Chapter 102

saṃjaya uvāca |
vyūheṣvāloḍyamāneṣu pāṇḍavānāṃ tatastataḥ |
sudūramanvayuḥ pārthāḥ pāñcālāḥ saha somakaiḥ || 1 ||
[Analyze grammar]

vartamāne tathā raudre saṃgrāme lomaharṣaṇe |
prakṣaye jagatastīvre yugānta iva bhārata || 2 ||
[Analyze grammar]

droṇe yudhi parākrānte nardamāne muhurmuhuḥ |
pāñcāleṣu ca kṣīṇeṣu vadhyamāneṣu pāṇḍuṣu || 3 ||
[Analyze grammar]

nāpaśyaccharaṇaṃ kiṃciddharmarājo yudhiṣṭhiraḥ |
cintayāmāsa rājendra kathametadbhaviṣyati || 4 ||
[Analyze grammar]

tatrāvekṣya diśaḥ sarvāḥ savyasācididṛkṣayā |
yudhiṣṭhiro dadarśātha naiva pārthaṃ na mādhavam || 5 ||
[Analyze grammar]

so'paśyannaraśārdūlaṃ vānararṣabhalakṣaṇam |
gāṇḍīvasya ca nirghoṣamaśṛṇvanvyathitendriyaḥ || 6 ||
[Analyze grammar]

apaśyansātyakiṃ cāpi vṛṣṇīnāṃ pravaraṃ ratham |
cintayābhiparītāṅgo dharmarājo yudhiṣṭhiraḥ |
nādhyagacchattadā śāntiṃ tāvapaśyannararṣabhau || 7 ||
[Analyze grammar]

lokopakrośabhīrutvāddharmarājo mahāyaśāḥ |
acintayanmahābāhuḥ śaineyasya rathaṃ prati || 8 ||
[Analyze grammar]

padavīṃ preṣitaścaiva phalgunasya mayā raṇe |
śaineyaḥ sātyakiḥ satyo mitrāṇāmabhayaṃkaraḥ || 9 ||
[Analyze grammar]

tadidaṃ hyekamevāsīddvidhā jātaṃ mamādya vai |
sātyakiśca hi me jñeyaḥ pāṇḍavaśca dhanaṃjayaḥ || 10 ||
[Analyze grammar]

sātyakiṃ preṣayitvā tu pāṇḍavasya padānugam |
sātvatasyāpi kaṃ yuddhe preṣayiṣye padānugam || 11 ||
[Analyze grammar]

kariṣyāmi prayatnena bhrāturanveṣaṇaṃ yadi |
yuyudhānamananviṣya loko māṃ garhayiṣyati || 12 ||
[Analyze grammar]

bhrāturanveṣaṇaṃ kṛtvā dharmarājo yudhiṣṭhiraḥ |
parityajati vārṣṇeyaṃ sātyakiṃ satyavikramam || 13 ||
[Analyze grammar]

lokāpavādabhīrutvātso'haṃ pārthaṃ vṛkodaram |
padavīṃ preṣayiṣyāmi mādhavasya mahātmanaḥ || 14 ||
[Analyze grammar]

yathaiva ca mama prītirarjune śatrusūdane |
tathaiva vṛṣṇivīre'pi sātvate yuddhadurmade || 15 ||
[Analyze grammar]

atibhāre niyuktaśca mayā śaineyanandanaḥ |
sa tu mitroparodhena gauravācca mahābalaḥ |
praviṣṭo bhāratīṃ senāṃ makaraḥ sāgaraṃ yathā || 16 ||
[Analyze grammar]

asau hi śrūyate śabdaḥ śūrāṇāmanivartinām |
mithaḥ saṃyudhyamānānāṃ vṛṣṇivīreṇa dhīmatā || 17 ||
[Analyze grammar]

prāptakālaṃ subalavanniścitya bahudhā hi me |
tatraiva pāṇḍaveyasya bhīmasenasya dhanvinaḥ |
gamanaṃ rocate mahyaṃ yatra yātau mahārathau || 18 ||
[Analyze grammar]

na cāpyasahyaṃ bhīmasya vidyate bhuvi kiṃcana |
śakto hyeṣa raṇe yattānpṛthivyāṃ sarvadhanvinaḥ |
svabāhubalamāsthāya prativyūhitumañjasā || 19 ||
[Analyze grammar]

yasya bāhubalaṃ sarve samāśritya mahātmanaḥ |
vanavāsānnivṛttāḥ sma na ca yuddheṣu nirjitāḥ || 20 ||
[Analyze grammar]

