Chapter 130

dhṛtarāṣṭra uvāca |
tasminpraviṣṭe durdharṣe sṛñjayānamitaujasi |
amṛṣyamāṇe saṃrabdhe kā vo'bhūdvai matistadā || 1 ||
[Analyze grammar]

duryodhanaṃ tathā putramuktvā śāstrātigaṃ mama |
yatprāviśadameyātmā kiṃ pārthaḥ pratyapadyata || 2 ||
[Analyze grammar]

nihate saindhave vīre bhūriśravasi caiva hi |
yadabhyagānmahātejāḥ pāñcālānaparājitaḥ || 3 ||
[Analyze grammar]

kimamanyata durdharṣaḥ praviṣṭe śatrutāpane |
duryodhanaśca kiṃ kṛtyaṃ prāptakālamamanyata || 4 ||
[Analyze grammar]

ke ca taṃ varadaṃ vīramanvayurdvijasattamam |
ke cāsya pṛṣṭhato'gacchanvīrāḥ śūrasya yudhyataḥ |
ke purastādayudhyanta nighnataḥ śātravānraṇe || 5 ||
[Analyze grammar]

manye'haṃ pāṇḍavānsarvānbhāradvājaśarārditān |
śiśire kampamānā vai kṛśā gāva ivābhibho || 6 ||
[Analyze grammar]

praviśya sa maheṣvāsaḥ pāñcālānarimardanaḥ |
kathaṃ nu puruṣavyāghraḥ pañcatvamupajagmivān || 7 ||
[Analyze grammar]

sarveṣu sainyeṣu ca saṃgateṣu rātrau sameteṣu mahāratheṣu |
saṃloḍyamāneṣu pṛthagvidheṣu ke vastadānīṃ matimanta āsan || 8 ||
[Analyze grammar]

hatāṃścaiva viṣaktāṃśca parābhūtāṃśca śaṃsasi |
rathino virathāṃścaiva kṛtānyuddheṣu māmakān || 9 ||
[Analyze grammar]

kathameṣāṃ tadā tatra pārthānāmapalāyinām |
prakāśamabhavadrātrau kathaṃ kuruṣu saṃjaya || 10 ||
[Analyze grammar]

saṃjaya uvāca |
rātriyuddhe tadā rājanvartamāne sudāruṇe |
droṇamabhyadravanrātrau pāṇḍavāḥ sahasainikāḥ || 11 ||
[Analyze grammar]

tato droṇaḥ kekayāṃśca dhṛṣṭadyumnasya cātmajān |
preṣayanmṛtyulokāya sarvāniṣubhirāśugaiḥ || 12 ||
[Analyze grammar]

tasya pramukhato rājanye'vartanta mahārathāḥ |
tānsarvānpreṣayāmāsa paralokāya bhārata || 13 ||
[Analyze grammar]

pramathnantaṃ tadā vīraṃ bhāradvājaṃ mahāratham |
abhyavartata saṃkruddhaḥ śibī rājanpratāpavān || 14 ||
[Analyze grammar]

tamāpatantaṃ saṃprekṣya pāṇḍavānāṃ mahāratham |
vivyādha daśabhirdroṇaḥ sarvapāraśavaiḥ śaraiḥ || 15 ||
[Analyze grammar]

taṃ śibiḥ prativivyādha triṃśatā niśitaiḥ śaraiḥ |
sārathiṃ cāsya bhallena smayamāno nyapātayat || 16 ||
[Analyze grammar]

tasya droṇo hayānhatvā sārathiṃ ca mahātmanaḥ |
athāsya saśirastrāṇaṃ śiraḥ kāyādapāharat || 17 ||
[Analyze grammar]

kaliṅgānāṃ ca sainyena kaliṅgasya suto raṇe |
pūrvaṃ pitṛvadhātkruddho bhīmasenamupādravat || 18 ||
[Analyze grammar]

sa bhīmaṃ pañcabhirviddhvā punarvivyādha saptabhiḥ |
viśokaṃ tribhirājaghne dhvajamekena patriṇā || 19 ||
[Analyze grammar]

kaliṅgānāṃ tu taṃ śūraṃ kruddhaṃ kruddho vṛkodaraḥ |
rathādrathamabhidrutya muṣṭinābhijaghāna ha || 20 ||
[Analyze grammar]

tasya muṣṭihatasyājau pāṇḍavena balīyasā |
sarvāṇyasthīni sahasā prāpatanvai pṛthakpṛthak || 21 ||
[Analyze grammar]

