Chapter 157

dhṛtarāṣṭra uvāca |
ekavīravadhe moghā śaktiḥ sūtātmaje yadā |
kasmātsarvānsamutsṛjya sa tāṃ pārthe na muktavān || 1 ||
[Analyze grammar]

tasminhate hatā hi syuḥ sarve pāṇḍavasṛñjayāḥ |
ekavīravadhe kasmānna yuddhe jayamādadhat || 2 ||
[Analyze grammar]

āhūto na nivarteyamiti tasya mahāvratam |
svayamāhvayitavyaḥ sa sūtaputreṇa phalgunaḥ || 3 ||
[Analyze grammar]

tato dvairathamānīya phalgunaṃ śakradattayā |
na jaghāna vṛṣā kasmāttanmamācakṣva saṃjaya || 4 ||
[Analyze grammar]

nūnaṃ buddhivihīnaścāpyasahāyaśca me sutaḥ |
śatrubhirvyaṃsitopāyaḥ kathaṃ nu sa jayedarīn || 5 ||
[Analyze grammar]

yā hyasya paramā śaktirjayasya ca parāyaṇam |
sā śaktirvāsudevena vyaṃsitāsya ghaṭotkace || 6 ||
[Analyze grammar]

kuṇeryathā hastagataṃ hriyedbilvaṃ balīyasā |
tathā śaktiramoghā sā moghībhūtā ghaṭotkace || 7 ||
[Analyze grammar]

yathā varāhasya śunaśca yudhyatostayorabhāve śvapacasya lābhaḥ |
manye vidvanvāsudevasya tadvadyuddhe lābhaḥ karṇahaiḍimbayorvai || 8 ||
[Analyze grammar]

ghaṭotkaco yadi hanyāddhi karṇaṃ paro lābhaḥ sa bhavetpāṇḍavānām |
vaikartano vā yadi taṃ nihanyāttathāpi kṛtyaṃ śaktināśātkṛtaṃ syāt || 9 ||
[Analyze grammar]

iti prājñaḥ prajñayaitadvicārya ghaṭotkacaṃ sūtaputreṇa yuddhe |
ayodhayadvāsudevo nṛsiṃhaḥ priyaṃ kurvanpāṇḍavānāṃ hitaṃ ca || 10 ||
[Analyze grammar]

saṃjaya uvāca |
etaccikīrṣitaṃ jñātvā karṇe madhunihā nṛpa |
niyojayāmāsa tadā dvairathe rākṣaseśvaram || 11 ||
[Analyze grammar]

ghaṭotkacaṃ mahāvīryaṃ mahābuddhirjanārdanaḥ |
amoghāyā vighātārthaṃ rājandurmantrite tava || 12 ||
[Analyze grammar]

tadaiva kṛtakāryā hi vayaṃ syāma kurūdvaha |
na rakṣedyadi kṛṣṇastaṃ pārthaṃ karṇānmahārathāt || 13 ||
[Analyze grammar]

sāśvadhvajarathaḥ saṃkhye dhṛtarāṣṭra patedbhuvi |
vinā janārdanaṃ pārtho yogānāmīśvaraṃ prabhum || 14 ||
[Analyze grammar]

taistairupāyairbahubhī rakṣyamāṇaḥ sa pārthiva |
jayatyabhimukhaḥ śatrūnpārthaḥ kṛṣṇena pālitaḥ || 15 ||
[Analyze grammar]

saviśeṣaṃ tvamoghāyāḥ kṛṣṇo'rakṣata pāṇḍavam |
hanyātkṣiptā hi kaunteyaṃ śaktirvṛkṣamivāśaniḥ || 16 ||
[Analyze grammar]

dhṛtarāṣṭra uvāca |
virodhī ca kumantrī ca prājñamānī mamātmajaḥ |
yasyaiṣa samatikrānto vadhopāyo jayaṃ prati || 17 ||
[Analyze grammar]

tavāpi samatikrāntametadgāvalgaṇe katham |
etamarthaṃ mahābuddhe yattvayā nāvabodhitaḥ || 18 ||
[Analyze grammar]

saṃjaya uvāca |
duryodhanasya śakunermama duḥśāsanasya ca |
rātrau rātrau bhavatyeṣā nityameva samarthanā || 19 ||
[Analyze grammar]

