Chapter 118

saṃjaya uvāca |
sa bāhurapatadbhūmau sakhaḍgaḥ saśubhāṅgadaḥ |
ādadhajjīvalokasya duḥkhamuttamamuttamaḥ || 1 ||
[Analyze grammar]

prahariṣyanhṛto bāhuradṛśyena kirīṭinā |
vegenābhyapatadbhūmau pañcāsya iva pannagaḥ || 2 ||
[Analyze grammar]

sa moghaṃ kṛtamātmānaṃ dṛṣṭvā pārthena kauravaḥ |
utsṛjya sātyakiṃ krodhādgarhayāmāsa pāṇḍavam || 3 ||
[Analyze grammar]

nṛśaṃsaṃ bata kaunteya karmedaṃ kṛtavānasi |
apaśyato viṣaktasya yanme bāhumacicchidaḥ || 4 ||
[Analyze grammar]

kiṃ nu vakṣyasi rājānaṃ dharmaputraṃ yudhiṣṭhiram |
kiṃ kurvāṇo mayā saṃkhye hato bhūriśravā iti || 5 ||
[Analyze grammar]

idamindreṇa te sākṣādupadiṣṭaṃ mahātmanā |
astraṃ rudreṇa vā pārtha droṇenātha kṛpeṇa vā || 6 ||
[Analyze grammar]

nanu nāma svadharmajñastvaṃ loke'bhyadhikaḥ paraiḥ |
ayudhyamānasya kathaṃ raṇe prahṛtavānasi || 7 ||
[Analyze grammar]

na pramattāya bhītāya virathāya prayācate |
vyasane vartamānāya praharanti manasvinaḥ || 8 ||
[Analyze grammar]

idaṃ tu nīcācaritamasatpuruṣasevitam |
kathamācaritaṃ pārtha tvayā karma suduṣkaram || 9 ||
[Analyze grammar]

āryeṇa sukaraṃ hyāhurāryakarma dhanaṃjaya |
anāryakarma tvāryeṇa suduṣkarataraṃ bhuvi || 10 ||
[Analyze grammar]

yeṣu yeṣu naraḥ pārtha yatra yatra ca vartate |
āśu tacchīlatāmeti tadidaṃ tvayi dṛśyate || 11 ||
[Analyze grammar]

kathaṃ hi rājavaṃśyastvaṃ kauraveyo viśeṣataḥ |
kṣatradharmādapakrāntaḥ suvṛttaścaritavrataḥ || 12 ||
[Analyze grammar]

idaṃ tu yadatikṣudraṃ vārṣṇeyārthe kṛtaṃ tvayā |
vāsudevamataṃ nūnaṃ naitattvayyupapadyate || 13 ||
[Analyze grammar]

ko hi nāma pramattāya pareṇa saha yudhyate |
īdṛśaṃ vyasanaṃ dadyādyo na kṛṣṇasakho bhavet || 14 ||
[Analyze grammar]

vrātyāḥ saṃśliṣṭakarmāṇaḥ prakṛtyaiva vigarhitāḥ |
vṛṣṇyandhakāḥ kathaṃ pārtha pramāṇaṃ bhavatā kṛtāḥ || 15 ||
[Analyze grammar]

evamuktvā mahābāhuryūpaketurmahāyaśāḥ |
yuyudhānaṃ parityajya raṇe prāyamupāviśat || 16 ||
[Analyze grammar]

śarānāstīrya savyena pāṇinā puṇyalakṣaṇaḥ |
yiyāsurbrahmalokāya prāṇānprāṇeṣvathājuhot || 17 ||
[Analyze grammar]

sūrye cakṣuḥ samādhāya prasannaṃ salile manaḥ |
dhyāyanmahopaniṣadaṃ yogayukto'bhavanmuniḥ || 18 ||
[Analyze grammar]

tataḥ sa sarvasenāyāṃ janaḥ kṛṣṇadhanaṃjayau |
garhayāmāsa taṃ cāpi śaśaṃsa puruṣarṣabham || 19 ||
[Analyze grammar]

nindyamānau tathā kṛṣṇau nocatuḥ kiṃcidapriyam |
praśasyamānaśca tathā nāhṛṣyadyūpaketanaḥ || 20 ||
[Analyze grammar]

tāṃstathā vādino rājanputrāṃstava dhanaṃjayaḥ |
amṛṣyamāṇo manasā teṣāṃ tasya ca bhāṣitam || 21 ||
[Analyze grammar]

asaṃkruddhamanā vācā smārayanniva bhārata |
uvāca pāṇḍutanayaḥ sākṣepamiva phalgunaḥ || 22 ||
[Analyze grammar]

mama sarve'pi rājāno jānantyetanmahāvratam |
na śakyo māmako hantuṃ yo me syādbāṇagocare || 23 ||
[Analyze grammar]

yūpaketo samīkṣya tvaṃ na māṃ garhitumarhasi |
na hi dharmamavijñāya yuktaṃ garhayituṃ param || 24 ||
[Analyze grammar]

