Chapter 92

saṃjaya uvāca |
te kirantaḥ śaravrātānsarve yattāḥ prahāriṇaḥ |
tvaramāṇā mahārāja yuyudhānamayodhayan || 1 ||
[Analyze grammar]

taṃ droṇaḥ saptasaptatyā jaghāna niśitaiḥ śaraiḥ |
durmarṣaṇo dvādaśabhirduḥsaho daśabhiḥ śaraiḥ || 2 ||
[Analyze grammar]

vikarṇaścāpi niśitaistriṃśadbhiḥ kaṅkapatribhiḥ |
vivyādha savye pārśve tu stanābhyāmantare tathā || 3 ||
[Analyze grammar]

durmukho daśabhirbāṇaistathā duḥśāsano'ṣṭabhiḥ |
citrasenaśca śaineyaṃ dvābhyāṃ vivyādha māriṣa || 4 ||
[Analyze grammar]

duryodhanaśca mahatā śaravarṣeṇa mādhavam |
apīḍayadraṇe rājañśūrāścānye mahārathāḥ || 5 ||
[Analyze grammar]

sarvataḥ pratividdhastu tava putrairmahārathaiḥ |
tānpratyavidhyacchaineyaḥ pṛthakpṛthagajihmagaiḥ || 6 ||
[Analyze grammar]

bhāradvājaṃ tribhirbāṇairduḥsahaṃ navabhistathā |
vikarṇaṃ pañcaviṃśatyā citrasenaṃ ca saptabhiḥ || 7 ||
[Analyze grammar]

durmarṣaṇaṃ dvādaśabhiścaturbhiśca viviṃśatim |
satyavrataṃ ca navabhirvijayaṃ daśabhiḥ śaraiḥ || 8 ||
[Analyze grammar]

tato rukmāṅgadaṃ cāpaṃ vidhunvāno mahārathaḥ |
abhyayātsātyakistūrṇaṃ putraṃ tava mahāratham || 9 ||
[Analyze grammar]

rājānaṃ sarvalokasya sarvaśastrabhṛtāṃ varam |
śarairabhyāhanadgāḍhaṃ tato yuddhamabhūttayoḥ || 10 ||
[Analyze grammar]

vimuñcantau śarāṃstīkṣṇānsaṃdadhānau ca sāyakān |
adṛśyaṃ samare'nyonyaṃ cakratustau mahārathau || 11 ||
[Analyze grammar]

sātyakiḥ kururājena nirviddho bahvaśobhata |
asravadrudhiraṃ bhūri svarasaṃ candano yathā || 12 ||
[Analyze grammar]

sātvatena ca bāṇaughairnirviddhastanayastava |
śātakumbhamayāpīḍo babhau yūpa ivocchritaḥ || 13 ||
[Analyze grammar]

mādhavastu raṇe rājankururājasya dhanvinaḥ |
dhanuściccheda sahasā kṣurapreṇa hasanniva |
athainaṃ chinnadhanvānaṃ śarairbahubhirācinot || 14 ||
[Analyze grammar]

nirbhinnaśca śaraistena dviṣatā kṣiprakāriṇā |
nāmṛṣyata raṇe rājā śatrorvijayalakṣaṇam || 15 ||
[Analyze grammar]

athānyaddhanurādāya hemapṛṣṭhaṃ durāsadam |
vivyādha sātyakiṃ tūrṇaṃ sāyakānāṃ śatena ha || 16 ||
[Analyze grammar]

so'tividdho balavatā putreṇa tava dhanvinā |
amarṣavaśamāpannastava putramapīḍayat || 17 ||
[Analyze grammar]

pīḍitaṃ nṛpatiṃ dṛṣṭvā tava putrā mahārathāḥ |
sātvataṃ śaravarṣeṇa chādayāmāsurañjasā || 18 ||
[Analyze grammar]

sa chādyamāno bahubhistava putrairmahārathaiḥ |
ekaikaṃ pañcabhirviddhvā punarvivyādha saptabhiḥ || 19 ||
[Analyze grammar]

duryodhanaṃ ca tvarito vivyādhāṣṭabhirāśugaiḥ |
prahasaṃścāsya ciccheda kārmukaṃ ripubhīṣaṇam || 20 ||
[Analyze grammar]

nāgaṃ maṇimayaṃ caiva śarairdhvajamapātayat |
hatvā tu caturo vāhāṃścaturbhirniśitaiḥ śaraiḥ |
sārathiṃ pātayāmāsa kṣurapreṇa mahāyaśāḥ || 21 ||
[Analyze grammar]

etasminnantare caiva kururājaṃ mahāratham |
avākiraccharairhṛṣṭo bahubhirmarmabhedibhiḥ || 22 ||
[Analyze grammar]

