Chapter 66

saṃjaya uvāca |
duḥśāsanabalaṃ hatvā savyasācī dhanaṃjayaḥ |
sindhurājaṃ parīpsanvai droṇānīkamupādravat || 1 ||
[Analyze grammar]

sa tu droṇaṃ samāsādya vyūhasya pramukhe sthitam |
kṛtāñjaliridaṃ vākyaṃ kṛṣṇasyānumate'bravīt || 2 ||
[Analyze grammar]

śivena dhyāhi māṃ brahmansvasti caiva vadasva me |
bhavatprasādādicchāmi praveṣṭuṃ durbhidāṃ camūm || 3 ||
[Analyze grammar]

bhavānpitṛsamo mahyaṃ dharmarājasamo'pi ca |
tathā kṛṣṇasamaścaiva satyametadbravīmi te || 4 ||
[Analyze grammar]

aśvatthāmā yathā tāta rakṣaṇīyastavānagha |
tathāhamapi te rakṣyaḥ sadaiva dvijasattama || 5 ||
[Analyze grammar]

tava prasādādicchāmi sindhurājānamāhave |
nihantuṃ dvipadāṃ śreṣṭha pratijñāṃ rakṣa me vibho || 6 ||
[Analyze grammar]

evamuktastadācāryaḥ pratyuvāca smayanniva |
māmajitvā na bībhatso śakyo jetuṃ jayadrathaḥ || 7 ||
[Analyze grammar]

etāvaduktvā taṃ droṇaḥ śaravrātairavākirat |
sarathāśvadhvajaṃ tīkṣṇaiḥ prahasanvai sasārathim || 8 ||
[Analyze grammar]

tato'rjunaḥ śaravrātāndroṇasyāvārya sāyakaiḥ |
droṇamabhyardayadbāṇairghorarūpairmahattaraiḥ || 9 ||
[Analyze grammar]

vivyādha ca raṇe droṇamanumānya viśāṃ pate |
kṣatradharmaṃ samāsthāya navabhiḥ sāyakaiḥ punaḥ || 10 ||
[Analyze grammar]

tasyeṣūniṣubhiśchittvā droṇo vivyādha tāvubhau |
viṣāgnijvalanaprakhyairiṣubhiḥ kṛṣṇapāṇḍavau || 11 ||
[Analyze grammar]

iyeṣa pāṇḍavastasya bāṇaiśchettuṃ śarāsanam |
tasya cintayatastvevaṃ phalgunasya mahātmanaḥ |
droṇaḥ śarairasaṃbhrānto jyāṃ cicchedāśu vīryavān || 12 ||
[Analyze grammar]

vivyādha ca hayānasya dhvajaṃ sārathimeva ca |
arjunaṃ ca śarairvīraṃ smayamāno'bhyavākirat || 13 ||
[Analyze grammar]

etasminnantare pārthaḥ sajjaṃ kṛtvā mahaddhanuḥ |
viśeṣayiṣyannācāryaṃ sarvāstraviduṣāṃ varam |
mumoca ṣaṭśatānbāṇāngṛhītvaikamiva drutam || 14 ||
[Analyze grammar]

punaḥ sapta śatānanyānsahasraṃ cānivartinām |
cikṣepāyutaśaścānyāṃste'ghnandroṇasya tāṃ camūm || 15 ||
[Analyze grammar]

taiḥ samyagastairbalinā kṛtinā citrayodhinā |
manuṣyavājimātaṅgā viddhāḥ peturgatāsavaḥ || 16 ||
[Analyze grammar]

vidrutāśca raṇe petuḥ saṃchinnāyudhajīvitāḥ |
rathino rathamukhyebhyaḥ sahayāḥ śarapīḍitāḥ || 17 ||
[Analyze grammar]

cūrṇitākṣiptadagdhānāṃ vajrānilahutāśanaiḥ |
tulyarūpā gajāḥ peturgiryagrāmbudaveśmanām || 18 ||
[Analyze grammar]

peturaśvasahasrāṇi prahatānyarjuneṣubhiḥ |
haṃsā himavataḥ pṛṣṭhe vāriviprahatā iva || 19 ||
[Analyze grammar]

rathāśvadvipapattyoghāḥ salilaughā ivādbhutāḥ |
yugāntādityaraśmyābhaiḥ pāṇḍavāstaśarairhatāḥ || 20 ||
[Analyze grammar]

taṃ pāṇḍavādityaśarāṃśujālaṃ kurupravīrānyudhi niṣṭapantam |
sa droṇameghaḥ śaravarṣavegaiḥ prācchādayanmegha ivārkaraśmīn || 21 ||
[Analyze grammar]

