Chapter 106

dhṛtarāṣṭra uvāca |
yau tau karṇaśca bhīmaśca saṃprayuddhau mahābalau |
arjunasya rathopānte kīdṛśaḥ so'bhavadraṇaḥ || 1 ||
[Analyze grammar]

pūrvaṃ hi nirjitaḥ karṇo bhīmasenena saṃyuge |
kathaṃ bhūyastu rādheyo bhīmamāgānmahārathaḥ || 2 ||
[Analyze grammar]

bhīmo vā sūtatanayaṃ pratyudyātaḥ kathaṃ raṇe |
mahārathasamākhyātaṃ pṛthivyāṃ pravaraṃ ratham || 3 ||
[Analyze grammar]

bhīṣmadroṇāvatikramya dharmaputro yudhiṣṭhiraḥ |
nānyato bhayamādatta vinā karṇaṃ dhanurdharam || 4 ||
[Analyze grammar]

bhayānna śete satataṃ cintayanvai mahāratham |
taṃ kathaṃ sūtaputraṃ hi bhīmo'yudhyata saṃyuge || 5 ||
[Analyze grammar]

brahmaṇyaṃ vīryasaṃpannaṃ samareṣvanivartinam |
kathaṃ karṇaṃ yudhāṃ śreṣṭhaṃ bhīmo'yudhyata saṃyuge || 6 ||
[Analyze grammar]

yau tau samīyaturvīrāvarjunasya rathaṃ prati |
kathaṃ nu tāvayudhyetāṃ sūtaputravṛkodarau || 7 ||
[Analyze grammar]

bhrātṛtvaṃ darśitaṃ pūrvaṃ ghṛṇī cāpi sa sūtajaḥ |
kathaṃ bhīmena yuyudhe kuntyā vākyamanusmaran || 8 ||
[Analyze grammar]

bhīmo vā sūtaputreṇa smaranvairaṃ purā kṛtam |
so'yudhyata kathaṃ vīraḥ karṇena saha saṃyuge || 9 ||
[Analyze grammar]

āśāste ca sadā sūta putro duryodhano mama |
karṇo jeṣyati saṃgrāme sahitānpāṇḍavāniti || 10 ||
[Analyze grammar]

jayāśā yatra mandasya putrasya mama saṃyuge |
sa kathaṃ bhīmakarmāṇaṃ bhīmasenamayudhyata || 11 ||
[Analyze grammar]

yaṃ samāśritya putrairme kṛtaṃ vairaṃ mahārathaiḥ |
taṃ sūtatanayaṃ tāta kathaṃ bhīmo hyayodhayat || 12 ||
[Analyze grammar]

anekānviprakārāṃśca sūtaputrasamudbhavān |
smaramāṇaḥ kathaṃ bhīmo yuyudhe sūtasūnunā || 13 ||
[Analyze grammar]

yo'jayatpṛthivīṃ sarvāṃ rathenaikena vīryavān |
taṃ sūtatanayaṃ yuddhe kathaṃ bhīmo hyayodhayat || 14 ||
[Analyze grammar]

yo jātaḥ kuṇḍalābhyāṃ ca kavacena sahaiva ca |
taṃ sūtaputraṃ samare bhīmaḥ kathamayodhayat || 15 ||
[Analyze grammar]

yathā tayoryuddhamabhūdyaścāsīdvijayī tayoḥ |
tanmamācakṣva tattvena kuśalo hyasi saṃjaya || 16 ||
[Analyze grammar]

saṃjaya uvāca |
bhīmasenastu rādheyamutsṛjya rathināṃ varam |
iyeṣa gantuṃ yatrāstāṃ vīrau kṛṣṇadhanaṃjayau || 17 ||
[Analyze grammar]

taṃ prayāntamabhidrutya rādheyaḥ kaṅkapatribhiḥ |
abhyavarṣanmahārāja megho vṛṣṭyeva parvatam || 18 ||
[Analyze grammar]

phullatā paṅkajeneva vaktreṇābhyutsmayanbalī |
ājuhāva raṇe yāntaṃ bhīmamādhirathistadā || 19 ||
[Analyze grammar]

bhīmasenastadāhvānaṃ karṇānnāmarṣayadyudhi |
ardhamaṇḍalamāvṛtya sūtaputramayodhayat || 20 ||
[Analyze grammar]

avakragāmibhirbāṇairabhyavarṣanmahāyasaiḥ |
dvairathe daṃśitaṃ yattaṃ sarvaśastrabhṛtāṃ varam || 21 ||
[Analyze grammar]

vidhitsuḥ kalahasyāntaṃ jighāṃsuḥ karṇamakṣiṇot |
taṃ ca hatvetarānsarvānhantukāmo mahābalaḥ || 22 ||
[Analyze grammar]

tasmai prāsṛjadugrāṇi vividhāni paraṃtapaḥ |
amarṣī pāṇḍavaḥ kruddhaḥ śaravarṣāṇi māriṣa || 23 ||
[Analyze grammar]

tasya tānīṣuvarṣāṇi mattadviradagāminaḥ |
sūtaputro'stramāyābhiragrasatsumahāyaśāḥ || 24 ||
[Analyze grammar]

sa yathāvanmahārāja vidyayā vai supūjitaḥ |
ācāryavanmaheṣvāsaḥ karṇaḥ paryacaradraṇe || 25 ||
[Analyze grammar]

saṃrambheṇa tu yudhyantaṃ bhīmasenaṃ smayanniva |
abhyapadyata rādheyastamamarṣī vṛkodaram || 26 ||
[Analyze grammar]

tannāmṛṣyata kaunteyaḥ karṇasya smitamāhave |
yudhyamāneṣu vīreṣu paśyatsu ca samantataḥ || 27 ||
[Analyze grammar]