śvaḥ sarvasainyānutsṛjya jahi karṇa dhanaṃjayam |
preṣyavatpāṇḍupāñcālānupabhokṣyāmahe tataḥ || 20 ||
[Analyze grammar]

atha vā nihate pārthe pāṇḍuṣvanyatamaṃ tataḥ |
sthāpayedyudhi vārṣṇeyastasmātkṛṣṇo nipātyatām || 21 ||
[Analyze grammar]

kṛṣṇo hi mūlaṃ pāṇḍūnāṃ pārthaḥ skandha ivodgataḥ |
śākhā ivetare pārthāḥ pāñcālāḥ patrasaṃjñitāḥ || 22 ||
[Analyze grammar]

kṛṣṇāśrayāḥ kṛṣṇabalāḥ kṛṣṇanāthāśca pāṇḍavāḥ |
kṛṣṇaḥ parāyaṇaṃ caiṣāṃ jyotiṣāmiva candramāḥ || 23 ||
[Analyze grammar]

tasmātparṇāni śākhāśca skandhaṃ cotsṛjya sūtaja |
kṛṣṇaṃ nikṛndhi pāṇḍūnāṃ mūlaṃ sarvatra sarvadā || 24 ||
[Analyze grammar]

hanyādyadi hi dāśārhaṃ karṇo yādavanandanam |
kṛtsnā vasumatī rājanvaśe te syānna saṃśayaḥ || 25 ||
[Analyze grammar]

yadi hi sa nihataḥ śayīta bhūmau yadukulapāṇḍavanandano mahātmā |
nanu tava vasudhā narendra sarvā sagirisamudravanā vaśaṃ vrajeta || 26 ||
[Analyze grammar]

sā tu buddhiḥ kṛtāpyevaṃ jāgrati tridaśeśvare |
aprameye hṛṣīkeśe yuddhakāle vyamuhyata || 27 ||
[Analyze grammar]

arjunaṃ cāpi kaunteyaṃ sadā rakṣati keśavaḥ |
na hyenamaicchatpramukhe sauteḥ sthāpayituṃ raṇe || 28 ||
[Analyze grammar]

anyāṃścāsmai rathodārānupasthāpayadacyutaḥ |
amoghāṃ tāṃ kathaṃ śaktiṃ moghāṃ kuryāmiti prabho || 29 ||
[Analyze grammar]

tataḥ kṛṣṇaṃ mahābāhuḥ sātyakiḥ satyavikramaḥ |
papraccha rathaśārdūla karṇaṃ prati mahāratham || 30 ||
[Analyze grammar]

ayaṃ ca pratyayaḥ karṇe śaktyā cāmitavikrama |
kimarthaṃ sūtaputreṇa na muktā phalgune tu sā || 31 ||
[Analyze grammar]

vāsudeva uvāca |
duḥśāsanaśca karṇaśca śakuniśca sasaindhavaḥ |
satataṃ mantrayanti sma duryodhanapurogamāḥ || 32 ||
[Analyze grammar]

karṇa karṇa maheṣvāsa raṇe'mitaparākrama |
nānyasya śaktireṣā te moktavyā jayatāṃ vara || 33 ||
[Analyze grammar]

ṛte mahārathātpārthātkuntīputrāddhanaṃjayāt |
sa hi teṣāmatiyaśā devānāmiva vāsavaḥ || 34 ||
[Analyze grammar]

tasminvinihate sarve pāṇḍavāḥ sṛñjayaiḥ saha |
bhaviṣyanti gatātmānaḥ surā iva niragnayaḥ || 35 ||
[Analyze grammar]

tatheti ca pratijñātaṃ karṇena śinipuṃgava |
hṛdi nityaṃ tu karṇasya vadho gāṇḍīvadhanvanaḥ || 36 ||
[Analyze grammar]

ahameva tu rādheyaṃ mohayāmi yudhāṃ vara |
yato nāvasṛjacchaktiṃ pāṇḍave śvetavāhane || 37 ||
[Analyze grammar]

phalgunasya hi tāṃ mṛtyumavagamya yuyutsataḥ |
na nidrā na ca me harṣo manaso'sti yudhāṃ vara || 38 ||
[Analyze grammar]

ghaṭotkace vyaṃsitāṃ tu dṛṣṭvā tāṃ śinipuṃgava |
mṛtyorāsyāntarānmuktaṃ paśyāmyadya dhanaṃjayam || 39 ||
[Analyze grammar]

na pitā na ca me mātā na yūyaṃ bhrātarastathā |
na ca prāṇāstathā rakṣyā yathā bībhatsurāhave || 40 ||
[Analyze grammar]

trailokyarājyādyatkiṃcidbhavedanyatsudurlabham |
neccheyaṃ sātvatāhaṃ tadvinā pārthaṃ dhanaṃjayam || 41 ||
[Analyze grammar]

ataḥ praharṣaḥ sumahānyuyudhānādya me'bhavat |
mṛtaṃ pratyāgatamiva dṛṣṭvā pārthaṃ dhanaṃjayam || 42 ||
[Analyze grammar]

ataśca prahito yuddhe mayā karṇāya rākṣasaḥ |
na hyanyaḥ samare rātrau śaktaḥ karṇaṃ prabādhitum || 43 ||
[Analyze grammar]

saṃjaya uvāca |
iti sātyakaye prāha tadā devakinandanaḥ |
dhanaṃjayahite yuktastatpriye satataṃ rataḥ || 44 ||
[Analyze grammar]