Chapter 148

saṃjaya uvāca |
tataḥ karṇo raṇe dṛṣṭvā pārṣataṃ paravīrahā |
ājaghānorasi śarairdaśabhirmarmabhedibhiḥ || 1 ||
[Analyze grammar]

prativivyādha taṃ tūrṇaṃ dhṛṣṭadyumno'pi māriṣa |
pañcabhiḥ sāyakairhṛṣṭastiṣṭha tiṣṭheti cābravīt || 2 ||
[Analyze grammar]

tāvanyonyaṃ śaraiḥ saṃkhye saṃchādya sumahārathau |
punaḥ pūrṇāyatotsṛṣṭairvivyadhāte parasparam || 3 ||
[Analyze grammar]

tataḥ pāñcālamukhyasya dhṛṣṭadyumnasya saṃyuge |
sārathiṃ caturaścāśvānkarṇo vivyādha sāyakaiḥ || 4 ||
[Analyze grammar]

kārmukapravaraṃ cāsya praciccheda śitaiḥ śaraiḥ |
sārathiṃ cāsya bhallena rathanīḍādapātayat || 5 ||
[Analyze grammar]

dhṛṣṭadyumnastu viratho hatāśvo hatasārathiḥ |
gṛhītvā parighaṃ ghoraṃ karṇasyāśvānapīpiṣat || 6 ||
[Analyze grammar]

viddhaśca bahubhistena śarairāśīviṣopamaiḥ |
tato yudhiṣṭhirānīkaṃ padbhyāmevānvavartata |
āruroha rathaṃ cāpi sahadevasya māriṣa || 7 ||
[Analyze grammar]

karṇasyāpi rathe vāhānanyānsūto nyayojayat |
śaṅkhavarṇānmahāvegānsaindhavānsādhuvāhinaḥ || 8 ||
[Analyze grammar]

labdhalakṣyastu rādheyaḥ pāñcālānāṃ mahārathān |
abhyapīḍayadāyastaḥ śarairmegha ivācalān || 9 ||
[Analyze grammar]

sā pīḍyamānā karṇena pāñcālānāṃ mahācamūḥ |
saṃprādravatsusaṃtrastā siṃhenevārditā mṛgī || 10 ||
[Analyze grammar]

patitāsturagebhyaśca gajebhyaśca mahītale |
rathebhyaśca narāstūrṇamadṛśyanta tatastataḥ || 11 ||
[Analyze grammar]

dhāvamānasya yodhasya kṣurapraiḥ sa mahāmṛdhe |
bāhū ciccheda vai karṇaḥ śiraścaiva sakuṇḍalam || 12 ||
[Analyze grammar]

ūrū ciccheda cānyasya gajasthasya viśāṃ pate |
vājipṛṣṭhagatasyāpi bhūmiṣṭhasya ca māriṣa || 13 ||
[Analyze grammar]

nājñāsiṣurdhāvamānā bahavaśca mahārathāḥ |
saṃchinnānyātmagātrāṇi vāhanāni ca saṃyuge || 14 ||
[Analyze grammar]

te vadhyamānāḥ samare pāñcālāḥ sṛñjayaiḥ saha |
tṛṇapraspandanāccāpi sūtaputraṃ sma menire || 15 ||
[Analyze grammar]

api svaṃ samare yodhaṃ dhāvamānaṃ vicetasaḥ |
karṇamevābhyamanyanta tato bhītā dravanti te || 16 ||
[Analyze grammar]

tānyanīkāni bhagnāni dravamāṇāni bhārata |
abhyadravaddrutaṃ karṇaḥ pṛṣṭhato vikirañśarān || 17 ||
[Analyze grammar]

avekṣamāṇāste'nyonyaṃ susaṃmūḍhā vicetasaḥ |
nāśaknuvannavasthātuṃ kālyamānā mahātmanā || 18 ||
[Analyze grammar]

karṇenābhyāhatā rājanpāñcālāḥ parameṣubhiḥ |
droṇena ca diśaḥ sarvā vīkṣamāṇāḥ pradudruvuḥ || 19 ||
[Analyze grammar]

tato yudhiṣṭhiro rājā svasainyaṃ prekṣya vidrutam |
apayāne matiṃ kṛtvā phalgunaṃ vākyamabravīt || 20 ||
[Analyze grammar]

paśya karṇaṃ maheṣvāsaṃ dhanuṣpāṇimavasthitam |
niśīthe dāruṇe kāle tapantamiva bhāskaram || 21 ||
[Analyze grammar]