taṃ bhīmasenaḥ saṃprāptaṃ vatsadantaiḥ stanāntare |
vivyādha balavānkruddhastottrairiva mahādvipam || 28 ||
[Analyze grammar]

sūtaṃ tu sūtaputrasya supuṅkhairniśitaiḥ śaraiḥ |
sumuktaiścitravarmāṇaṃ nirbibheda trisaptabhiḥ || 29 ||
[Analyze grammar]

karṇo jāmbūnadairjālaiḥ saṃchannānvātaraṃhasaḥ |
vivyādha turagānvīraḥ pañcabhiḥ pañcabhiḥ śaraiḥ || 30 ||
[Analyze grammar]

tato bāṇamayaṃ jālaṃ bhīmasenarathaṃ prati |
karṇena vihitaṃ rājannimeṣārdhādadṛśyata || 31 ||
[Analyze grammar]

sarathaḥ sadhvajastatra sasūtaḥ pāṇḍavastadā |
prācchādyata mahārāja karṇacāpacyutaiḥ śaraiḥ || 32 ||
[Analyze grammar]

tasya karṇaścatuḥṣaṣṭyā vyadhamatkavacaṃ dṛḍham |
kruddhaścāpyahanatpārśve nārācairmarmabhedibhiḥ || 33 ||
[Analyze grammar]

tato'cintya mahāvegānkarṇakārmukaniḥsṛtān |
samāśliṣyadasaṃbhrāntaḥ sūtaputraṃ vṛkodaraḥ || 34 ||
[Analyze grammar]

sa karṇacāpaprabhavāniṣūnāśīviṣopamān |
bibhradbhīmo mahārāja na jagāma vyathāṃ raṇe || 35 ||
[Analyze grammar]

tato dvātriṃśatā bhallairniśitaistigmatejanaiḥ |
vivyādha samare karṇaṃ bhīmasenaḥ pratāpavān || 36 ||
[Analyze grammar]

ayatnenaiva taṃ karṇaḥ śarairupa samākirat |
bhīmasenaṃ mahābāhuṃ saindhavasya vadhaiṣiṇam || 37 ||
[Analyze grammar]

mṛdupūrvaṃ ca rādheyo bhīmamājāvayodhayat |
krodhapūrvaṃ tathā bhīmaḥ pūrvavairamanusmaran || 38 ||
[Analyze grammar]

taṃ bhīmaseno nāmṛṣyadavamānamamarṣaṇaḥ |
sa tasmai vyasṛjattūrṇaṃ śaravarṣamamitrajit || 39 ||
[Analyze grammar]

te śarāḥ preṣitā rājanbhīmasenena saṃyuge |
nipetuḥ sarvato bhīmāḥ kūjanta iva pakṣiṇaḥ || 40 ||
[Analyze grammar]

hemapuṅkhā mahārāja bhīmasenadhanuścyutāḥ |
abhyadravaṃste rādheyaṃ vṛkāḥ kṣudramṛgaṃ yathā || 41 ||
[Analyze grammar]

karṇastu rathināṃ śreṣṭhaśchādyamānaḥ samantataḥ |
rājanvyasṛjadugrāṇi śaravarṣāṇi saṃyuge || 42 ||
[Analyze grammar]

tasya tānaśaniprakhyāniṣūnsamaraśobhinaḥ |
ciccheda bahubhirbhallairasaṃprāptānvṛkodaraḥ || 43 ||
[Analyze grammar]

punaśca śaravarṣeṇa chādayāmāsa bhārata |
karṇo vaikartano yuddhe bhīmasenaṃ mahāratham || 44 ||
[Analyze grammar]

tatra bhārata bhīmaṃ tu dṛṣṭavantaḥ sma sāyakaiḥ |
samācitatanuṃ saṃkhye śvāvidhaṃ śalalairiva || 45 ||
[Analyze grammar]

hemapuṅkhāñśilādhautānkarṇacāpacyutāñśarān |
dadhāra samare vīraḥ svaraśmīniva bhāskaraḥ || 46 ||
[Analyze grammar]

rudhirokṣitasarvāṅgo bhīmaseno vyarocata |
tapanīyanibhaiḥ puṣpaiḥ palāśa iva kānane || 47 ||
[Analyze grammar]

tattu bhīmo mahārāja karṇasya caritaṃ raṇe |
nāmṛṣyata maheṣvāsaḥ krodhādudvṛtya cakṣuṣī || 48 ||
[Analyze grammar]

sa karṇaṃ pañcaviṃśatyā nārācānāṃ samārpayat |
mahīdharamiva śvetaṃ gūḍhapādairviṣolbaṇaiḥ || 49 ||
[Analyze grammar]

taṃ vivyādha punarbhīmaḥ ṣaḍbhiraṣṭābhireva ca |
marmasvamaravikrāntaḥ sūtaputraṃ mahāraṇe || 50 ||
[Analyze grammar]

tataḥ karṇasya saṃkruddho bhīmasenaḥ pratāpavān |
ciccheda kārmukaṃ tūrṇaṃ sarvopakaraṇāni ca || 51 ||
[Analyze grammar]

jaghāna caturaścāśvānsūtaṃ ca tvaritaḥ śaraiḥ |
nārācairarkaraśmyābhaiḥ karṇaṃ vivyādha corasi || 52 ||
[Analyze grammar]

te jagmurdharaṇīṃ sarve karṇaṃ nirbhidya māriṣa |
yathā hi jaladaṃ bhittvā rājansūryasya raśmayaḥ || 53 ||
[Analyze grammar]

sa vaikalyaṃ mahatprāpya chinnadhanvā śarārditaḥ |
tathā puruṣamānī sa pratyapāyādrathāntaram || 54 ||
[Analyze grammar]