Chapter 112

saṃjaya uvāca |
bhīmasenasya rādheyaḥ śrutvā jyātalanisvanam |
nāmṛṣyata yathā matto gajaḥ pratigajasvanam || 1 ||
[Analyze grammar]

apakramya sa bhīmasya muhūrtaṃ śaragocarāt |
tava cādhirathirdṛṣṭvā syandanebhyaścyutānsutān || 2 ||
[Analyze grammar]

bhīmasenena nihatānvimanā duḥkhito'bhavat |
niḥśvasandīrghamuṣṇaṃ ca punaḥ pāṇḍavamabhyayāt || 3 ||
[Analyze grammar]

sa tāmranayanaḥ krodhācchvasanniva mahoragaḥ |
babhau karṇaḥ śarānasyanraśmivāniva bhāskaraḥ || 4 ||
[Analyze grammar]

raśmijālairivārkasya vitatairbharatarṣabha |
karṇacāpacyutairbāṇaiḥ prācchādyata vṛkodaraḥ || 5 ||
[Analyze grammar]

karṇacāpacyutāścitrāḥ śarā barhiṇavāsasaḥ |
viviśuḥ sarvataḥ pārthaṃ vāsāyevāṇḍajā drumam || 6 ||
[Analyze grammar]

karṇacāpacyutā bāṇāḥ saṃpatantastatastataḥ |
rukmapuṅkhā vyarājanta haṃsāḥ śreṇīkṛtā iva || 7 ||
[Analyze grammar]

cāpadhvajopaskarebhyaśchatrādīṣāmukhādyugāt |
prabhavanto vyadṛśyanta rājannādhiratheḥ śarāḥ || 8 ||
[Analyze grammar]

khaṃ pūrayanmahāvegānkhagamānkhagavāsasaḥ |
suvarṇavikṛtāṃścitrānmumocādhirathiḥ śarān || 9 ||
[Analyze grammar]

tamantakamivāyastamāpatantaṃ vṛkodaraḥ |
tyaktvā prāṇānabhikrudhya vivyādha navabhiḥ śaraiḥ || 10 ||
[Analyze grammar]

tasya vegamasaṃsahyaṃ dṛṣṭvā karṇasya pāṇḍavaḥ |
mahataśca śaraughāṃstānnaivāvyathata vīryavān || 11 ||
[Analyze grammar]

tato vidhamyādhiratheḥ śarajālāni pāṇḍavaḥ |
vivyādha karṇaṃ viṃśatyā punaranyaiḥ śitaiḥ śaraiḥ || 12 ||
[Analyze grammar]

yathaiva hi śaraiḥ pārthaḥ sūtaputreṇa chāditaḥ |
tathaiva karṇaṃ samare chādayāmāsa pāṇḍavaḥ || 13 ||
[Analyze grammar]

dṛṣṭvā tu bhīmasenasya vikramaṃ yudhi bhārata |
abhyanandaṃstvadīyāśca saṃprahṛṣṭāśca cāraṇāḥ || 14 ||
[Analyze grammar]

bhūriśravāḥ kṛpo drauṇirmadrarājo jayadrathaḥ |
uttamaujā yudhāmanyuḥ sātyakiḥ keśavārjunau || 15 ||
[Analyze grammar]

kurupāṇḍavānāṃ pravarā daśa rājanmahārathāḥ |
sādhu sādhviti vegena siṃhanādamathānadan || 16 ||
[Analyze grammar]

tasmiṃstu tumule śabde pravṛtte lomaharṣaṇe |
abhyabhāṣata putrāṃste rājanduryodhanastvaran || 17 ||
[Analyze grammar]

rājñaśca rājaputrāṃśca sodaryāṃśca viśeṣataḥ |
karṇaṃ gacchata bhadraṃ vaḥ parīpsanto vṛkodarāt || 18 ||
[Analyze grammar]

purā nighnanti rādheyaṃ bhīmacāpacyutāḥ śarāḥ |
te yatadhvaṃ maheṣvāsāḥ sūtaputrasya rakṣaṇe || 19 ||
[Analyze grammar]

duryodhanasamādiṣṭāḥ sodaryāḥ sapta māriṣa |
bhīmasenamabhidrutya saṃrabdhāḥ paryavārayan || 20 ||
[Analyze grammar]

te samāsādya kaunteyamāvṛṇvañśaravṛṣṭibhiḥ |
parvataṃ vāridhārābhiḥ prāvṛṣīva balāhakāḥ || 21 ||
[Analyze grammar]

te'pīḍayanbhīmasenaṃ kruddhāḥ sapta mahārathāḥ |
prajāsaṃharaṇe rājansomaṃ sapta grahā iva || 22 ||
[Analyze grammar]

tato vāmena kaunteyaḥ pīḍayitvā śarāsanam |
muṣṭinā pāṇḍavo rājandṛḍhena supariṣkṛtam || 23 ||
[Analyze grammar]

