Chapter 147

saṃjaya uvāca |
vidrutaṃ svabalaṃ dṛṣṭvā vadhyamānaṃ mahātmabhiḥ |
krodhena mahatāviṣṭaḥ putrastava viśāṃ pate || 1 ||
[Analyze grammar]

abhyetya sahasā karṇaṃ droṇaṃ ca jayatāṃ varam |
amarṣavaśamāpanno vākyajño vākyamabravīt || 2 ||
[Analyze grammar]

bhavadbhyāmiha saṃgrāmo kruddhābhyāṃ saṃpravartitaḥ |
āhave nihataṃ dṛṣṭvā saindhavaṃ savyasācinā || 3 ||
[Analyze grammar]

nihanyamānāṃ pāṇḍūnāṃ balena mama vāhinīm |
bhūtvā tadvijaye śaktāvaśaktāviva paśyataḥ || 4 ||
[Analyze grammar]

yadyahaṃ bhavatostyājyo na vācyo'smi tadaiva hi |
āvāṃ pāṇḍusutānsaṃkhye jeṣyāva iti mānadau || 5 ||
[Analyze grammar]

tadaivāhaṃ vacaḥ śrutvā bhavadbhyāmanusaṃmatam |
kṛtavānpāṇḍavaiḥ sārdhaṃ vairaṃ yodhavināśanam || 6 ||
[Analyze grammar]

yadi nāhaṃ parityājyo bhavadbhyāṃ puruṣarṣabhau |
yudhyetāmanurūpeṇa vikrameṇa suvikramau || 7 ||
[Analyze grammar]

vākpratodena tau vīrau praṇunnau tanayena te |
prāvartayetāṃ tau yuddhaṃ ghaṭṭitāviva pannagau || 8 ||
[Analyze grammar]

tatastau rathināṃ śreṣṭhau sarvalokadhanurdharau |
śaineyapramukhānpārthānabhidudruvatū raṇe || 9 ||
[Analyze grammar]

tathaiva sahitāḥ pārthāḥ svena sainyena saṃvṛtāḥ |
abhyavartanta tau vīrau nardamānau muhurmuhuḥ || 10 ||
[Analyze grammar]

atha droṇo maheṣvāso daśabhiḥ śinipuṃgavam |
avidhyattvaritaṃ kruddhaḥ sarvaśastrabhṛtāṃ varaḥ || 11 ||
[Analyze grammar]

karṇaśca daśabhirbāṇaiḥ putraśca tava saptabhiḥ |
daśabhirvṛṣasenaśca saubalaścāpi saptabhiḥ |
ete kaurava saṃkrande śaineyaṃ paryavārayan || 12 ||
[Analyze grammar]

dṛṣṭvā ca samare droṇaṃ nighnantaṃ pāṇḍavīṃ camūm |
vivyadhuḥ somakāstūrṇaṃ samantāccharavṛṣṭibhiḥ || 13 ||
[Analyze grammar]

tato droṇo'haratprāṇānkṣatriyāṇāṃ viśāṃ pate |
raśmibhirbhāskaro rājaṃstamasāmiva bhārata || 14 ||
[Analyze grammar]

droṇena vadhyamānānāṃ pāñcālānāṃ viśāṃ pate |
śuśruve tumulaḥ śabdaḥ krośatāmitaretaram || 15 ||
[Analyze grammar]

putrānanye pitṝnanye bhrātṝnanye ca mātulān |
bhāgineyānvayasyāṃśca tathā saṃbandhibāndhavān |
utsṛjyotsṛjya gacchanti tvaritā jīvitepsavaḥ || 16 ||
[Analyze grammar]

apare mohitā mohāttamevābhimukhā yayuḥ |
pāṇḍavānāṃ raṇe yodhāḥ paralokaṃ tathāpare || 17 ||
[Analyze grammar]

sā tathā pāṇḍavī senā vadhyamānā mahātmabhiḥ |
niśi saṃprādravadrājannutsṛjyolkāḥ sahasraśaḥ || 18 ||
[Analyze grammar]