karṇasāyakanunnānāṃ krośatāmeṣa nisvanaḥ |
aniśaṃ śrūyate pārtha tvadbandhūnāmanāthavat || 22 ||
[Analyze grammar]

yathā visṛjataścāsya saṃdadhānasya cāśugān |
paśyāmi jayavikrāntaṃ kṣapayiṣyati no dhruvam || 23 ||
[Analyze grammar]

yadatrānantaraṃ kāryaṃ prāptakālaṃ prapaśyasi |
karṇasya vadhasaṃyuktaṃ tatkuruṣva dhanaṃjaya || 24 ||
[Analyze grammar]

evamukto mahābāhuḥ pārthaḥ kṛṣṇamathābravīt |
bhītaḥ kuntīsuto rājā rādheyasyātivikramāt || 25 ||
[Analyze grammar]

evaṃ gate prāptakālaṃ karṇānīke punaḥ punaḥ |
bhavānvyavasyatāṃ kṣipraṃ dravate hi varūthinī || 26 ||
[Analyze grammar]

droṇasāyakanunnānāṃ bhagnānāṃ madhusūdana |
karṇena trāsyamānānāmavasthānaṃ na vidyate || 27 ||
[Analyze grammar]

paśyāmi ca tathā karṇaṃ vicarantamabhītavat |
dravamāṇānrathodārānkirantaṃ viśikhaiḥ śitaiḥ || 28 ||
[Analyze grammar]

naitadasyotsahe soḍhuṃ caritaṃ raṇamūrdhani |
pratyakṣaṃ vṛṣṇiśārdūla pādasparśamivoragaḥ || 29 ||
[Analyze grammar]

sa bhavānatra yātvāśu yatra karṇo mahārathaḥ |
ahamenaṃ vadhiṣyāmi māṃ vaiṣa madhusūdana || 30 ||
[Analyze grammar]

vāsudeva uvāca |
paśyāmi karṇaṃ kaunteya devarājamivāhave |
vicarantaṃ naravyāghramatimānuṣavikramam || 31 ||
[Analyze grammar]

naitasyānyo'sti samare pratyudyātā dhanaṃjaya |
ṛte tvāṃ puruṣavyāghra rākṣasādvā ghaṭotkacāt || 32 ||
[Analyze grammar]

na tu tāvadahaṃ manye prāptakālaṃ tavānagha |
samāgamaṃ mahābāho sūtaputreṇa saṃyuge || 33 ||
[Analyze grammar]

dīpyamānā maholkeva tiṣṭhatyasya hi vāsavī |
tvadarthaṃ hi mahābāho raudrarūpaṃ bibharti ca || 34 ||
[Analyze grammar]

ghaṭotkacastu rādheyaṃ pratyudyātu mahābalaḥ |
sa hi bhīmena balinā jātaḥ suraparākramaḥ || 35 ||
[Analyze grammar]

tasminnastrāṇi divyāni rākṣasānyāsurāṇi ca |
satataṃ cānurakto vo hitaiṣī ca ghaṭotkacaḥ |
vijeṣyati raṇe karṇamiti me nātra saṃśayaḥ || 36 ||
[Analyze grammar]

saṃjaya uvāca |
evamuktvā mahābāhuḥ pārthaṃ puṣkaralocanaḥ |
ājuhāvātha tadrakṣaḥ taccāsītprāduragrataḥ || 37 ||
[Analyze grammar]

kavacī sa śarī khaḍgī sadhanvā ca viśāṃ pate |
abhivādya tataḥ kṛṣṇaṃ pāṇḍavaṃ ca dhanaṃjayam |
abravīttaṃ tadā hṛṣṭastvayamasmyanuśādhi mām || 38 ||
[Analyze grammar]

tatastaṃ meghasaṃkāśaṃ dīptāsyaṃ dīptakuṇḍalam |
abhyabhāṣata haiḍimbaṃ dāśārhaḥ prahasanniva || 39 ||
[Analyze grammar]

ghaṭotkaca vijānīhi yattvāṃ vakṣyāmi putraka |
prāpto vikramakālo'yaṃ tava nānyasya kasyacit || 40 ||
[Analyze grammar]

sa bhavānmajjamānānāṃ bandhūnāṃ tvaṃ plavo yathā |
vividhāni tavāstrāṇi santi māyā ca rākṣasī || 41 ||
[Analyze grammar]

