Chapter 96

saṃjaya uvāca |
jitvā yavanakāmbojānyuyudhānastato'rjunam |
jagāma tava sainyasya madhyena rathināṃ varaḥ || 1 ||
[Analyze grammar]

śaradaṃṣṭro naravyāghro vicitrakavacacchaviḥ |
mṛgānvyāghra ivājighraṃstava sainyamabhīṣayat || 2 ||
[Analyze grammar]

sa rathena caranmārgāndhanurabhrāmayadbhṛśam |
rukmapṛṣṭhaṃ mahāvegaṃ rukmacandrakasaṃkulam || 3 ||
[Analyze grammar]

rukmāṅgadaśirastrāṇo rukmavarmasamāvṛtaḥ |
rukmadhvajavaraḥ śūro meruśṛṅga ivābabhau || 4 ||
[Analyze grammar]

sadhanurmaṇḍalaḥ saṃkhye tejobhāsvararaśmivān |
śaradīvoditaḥ sūryo nṛsūryo virarāja ha || 5 ||
[Analyze grammar]

vṛṣabhaskandhavikrānto vṛṣabhākṣo nararṣabhaḥ |
tāvakānāṃ babhau madhye gavāṃ madhye yathā vṛṣaḥ || 6 ||
[Analyze grammar]

mattadviradasaṃkāśaṃ mattadviradagāminam |
prabhinnamiva mātaṅgaṃ yūthamadhye vyavasthitam |
vyāghrā iva jighāṃsantastvadīyābhyadravanraṇe || 7 ||
[Analyze grammar]

droṇānīkamatikrāntaṃ bhojānīkaṃ ca dustaram |
jalasaṃdhārṇavaṃ tīrtvā kāmbojānāṃ ca vāhinīm || 8 ||
[Analyze grammar]

hārdikyamakarānmuktaṃ tīrṇaṃ vai sainyasāgaram |
parivavruḥ susaṃkruddhāstvadīyāḥ sātyakiṃ rathāḥ || 9 ||
[Analyze grammar]

duryodhanaścitraseno duḥśāsanaviviṃśatī |
śakunirduḥsahaścaiva yuvā durmarṣaṇaḥ krathaḥ || 10 ||
[Analyze grammar]

anye ca bahavaḥ śūrāḥ śastravanto durāsadāḥ |
pṛṣṭhataḥ sātyakiṃ yāntamanvadhāvannamarṣitāḥ || 11 ||
[Analyze grammar]

atha śabdo mahānāsīttava sainyasya māriṣa |
mārutoddhūtavegasya sāgarasyeva parvaṇi || 12 ||
[Analyze grammar]

tānabhidravataḥ sarvānsamīkṣya śinipuṃgavaḥ |
śanairyāhīti yantāramabravītprahasanniva || 13 ||
[Analyze grammar]

idameti samuddhūtaṃ dhārtarāṣṭrasya yadbalam |
māmevābhimukhaṃ tūrṇaṃ gajāśvarathapattimat || 14 ||
[Analyze grammar]

nādayanvai diśaḥ sarvā rathaghoṣeṇa sārathe |
pṛthivīṃ cāntarikṣaṃ ca kampayansāgarānapi || 15 ||
[Analyze grammar]

etadbalārṇavaṃ tāta vārayiṣye mahāraṇe |
paurṇamāsyāmivoddhūtaṃ veleva salilāśayam || 16 ||
[Analyze grammar]

paśya me sūta vikrāntamindrasyeva mahāmṛdhe |
eṣa sainyāni śatrūṇāṃ vidhamāmi śitaiḥ śaraiḥ || 17 ||
[Analyze grammar]

nihatānāhave paśya padātyaśvarathadvipān |
maccharairagnisaṃkāśairvidehāsūnsahasraśaḥ || 18 ||
[Analyze grammar]

ityevaṃ bruvatastasya sātyakeramitaujasaḥ |
samīpaṃ sainikāste tu śīghramīyuryuyutsavaḥ |
jahyādravasva tiṣṭheti paśya paśyeti vādinaḥ || 19 ||
[Analyze grammar]

tānevaṃ bruvato vīrānsātyakirniśitaiḥ śaraiḥ |
jaghāna triśatānaśvānkuñjarāṃśca catuḥśatān || 20 ||
[Analyze grammar]

sa saṃprahārastumulastasya teṣāṃ ca dhanvinām |
devāsuraraṇaprakhyaḥ prāvartata janakṣayaḥ || 21 ||
[Analyze grammar]

meghajālanibhaṃ sainyaṃ tava putrasya māriṣa |
pratyagṛhṇācchineḥ pautraḥ śarairāśīviṣopamaiḥ || 22 ||
[Analyze grammar]

pracchādyamānaḥ samare śarajālaiḥ sa vīryavān |
asaṃbhramaṃ mahārāja tāvakānavadhīdbahūn || 23 ||
[Analyze grammar]

