Chapter 133

saṃjaya uvāca |
udīryamāṇaṃ taddṛṣṭvā pāṇḍavānāṃ mahadbalam |
aviṣahyaṃ ca manvānaḥ karṇaṃ duryodhano'bravīt || 1 ||
[Analyze grammar]

ayaṃ sa kālaḥ saṃprāpto mitrāṇāṃ mitravatsala |
trāyasva samare karṇa sarvānyodhānmahābala || 2 ||
[Analyze grammar]

pāñcālairmatsyakaikeyaiḥ pāṇḍavaiśca mahārathaiḥ |
vṛtānsamantātsaṃkruddhairniḥśvasadbhirivoragaiḥ || 3 ||
[Analyze grammar]

ete nadanti saṃhṛṣṭāḥ pāṇḍavā jitakāśinaḥ |
śakropamāśca bahavaḥ pāñcālānāṃ rathavrajāḥ || 4 ||
[Analyze grammar]

karṇa uvāca |
paritrātumiha prāpto yadi pārthaṃ puraṃdaraḥ |
tamapyāśu parājitya tato hantāsmi pāṇḍavam || 5 ||
[Analyze grammar]

satyaṃ te pratijānāmi samāśvasihi bhārata |
hantāsmi pāṇḍutanayānpāñcālāṃśca samāgatān || 6 ||
[Analyze grammar]

jayaṃ te pratijānāmi vāsavasyeva pāvakiḥ |
priyaṃ tava mayā kāryamiti jīvāmi pārthiva || 7 ||
[Analyze grammar]

sarveṣāmeva pārthānāṃ phalguno balavattaraḥ |
tasyāmoghāṃ vimokṣyāmi śaktiṃ śakravinirmitām || 8 ||
[Analyze grammar]

tasminhate maheṣvāse bhrātarastasya mānada |
tava vaśyā bhaviṣyanti vanaṃ yāsyanti vā punaḥ || 9 ||
[Analyze grammar]

mayi jīvati kauravya viṣādaṃ mā kṛthāḥ kvacit |
ahaṃ jeṣyāmi samare sahitānsarvapāṇḍavān || 10 ||
[Analyze grammar]

pāñcālānkekayāṃścaiva vṛṣṇīṃścāpi samāgatān |
bāṇaughaiḥ śakalīkṛtya tava dāsyāmi medinīm || 11 ||
[Analyze grammar]

saṃjaya uvāca |
evaṃ bruvāṇaṃ karṇaṃ tu kṛpaḥ śāradvato'bravīt |
smayanniva mahābāhuḥ sūtaputramidaṃ vacaḥ || 12 ||
[Analyze grammar]

śobhanaṃ śobhanaṃ karṇa sanāthaḥ kurupuṃgavaḥ |
tvayā nāthena rādheya vacasā yadi sidhyati || 13 ||
[Analyze grammar]

bahuśaḥ katthase karṇa kauravyasya samīpataḥ |
na tu te vikramaḥ kaściddṛśyate balameva vā || 14 ||
[Analyze grammar]

samāgamaḥ pāṇḍusutairdṛṣṭaste bahuśo yudhi |
sarvatra nirjitaścāsi pāṇḍavaiḥ sūtanandana || 15 ||
[Analyze grammar]

hriyamāṇe tadā karṇa gandharvairdhṛtarāṣṭraje |
tadāyudhyanta sainyāni tvamekastu palāyathāḥ || 16 ||
[Analyze grammar]

virāṭanagare cāpi sametāḥ sarvakauravāḥ |
pārthena nirjitā yuddhe tvaṃ ca karṇa sahānujaḥ || 17 ||
[Analyze grammar]

ekasyāpyasamarthastvaṃ phalgunasya raṇājire |
kathamutsahase jetuṃ sakṛṣṇānsarvapāṇḍavān || 18 ||
[Analyze grammar]

abruvankarṇa yudhyasva bahu katthasi sūtaja |
anuktvā vikramedyastu tadvai satpuruṣavratam || 19 ||
[Analyze grammar]

garjitvā sūtaputra tvaṃ śāradābhramivājalam |
niṣphalo dṛśyase karṇa tacca rājā na budhyate || 20 ||
[Analyze grammar]

tāvadgarjasi rādheya yāvatpārthaṃ na paśyasi |
purā pārthaṃ hi te dṛṣṭvā durlabhaṃ garjitaṃ bhavet || 21 ||
[Analyze grammar]

tvamanāsādya tānbāṇānphalgunasya vigarjasi |
pārthasāyakaviddhasya durlabhaṃ garjitaṃ bhavet || 22 ||
[Analyze grammar]

bāhubhiḥ kṣatriyāḥ śūrā vāgbhiḥ śūrā dvijātayaḥ |
dhanuṣā phalgunaḥ śūraḥ karṇaḥ śūro manorathaiḥ || 23 ||
[Analyze grammar]

evaṃ paruṣitastena tadā śāradvatena saḥ |
karṇaḥ praharatāṃ śreṣṭhaḥ kṛpaṃ vākyamathābravīt || 24 ||
[Analyze grammar]