ito gate bhīmasene sātvataṃ prati pāṇḍave |
sanāthau bhavitārau hi yudhi sātvataphalgunau || 21 ||
[Analyze grammar]

kāmaṃ tvaśocanīyau tau raṇe sātvataphalgunau |
rakṣitau vāsudevena svayaṃ cāstraviśāradau || 22 ||
[Analyze grammar]

avaśyaṃ tu mayā kāryamātmanaḥ śokanāśanam |
tasmādbhīmaṃ niyokṣyāmi sātvatasya padānugam |
tataḥ pratikṛtaṃ manye vidhānaṃ sātyakiṃ prati || 23 ||
[Analyze grammar]

evaṃ niścitya manasā dharmaputro yudhiṣṭhiraḥ |
yantāramabravīdrājanbhīmaṃ prati nayasva mām || 24 ||
[Analyze grammar]

dharmarājavacaḥ śrutvā sārathirhayakovidaḥ |
rathaṃ hemapariṣkāraṃ bhīmāntikamupānayat || 25 ||
[Analyze grammar]

bhīmasenamanuprāpya prāptakālamanusmaran |
kaśmalaṃ prāviśadrājā bahu tatra samādiśan || 26 ||
[Analyze grammar]

yaḥ sadevānsagandharvāndaityāṃścaikaratho'jayat |
tasya lakṣma na paśyāmi bhīmasenānujasya te || 27 ||
[Analyze grammar]

tato'bravīddharmarājaṃ bhīmasenastathāgatam |
naivādrākṣaṃ na cāśrauṣaṃ tava kaśmalamīdṛśam || 28 ||
[Analyze grammar]

purā hi duḥkhadīrṇānāṃ bhavāngatirabhūddhi naḥ |
uttiṣṭhottiṣṭha rājendra śādhi kiṃ karavāṇi te || 29 ||
[Analyze grammar]

na hyasādhyamakāryaṃ vā vidyate mama mānada |
ājñāpaya kuruśreṣṭha mā ca śoke manaḥ kṛthāḥ || 30 ||
[Analyze grammar]

tamabravīdaśrupūrṇaḥ kṛṣṇasarpa iva śvasan |
bhīmasenamidaṃ vākyaṃ pramlānavadano nṛpaḥ || 31 ||
[Analyze grammar]

yathā śaṅkhasya nirghoṣaḥ pāñcajanyasya śrūyate |
prerito vāsudevena saṃrabdhena yaśasvinā |
nūnamadya hataḥ śete tava bhrātā dhanaṃjayaḥ || 32 ||
[Analyze grammar]

tasminvinihate nūnaṃ yudhyate'sau janārdanaḥ |
yasya sattvavato vīryamupajīvanti pāṇḍavāḥ || 33 ||
[Analyze grammar]

yaṃ bhayeṣvabhigacchanti sahasrākṣamivāmarāḥ |
sa śūraḥ saindhavaprepsuranvayādbhāratīṃ camūm || 34 ||
[Analyze grammar]

tasya vai gamanaṃ vidmo bhīma nāvartanaṃ punaḥ |
śyāmo yuvā guḍākeśo darśanīyo mahābhujaḥ || 35 ||
[Analyze grammar]

vyūḍhorasko mahāskandho mattadviradavikramaḥ |
cakoranetrastāmrākṣo dviṣatāmaghavardhanaḥ || 36 ||
[Analyze grammar]

tadidaṃ mama bhadraṃ te śokasthānamariṃdama |
arjunārthaṃ mahābāho sātvatasya ca kāraṇāt || 37 ||
[Analyze grammar]

vardhate haviṣevāgniridhyamānaḥ punaḥ punaḥ |
tasya lakṣma na paśyāmi tena vindāmi kaśmalam || 38 ||
[Analyze grammar]

taṃ viddhi puruṣavyāghraṃ sātvataṃ ca mahāratham |
sa taṃ mahārathaṃ paścādanuyātastavānujam |
tamapaśyanmahābāhumahaṃ vindāmi kaśmalam || 39 ||
[Analyze grammar]

tasmātkṛṣṇo raṇe nūnaṃ yudhyate yuddhakovidaḥ |
yasya vīryavato vīryamupajīvanti pāṇḍavāḥ || 40 ||
[Analyze grammar]

sa tatra gaccha kaunteya yatra yāto dhanaṃjayaḥ |
sātyakiśca mahāvīryaḥ kartavyaṃ yadi manyase |
vacanaṃ mama dharmajña jyeṣṭho bhrātā bhavāmi te || 41 ||
[Analyze grammar]

na te'rjunastathā jñeyo jñātavyaḥ sātyakiryathā |
cikīrṣurmatpriyaṃ pārtha prayātaḥ savyasācinaḥ |
padavīṃ durgamāṃ ghorāmagamyāmakṛtātmabhiḥ || 42 ||
[Analyze grammar]

bhīmasena uvāca |
brahmeśānendravaruṇānavahadyaḥ purā rathaḥ |
tamāsthāya gatau kṛṣṇau na tayorvidyate bhayam || 43 ||
[Analyze grammar]

