pāṇḍavānāṃ ca saṃhṛṣṭānāṃ viśāṃ pate || 1 ||
[Analyze grammar]

atha candraprabhāṃ muṣṇannādityasya puraḥsaraḥ |
aruṇo'bhyudayāṃ cakre tāmrīkurvannivāmbaram || 2 ||
[Analyze grammar]

tato dvaidhīkṛte sainye droṇaḥ somakapāṇḍavān |
abhyadravatsapāñcālānduryodhanapurogamaḥ || 3 ||
[Analyze grammar]

dvaidhībhūtānkurūndṛṣṭvā mādhavo'rjunamabravīt |
sapatnānsavyataḥ kurmi savyasācinnimānkurūn || 4 ||
[Analyze grammar]

sa mādhavamanujñāya kuruṣveti dhanaṃjayaḥ |
droṇakarṇau maheṣvāsau savyataḥ paryavartata || 5 ||
[Analyze grammar]

abhiprāyaṃ tu kṛṣṇasya jñātvā parapuraṃjayaḥ |
ājiśīrṣagataṃ dṛṣṭvā bhīmasenaṃ samāsadat || 6 ||
[Analyze grammar]

bhīma uvāca |
arjunārjuna bībhatso śṛṇu me tattvato vacaḥ |
yadarthaṃ kṣatriyā sūte tasya kālo'yamāgataḥ || 7 ||
[Analyze grammar]

asmiṃścedāgate kāle śreyo na pratipatsyase |
asaṃbhāvitarūpaḥ sannānṛśaṃsyaṃ kariṣyasi || 8 ||
[Analyze grammar]

satyaśrīdharmayaśasāṃ vīryeṇānṛṇyamāpnuhi |
bhindhyanīkaṃ yudhāṃ śreṣṭha savyasācinnimānkuru || 9 ||
[Analyze grammar]

saṃjaya uvāca |
sa savyasācī bhīmena coditaḥ keśavena ca |
karṇadroṇāvatikramya samantātparyavārayat || 10 ||
[Analyze grammar]

tamājiśīrṣamāyāntaṃ dahantaṃ kṣatriyarṣabhān |
parākrāntaṃ parākramya yatantaḥ kṣatriyarṣabhāḥ |
nāśaknuvanvārayituṃ vardhamānamivānalam || 11 ||
[Analyze grammar]

atha duryodhanaḥ karṇaḥ śakuniścāpi saubalaḥ |
abhyavarṣañśaravrātaiḥ kuntīputraṃ dhanaṃjayam || 12 ||
[Analyze grammar]

teṣāmastrāṇi sarveṣāmuttamāstravidāṃ varaḥ |
kadarthīkṛtya rājendra śaravarṣairavākirat || 13 ||
[Analyze grammar]

astrairastrāṇi saṃvārya laghuhasto dhanaṃjayaḥ |
sarvānavidhyanniśitairdaśabhirdaśabhiḥ śaraiḥ || 14 ||
[Analyze grammar]

uddhūtā rajaso vṛṣṭiḥ śaravṛṣṭistathaiva ca |
tamaśca ghoraṃ śabdaśca tadā samabhavanmahān || 15 ||
[Analyze grammar]

na dyaurna bhūmirna diśaḥ prājñāyanta tathā gate |
sainyena rajasā mūḍhaṃ sarvamandhamivābhavat || 16 ||
[Analyze grammar]

naiva te na vayaṃ rājanprajñāsiṣma parasparam |
uddeśena hi tena sma samayudhyanta pārthivāḥ || 17 ||
[Analyze grammar]

virathā rathino rājansamāsādya parasparam |
keśeṣu samasajjanta kavaceṣu bhujeṣu ca || 18 ||
[Analyze grammar]

hatāśvā hatasūtāśca niśceṣṭā rathinastadā |
jīvanta iva tatra sma vyadṛśyanta bhayārditāḥ || 19 ||
[Analyze grammar]

hatāngajānsamāśliṣya parvatāniva vājinaḥ |
gatasattvā vyadṛśyanta tathaiva saha sādibhiḥ || 20 ||
[Analyze grammar]

tatastvabhyavasṛtyaiva saṃgrāmāduttarāṃ diśam |
atiṣṭhadāhave droṇo vidhūma iva pāvakaḥ || 21 ||
[Analyze grammar]

tamājiśīrṣādekāntamapakrāntaṃ niśāmya tu |
samakampanta sainyāni pāṇḍavānāṃ viśāṃ pate || 22 ||
[Analyze grammar]

bhrājamānaṃ śriyā yuktaṃ jvalantamiva tejasā |
droṇaṃ dṛṣṭvārayastresuścelurmamluśca māriṣa || 23 ||
[Analyze grammar]