taṃ karṇo bhrātaraścāsya nāmṛṣyanta mahārathāḥ |
te bhīmasenaṃ nārācairjaghnurāśīviṣopamaiḥ || 22 ||
[Analyze grammar]

tataḥ śatrurathaṃ tyaktvā bhīmo dhruvarathaṃ gataḥ |
dhruvaṃ cāsyantamaniśaṃ muṣṭinā samapothayat |
sa tathā pāṇḍuputreṇa balinā nihato'patat || 23 ||
[Analyze grammar]

taṃ nihatya mahārāja bhīmaseno mahābalaḥ |
jayarātarathaṃ prāpya muhuḥ siṃha ivānadat || 24 ||
[Analyze grammar]

jayarātamathākṣipya nadansavyena pāṇinā |
talena nāśayāmāsa karṇasyaivāgrataḥ sthitam || 25 ||
[Analyze grammar]

karṇastu pāṇḍave śaktiṃ kāñcanīṃ samavāsṛjat |
tatastāmeva jagrāha prahasanpāṇḍunandanaḥ || 26 ||
[Analyze grammar]

karṇāyaiva ca durdharṣaścikṣepājau vṛkodaraḥ |
tāmantarikṣe ciccheda śakunistailapāyinā || 27 ||
[Analyze grammar]

tatastava sutā rājanbhīmasya rathamāvrajan |
mahatā śaravarṣeṇa chādayanto vṛkodaram || 28 ||
[Analyze grammar]

durmadasya tato bhīmaḥ prahasanniva saṃyuge |
sārathiṃ ca hayāṃścaiva śarairninye yamakṣayam |
durmadastu tato yānaṃ duṣkarṇasyāvapupluve || 29 ||
[Analyze grammar]

tāvekarathamārūḍhau bhrātarau paratāpanau |
saṃgrāmaśiraso madhye bhīmaṃ dvāvabhyadhāvatām |
yathāmbupatimitrau hi tārakaṃ daityasattamam || 30 ||
[Analyze grammar]

tatastu durmadaścaiva duṣkarṇaśca tavātmajau |
rathamekaṃ samāruhya bhīmaṃ bāṇairavidhyatām || 31 ||
[Analyze grammar]

tataḥ karṇasya miṣato drauṇerduryodhanasya ca |
kṛpasya somadattasya bāhlīkasya ca pāṇḍavaḥ || 32 ||
[Analyze grammar]

durmadasya ca vīrasya duṣkarṇasya ca taṃ ratham |
pādaprahāreṇa dharāṃ prāveśayadariṃdamaḥ || 33 ||
[Analyze grammar]

tataḥ sutau te balinau śūrau duṣkarṇadurmadau |
muṣṭināhatya saṃkruddho mamarda caraṇena ca || 34 ||
[Analyze grammar]

tato hāhākṛte sainye dṛṣṭvā bhīmaṃ nṛpābruvan |
rudro'yaṃ bhīmarūpeṇa dhārtarāṣṭreṣu gṛdhyati || 35 ||
[Analyze grammar]

evamuktvāpalāyanta sarve bhārata pārthivāḥ |
visaṃjñāvāhayanvāhānna ca dvau saha dhāvataḥ || 36 ||
[Analyze grammar]

tato bale bhṛśalulite niśāmukhe supūjito nṛpavṛṣabhairvṛkodaraḥ |
mahābalaḥ kamalavibuddhalocano yudhiṣṭhiraṃ nṛpatimapūjayadbalī || 37 ||
[Analyze grammar]

tato yamau drupadavirāṭakekayā yudhiṣṭhiraścāpi parāṃ mudaṃ yayuḥ |
vṛkodaraṃ bhṛśamabhipūjayaṃśca te yathāndhake pratinihate haraṃ surāḥ || 38 ||
[Analyze grammar]

tataḥ sutāstava varuṇātmajopamā ruṣānvitāḥ saha guruṇā mahātmanā |
vṛkodaraṃ sarathapadātikuñjarā yuyutsavo bhṛśamabhiparyavārayan || 39 ||
[Analyze grammar]

tato'bhavattimiraghanairivāvṛtaṃ mahābhaye bhayadamatīva dāruṇam |
niśāmukhe baḍavṛkagṛdhramodanaṃ mahātmanāṃ nṛpavarayuddhamadbhutam || 40 ||
[Analyze grammar]