śūrā garjanti satataṃ prāvṛṣīva balāhakāḥ |
phalaṃ cāśu prayacchanti bījamuptamṛtāviva || 25 ||
[Analyze grammar]

doṣamatra na paśyāmi śūrāṇāṃ raṇamūrdhani |
tattadvikatthamānānāṃ bhāraṃ codvahatāṃ mṛdhe || 26 ||
[Analyze grammar]

yaṃ bhāraṃ puruṣo voḍhuṃ manasā hi vyavasyati |
daivamasya dhruvaṃ tatra sāhāyyāyopapadyate || 27 ||
[Analyze grammar]

vyavasāyadvitīyo'haṃ manasā bhāramudvahan |
garjāmi yadyahaṃ vipra tava kiṃ tatra naśyati || 28 ||
[Analyze grammar]

vṛthā śūrā na garjanti sajalā iva toyadāḥ |
sāmarthyamātmano jñātvā tato garjanti paṇḍitāḥ || 29 ||
[Analyze grammar]

so'hamadya raṇe yattaḥ sahitau kṛṣṇapāṇḍavau |
utsahe tarasā jetuṃ tato garjāmi gautama || 30 ||
[Analyze grammar]

paśya tvaṃ garjitasyāsya phalaṃ me vipra sānugaḥ |
hatvā pāṇḍusutānājau sahakṛṣṇānsasātvatān |
duryodhanāya dāsyāmi pṛthivīṃ hatakaṇṭakām || 31 ||
[Analyze grammar]

kṛpa uvāca |
manorathapralāpo me na grāhyastava sūtaja |
yadā kṣipasi vai kṛṣṇau dharmarājaṃ ca pāṇḍavam || 32 ||
[Analyze grammar]

dhruvastatra jayaḥ karṇa yatra yuddhaviśāradau |
devagandharvayakṣāṇāṃ manuṣyoragarakṣasām |
daṃśitānāmapi raṇe ajeyau kṛṣṇapāṇḍavau || 33 ||
[Analyze grammar]

brahmaṇyaḥ satyavāgdānto gurudaivatapūjakaḥ |
nityaṃ dharmarataścaiva kṛtāstraśca viśeṣataḥ |
dhṛtimāṃśca kṛtajñaśca dharmaputro yudhiṣṭhiraḥ || 34 ||
[Analyze grammar]

bhrātaraścāsya balinaḥ sarvāstreṣu kṛtaśramāḥ |
guruvṛttiratāḥ prājñā dharmanityā yaśasvinaḥ || 35 ||
[Analyze grammar]

saṃbandhinaścendravīryāḥ svanuraktāḥ prahāriṇaḥ |
dhṛṣṭadyumnaḥ śikhaṇḍī ca daurmukhirjanamejayaḥ || 36 ||
[Analyze grammar]

candraseno bhadrasenaḥ kīrtidharmā dhruvo dharaḥ |
vasucandro dāmacandraḥ siṃhacandraḥ suvedhanaḥ || 37 ||
[Analyze grammar]

drupadasya tathā putrā drupadaśca mahāstravit |
yeṣāmarthāya saṃyatto matsyarājaḥ sahānugaḥ || 38 ||
[Analyze grammar]

śatānīkaḥ sudaśanaḥ śrutānīkaḥ śrutadhvajaḥ |
balānīko jayānīko jayāśvo rathavāhanaḥ || 39 ||
[Analyze grammar]

candrodayaḥ kāmaratho virāṭabhrātaraḥ śubhāḥ |
yamau ca draupadeyāśca rākṣasaśca ghaṭotkacaḥ |
yeṣāmarthāya yudhyante na teṣāṃ vidyate kṣayaḥ || 40 ||
[Analyze grammar]

kāmaṃ khalu jagatsarvaṃ sadevāsuramānavam |
sayakṣarākṣasagaṇaṃ sabhūtabhujagadvipam |
niḥśeṣamastravīryeṇa kuryātāṃ bhīmaphalgunau || 41 ||
[Analyze grammar]

yudhiṣṭhiraśca pṛthivīṃ nirdahedghoracakṣuṣā |
aprameyabalaḥ śauriryeṣāmarthe ca daṃśitaḥ |
kathaṃ tānsaṃyuge karṇa jetumutsahase parān || 42 ||
[Analyze grammar]