paśya karṇena haiḍimba pāṇḍavānāmanīkinī |
kālyamānā yathā gāvaḥ pālena raṇamūrdhani || 42 ||
[Analyze grammar]

eṣa karṇo maheṣvāso matimāndṛḍhavikramaḥ |
pāṇḍavānāmanīkeṣu nihanti kṣatriyarṣabhān || 43 ||
[Analyze grammar]

kirantaḥ śaravarṣāṇi mahānti dṛḍhadhanvinaḥ |
na śaknuvantyavasthātuṃ pīḍyamānāḥ śarārciṣā || 44 ||
[Analyze grammar]

niśīthe sūtaputreṇa śaravarṣeṇa pīḍitāḥ |
ete dravanti pāñcālāḥ siṃhasyeva bhayānmṛgāḥ || 45 ||
[Analyze grammar]

etasyaivaṃ pravṛddhasya sūtaputrasya saṃyuge |
niṣeddhā vidyate nānyastvadṛte bhīmavikrama || 46 ||
[Analyze grammar]

sa tvaṃ kuru mahābāho karma yuktamihātmanaḥ |
mātulānāṃ pitṝṇāṃ ca tejaso'strabalasya ca || 47 ||
[Analyze grammar]

etadarthaṃ hi haiḍimba putrānicchanti mānavāḥ |
kathaṃ nastārayedduḥkhātsa tvaṃ tāraya bāndhavān || 48 ||
[Analyze grammar]

tava hyastrabalaṃ bhīmaṃ māyāśca tava dustarāḥ |
saṃgrāme yudhyamānasya satataṃ bhīmanandana || 49 ||
[Analyze grammar]

pāṇḍavānāṃ prabhagnānāṃ karṇena śitasāyakaiḥ |
majjatāṃ dhārtarāṣṭreṣu bhava pāraṃ paraṃtapa || 50 ||
[Analyze grammar]

rātrau hi rākṣasā bhūyo bhavantyamitavikramāḥ |
balavantaḥ sudurdharṣāḥ śūrā vikrāntacāriṇaḥ || 51 ||
[Analyze grammar]

jahi karṇaṃ maheṣvāsaṃ niśīthe māyayā raṇe |
pārthā droṇaṃ vadhiṣyanti dhṛṣṭadyumnapurogamāḥ || 52 ||
[Analyze grammar]

keśavasya vacaḥ śrutvā bībhatsurapi rākṣasam |
abhyabhāṣata kauravya ghaṭotkacamariṃdamam || 53 ||
[Analyze grammar]

ghaṭotkaca bhavāṃścaiva dīrghabāhuśca sātyakiḥ |
matau me sarvasainyeṣu bhīmasenaśca pāṇḍavaḥ || 54 ||
[Analyze grammar]

sa bhavānyātu karṇena dvairathaṃ yudhyatāṃ niśi |
sātyakiḥ pṛṣṭhagopaste bhaviṣyati mahārathaḥ || 55 ||
[Analyze grammar]

jahi karṇaṃ raṇe śūraṃ sātvatena sahāyavān |
yathendrastārakaṃ pūrvaṃ skandena saha jaghnivān || 56 ||
[Analyze grammar]

ghaṭotkaca uvāca |
alamevāsmi karṇāya droṇāyālaṃ ca sattama |
anyeṣāṃ kṣatriyāṇāṃ ca kṛtāstrāṇāṃ mahātmanām || 57 ||
[Analyze grammar]

adya dāsyāmi saṃgrāmaṃ sūtaputrāya taṃ niśi |
yaṃ janāḥ saṃpravakṣyanti yāvadbhūmirdhariṣyati || 58 ||
[Analyze grammar]

na cātra śūrānmokṣyāmi na bhītānna kṛtāñjalīn |
sarvāneva vadhiṣyāmi rākṣasaṃ dharmamāsthitaḥ || 59 ||
[Analyze grammar]

saṃjaya uvāca |
evamuktvā mahābāhurhaiḍimbaḥ paravīrahā |
abhyayāttumule karṇaṃ tava sainyaṃ vibhīṣayan || 60 ||
[Analyze grammar]

tamāpatantaṃ saṃkruddhaṃ dīptāsyamiva pannagam |
abhyasyanparameṣvāsaḥ pratijagrāha sūtajaḥ || 61 ||
[Analyze grammar]

tayoḥ samabhavadyuddhaṃ karṇarākṣasayorniśi |
garjato rājaśārdūla śakraprahrādayoriva || 62 ||
[Analyze grammar]