āścaryaṃ tatra rājendra sumahaddṛṣṭavānaham |
na moghaḥ sāyakaḥ kaścitsātyakerabhavatprabho || 24 ||
[Analyze grammar]

rathanāgāśvakalilaḥ padātyūrmisamākulaḥ |
śaineyavelāmāsādya sthitaḥ sainyamahārṇavaḥ || 25 ||
[Analyze grammar]

saṃbhrāntanaranāgāśvamāvartata muhurmuhuḥ |
tatsainyamiṣubhistena vadhyamānaṃ samantataḥ |
babhrāma tatra tatraiva gāvaḥ śītārditā iva || 26 ||
[Analyze grammar]

padātinaṃ rathaṃ nāgaṃ sādinaṃ turagaṃ tathā |
aviddhaṃ tatra nādrākṣaṃ yuyudhānasya sāyakaiḥ || 27 ||
[Analyze grammar]

na tādṛkkadanaṃ rājankṛtavāṃstatra phalgunaḥ |
yādṛkkṣayamanīkānāmakarotsātyakirnṛpa |
atyarjunaṃ śineḥ pautro yudhyate bharatarṣabha || 28 ||
[Analyze grammar]

tato duryodhano rājā sātvatasya tribhiḥ śaraiḥ |
vivyādha sūtaṃ niśitaiścaturbhiścaturo hayān || 29 ||
[Analyze grammar]

sātyakiṃ ca tribhirviddhvā punarvivyādha so'ṣṭabhiḥ |
duḥśāsanaḥ ṣoḍaśabhirvivyādha śinipuṃgavam || 30 ||
[Analyze grammar]

śakuniḥ pañcaviṃśatyā citrasenaśca pañcabhiḥ |
duḥsahaḥ pañcadaśabhirvivyādhorasi sātyakim || 31 ||
[Analyze grammar]

utsmayanvṛṣṇiśārdūlastathā bāṇaiḥ samāhataḥ |
tānavidhyanmahārāja sarvāneva tribhistribhiḥ || 32 ||
[Analyze grammar]

gāḍhaviddhānarīnkṛtvā mārgaṇaiḥ so'titejanaiḥ |
śaineyaḥ śyenavatsaṃkhye vyacarallaghuvikramaḥ || 33 ||
[Analyze grammar]

saubalasya dhanuśchittvā hastāvāpaṃ nikṛtya ca |
duryodhanaṃ tribhirbāṇairabhyavidhyatstanāntare || 34 ||
[Analyze grammar]

citrasenaṃ śatenaiva daśabhirduḥsahaṃ tathā |
duḥśāsanaṃ ca viṃśatyā vivyādha śinipuṃgavaḥ || 35 ||
[Analyze grammar]

athānyaddhanurādāya syālastava viśāṃ pate |
aṣṭabhiḥ sātyakiṃ viddhvā punarvivyādha pañcabhiḥ || 36 ||
[Analyze grammar]

duḥśāsanaśca daśabhirduḥsahaśca tribhiḥ śaraiḥ |
durmukhaśca dvādaśabhī rājanvivyādha sātyakim || 37 ||
[Analyze grammar]

duryodhanastrisaptatyā viddhvā bhārata mādhavam |
tato'sya niśitairbāṇaistribhirvivyādha sārathim || 38 ||
[Analyze grammar]

tānsarvānsahitāñśūrānyatamānānmahārathān |
pañcabhiḥ pañcabhirbāṇaiḥ punarvivyādha sātyakiḥ || 39 ||
[Analyze grammar]

tataḥ sa rathināṃ śreṣṭhastava putrasya sārathim |
ājaghānāśu bhallena sa hato nyapatadbhuvi || 40 ||
[Analyze grammar]

pātite sārathau tasmiṃstava putrarathaḥ prabho |
vātāyamānaistairaśvairapānīyata saṃgarāt || 41 ||
[Analyze grammar]

tatastava sutā rājansainikāśca viśāṃ pate |
rājño rathamabhiprekṣya vidrutāḥ śataśo'bhavan || 42 ||
[Analyze grammar]

vidrutaṃ tatra tatsainyaṃ dṛṣṭvā bhārata sātyakiḥ |
avākiraccharaistīkṣṇai rukmapuṅkhaiḥ śilāśitaiḥ || 43 ||
[Analyze grammar]

vidrāvya sarvasainyāni tāvakāni samantataḥ |
prayayau sātyakī rājañśvetāśvasya rathaṃ prati || 44 ||
[Analyze grammar]

taṃ śarānādadānaṃ ca rakṣamāṇaṃ ca sārathim |
ātmānaṃ mocayantaṃ ca tāvakāḥ samapūjayan || 45 ||
[Analyze grammar]