Chapter 142

saṃjaya uvāca |
sahadevamathāyāntaṃ droṇaprepsuṃ viśāṃ pate |
karṇo vaikartano yuddhe vārayāmāsa bhārata || 1 ||
[Analyze grammar]

sahadevastu rādheyaṃ viddhvā navabhirāśugaiḥ |
punarvivyādha daśabhirniśitairnataparvabhiḥ || 2 ||
[Analyze grammar]

taṃ karṇaḥ prativivyādha śatena nataparvaṇām |
sajyaṃ cāsya dhanuḥ śīghraṃ ciccheda laghuhastavat || 3 ||
[Analyze grammar]

tato'nyaddhanurādāya mādrīputraḥ pratāpavān |
karṇaṃ vivyādha viṃśatyā tadadbhutamivābhavat || 4 ||
[Analyze grammar]

tasya karṇo hayānhatvā śaraiḥ saṃnataparvabhiḥ |
sārathiṃ cāsya bhallena drutaṃ ninye yamakṣayam || 5 ||
[Analyze grammar]

virathaḥ sahadevastu khaḍgaṃ carma samādade |
tadapyasya śaraiḥ karṇo vyadhamatprahasanniva || 6 ||
[Analyze grammar]

tato gurvīṃ mahāghorāṃ hemacitrāṃ mahāgadām |
preṣayāmāsa samare vaikartanarathaṃ prati || 7 ||
[Analyze grammar]

tāmāpatantīṃ sahasā sahadevapraveritām |
vyaṣṭambhayaccharaiḥ karṇo bhūmau caināmapātayat || 8 ||
[Analyze grammar]

gadāṃ vinihatāṃ dṛṣṭvā sahadevastvarānvitaḥ |
śaktiṃ cikṣepa karṇāya tāmapyasyācchinaccharaiḥ || 9 ||
[Analyze grammar]

sasaṃbhramastatastūrṇamavaplutya rathottamāt |
sahadevo mahārāja dṛṣṭvā karṇaṃ vyavasthitam |
rathacakraṃ tato gṛhya mumocādhirathiṃ prati || 10 ||
[Analyze grammar]

tamāpatantaṃ sahasā kālacakramivodyatam |
śarairanekasāhasrairacchinatsūtanandanaḥ || 11 ||
[Analyze grammar]

tasmiṃstu vitathe cakre kṛte tena mahātmanā |
vāryamāṇaśca viśikhaiḥ sahadevo raṇaṃ jahau || 12 ||
[Analyze grammar]

tamabhidrutya rādheyo muhūrtādbharatarṣabha |
abravītprahasanvākyaṃ sahadevaṃ viśāṃ pate || 13 ||
[Analyze grammar]

mā yudhyasva raṇe vīra viśiṣṭai rathibhiḥ saha |
sadṛśairyudhya mādreya vaco me mā viśaṅkithāḥ || 14 ||
[Analyze grammar]

athainaṃ dhanuṣo'greṇa tudanbhūyo'bravīdvacaḥ |
eṣo'rjuno raṇe yatto yudhyate kurubhiḥ saha |
tatra gacchasva mādreya gṛhaṃ vā yadi manyase || 15 ||
[Analyze grammar]

evamuktvā tu taṃ karṇo rathena rathināṃ varaḥ |
prāyātpāñcālapāṇḍūnāṃ sainyāni prahasanniva || 16 ||
[Analyze grammar]

vadhaprāptaṃ tu mādreyaṃ nāvadhītsamare'rihā |
kuntyāḥ smṛtvā vaco rājansatyasaṃdho mahārathaḥ || 17 ||
[Analyze grammar]

sahadevastato rājanvimanāḥ śarapīḍitaḥ |
karṇavākśalyataptaśca jīvitānniravidyata || 18 ||
[Analyze grammar]

āruroha rathaṃ cāpi pāñcālyasya mahātmanaḥ |
janamejayasya samare tvarāyukto mahārathaḥ || 19 ||
[Analyze grammar]

virāṭaṃ sahasenaṃ tu droṇārthe drutamāgatam |
madrarājaḥ śaraugheṇa chādayāmāsa dhanvinam || 20 ||
[Analyze grammar]

tayoḥ samabhavadyuddhaṃ samare dṛḍhadhanvinoḥ |
yādṛśaṃ hyabhavadrājañjambhavāsavayoḥ purā || 21 ||
[Analyze grammar]

madrarājo mahārāja virāṭaṃ vāhinīpatim |
ājaghne tvaritaṃ tīkṣṇaiḥ śatena nataparvaṇām || 22 ||
[Analyze grammar]

prativivyādha taṃ rājā navabhirniśitaiḥ śaraiḥ |
punaścaiva trisaptatyā bhūyaścaiva śatena ha || 23 ||
[Analyze grammar]

tasya madrādhipo hatvā caturo rathavājinaḥ |
sūtaṃ dhvajaṃ ca samare rathopasthādapātayat || 24 ||
[Analyze grammar]

hatāśvāttu rathāttūrṇamavaplutya mahārathaḥ |
tasthau visphārayaṃścāpaṃ vimuñcaṃśca śitāñśarān || 25 ||
[Analyze grammar]