paśyato bhīmasenasya vijayasyācyutasya ca |
yamayordharmaputrasya pārṣatasya ca paśyataḥ || 19 ||
[Analyze grammar]

tamasā saṃvṛte loke na prājñāyata kiṃcana |
kauravāṇāṃ prakāśena dṛśyante tu drutāḥ pare || 20 ||
[Analyze grammar]

dravamāṇaṃ tu tatsainyaṃ droṇakarṇau mahārathau |
jaghnatuḥ pṛṣṭhato rājankirantau sāyakānbahūn || 21 ||
[Analyze grammar]

pāñcāleṣu prabhagneṣu dīryamāṇeṣu sarvaśaḥ |
janārdano dīnamanāḥ pratyabhāṣata phalgunam || 22 ||
[Analyze grammar]

droṇakarṇau maheṣvāsāvetau pārṣatasātyakī |
pāñcālāṃścaiva sahitau jaghnatuḥ sāyakairbhṛśam || 23 ||
[Analyze grammar]

etayoḥ śaravarṣeṇa prabhagnā no mahārathāḥ |
vāryamāṇāpi kaunteya pṛtanā nāvatiṣṭhate || 24 ||
[Analyze grammar]

etāvāvāṃ sarvasainyairvyūḍhaiḥ samyagudāyudhaiḥ |
droṇaṃ ca sūtaputraṃ ca prayatāvaḥ prabādhitum || 25 ||
[Analyze grammar]

etau hi balinau śūrau kṛtāstrau jitakāśinau |
upekṣitau balaṃ kruddhau nāśayetāṃ niśāmimām |
eṣa bhīmo'bhiyātyugraḥ punarāvartya vāhinīm || 26 ||
[Analyze grammar]

vṛkodaraṃ tathāyāntaṃ dṛṣṭvā tatra janārdanaḥ |
punarevābravīdrājanharṣayanniva pāṇḍavam || 27 ||
[Analyze grammar]

eṣa bhīmo raṇaślāghī vṛtaḥ somakapāṇḍavaiḥ |
ruṣito'bhyeti vegena droṇakarṇau mahābalau || 28 ||
[Analyze grammar]

etena sahito yudhya pāñcālaiśca mahārathaiḥ |
āśvāsanārthaṃ sarveṣāṃ sainyānāṃ pāṇḍunandana || 29 ||
[Analyze grammar]

tatastau puruṣavyāghrāvubhau mādhavapāṇḍavau |
droṇakarṇau samāsādya dhiṣṭhitau raṇamūrdhani || 30 ||
[Analyze grammar]

tatastatpunarāvṛttaṃ yudhiṣṭhirabalaṃ mahat |
tato droṇaśca karṇaśca parānmamṛdaturyudhi || 31 ||
[Analyze grammar]

sa saṃprahārastumulo niśi pratyabhavanmahān |
yathā sāgarayo rājaṃścandrodayavivṛddhayoḥ || 32 ||
[Analyze grammar]

tata utsṛjya pāṇibhyaḥ pradīpāṃstava vāhinī |
yuyudhe pāṇḍavaiḥ sārdhamunmattavadahaḥkṣaye || 33 ||
[Analyze grammar]

rajasā tamasā caiva saṃvṛte bhṛśadāruṇe |
kevalaṃ nāmagotreṇa prāyudhyanta jayaiṣiṇaḥ || 34 ||
[Analyze grammar]

aśrūyanta hi nāmāni śrāvyamāṇāni pārthivaiḥ |
praharadbhirmahārāja svayaṃvara ivāhave || 35 ||
[Analyze grammar]

niḥśabdamāsītsahasā punaḥ śabdo mahānabhūt |
kruddhānāṃ yudhyamānānāṃ jayatāṃ jīyatāmapi || 36 ||
[Analyze grammar]

yatra yatra sma dṛśyante pradīpāḥ kurusattama |
tatra tatra sma te śūrā nipatanti pataṃgavat || 37 ||
[Analyze grammar]

tathā saṃyudhyamānānāṃ vigāḍhābhūnmahāniśā |
pāṇḍavānāṃ ca rājendra kauravāṇāṃ ca sarvaśaḥ || 38 ||
[Analyze grammar]