Chapter 97

dhṛtarāṣṭra uvāca |
saṃpramṛdya mahatsainyaṃ yāntaṃ śaineyamarjunam |
nirhrīkā mama te putrāḥ kimakurvata saṃjaya || 1 ||
[Analyze grammar]

kathaṃ caiṣāṃ tathā yuddhe dhṛtirāsīnmumūrṣatām |
śaineyacaritaṃ dṛṣṭvā sadṛśaṃ savyasācinaḥ || 2 ||
[Analyze grammar]

kiṃ nu vakṣyanti te kṣātraṃ sainyamadhye parājitāḥ |
kathaṃ ca sātyakiryuddhe vyatikrānto mahāyaśāḥ || 3 ||
[Analyze grammar]

kathaṃ ca mama putrāṇāṃ jīvatāṃ tatra saṃjaya |
śaineyo'bhiyayau yuddhe tanmamācakṣva tattvataḥ || 4 ||
[Analyze grammar]

atyadbhutamidaṃ tāta tvatsakāśācchṛṇomyaham |
ekasya bahubhiryuddhaṃ śatrubhirvai mahārathaiḥ || 5 ||
[Analyze grammar]

viparītamahaṃ manye mandabhāgyānsutānprati |
yatrāvadhyanta samare sātvatena mahātmanā || 6 ||
[Analyze grammar]

ekasya hi na paryāptaṃ matsainyaṃ tasya saṃjaya |
kruddhasya yuyudhānasya sarve tiṣṭhantu pāṇḍavāḥ || 7 ||
[Analyze grammar]

nirjitya samare droṇaṃ kṛtinaṃ yuddhadurmadam |
yathā paśugaṇānsiṃhastadvaddhantā sutānmama || 8 ||
[Analyze grammar]

kṛtavarmādibhiḥ śūrairyattairbahubhirāhave |
yuyudhāno na śakito hantuṃ yaḥ puruṣarṣabhaḥ || 9 ||
[Analyze grammar]

naitadīdṛśakaṃ yuddhaṃ kṛtavāṃstatra phalgunaḥ |
yādṛśaṃ kṛtavānyuddhaṃ śinernaptā mahāyaśāḥ || 10 ||
[Analyze grammar]

saṃjaya uvāca |
tava durmantrite rājanduryodhanakṛtena ca |
śṛṇuṣvāvahito bhūtvā yatte vakṣyāmi bhārata || 11 ||
[Analyze grammar]

te punaḥ saṃnyavartanta kṛtvā saṃśaptakānmithaḥ |
parāṃ yuddhe matiṃ kṛtvā putrasya tava śāsanāt || 12 ||
[Analyze grammar]

trīṇi sādisahasrāṇi duryodhanapurogamāḥ |
śakāḥ kāmbojabāhlīkā yavanāḥ pāradāstathā || 13 ||
[Analyze grammar]

kuṇindāstaṅgaṇāmbaṣṭhāḥ paiśācāśca samandarāḥ |
abhyadravanta śaineyaṃ śalabhāḥ pāvakaṃ yathā || 14 ||
[Analyze grammar]

yuktāśca pārvatīyānāṃ rathāḥ pāṣāṇayodhinām |
śūrāḥ pañcaśatā rājañśaineyaṃ samupādravan || 15 ||
[Analyze grammar]

tato rathasahasreṇa mahārathaśatena ca |
dviradānāṃ sahasreṇa dvisāhasraiśca vājibhiḥ || 16 ||
[Analyze grammar]

śaravarṣāṇi muñcanto vividhāni mahārathāḥ |
abhyadravanta śaineyamasaṃkhyeyāśca pattayaḥ || 17 ||
[Analyze grammar]

tāṃśca saṃcodayansarvānghnatainamiti bhārata |
duḥśāsano mahārāja sātyakiṃ paryavārayat || 18 ||
[Analyze grammar]

tatrādbhutamapaśyāma śaineyacaritaṃ mahat |
yadeko bahubhiḥ sārdhamasaṃbhrāntamayudhyata || 19 ||
[Analyze grammar]

avadhīcca rathānīkaṃ dviradānāṃ ca tadbalam |
sādinaścaiva tānsarvāndasyūnapi ca sarvaśaḥ || 20 ||
[Analyze grammar]

tatra cakrairvimathitairbhagnaiśca paramāyudhaiḥ |
akṣaiśca bahudhā bhagnairīṣādaṇḍakabandhuraiḥ || 21 ||
[Analyze grammar]

kūbarairmathitaiścāpi dhvajaiścāpi nipātitaiḥ |
varmabhiścāmaraiścaiva vyavakīrṇā vasuṃdharā || 22 ||
[Analyze grammar]

sragbhirābharaṇairvastrairanukarṣaiśca māriṣa |
saṃchannā vasudhā tatra dyaurgrahairiva bhārata || 23 ||
[Analyze grammar]

girirūpadharāścāpi patitāḥ kuñjarottamāḥ |
añjanasya kule jātā vāmanasya ca bhārata |
supratīkakule jātā mahāpadmakule tathā || 24 ||
[Analyze grammar]

airāvaṇakule caiva tathānyeṣu kuleṣu ca |
jātā dantivarā rājañśerate bahavo hatāḥ || 25 ||
[Analyze grammar]

vanāyujānpārvatīyānkāmbojāraṭṭabāhlikān |
tathā hayavarānrājannijaghne tatra sātyakiḥ || 26 ||
[Analyze grammar]

nānādeśasamutthāṃśca nānājātyāṃśca pattinaḥ |
nijaghne tatra śaineyaḥ śataśo'tha sahasraśaḥ || 27 ||
[Analyze grammar]