āhvayantaṃ parānīkaṃ prabhinnamiva vāraṇam |
nainaṃ śaśaṃsire jetuṃ dānavā vāsavaṃ yathā || 24 ||
[Analyze grammar]

kecidāsannirutsāhāḥ kecitkruddhā manasvinaḥ |
vismitāścābhavankecitkecidāsannamarṣitāḥ || 25 ||
[Analyze grammar]

hastairhastāgramapare pratyapiṃṣannarādhipāḥ |
apare daśanairoṣṭhānadaśankrodhamūrchitāḥ || 26 ||
[Analyze grammar]

vyākṣipannāyudhānanye mamṛduścāpare bhujān |
anye cānvapatandroṇaṃ tyaktātmāno mahaujasaḥ || 27 ||
[Analyze grammar]

pāñcālāstu viśeṣeṇa droṇasāyakapīḍitāḥ |
samasajjanta rājendra samare bhṛśavedanāḥ || 28 ||
[Analyze grammar]

tato virāṭadrupadau droṇaṃ pratiyayū raṇe |
tathā carantaṃ saṃgrāme bhṛśaṃ samaradurjayam || 29 ||
[Analyze grammar]

drupadasya tataḥ pautrāstraya eva viśāṃ pate |
cedayaśca maheṣvāsā droṇamevābhyayuryudhi || 30 ||
[Analyze grammar]

teṣāṃ drupadapautrāṇāṃ trayāṇāṃ niśitaiḥ śaraiḥ |
tribhirdroṇo'haratprāṇāṃste hatā nyapatanbhuvi || 31 ||
[Analyze grammar]

tato droṇo'jayadyuddhe cedikekayasṛñjayān |
matsyāṃścaivājayatsarvānbhāradvājo mahārathaḥ || 32 ||
[Analyze grammar]

tatastu drupadaḥ krodhāccharavarṣamavākirat |
droṇaṃ prati mahārāja virāṭaścaiva saṃyuge || 33 ||
[Analyze grammar]

tato droṇaḥ supītābhyāṃ bhallābhyāmarimardanaḥ |
drupadaṃ ca virāṭaṃ ca praiṣīdvaivasvatakṣayam || 34 ||
[Analyze grammar]

hate virāṭe drupade kekayeṣu tathaiva ca |
tathaiva cedimatsyeṣu pāñcāleṣu tathaiva ca |
hateṣu triṣu vīreṣu drupadasya ca naptṛṣu || 35 ||
[Analyze grammar]

droṇasya karma taddṛṣṭvā kopaduḥkhasamanvitaḥ |
śaśāpa rathināṃ madhye dhṛṣṭadyumno mahāmanāḥ || 36 ||
[Analyze grammar]

iṣṭāpūrtāttathā kṣātrādbrāhmaṇyācca sa naśyatu |
droṇo yasyādya mucyeta yo vā droṇātparāṅmukhaḥ || 37 ||
[Analyze grammar]

iti teṣāṃ pratiśrutya madhye sarvadhanuṣmatām |
āyāddroṇaṃ sahānīkaḥ pāñcālyaḥ paravīrahā |
pāñcālāstvekato droṇamabhyaghnanpāṇḍavānyataḥ || 38 ||
[Analyze grammar]

duryodhanaśca karṇaśca śakuniścāpi saubalaḥ |
sodaryāśca yathā mukhyāste'rakṣandroṇamāhave || 39 ||
[Analyze grammar]

rakṣyamāṇaṃ tathā droṇaṃ samare tairmahātmabhiḥ |
yatamānāpi pāñcālā na śekuḥ prativīkṣitum || 40 ||
[Analyze grammar]

tatrākrudhyadbhīmaseno dhṛṣṭadyumnasya māriṣa |
sa enaṃ vāgbhirugrābhistatakṣa puruṣarṣabha || 41 ||
[Analyze grammar]

drupadasya kule jātaḥ sarvāstreṣvastravittamaḥ |
kaḥ kṣatriyo manyamānaḥ prekṣetārimavasthitam || 42 ||
[Analyze grammar]

pitṛputravadhaṃ prāpya pumānkaḥ parihāpayet |
viśeṣatastu śapathaṃ śapitvā rājasaṃsadi || 43 ||
[Analyze grammar]

eṣa vaiśvānara iva samiddhaḥ svena tejasā |
śaracāpendhano droṇaḥ kṣatraṃ dahati tejasā || 44 ||
[Analyze grammar]

purā karoti niḥśeṣāṃ pāṇḍavānāmanīkinīm |
sthitāḥ paśyata me karma droṇameva vrajāmyaham || 45 ||
[Analyze grammar]

ityuktvā prāviśatkruddho droṇānīkaṃ vṛkodaraḥ |
dṛḍhaiḥ pūrṇāyatotsṛṣṭairdrāvayaṃstava vāhinīm || 46 ||
[Analyze grammar]

dhṛṣṭadyumno'pi pāñcālyaḥ praviśya mahatīṃ camūm |
āsasāda raṇe droṇaṃ tadāsīttumulaṃ mahat || 47 ||
[Analyze grammar]

naiva nastādṛśaṃ yuddhaṃ dṛṣṭapūrvaṃ na ca śrutam |
yathā sūryodaye rājansamutpiñjo'bhavanmahān || 48 ||
[Analyze grammar]

saṃsaktāni vyadṛśyanta rathavṛndāni māriṣa |
hatāni ca vikīrṇāni śarīrāṇi śarīriṇām || 49 ||
[Analyze grammar]

kecidanyatra gacchantaḥ pathi cānyairupadrutāḥ |
vimukhāḥ pṛṣṭhataścānye tāḍyante pārśvato'pare || 50 ||
[Analyze grammar]

tathā saṃsaktayuddhaṃ tadabhavadbhṛśadāruṇam |
atha saṃdhyāgataḥ sūryaḥ kṣaṇena samapadyata || 51 ||
[Analyze grammar]