Chapter 107

dhṛtarāṣṭra uvāca |
yasmiñjayāśā satataṃ putrāṇāṃ mama saṃjaya |
taṃ dṛṣṭvā vimukhaṃ saṃkhye kiṃ nu duryodhano'bravīt |
karṇo vā samare tāta kimakārṣīdataḥ param || 1 ||
[Analyze grammar]

saṃjaya uvāca |
bhīmasenaṃ raṇe dṛṣṭvā jvalantamiva pāvakam |
rathamanyaṃ samāsthāya vidhivatkalpitaṃ punaḥ |
abhyayātpāṇḍavaṃ karṇo vātoddhūta ivārṇavaḥ || 2 ||
[Analyze grammar]

kruddhamādhirathiṃ dṛṣṭvā putrāstava viśāṃ pate |
bhīmasenamamanyanta vaivasvatamukhe hutam || 3 ||
[Analyze grammar]

cāpaśabdaṃ mahatkṛtvā talaśabdaṃ ca bhairavam |
abhyavartata rādheyo bhīmasenarathaṃ prati || 4 ||
[Analyze grammar]

punareva tato rājanmahānāsītsudāruṇaḥ |
vimardaḥ sūtaputrasya bhīmasya ca viśāṃ pate || 5 ||
[Analyze grammar]

saṃrabdhau hi mahābāhū parasparavadhaiṣiṇau |
anyonyamīkṣāṃ cakrāte dahantāviva locanaiḥ || 6 ||
[Analyze grammar]

krodharaktekṣaṇau kruddhau niḥśvasantau mahārathau |
yuddhe'nyonyaṃ samāsādya tatakṣaturariṃdamau || 7 ||
[Analyze grammar]

vyāghrāviva susaṃrabdhau śyenāviva ca śīghragau |
śarabhāviva saṃkruddhau yuyudhāte parasparam || 8 ||
[Analyze grammar]

tato bhīmaḥ smarankleśānakṣadyūte vane'pi ca |
virāṭanagare caiva prāptaṃ duḥkhamariṃdamaḥ || 9 ||
[Analyze grammar]

rāṣṭrāṇāṃ sphītaratnānāṃ haraṇaṃ ca tavātmajaiḥ |
satataṃ ca parikleśānsaputreṇa tvayā kṛtān || 10 ||
[Analyze grammar]

dagdhumaicchaśca yatkuntīṃ saputrāṃ tvamanāgasam |
kṛṣṇāyāśca parikleśaṃ sabhāmadhye durātmabhiḥ || 11 ||
[Analyze grammar]

patimanyaṃ parīpsasva na santi patayastava |
narakaṃ patitāḥ pārthāḥ sarve ṣaṇḍhatilopamāḥ || 12 ||
[Analyze grammar]

samakṣaṃ tava kauravya yadūcuḥ kuravastadā |
dāsībhogena kṛṣṇāṃ ca bhoktukāmāḥ sutāstava || 13 ||
[Analyze grammar]

yaccāpi tānpravrajataḥ kṛṣṇājinanivāsinaḥ |
paruṣāṇyuktavānkarṇaḥ sabhāyāṃ saṃnidhau tava || 14 ||
[Analyze grammar]

tṛṇīkṛtya ca yatpārthāṃstava putro vavalga ha |
viṣamasthānsamastho hi saṃrambhādgatacetasaḥ || 15 ||
[Analyze grammar]

bālyātprabhṛti cārighnastāni duḥkhāni cintayan |
niravidyata dharmātmā jīvitena vṛkodaraḥ || 16 ||
[Analyze grammar]

tato visphārya sumahaddhemapṛṣṭhaṃ durāsadam |
cāpaṃ bharataśārdūlastyaktātmā karṇamabhyayāt || 17 ||
[Analyze grammar]

sa sāyakamayairjālairbhīmaḥ karṇarathaṃ prati |
bhānumadbhiḥ śilādhautairbhānoḥ pracchādayatprabhām || 18 ||
[Analyze grammar]

tataḥ prahasyādhirathistūrṇamasyañśitāñśarān |
vyadhamadbhīmasenasya śarajālāni patribhiḥ || 19 ||
[Analyze grammar]