athātyarthavisṛṣṭena dviṣatāmasubhojinā |
ājaghne vakṣasi droṇo nārācena dhanaṃjayam || 22 ||
[Analyze grammar]

sa vihvalitasarvāṅgaḥ kṣitikampe yathācalaḥ |
dhairyamālambya bībhatsurdroṇaṃ vivyādha patribhiḥ || 23 ||
[Analyze grammar]

droṇastu pañcabhirbāṇairvāsudevamatāḍayat |
arjunaṃ ca trisaptatyā dhvajaṃ cāsya tribhiḥ śaraiḥ || 24 ||
[Analyze grammar]

viśeṣayiṣyañśiṣyaṃ ca droṇo rājanparākramī |
adṛśyamarjunaṃ cakre nimeṣāccharavṛṣṭibhiḥ || 25 ||
[Analyze grammar]

prasaktānpatato'drākṣma bhāradvājasya sāyakān |
maṇḍalīkṛtamevāsya dhanuścādṛśyatādbhutam || 26 ||
[Analyze grammar]

te'bhyayuḥ samare rājanvāsudevadhanaṃjayau |
droṇasṛṣṭāḥ subahavaḥ kaṅkapatraparicchadāḥ || 27 ||
[Analyze grammar]

taddṛṣṭvā tādṛśaṃ yuddhaṃ droṇapāṇḍavayostadā |
vāsudevo mahābuddhiḥ kāryavattāmacintayat || 28 ||
[Analyze grammar]

tato'bravīdvāsudevo dhanaṃjayamidaṃ vacaḥ |
pārtha pārtha mahābāho na naḥ kālātyayo bhavet || 29 ||
[Analyze grammar]

droṇamutsṛjya gacchāmaḥ kṛtyametanmahattaram |
pārthaścāpyabravītkṛṣṇaṃ yatheṣṭamiti keśava || 30 ||
[Analyze grammar]

tataḥ pradakṣiṇaṃ kṛtvā droṇaṃ prāyānmahābhujaḥ |
parivṛttaśca bībhatsuragacchadvisṛjañśarān || 31 ||
[Analyze grammar]

tato'bravītsmayandroṇaḥ kvedaṃ pāṇḍava gamyate |
nanu nāma raṇe śatrumajitvā na nivartase || 32 ||
[Analyze grammar]

arjuna uvāca |
gururbhavānna me śatruḥ śiṣyaḥ putrasamo'smi te |
na cāsti sa pumāṃlloke yastvāṃ yudhi parājayet || 33 ||
[Analyze grammar]

saṃjaya uvāca |
evaṃ bruvāṇo bībhatsurjayadrathavadhotsukaḥ |
tvarāyukto mahābāhustatsainyaṃ samupādravat || 34 ||
[Analyze grammar]

taṃ cakrarakṣau pāñcālyau yudhāmanyūttamaujasau |
anvayātāṃ mahātmānau viśantaṃ tāvakaṃ balam || 35 ||
[Analyze grammar]

tato jayo mahārāja kṛtavarmā ca sāttvataḥ |
kāmbojaśca śrutāyuśca dhanaṃjayamavārayan || 36 ||
[Analyze grammar]

teṣāṃ daśasahasrāṇi rathānāmanuyāyinām |
abhīṣāhāḥ śūrasenāḥ śibayo'tha vasātayaḥ || 37 ||
[Analyze grammar]

mācellakā lalitthāśca kekayā madrakāstathā |
nārāyaṇāśca gopālāḥ kāmbojānāṃ ca ye gaṇāḥ || 38 ||
[Analyze grammar]

karṇena vijitāḥ pūrvaṃ saṃgrāme śūrasaṃmatāḥ |
bhāradvājaṃ puraskṛtya tyaktātmāno'rjunaṃ prati || 39 ||
[Analyze grammar]

putraśokābhisaṃtaptaṃ kruddhaṃ mṛtyumivāntakam |
tyajantaṃ tumule prāṇānsaṃnaddhaṃ citrayodhinam || 40 ||
[Analyze grammar]

gāhamānamanīkāni mātaṅgamiva yūthapam |
maheṣvāsaṃ parākrāntaṃ naravyāghramavārayan || 41 ||
[Analyze grammar]

tataḥ pravavṛte yuddhaṃ tumulaṃ lomaharṣaṇam |
anyonyaṃ vai prārthayatāṃ yodhānāmarjunasya ca || 42 ||
[Analyze grammar]

jayadrathavadhaprepsumāyāntaṃ puruṣarṣabham |
nyavārayanta sahitāḥ kriyā vyādhimivotthitam || 43 ||
[Analyze grammar]