ājñāṃ tu śirasā bibhradeṣa gacchāmi mā śucaḥ |
sametya tānnaravyāghrāṃstava dāsyāmi saṃvidam || 44 ||
[Analyze grammar]

saṃjaya uvāca |
etāvaduktvā prayayau paridāya yudhiṣṭhiram |
dhṛṣṭadyumnāya balavānsuhṛdbhyaśca punaḥ punaḥ |
dhṛṣṭadyumnaṃ cedamāha bhīmaseno mahābalaḥ || 45 ||
[Analyze grammar]

viditaṃ te mahābāho yathā droṇo mahārathaḥ |
grahaṇe dharmarājasya sarvopāyena vartate || 46 ||
[Analyze grammar]

na ca me gamane kṛtyaṃ tādṛkpārṣata vidyate |
yādṛśaṃ rakṣaṇe rājñaḥ kāryamātyayikaṃ hi naḥ || 47 ||
[Analyze grammar]

evamukto'smi pārthena prativaktuṃ sma notsahe |
prayāsye tatra yatrāsau mumūrṣuḥ saindhavaḥ sthitaḥ |
dharmarājasya vacane sthātavyamaviśaṅkayā || 48 ||
[Analyze grammar]

so'dya yatto raṇe pārthaṃ parirakṣa yudhiṣṭhiram |
etaddhi sarvakāryāṇāṃ paramaṃ kṛtyamāhave || 49 ||
[Analyze grammar]

tamabravīnmahārāja dhṛṣṭadyumno vṛkodaram |
īpsitena mahābāho gaccha pārthāvicārayan || 50 ||
[Analyze grammar]

nāhatvā samare droṇo dhṛṣṭadyumnaṃ kathaṃcana |
nigrahaṃ dharmarājasya prakariṣyati saṃyuge || 51 ||
[Analyze grammar]

tato nikṣipya rājānaṃ dhṛṣṭadyumnāya pāṇḍavaḥ |
abhivādya guruṃ jyeṣṭhaṃ prayayau yatra phalgunaḥ || 52 ||
[Analyze grammar]

pariṣvaktastu kaunteyo dharmarājena bhārata |
āghrātaśca tathā mūrdhni śrāvitaścāśiṣaḥ śubhāḥ || 53 ||
[Analyze grammar]

bhīmaseno mahābāhuḥ kavacī śubhakuṇḍalī |
sāṅgadaḥ satanutrāṇaḥ saśarī rathināṃ varaḥ || 54 ||
[Analyze grammar]

tasya kārṣṇāyasaṃ varma hemacitraṃ maharddhimat |
vibabhau parvataśliṣṭaḥ savidyudiva toyadaḥ || 55 ||
[Analyze grammar]

pītaraktāsitasitairvāsobhiśca suveṣṭitaḥ |
kaṇṭhatrāṇena ca babhau sendrāyudha ivāmbudaḥ || 56 ||
[Analyze grammar]

prayāte bhīmasene tu tava sainyaṃ yuyutsayā |
pāñcajanyaravo ghoraḥ punarāsīdviśāṃ pate || 57 ||
[Analyze grammar]

taṃ śrutvā ninadaṃ ghoraṃ trailokyatrāsanaṃ mahat |
punarbhīmaṃ mahābāhurdharmaputro'bhyabhāṣata || 58 ||
[Analyze grammar]

eṣa vṛṣṇipravīreṇa dhmātaḥ salilajo bhṛśam |
pṛthivīṃ cāntarikṣaṃ ca vinādayati śaṅkharāṭ || 59 ||
[Analyze grammar]

nūnaṃ vyasanamāpanne sumahatsavyasācini |
kurubhiryudhyate sārdhaṃ sarvaiścakragadādharaḥ || 60 ||
[Analyze grammar]

nūnamāryā mahatkuntī pāpamadya nidarśanam |
draupadī ca subhadrā ca paśyanti saha bandhubhiḥ || 61 ||
[Analyze grammar]