āttaśastrasya hi raṇe vṛṣṇivīraṃ jighāṃsataḥ |
yadahaṃ bāhumacchaitsaṃ na sa dharmo vigarhitaḥ || 25 ||
[Analyze grammar]

nyastaśastrasya bālasya virathasya vivarmaṇaḥ |
abhimanyorvadhaṃ tāta dhārmikaḥ ko na pūjayet || 26 ||
[Analyze grammar]

evamuktastu pārthena śirasā bhūmimaspṛśat |
pāṇinā caiva savyena prāhiṇodasya dakṣiṇam || 27 ||
[Analyze grammar]

etatpārthasya tu vacastataḥ śrutvā mahādyutiḥ |
yūpaketurmahārāja tūṣṇīmāsīdavāṅmukhaḥ || 28 ||
[Analyze grammar]

arjuna uvāca |
yā prītirdharmarāje me bhīme ca vadatāṃ vare |
nakule sahadeve ca sā me tvayi śalāgraja || 29 ||
[Analyze grammar]

mayā tu samanujñātaḥ kṛṣṇena ca mahātmanā |
gaccha puṇyakṛtāṃllokāñśibirauśīnaro yathā || 30 ||
[Analyze grammar]

saṃjaya uvāca |
tata utthāya śaineyo vimuktaḥ saumadattinā |
khaḍgamādāya cicchitsuḥ śirastasya mahātmanaḥ || 31 ||
[Analyze grammar]

nihataṃ pāṇḍuputreṇa pramattaṃ bhūridakṣiṇam |
iyeṣa sātyakirhantuṃ śalāgrajamakalmaṣam || 32 ||
[Analyze grammar]

nikṛttabhujamāsīnaṃ chinnahastamiva dvipam |
krośatāṃ sarvasainyānāṃ nindyamānaḥ sudurmanāḥ || 33 ||
[Analyze grammar]

vāryamāṇaḥ sa kṛṣṇena pārthena ca mahātmanā |
bhīmena cakrarakṣābhyāmaśvatthāmnā kṛpeṇa ca || 34 ||
[Analyze grammar]

karṇena vṛṣasenena saindhavena tathaiva ca |
vikrośatāṃ ca sainyānāmavadhīttaṃ yatavratam || 35 ||
[Analyze grammar]

prāyopaviṣṭāya raṇe pārthena chinnabāhave |
sātyakiḥ kauravendrāya khaḍgenāpāharacchiraḥ || 36 ||
[Analyze grammar]

nābhyanandanta tatsainyāḥ sātyakiṃ tena karmaṇā |
arjunena hataṃ pūrvaṃ yajjaghāna kurūdvaham || 37 ||
[Analyze grammar]

sahasrākṣasamaṃ tatra siddhacāraṇamānavāḥ |
bhūriśravasamālokya yuddhe prāyagataṃ hatam || 38 ||
[Analyze grammar]

apūjayanta taṃ devā vismitāstasya karmabhiḥ |
pakṣavādāṃśca bahuśaḥ prāvadaṃstasya sainikāḥ || 39 ||
[Analyze grammar]

na vārṣṇeyasyāparādho bhavitavyaṃ hi tattathā |
tasmānmanyurna vaḥ kāryaḥ krodho duḥkhakaro nṛṇām || 40 ||
[Analyze grammar]

hantavyaścaiṣa vīreṇa nātra kāryā vicāraṇā |
vihito hyasya dhātraiva mṛtyuḥ sātyakirāhave || 41 ||
[Analyze grammar]

sātyakiruvāca |
na hantavyo na hantavya iti yanmāṃ prabhāṣatha |
dharmavādairadharmiṣṭhā dharmakañcukamāsthitāḥ || 42 ||
[Analyze grammar]

yadā bālaḥ subhadrāyāḥ sutaḥ śastravinākṛtaḥ |
yuṣmābhirnihato yuddhe tadā dharmaḥ kva vo gataḥ || 43 ||
[Analyze grammar]

mayā tvetatpratijñātaṃ kṣepe kasmiṃścideva hi |
yo māṃ niṣpiṣya saṃgrāme jīvanhanyātpadā ruṣā |
sa me vadhyo bhavecchatruryadyapi syānmunivrataḥ || 44 ||
[Analyze grammar]

ceṣṭamānaṃ pratīghāte sabhujaṃ māṃ sacakṣuṣaḥ |
manyadhvaṃ mṛtamityevametadvo buddhilāghavam |
yukto hyasya pratīghātaḥ kṛto me kurupuṃgavāḥ || 45 ||
[Analyze grammar]

yattu pārthena matsnehātsvāṃ pratijñāṃ ca rakṣatā |
sakhaḍgo'sya hṛto bāhuretenaivāsmi vañcitaḥ || 46 ||
[Analyze grammar]

bhavitavyaṃ ca yadbhāvi daivaṃ ceṣṭayatīva ca |
so'yaṃ hato vimarde'sminkimatrādharmaceṣṭitam || 47 ||
[Analyze grammar]

api cāyaṃ purā gītaḥ śloko vālmīkinā bhuvi |
pīḍākaramamitrāṇāṃ yatsyātkartavyameva tat || 48 ||
[Analyze grammar]

saṃjaya uvāca |
evamukte mahārāja sarve kauravapāṇḍavāḥ |
na sma kiṃcidabhāṣanta manasā samapūjayan || 49 ||
[Analyze grammar]

mantrairhi pūtasya mahādhvareṣu yaśasvino bhūrisahasradasya |
munerivāraṇyagatasya tasya na tatra kaścidvadhamabhyanandat || 50 ||
[Analyze grammar]

sunīlakeśaṃ varadasya tasya śūrasya pārāvatalohitākṣam |
aśvasya medhyasya śiro nikṛttaṃ nyastaṃ havirdhānamivottareṇa || 51 ||
[Analyze grammar]

sa tejasā śastrahatena pūto mahāhave dehavaraṃ visṛjya |
ākrāmadūrdhvaṃ varado varārho vyāvṛtya dharmeṇa pareṇa rodasī || 52 ||
[Analyze grammar]