teṣu prakālyamāneṣu dasyūnduḥśāsano'bravīt |
nivartadhvamadharmajñā yudhyadhvaṃ kiṃ sṛtena vaḥ || 28 ||
[Analyze grammar]

tāṃścāpi sarvānsaṃprekṣya putro duḥśāsanastava |
pāṣāṇayodhinaḥ śūrānpārvatīyānacodayat || 29 ||
[Analyze grammar]

aśmayuddheṣu kuśalā naitajjānāti sātyakiḥ |
aśmayuddhamajānantaṃ ghnatainaṃ yuddhakāmukam || 30 ||
[Analyze grammar]

tathaiva kuravaḥ sarve nāśmayuddhaviśāradāḥ |
abhidravata mā bhaiṣṭa na vaḥ prāpsyati sātyakiḥ || 31 ||
[Analyze grammar]

tato gajaśiśuprakhyairupalaiḥ śailavāsinaḥ |
udyatairyuyudhānasya sthitā maraṇakāṅkṣiṇaḥ || 32 ||
[Analyze grammar]

kṣepaṇīyaistathāpyanye sātvatasya vadhaiṣiṇaḥ |
coditāstava putreṇa rurudhuḥ sarvatodiśam || 33 ||
[Analyze grammar]

teṣāmāpatatāmeva śilāyuddhaṃ cikīrṣatām |
sātyakiḥ pratisaṃdhāya triṃśataṃ prāhiṇoccharān || 34 ||
[Analyze grammar]

tāmaśmavṛṣṭiṃ tumulāṃ pārvatīyaiḥ samīritām |
bibhedoragasaṃkāśairnārācaiḥ śinipuṃgavaḥ || 35 ||
[Analyze grammar]

tairaśmacūrṇairdīpyadbhiḥ khadyotānāmiva vrajaiḥ |
prāyaḥ sainyānyavadhyanta hāhābhūtāni māriṣa || 36 ||
[Analyze grammar]

tataḥ pañcaśatāḥ śūrāḥ samudyatamahāśilāḥ |
nikṛttabāhavo rājannipeturdharaṇītale || 37 ||
[Analyze grammar]

pāṣāṇayodhinaḥ śūrānyatamānānavasthitān |
avadhīdbahusāhasrāṃstadadbhutamivābhavat || 38 ||
[Analyze grammar]

tataḥ punarbastamukhairaśmavṛṣṭiṃ samantataḥ |
ayohastaiḥ śūlahastairdaradaiḥ khaśataṅgaṇaiḥ || 39 ||
[Analyze grammar]

ambaṣṭhaiśca kuṇindaiśca kṣiptāṃ kṣiptāṃ sa sātyakiḥ |
nārācaiḥ prativivyādha prekṣamāṇo mahābalaḥ || 40 ||
[Analyze grammar]

adrīṇāṃ bhidyamānānāmantarikṣe śitaiḥ śaraiḥ |
śabdena prādravanrājangajāśvarathapattayaḥ || 41 ||
[Analyze grammar]

aśmacūrṇaiḥ samākīrṇā manuṣyāśca vayāṃsi ca |
nāśaknuvannavasthātuṃ bhramarairiva daṃśitāḥ || 42 ||
[Analyze grammar]

hataśiṣṭā virudhirā bhinnamastakapiṇḍikāḥ |
kuñjarāḥ saṃnyavartanta yuyudhānarathaṃ prathi || 43 ||
[Analyze grammar]

tataḥ śabdaḥ samabhavattava sainyasya māriṣa |
mādhavenārdyamānasya sāgarasyeva dāruṇaḥ || 44 ||
[Analyze grammar]

taṃ śabdaṃ tumulaṃ śrutvā droṇo yantāramabravīt |
eṣa sūta raṇe kruddhaḥ sātvatānāṃ mahārathaḥ || 45 ||
[Analyze grammar]

dārayanbahudhā sainyaṃ raṇe carati kālavat |
yatraiṣa śabdastumulastatra sūta rathaṃ naya || 46 ||
[Analyze grammar]

pāṣāṇayodhibhirnūnaṃ yuyudhānaḥ samāgataḥ |
tathā hi rathinaḥ sarve hriyante vidrutairhayaiḥ || 47 ||
[Analyze grammar]

viśastrakavacā rugṇāstatra tatra patanti ca |
na śaknuvanti yantāraḥ saṃyantuṃ tumule hayān || 48 ||
[Analyze grammar]

ityevaṃ bruvato rājanbhāradvājasya dhīmataḥ |
pratyuvāca tato yantā droṇaṃ śastrabhṛtāṃ varam || 49 ||
[Analyze grammar]

āyuṣmandravate sainyaṃ kauraveyaṃ samantataḥ |
paśya yodhānraṇe bhinnāndhāvamānāṃstatastataḥ || 50 ||
[Analyze grammar]

ete ca sahitāḥ śūrāḥ pāñcālāḥ pāṇḍavaiḥ saha |
tvāmeva hi jighāṃsantaḥ prādravanti samantataḥ || 51 ||
[Analyze grammar]

atra kāryaṃ samādhatsva prāptakālamariṃdama |
sthāne vā gamane vāpi dūraṃ yātaśca sātyakiḥ || 52 ||
[Analyze grammar]

tathaivaṃ vadatastasya bhāradvājasya māriṣa |
pratyadṛśyata śaineyo nighnanbahuvidhānrathān || 53 ||
[Analyze grammar]

te vadhyamānāḥ samare yuyudhānena tāvakāḥ |
yuyudhānarathaṃ tyaktvā droṇānīkāya dudruvuḥ || 54 ||
[Analyze grammar]

yaistu duḥśāsanaḥ sārdhaṃ rathaiḥ pūrvaṃ nyavartata |
te bhītāstvabhyadhāvanta sarve droṇarathaṃ prati || 55 ||
[Analyze grammar]