sa bhīmastvarayā yukto yāhi yatra dhanaṃjayaḥ |
muhyantīva hi me sarvā dhanaṃjayadidṛkṣayā |
diśaḥ sapradiśaḥ pārtha sātvatasya ca kāraṇāt || 62 ||
[Analyze grammar]

gaccha gaccheti ca punarbhīmasenamabhāṣata |
bhṛśaṃ sa prahito bhrātrā bhrātā bhrātuḥ priyaṃkaraḥ |
āhatya dundubhiṃ bhīmaḥ śaṅkhaṃ pradhmāya cāsakṛt || 63 ||
[Analyze grammar]

vinadya siṃhanādaṃ ca jyāṃ vikarṣanpunaḥ punaḥ |
darśayanghoramātmānamamitrānsahasābhyayāt || 64 ||
[Analyze grammar]

tamūhurjavanā dāntā vikurvāṇā hayottamāḥ |
viśokenābhisaṃyattā manomārutaraṃhasaḥ || 65 ||
[Analyze grammar]

ārujanvirujanpārtho jyāṃ vikarṣaṃśca pāṇinā |
so'vakarṣanvikarṣaṃśca senāgraṃ samaloḍayat || 66 ||
[Analyze grammar]

taṃ prayāntaṃ mahābāhuṃ pāñcālāḥ sahasomakāḥ |
pṛṣṭhato'nuyayuḥ śūrā maghavantamivāmarāḥ || 67 ||
[Analyze grammar]

taṃ sasenā mahārāja sodaryāḥ paryavārayan |
duḥśalaścitrasenaśca kuṇḍabhedī viviṃśatiḥ || 68 ||
[Analyze grammar]

durmukho duḥsahaścaiva vikarṇaśca śalastathā |
vindānuvindau sumukho dīrghabāhuḥ sudarśanaḥ || 69 ||
[Analyze grammar]

vṛndārakaḥ suhastaśca suṣeṇo dīrghalocanaḥ |
abhayo raudrakarmā ca suvarmā durvimocanaḥ || 70 ||
[Analyze grammar]

vividhai rathināṃ śreṣṭhāḥ saha sainyaiḥ sahānugaiḥ |
saṃyattāḥ samare śūrā bhīmasenamupādravan || 71 ||
[Analyze grammar]

tānsamīkṣya tu kaunteyo bhīmasenaḥ parākramī |
abhyavartata vegena siṃhaḥ kṣudramṛgāniva || 72 ||
[Analyze grammar]

te mahāstrāṇi divyāni tatra vīrā adarśayan |
vārayantaḥ śarairbhīmaṃ meghāḥ sūryamivoditam || 73 ||
[Analyze grammar]

sa tānatītya vegena droṇānīkamupādravat |
agrataśca gajānīkaṃ śaravarṣairavākirat || 74 ||
[Analyze grammar]

so'cireṇaiva kālena tadgajānīkamāśugaiḥ |
diśaḥ sarvāḥ samabhyasya vyadhamatpavanātmajaḥ || 75 ||
[Analyze grammar]

trāsitāḥ śarabhasyeva garjitena vane mṛgāḥ |
prādravandviradāḥ sarve nadanto bhairavānravān || 76 ||
[Analyze grammar]

punaścātītya vegena droṇānīkamupādravat |
tamavārayadācāryo velevodvṛttamarṇavam || 77 ||
[Analyze grammar]

lalāṭe'tāḍayaccainaṃ nārācena smayanniva |
ūrdhvaraśmirivādityo vibabhau tatra pāṇḍavaḥ || 78 ||
[Analyze grammar]

sa manyamānastvācāryo mamāyaṃ phalguno yathā |
bhīmaḥ kariṣyate pūjāmityuvāca vṛkodaram || 79 ||
[Analyze grammar]

bhīmasena na te śakyaṃ praveṣṭumarivāhinīm |
māmanirjitya samare śatrumadhye mahābala || 80 ||
[Analyze grammar]

yadi te so'nujaḥ kṛṣṇaḥ praviṣṭo'numate mama |
anīkaṃ na tu śakyaṃ bhoḥ praveṣṭumiha vai tvayā || 81 ||
[Analyze grammar]

atha bhīmastu tacchrutvā gurorvākyamapetabhīḥ |
kruddhaḥ provāca vai droṇaṃ raktatāmrekṣaṇaḥ śvasan || 82 ||
[Analyze grammar]

tavārjuno nānumate brahmabandho raṇājiram |
praviṣṭaḥ sa hi durdharṣaḥ śakrasyāpi viśedbalam || 83 ||
[Analyze grammar]