śatānīkastato dṛṣṭvā bhrātaraṃ hatavāhanam |
rathenābhyapatattūrṇaṃ sarvalokasya paśyataḥ || 26 ||
[Analyze grammar]

śatānīkamathāyāntaṃ madrarājo mahāmṛdhe |
viśikhairbahubhirviddhvā tato ninye yamakṣayam || 27 ||
[Analyze grammar]

tasmiṃstu nihate vīre virāṭo rathasattamaḥ |
āruroha rathaṃ tūrṇaṃ tameva dhvajamālinam || 28 ||
[Analyze grammar]

tato visphārya nayane krodhāddviguṇavikramaḥ |
madrarājarathaṃ tūrṇaṃ chādayāmāsa patribhiḥ || 29 ||
[Analyze grammar]

tato madrādhipaḥ kruddhaḥ śatena nataparvaṇām |
ājaghānorasi dṛḍhaṃ virāṭaṃ vāhinīpatim || 30 ||
[Analyze grammar]

so'tividdho mahārāja rathopastha upāviśat |
kaśmalaṃ cāviśattīvraṃ virāṭo bharatarṣabha |
sārathistamapovāha samare śaravikṣatam || 31 ||
[Analyze grammar]

tataḥ sā mahatī senā prādravanniśi bhārata |
vadhyamānā śaraśataiḥ śalyenāhavaśobhinā || 32 ||
[Analyze grammar]

tāṃ dṛṣṭvā vidrutāṃ senāṃ vāsudevadhanaṃjayau |
prāyātāṃ tatra rājendra yatra śalyo vyavasthitaḥ || 33 ||
[Analyze grammar]

tau tu pratyudyayau rājanrākṣasendro hyalambusaḥ |
aṣṭacakrasamāyuktamāsthāya pravaraṃ ratham || 34 ||
[Analyze grammar]

turaṃgamamukhairyuktaṃ piśācairghoradarśanaiḥ |
lohitārdrapatākaṃ taṃ raktamālyavibhūṣitam |
kārṣṇāyasamayaṃ ghoramṛkṣacarmāvṛtaṃ mahat || 35 ||
[Analyze grammar]

raudreṇa citrapakṣeṇa vivṛtākṣeṇa kūjatā |
dhvajenocchritatuṇḍena gṛdhrarājena rājatā || 36 ||
[Analyze grammar]

sa babhau rākṣaso rājanbhinnāñjanacayopamaḥ |
rurodhārjunamāyāntaṃ prabhañjanamivādrirāṭ |
kiranbāṇagaṇānrājañśataśo'rjunamūrdhani || 37 ||
[Analyze grammar]

atitīvramabhūdyuddhaṃ nararākṣasayormṛdhe |
draṣṭṝṇāṃ prītijananaṃ sarveṣāṃ bharatarṣabha || 38 ||
[Analyze grammar]

tamarjunaḥ śatenaiva patriṇāmabhyatāḍayat |
navabhiśca śitairbāṇaiściccheda dhvajamucchritam || 39 ||
[Analyze grammar]

sārathiṃ ca tribhirbāṇaistribhireva triveṇukam |
dhanurekena ciccheda caturbhiścaturo hayān |
virathasyodyataṃ khaḍgaṃ śareṇāsya dvidhācchinat || 40 ||
[Analyze grammar]

athainaṃ niśitairbāṇaiścaturbhirbharatarṣabha |
pārtho'rdayadrākṣasendraṃ sa viddhaḥ prādravadbhayāt || 41 ||
[Analyze grammar]

taṃ vijityārjunastūrṇaṃ droṇāntikamupāyayau |
kirañśaragaṇānrājannaravāraṇavājiṣu || 42 ||
[Analyze grammar]

vadhyamānā mahārāja pāṇḍavena yaśasvinā |
sainikā nyapatannurvyāṃ vātanunnā iva drumāḥ || 43 ||
[Analyze grammar]

teṣu tūtsādyamāneṣu phalgunena mahātmanā |
saṃprādravadbalaṃ sarvaṃ putrāṇāṃ te viśāṃ pate || 44 ||
[Analyze grammar]