sa vadhyamānaḥ samare śaineyasya śarottamaiḥ |
prādravatsahasā rājanputro duryodhanastava |
āplutaśca tato yānaṃ citrasenasya dhanvinaḥ || 23 ||
[Analyze grammar]

hāhābhūtaṃ jagaccāsīddṛṣṭvā rājānamāhave |
grasyamānaṃ sātyakinā khe somamiva rāhuṇā || 24 ||
[Analyze grammar]

taṃ tu śabdaṃ mahacchrutvā kṛtavarmā mahārathaḥ |
abhyayātsahasā tatra yatrāste mādhavaḥ prabhuḥ || 25 ||
[Analyze grammar]

vidhunvāno dhanuḥśreṣṭhaṃ codayaṃścaiva vājinaḥ |
bhartsayansārathiṃ cograṃ yāhi yāhīti satvaraḥ || 26 ||
[Analyze grammar]

tamāpatantaṃ saṃprekṣya vyāditāsyamivāntakam |
yuyudhāno mahārāja yantāramidamabravīt || 27 ||
[Analyze grammar]

kṛtavarmā rathenaiṣa drutamāpatate śarī |
pratyudyāhi rathenainaṃ pravaraṃ sarvadhanvinām || 28 ||
[Analyze grammar]

tataḥ prajavitāśvena vidhivatkalpitena ca |
āsasāda raṇe bhojaṃ pratimānaṃ dhanuṣmatām || 29 ||
[Analyze grammar]

tataḥ paramasaṃkruddhau jvalantāviva pāvakau |
sameyātāṃ naravyāghrau vyāghrāviva tarasvinau || 30 ||
[Analyze grammar]

kṛtavarmā tu śaineyaṃ ṣaḍviṃśatyā samārpayat |
niśitaiḥ sāyakaistīkṣṇairyantāraṃ cāsya saptabhiḥ || 31 ||
[Analyze grammar]

caturaśca hayodārāṃścaturbhiḥ parameṣubhiḥ |
avidhyatsādhudāntānvai saindhavānsātvatasya ha || 32 ||
[Analyze grammar]

rukmadhvajo rukmapṛṣṭhaṃ mahadvisphārya kārmukam |
rukmāṅgadī rukmavarmā rukmapuṅkhānavākirat || 33 ||
[Analyze grammar]

tato'śītiṃ śineḥ pautraḥ sāyakānkṛtavarmaṇe |
prāhiṇottvarayā yukto draṣṭukāmo dhanaṃjayam || 34 ||
[Analyze grammar]

so'tividdho balavatā śatruṇā śatrutāpanaḥ |
samakampata durdharṣaḥ kṣitikampe yathācalaḥ || 35 ||
[Analyze grammar]

triṣaṣṭyā caturo'syāśvānsaptabhiḥ sārathiṃ śaraiḥ |
vivyādha niśitaistūrṇaṃ sātyakiḥ kṛtavarmaṇaḥ || 36 ||
[Analyze grammar]

suvarṇapuṅkhaṃ viśikhaṃ samādhāya sa sātyakiḥ |
vyasṛjattaṃ mahājvālaṃ saṃkruddhamiva pannagam || 37 ||
[Analyze grammar]

so'viśatkṛtavarmāṇaṃ yamadaṇḍopamaḥ śaraḥ |
jāmbūnadavicitraṃ ca varma nirbhidya bhānumat |
abhyagāddharaṇīmugro rudhireṇa samukṣitaḥ || 38 ||
[Analyze grammar]

saṃjātarudhiraścājau sātvateṣubhirarditaḥ |
pracalandhanurutsṛjya nyapatatsyandanottame || 39 ||
[Analyze grammar]

sa siṃhadaṃṣṭro jānubhyāmāpanno'mitavikramaḥ |
śarārditaḥ sātyakinā rathopasthe nararṣabhaḥ || 40 ||
[Analyze grammar]

sahasrabāhoḥ sadṛśamakṣobhyamiva sāgaram |
nivārya kṛtavarmāṇaṃ sātyakiḥ prayayau tataḥ || 41 ||
[Analyze grammar]

khaḍgaśaktidhanuḥkīrṇāṃ gajāśvarathasaṃkulām |
pravartitograrudhirāṃ śataśaḥ kṣatriyarṣabhaiḥ || 42 ||
[Analyze grammar]

prekṣatāṃ sarvasainyānāṃ madhyena śinipuṃgavaḥ |
abhyagādvāhinīṃ bhittvā vṛtrahevāsurīṃ camūm || 43 ||
[Analyze grammar]

samāśvāsya ca hārdikyo gṛhya cānyanmahaddhanuḥ |
tasthau tatraiva balavānvārayanyudhi pāṇḍavān || 44 ||
[Analyze grammar]