Chapter 103

saṃjaya uvāca |
tamuttīrṇaṃ rathānīkāttamaso bhāskaraṃ yathā |
didhārayiṣurācāryaḥ śaravarṣairavākirat || 1 ||
[Analyze grammar]

pibanniva śaraughāṃstāndroṇacāpavarātigān |
so'bhyavartata sodaryānmāyayā mohayanbalam || 2 ||
[Analyze grammar]

taṃ mṛdhe vegamāsthāya paraṃ paramadhanvinaḥ |
coditāstava putraiśca sarvataḥ paryavārayan || 3 ||
[Analyze grammar]

sa tathā saṃvṛto bhīmaḥ prahasanniva bhārata |
udayacchadgadāṃ tebhyo ghorāṃ tāṃ siṃhavannadan |
avāsṛjacca vegena teṣu tānpramathadbalī || 4 ||
[Analyze grammar]

sendrāśanirivendreṇa praviddhā saṃhatātmanā |
ghoṣeṇa mahatā rājanpūrayitveva medinīm |
jvalantī tejasā bhīmā trāsayāmāsa te sutān || 5 ||
[Analyze grammar]

tāṃ patantīṃ mahāvegāṃ dṛṣṭvā tejobhisaṃvṛtām |
prādravaṃstāvakāḥ sarve nadanto bhairavānravān || 6 ||
[Analyze grammar]

taṃ ca śabdamasaṃsahyaṃ tasyāḥ saṃlakṣya māriṣa |
prāpatanmanujāstatra rathebhyo rathinastadā || 7 ||
[Analyze grammar]

sa tānvidrāvya kaunteyaḥ saṃkhye'mitrāndurāsadaḥ |
suparṇa iva vegena pakṣirāḍatyagāccamūm || 8 ||
[Analyze grammar]

tathā taṃ viprakurvāṇaṃ rathayūthapayūthapam |
bhāradvājo mahārāja bhīmasenaṃ samabhyayāt || 9 ||
[Analyze grammar]

droṇastu samare bhīmaṃ vārayitvā śarormibhiḥ |
akarotsahasā nādaṃ pāṇḍūnāṃ bhayamādadhat || 10 ||
[Analyze grammar]

tadyuddhamāsītsumahadghoraṃ devāsuropamam |
droṇasya ca mahārāja bhīmasya ca mahātmanaḥ || 11 ||
[Analyze grammar]

yadā tu viśikhaistīkṣṇairdroṇacāpaviniḥsṛtaiḥ |
vadhyante samare vīrāḥ śataśo'tha sahasraśaḥ || 12 ||
[Analyze grammar]

tato rathādavaplutya vegamāsthāya pāṇḍavaḥ |
nimīlya nayane rājanpadātirdroṇamabhyayāt || 13 ||
[Analyze grammar]

yathā hi govṛṣo varṣaṃ pratigṛhṇāti līlayā |
tathā bhīmo naravyāghraḥ śaravarṣaṃ samagrahīt || 14 ||
[Analyze grammar]

sa vadhyamānaḥ samare rathaṃ droṇasya māriṣa |
īṣāyāṃ pāṇinā gṛhya pracikṣepa mahābalaḥ || 15 ||
[Analyze grammar]

droṇastu satvaro rājankṣipto bhīmena saṃyuge |
rathamanyaṃ samāsthāya vyūhadvāramupāyayau || 16 ||
[Analyze grammar]

tasminkṣaṇe tasya yantā tūrṇamaśvānacodayat |
bhīmasenasya kauravya tadadbhutamivābhavat || 17 ||
[Analyze grammar]

tataḥ svarathamāsthāya bhīmaseno mahābalaḥ |
abhyavartata vegena tava putrasya vāhinīm || 18 ||
[Analyze grammar]

sa mṛdnankṣatriyānājau vāto vṛkṣānivoddhataḥ |
agacchaddārayansenāṃ sindhuvego nagāniva || 19 ||
[Analyze grammar]

bhojānīkaṃ samāsādya hārdikyenābhirakṣitam |
pramathya bahudhā rājanbhīmasenaḥ samabhyayāt || 20 ||
[Analyze grammar]

saṃtrāsayannanīkāni talaśabdena māriṣa |
ajayatsarvasainyāni śārdūla iva govṛṣān || 21 ||
[Analyze grammar]

bhojānīkamatikramya kāmbojānāṃ ca vāhinīm |
tathā mlecchagaṇāṃścānyānbahūnyuddhaviśāradān || 22 ||
[Analyze grammar]

sātyakiṃ cāpi saṃprekṣya yudhyamānaṃ nararṣabham |
rathena yattaḥ kaunteyo vegena prayayau tadā || 23 ||
[Analyze grammar]

bhīmaseno mahārāja draṣṭukāmo dhanaṃjayam |
atītya samare yodhāṃstāvakānpāṇḍunandanaḥ || 24 ||
[Analyze grammar]

so'paśyadarjunaṃ tatra yudhyamānaṃ nararṣabham |
saindhavasya vadhārthaṃ hi parākrāntaṃ parākramī || 25 ||
[Analyze grammar]

