Chapter 143

saṃjaya uvāca |
śatānīkaṃ śaraistūrṇaṃ nirdahantaṃ camūṃ tava |
citrasenastava suto vārayāmāsa bhārata || 1 ||
[Analyze grammar]

nākuliścitrasenaṃ tu nārācenārdayadbhṛśam |
sa ca taṃ prativivyādha daśabhirniśitaiḥ śaraiḥ || 2 ||
[Analyze grammar]

citraseno mahārāja śatānīkaṃ punaryudhi |
navabhirniśitairbāṇairājaghāna stanāntare || 3 ||
[Analyze grammar]

nākulistasya viśikhairvarma saṃnataparvabhiḥ |
gātrātsaṃcyāvayāmāsa tadadbhutamivābhavat || 4 ||
[Analyze grammar]

so'petavarmā putraste virarāja bhṛśaṃ nṛpa |
utsṛjya kāle rājendra nirmokamiva pannagaḥ || 5 ||
[Analyze grammar]

tato'sya niśitairbāṇairdhvajaṃ ciccheda nākuliḥ |
dhanuścaiva mahārāja yatamānasya saṃyuge || 6 ||
[Analyze grammar]

sa chinnadhanvā samare vivarmā ca mahārathaḥ |
dhanuranyanmahārāja jagrāhārividāraṇam || 7 ||
[Analyze grammar]

tatastūrṇaṃ citraseno nākuliṃ navabhiḥ śaraiḥ |
vivyādha samare kruddho bharatānāṃ mahārathaḥ || 8 ||
[Analyze grammar]

śatānīko'tha saṃkruddhaścitrasenasya māriṣa |
jaghāna caturo vāhānsārathiṃ ca narottamaḥ || 9 ||
[Analyze grammar]

avaplutya rathāttasmāccitraseno mahārathaḥ |
nākuliṃ pañcaviṃśatyā śarāṇāmārdayadbalī || 10 ||
[Analyze grammar]

tasya tatkurvataḥ karma nakulasya suto raṇe |
ardhacandreṇa ciccheda cāpaṃ ratnavibhūṣitam || 11 ||
[Analyze grammar]

sa chinnadhanvā viratho hatāśvo hatasārathiḥ |
āruroha rathaṃ tūrṇaṃ hārdikyasya mahātmanaḥ || 12 ||
[Analyze grammar]

drupadaṃ tu sahānīkaṃ droṇaprepsuṃ mahāratham |
vṛṣaseno'bhyayāttūrṇaṃ kirañśaraśataistadā || 13 ||
[Analyze grammar]

yajñasenastu samare karṇaputraṃ mahāratham |
ṣaṣṭyā śarāṇāṃ vivyādha bāhvorurasi cānagha || 14 ||
[Analyze grammar]

vṛṣasenastu saṃkruddho yajñasenaṃ rathe sthitam |
bahubhiḥ sāyakaistīkṣṇairājaghāna stanāntare || 15 ||
[Analyze grammar]

tāvubhau śaranunnāṅgau śarakaṇṭakinau raṇe |
vyabhrājetāṃ mahārāja śvāvidhau śalalairiva || 16 ||
[Analyze grammar]

rukmapuṅkhairajihmāgraiḥ śaraiśchinnatanucchadau |
rudhiraughapariklinnau vyabhrājetāṃ mahāmṛdhe || 17 ||
[Analyze grammar]

tapanīyanibhau citrau kalpavṛkṣāvivādbhutau |
kiṃśukāviva cotphullau vyakāśetāṃ raṇājire || 18 ||
[Analyze grammar]

vṛṣasenastato rājannavabhirdrupadaṃ śaraiḥ |
viddhvā vivyādha saptatyā punaścānyaistribhiḥ śaraiḥ || 19 ||
[Analyze grammar]

tataḥ śarasahasrāṇi vimuñcanvibabhau tadā |
karṇaputro mahārāja varṣamāṇa ivāmbudaḥ || 20 ||
[Analyze grammar]

tatastu drupadānīkaṃ śaraiśchinnatanucchadam |
saṃprādravadraṇe rājanniśīthe bhairave sati || 21 ||
[Analyze grammar]