yena vai paramāṃ pūjāṃ kurvatā mānito hyasi |
nārjuno'haṃ ghṛṇī droṇa bhīmaseno'smi te ripuḥ || 84 ||
[Analyze grammar]

pitā nastvaṃ gururbandhustathā putrā hi te vayam |
iti manyāmahe sarve bhavantaṃ praṇatāḥ sthitāḥ || 85 ||
[Analyze grammar]

adya tadviparītaṃ te vadato'smāsu dṛśyate |
yadi śatruṃ tvamātmānaṃ manyase tattathāstviha |
eṣa te sadṛśaṃ śatroḥ karma bhīmaḥ karomyaham || 86 ||
[Analyze grammar]

athodbhrāmya gadāṃ bhīmaḥ kāladaṇḍamivāntakaḥ |
droṇāyāvasṛjadrājansa rathādavapupluve || 87 ||
[Analyze grammar]

sāśvasūtadhvajaṃ yānaṃ droṇasyāpothayattadā |
prāmṛdnācca bahūnyodhānvāyurvṛkṣānivaujasā || 88 ||
[Analyze grammar]

taṃ punaḥ parivavruste tava putrā rathottamam |
anyaṃ ca rathamāsthāya droṇaḥ praharatāṃ varaḥ || 89 ||
[Analyze grammar]

tataḥ kruddho mahārāja bhīmasenaḥ parākramī |
agrataḥ syandanānīkaṃ śaravarṣairavākirat || 90 ||
[Analyze grammar]

te vadhyamānāḥ samare tava putrā mahārathāḥ |
bhīmaṃ bhīmabalaṃ yuddhe'yodhayaṃstu jayaiṣiṇaḥ || 91 ||
[Analyze grammar]

tato duḥśāsanaḥ kruddho rathaśaktiṃ samākṣipat |
sarvapāraśavīṃ tīkṣṇāṃ jighāṃsuḥ pāṇḍunandanam || 92 ||
[Analyze grammar]

āpatantīṃ mahāśaktiṃ tava putrapracoditām |
dvidhā ciccheda tāṃ bhīmastadadbhutamivābhavat || 93 ||
[Analyze grammar]

athānyairniśitairbāṇaiḥ saṃkruddhaḥ kuṇḍabhedinam |
suṣeṇaṃ dīrghanetraṃ ca tribhistrīnavadhīdbalī || 94 ||
[Analyze grammar]

tato vṛndārakaṃ vīraṃ kurūṇāṃ kīrtivardhanam |
putrāṇāṃ tava vīrāṇāṃ yudhyatāmavadhītpunaḥ || 95 ||
[Analyze grammar]

abhayaṃ raudrakarmāṇaṃ durvimocanameva ca |
tribhistrīnavadhīdbhīmaḥ punareva sutāṃstava || 96 ||
[Analyze grammar]

vadhyamānā mahārāja putrāstava balīyasā |
bhīmaṃ praharatāṃ śreṣṭhaṃ samantātparyavārayan || 97 ||
[Analyze grammar]

vindānuvindau sahitau suvarmāṇaṃ ca te sutam |
prahasanniva kaunteyaḥ śarairninye yamakṣayam || 98 ||
[Analyze grammar]

tataḥ sudarśanaṃ vīraṃ putraṃ te bharatarṣabha |
vivyādha samare tūrṇaṃ sa papāta mamāra ca || 99 ||
[Analyze grammar]

so'cireṇaiva kālena tadrathānīkamāśugaiḥ |
diśaḥ sarvāḥ samabhyasya vyadhamatpāṇḍunandanaḥ || 100 ||
[Analyze grammar]

tato vai rathaghoṣeṇa garjitena mṛgā iva |
vadhyamānāśca samare putrāstava viśāṃ pate |
prādravansarathāḥ sarve bhīmasenabhayārditāḥ || 101 ||
[Analyze grammar]

anuyāya tu kaunteyaḥ putrāṇāṃ te mahadbalam |
vivyādha samare rājankauraveyānsamantataḥ || 102 ||
[Analyze grammar]

vadhyamānā mahārāja bhīmasenena tāvakāḥ |
tyaktvā bhīmaṃ raṇe yānti codayanto hayottamān || 103 ||
[Analyze grammar]

tāṃstu nirjitya samare bhīmaseno mahābalaḥ |
siṃhanādaravaṃ cakre bāhuśabdaṃ ca pāṇḍavaḥ || 104 ||
[Analyze grammar]

talaśabdaṃ ca sumahatkṛtvā bhīmo mahābalaḥ |
vyatītya rathinaścāpi droṇānīkamupādravat || 105 ||
[Analyze grammar]