mahāratho mahābāhurmahāvegairmahābalaḥ |
vivyādhādhirathirbhīmaṃ navabhirniśitaiḥ śaraiḥ || 20 ||
[Analyze grammar]

sa tottrairiva mātaṅgo vāryamāṇaḥ patatribhiḥ |
abhyadhāvadasaṃbhrāntaḥ sūtaputraṃ vṛkodaraḥ || 21 ||
[Analyze grammar]

tamāpatantaṃ vegena rabhasaṃ pāṇḍavarṣabham |
karṇaḥ pratyudyayau yoddhuṃ matto mattamiva dvipam || 22 ||
[Analyze grammar]

tataḥ pradhmāpya jalajaṃ bherīśatanināditam |
akṣubhyata balaṃ harṣāduddhūta iva sāgaraḥ || 23 ||
[Analyze grammar]

taduddhūtaṃ balaṃ dṛṣṭva rathanāgāśvapattimat |
bhīmaḥ karṇaṃ samāsādya chādayāmāsa sāyakaiḥ || 24 ||
[Analyze grammar]

aśvānṛśyasavarṇāṃstu haṃsavarṇairhayottamaiḥ |
vyāmiśrayadraṇe karṇaḥ pāṇḍavaṃ chādayañśaraiḥ || 25 ||
[Analyze grammar]

ṛśyavarṇānhayānkarkairmiśrānmārutaraṃhasaḥ |
nirīkṣya tava putrāṇāṃ hāhākṛtamabhūdbalam || 26 ||
[Analyze grammar]

te hayā bahvaśobhanta miśritā vātaraṃhasaḥ |
sitāsitā mahārāja yathā vyomni balāhakāḥ || 27 ||
[Analyze grammar]

saṃrabdhau krodhatāmrākṣau prekṣya karṇavṛkodarau |
saṃtrastāḥ samakampanta tvadīyānāṃ mahārathāḥ || 28 ||
[Analyze grammar]

yamarāṣṭropamaṃ ghoramāsīdāyodhanaṃ tayoḥ |
durdarśaṃ bharataśreṣṭha pretarājapuraṃ yathā || 29 ||
[Analyze grammar]

samājamiva taccitraṃ prekṣamāṇā mahārathāḥ |
nālakṣayañjayaṃ vyaktamekaikasya nivāraṇe || 30 ||
[Analyze grammar]

tayoḥ praikṣanta saṃmardaṃ saṃnikṛṣṭamahāstrayoḥ |
tava durmantrite rājansaputrasya viśāṃ pate || 31 ||
[Analyze grammar]

chādayantau hi śatrughnāvanyonyaṃ sāyakaiḥ śitaiḥ |
śarajālāvṛtaṃ vyoma cakrāte śaravṛṣṭibhiḥ || 32 ||
[Analyze grammar]

tāvanyonyaṃ jighāṃsantau śaraistīkṣṇairmahārathau |
prekṣaṇīyatarāvāstāṃ vṛṣṭimantāvivāmbudau || 33 ||
[Analyze grammar]

suvarṇavikṛtānbāṇānpramuñcantāvariṃdamau |
bhāsvaraṃ vyoma cakrāte vahnyulkābhiriva prabho || 34 ||
[Analyze grammar]

tābhyāṃ muktā vyakāśanta kaṅkabarhiṇavāsasaḥ |
paṅktyaḥ śaradi mattānāṃ sārasānāmivāmbare || 35 ||
[Analyze grammar]

saṃsaktaṃ sūtaputreṇa dṛṣṭvā bhīmamariṃdamam |
atibhāramamanyetāṃ bhīme kṛṣṇadhanaṃjayau || 36 ||
[Analyze grammar]

tatrādhirathibhīmābhyāṃ śarairmuktairdṛḍhāhatāḥ |
iṣupātamatikramya peturaśvanaradvipāḥ || 37 ||
[Analyze grammar]

patadbhiḥ patitaiścānyairgatāsubhiranekaśaḥ |
kṛto mahānmahārāja putrāṇāṃ te janakṣayaḥ || 38 ||
[Analyze grammar]

manuṣyāśvagajānāṃ ca śarīrairgatajīvitaiḥ |
kṣaṇena bhūmiḥ saṃjajñe saṃvṛtā bharatarṣabha || 39 ||
[Analyze grammar]