manuṣyasamatāṃ jñātvā sapta saṃdhāya sāyakān |
tebhyo vyasṛjadāyastaḥ sūryaraśminibhānprabhuḥ || 24 ||
[Analyze grammar]

nirasyanniva dehebhyastanayānāmasūṃstava |
bhīmaseno mahārāja pūrvavairamanusmaran || 25 ||
[Analyze grammar]

te kṣiptā bhīmasenena śarā bhārata bhāratān |
vidārya khaṃ samutpetuḥ svarṇapuṅkhāḥ śilāśitāḥ || 26 ||
[Analyze grammar]

teṣāṃ vidārya cetāṃsi śarā hemavibhūṣitāḥ |
vyarājanta mahārāja suparṇā iva khecarāḥ || 27 ||
[Analyze grammar]

śoṇitādigdhavājāgrāḥ sapta hemapariṣkṛtāḥ |
putrāṇāṃ tava rājendra pītvā śoṇitamudgatāḥ || 28 ||
[Analyze grammar]

te śarairbhinnamarmāṇo rathebhyaḥ prāpatankṣitau |
girisānuruhā bhagnā dvipeneva mahādrumāḥ || 29 ||
[Analyze grammar]

śatruṃjayaḥ śatrusahaścitraścitrāyudho dṛḍhaḥ |
citraseno vikarṇaśca saptaite vinipātitāḥ || 30 ||
[Analyze grammar]

tānnihatya mahābāhū rādheyasyaiva paśyataḥ |
siṃhanādaravaṃ ghoramasṛjatpāṇḍunandanaḥ || 31 ||
[Analyze grammar]

sa ravastasya śūrasya dharmarājasya bhārata |
ācakhyāviva tadyuddhaṃ vijayaṃ cātmano mahat || 32 ||
[Analyze grammar]

taṃ śrutvā sumahānādaṃ bhīmasenasya dhanvinaḥ |
babhūva paramā prītirdharmarājasya saṃyuge || 33 ||
[Analyze grammar]

tato hṛṣṭo mahārāja vāditrāṇāṃ mahāsvanaiḥ |
bhīmasenaravaṃ pārthaḥ pratijagrāha sarvaśaḥ || 34 ||
[Analyze grammar]

abhyayāccaiva samare droṇamastrabhṛtāṃ varam |
harṣeṇa mahatā yuktaḥ kṛtasaṃjñe vṛkodare || 35 ||
[Analyze grammar]

ekatriṃśanmahārāja putrāṃstava mahārathān |
hatānduryodhano dṛṣṭvā kṣattuḥ sasmāra tadvacaḥ || 36 ||
[Analyze grammar]

tadidaṃ samanuprāptaṃ kṣatturhitakaraṃ vacaḥ |
iti saṃcintya rājāsau nottaraṃ pratyapadyata || 37 ||
[Analyze grammar]

yaddyūtakāle durbuddhirabravīttanayastava |
yacca karṇo'bravītkṛṣṇāṃ sabhāyāṃ paruṣaṃ vacaḥ || 38 ||
[Analyze grammar]

pramukhe pāṇḍuputrāṇāṃ tava caiva viśāṃ pate |
kauravāṇāṃ ca sarveṣāmācāryasya ca saṃnidhau || 39 ||
[Analyze grammar]

vinaṣṭāḥ pāṇḍavāḥ kṛṣṇe śāśvataṃ narakaṃ gatāḥ |
patimanyaṃ vṛṇīṣveti tasyedaṃ phalamāgatam || 40 ||
[Analyze grammar]

yatsma tāṃ paruṣāṇyāhuḥ sabhāmānāyya draupadīm |
pāṇḍavānugradhanuṣaḥ krodhayantastavātmajāḥ || 41 ||
[Analyze grammar]

taṃ bhīmasenaḥ krodhāgniṃ trayodaśa samāḥ sthitam |
visṛjaṃstava putrāṇāmantaṃ gacchati kaurava || 42 ||
[Analyze grammar]

vilapaṃśca bahu kṣattā śamaṃ nālabhata tvayi |
saputro bharataśreṣṭha tasya bhuṅkṣva phalodayam |
hato vikarṇo rājendra citrasenaśca vīryavān || 43 ||
[Analyze grammar]

pravarānātmajānāṃ te sutāṃścānyānmahārathān |
yānyāṃśca dadṛśe bhīmaścakṣurviṣayamāgatān |
putrāṃstava mahābāho tvarayā tāñjaghāna ha || 44 ||
[Analyze grammar]

tvatkṛte hyahamadrākṣaṃ dahyamānāṃ varūthinīm |
sahasraśaḥ śarairmuktaiḥ pāṇḍavena vṛṣeṇa ca || 45 ||
[Analyze grammar]