pradīpairhi parityaktairjvaladbhistaiḥ samantataḥ |
vyarājata mahī rājanvītābhrā dyauriva grahaiḥ || 22 ||
[Analyze grammar]

tathāṅgadairnipatitairvyarājata vasuṃdharā |
prāvṛṭkāle mahārāja vidyudbhiriva toyadaḥ || 23 ||
[Analyze grammar]

tataḥ karṇasutatrastāḥ somakā vipradudruvuḥ |
yathendrabhayavitrastā dānavāstārakāmaye || 24 ||
[Analyze grammar]

tenārdyamānāḥ samare dravamāṇāśca somakāḥ |
vyarājanta mahārāja pradīpairavabhāsitāḥ || 25 ||
[Analyze grammar]

tāṃstu nirjitya samare karṇaputro vyarocata |
madhyaṃdinamanuprāpto gharmāṃśuriva bhārata || 26 ||
[Analyze grammar]

teṣu rājasahasreṣu tāvakeṣu pareṣu ca |
eka eva jvalaṃstasthau vṛṣasenaḥ pratāpavān || 27 ||
[Analyze grammar]

sa vijitya raṇe śūrānsomakānāṃ mahārathān |
jagāma tvaritastatra yatra rājā yudhiṣṭhiraḥ || 28 ||
[Analyze grammar]

prativindhyamatha kruddhaṃ pradahantaṃ raṇe ripūn |
duḥśāsanastava sutaḥ pratyudgacchanmahārathaḥ || 29 ||
[Analyze grammar]

tayoḥ samāgamo rājaṃścitrarūpo babhūva ha |
vyapetajalade vyomni budhabhārgavayoriva || 30 ||
[Analyze grammar]

prativindhyaṃ tu samare kurvāṇaṃ karma duṣkaram |
duḥśāsanastribhirbāṇairlalāṭe samavidhyata || 31 ||
[Analyze grammar]

so'tividdho balavatā putreṇa tava dhanvinā |
virarāja mahābāhuḥ saśṛṅga iva parvataḥ || 32 ||
[Analyze grammar]

duḥśāsanaṃ tu samare prativindhyo mahārathaḥ |
navabhiḥ sāyakairviddhvā punarvivyādha saptabhiḥ || 33 ||
[Analyze grammar]

tatra bhārata putraste kṛtavānkarma duṣkaram |
prativindhyahayānugraiḥ pātayāmāsa yaccharaiḥ || 34 ||
[Analyze grammar]

sārathiṃ cāsya bhallena dhvajaṃ ca samapātayat |
rathaṃ ca śataśo rājanvyadhamattasya dhanvinaḥ || 35 ||
[Analyze grammar]

patākāśca sa tūṇīrānraśmīnyoktrāṇi cābhibho |
ciccheda tilaśaḥ kruddhaḥ śaraiḥ saṃnataparvabhiḥ || 36 ||
[Analyze grammar]

virathaḥ sa tu dharmātmā dhanuṣpāṇiravasthitaḥ |
ayodhayattava sutaṃ kirañśaraśatānbahūn || 37 ||
[Analyze grammar]

kṣurapreṇa dhanustasya ciccheda kṛtahastavat |
athainaṃ daśabhirbhallaiśchinnadhanvānamārdayat || 38 ||
[Analyze grammar]

taṃ dṛṣṭvā virathaṃ tatra bhrātaro'sya mahārathāḥ |
anvavartanta vegena mahatyā senayā saha || 39 ||
[Analyze grammar]

āplutaḥ sa tato yānaṃ sutasomasya bhāsvaram |
dhanurgṛhya mahārāja vivyādha tanayaṃ tava || 40 ||
[Analyze grammar]

tatastu tāvakāḥ sarve parivārya sutaṃ tava |
abhyavartanta saṃgrāme mahatyā senayā vṛtāḥ || 41 ||
[Analyze grammar]

tataḥ pravavṛte yuddhaṃ tava teṣāṃ ca bhārata |
niśīthe dāruṇe kāle yamarāṣṭravivardhanam || 42 ||
[Analyze grammar]