mahānapanayastveṣa tava nityaṃ hi sūtaja |
yastvamutsahase yoddhuṃ samare śauriṇā saha || 43 ||
[Analyze grammar]

saṃjaya uvāca |
evamuktastu rādheyaḥ prahasanbharatarṣabha |
abravīcca tadā karṇo guruṃ śāradvataṃ kṛpam || 44 ||
[Analyze grammar]

satyamuktaṃ tvayā brahmanpāṇḍavānprati yadvacaḥ |
ete cānye ca bahavo guṇāḥ pāṇḍusuteṣu vai || 45 ||
[Analyze grammar]

ajayyāśca raṇe pārthā devairapi savāsavaiḥ |
sadaityayakṣagandharvapiśācoragarākṣasaiḥ |
tathāpi pārthāñjeṣyāmi śaktyā vāsavadattayā || 46 ||
[Analyze grammar]

mamāpyamoghā datteyaṃ śaktiḥ śakreṇa vai dvija |
etayā nihaniṣyāmi savyasācinamāhave || 47 ||
[Analyze grammar]

hate tu pāṇḍave kṛṣṇo bhrātaraścāsya sodarāḥ |
anarjunā na śakṣyanti mahīṃ bhoktuṃ kathaṃcana || 48 ||
[Analyze grammar]

teṣu naṣṭeṣu sarveṣu pṛthivīyaṃ sasāgarā |
ayatnātkauraveyasya vaśe sthāsyati gautama || 49 ||
[Analyze grammar]

sunītairiha sarvārthāḥ sidhyante nātra saṃśayaḥ |
etamarthamahaṃ jñātvā tato garjāmi gautama || 50 ||
[Analyze grammar]

tvaṃ tu vṛddhaśca vipraśca aśaktaścāpi saṃyuge |
kṛtasnehaśca pārtheṣu mohānmāmavamanyase || 51 ||
[Analyze grammar]

yadyevaṃ vakṣyase bhūyo māmapriyamiha dvija |
tataste khaḍgamudyamya jihvāṃ chetsyāmi durmate || 52 ||
[Analyze grammar]

yaccāpi pāṇḍavānvipra stotumicchasi saṃyuge |
bhīṣayansarvasainyāni kauraveyāṇi durmate |
atrāpi śṛṇu me vākyaṃ yathāvadgadato dvija || 53 ||
[Analyze grammar]

duryodhanaśca droṇaśca śakunirdurmukho jayaḥ |
duḥśāsano vṛṣaseno madrarājastvameva ca |
somadattaśca bhūriśca tathā drauṇirviviṃśatiḥ || 54 ||
[Analyze grammar]

tiṣṭheyurdaṃśitā yatra sarve yuddhaviśāradāḥ |
jayedetānraṇe ko nu śakratulyabalo'pyariḥ || 55 ||
[Analyze grammar]

śūrāśca hi kṛtāstrāśca balinaḥ svargalipsavaḥ |
dharmajñā yuddhakuśalā hanyuryuddhe surānapi || 56 ||
[Analyze grammar]

ete sthāsyanti saṃgrāme pāṇḍavānāṃ vadhārthinaḥ |
jayamākāṅkṣamāṇā hi kauraveyasya daṃśitāḥ || 57 ||
[Analyze grammar]

daivāyattamahaṃ manye jayaṃ subalināmapi |
yatra bhīṣmo mahābāhuḥ śete śaraśatācitaḥ || 58 ||
[Analyze grammar]

vikarṇaścitrasenaśca bāhlīko'tha jayadrathaḥ |
bhūriśravā jayaścaiva jalasaṃdhaḥ sudakṣiṇaḥ || 59 ||
[Analyze grammar]

śalaśca rathināṃ śreṣṭho bhagadattaśca vīryavān |
ete cānye ca rājāno devairapi sudurjayāḥ || 60 ||
[Analyze grammar]

nihatāḥ samare śūrāḥ pāṇḍavairbalavattarāḥ |
kimanyaddaivasaṃyogānmanyase puruṣādhama || 61 ||
[Analyze grammar]

yāṃśca tānstauṣi satataṃ duryodhanaripūndvija |
teṣāmapi hatāḥ śūrāḥ śataśo'tha sahasraśaḥ || 62 ||
[Analyze grammar]

kṣīyante sarvasainyāni kurūṇāṃ pāṇḍavaiḥ saha |
prabhāvaṃ nātra paśyāmi pāṇḍavānāṃ kathaṃcana || 63 ||
[Analyze grammar]

yāṃstānbalavato nityaṃ manyase tvaṃ dvijādhama |
yatiṣye'haṃ yathāśakti yoddhuṃ taiḥ saha saṃyuge |
duryodhanahitārthāya jayo daive pratiṣṭhitaḥ || 64 ||
[Analyze grammar]