arjunaṃ tatra dṛṣṭvātha cukrośa mahato ravān |
taṃ tu tasya mahānādaṃ pārthaḥ śuśrāva nardataḥ || 26 ||
[Analyze grammar]

tataḥ pārtho mahānādaṃ muñcanvai mādhavaśca ha |
abhyayātāṃ mahārāja nardantau govṛṣāviva || 27 ||
[Analyze grammar]

vāsudevārjunau śrutvā ninādaṃ tasya śuṣmiṇaḥ |
punaḥ punaḥ praṇadatāṃ didṛkṣantau vṛkodaram || 28 ||
[Analyze grammar]

bhīmasenaravaṃ śrutvā phalgunasya ca dhanvinaḥ |
aprīyata mahārāja dharmaputro yudhiṣṭhiraḥ || 29 ||
[Analyze grammar]

viśokaścābhavadrājā śrutvā taṃ ninadaṃ mahat |
dhanaṃjayasya ca raṇe jayamāśāstavānvibhuḥ || 30 ||
[Analyze grammar]

tathā tu nardamāne vai bhīmasene raṇotkaṭe |
smitaṃ kṛtvā mahābāhurdharmaputro yudhiṣṭhiraḥ || 31 ||
[Analyze grammar]

hṛdgataṃ manasā prāha dhyātvā dharmabhṛtāṃ varaḥ |
dattā bhīma tvayā saṃvitkṛtaṃ guruvacastathā || 32 ||
[Analyze grammar]

na hi teṣāṃ jayo yuddhe yeṣāṃ dveṣṭāsi pāṇḍava |
diṣṭyā jīvati saṃgrāme savyasācī dhanaṃjayaḥ || 33 ||
[Analyze grammar]

diṣṭyā ca kuśalī vīraḥ sātyakiḥ satyavikramaḥ |
diṣṭyā śṛṇomi garjantau vāsudevadhanaṃjayau || 34 ||
[Analyze grammar]

yena śakraṃ raṇe jitvā tarpito havyavāhanaḥ |
sa hantā dviṣatāṃ saṃkhye diṣṭyā jīvati phalgunaḥ || 35 ||
[Analyze grammar]

yasya bāhubalaṃ sarve vayamāśritya jīvitāḥ |
sa hantā ripusainyānāṃ diṣṭyā jīvati phalgunaḥ || 36 ||
[Analyze grammar]

nivātakavacā yena devairapi sudurjayāḥ |
nirjitā rathinaikena diṣṭyā pārthaḥ sa jīvati || 37 ||
[Analyze grammar]

kauravānsahitānsarvāngograhārthe samāgatān |
yo'jayanmatsyanagare diṣṭyā pārthaḥ sa jīvati || 38 ||
[Analyze grammar]

kālakeyasahasrāṇi caturdaśa mahāraṇe |
yo'vadhīdbhujavīryeṇa diṣṭyā pārthaḥ sa jīvati || 39 ||
[Analyze grammar]

gandharvarājaṃ balinaṃ duryodhanakṛtena vai |
jitavānyo'stravīryeṇa diṣṭyā pārthaḥ sa jīvati || 40 ||
[Analyze grammar]

kirīṭamālī balavāñśvetāśvaḥ kṛṣṇasārathiḥ |
mama priyaśca satataṃ diṣṭyā jīvati phalgunaḥ || 41 ||
[Analyze grammar]

putraśokābhisaṃtaptaścikīrṣuḥ karma duṣkaram |
jayadrathavadhānveṣī pratijñāṃ kṛtavānhi yaḥ |
kaccitsa saindhavaṃ saṃkhye haniṣyati dhanaṃjayaḥ || 42 ||
[Analyze grammar]

kaccittīrṇapratijñaṃ hi vāsudevena rakṣitam |
anastamita āditye sameṣyāmyahamarjunam || 43 ||
[Analyze grammar]

kaccitsaindhavako rājā duryodhanahite rataḥ |
nandayiṣyatyamitrāṇi phalgunena nipātitaḥ || 44 ||
[Analyze grammar]

kaccidduryodhano rājā phalgunena nipātitam |
dṛṣṭvā saindhavakaṃ saṃkhye śamamasmāsu dhāsyati || 45 ||
[Analyze grammar]

dṛṣṭvā vinihatānbhrātṝnbhīmasenena saṃyuge |
kaccidduryodhano mandaḥ śamamasmāsu dhāsyati || 46 ||
[Analyze grammar]

dṛṣṭvā cānyānbahūnyodhānpātitāndharaṇītale |
kaccidduryodhano mandaḥ paścāttāpaṃ kariṣyati || 47 ||
[Analyze grammar]

kaccidbhīṣmeṇa no vairamekenaiva praśāmyati |
śeṣasya rakṣaṇārthaṃ ca saṃdhāsyati suyodhanaḥ || 48 ||
[Analyze grammar]

evaṃ bahuvidhaṃ tasya cintayānasya pārthiva |
kṛpayābhiparītasya ghoraṃ yuddhamavartata || 49 ||
[Analyze grammar]