Chapter 64

saṃjaya uvāca |
tato vyūḍheṣvanīkeṣu samutkruṣṭeṣu māriṣa |
tāḍyamānāsu bherīṣu mṛdaṅgeṣu nadatsu ca || 1 ||
[Analyze grammar]

anīkānāṃ ca saṃhrāde vāditrāṇāṃ ca nisvane |
pradhmāpiteṣu śaṅkheṣu saṃnāde lomaharṣaṇe || 2 ||
[Analyze grammar]

abhihārayatsu śanakairbharateṣu yuyutsuṣu |
raudre muhūrte saṃprāpte savyasācī vyadṛśyata || 3 ||
[Analyze grammar]

vaḍānāṃ vāyasānāṃ ca purastātsavyasācinaḥ |
bahulāni sahasrāṇi prākrīḍaṃstatra bhārata || 4 ||
[Analyze grammar]

mṛgāśca ghorasaṃnādāḥ śivāścāśivadarśanāḥ |
dakṣiṇena prayātānāmasmākaṃ prāṇadaṃstathā || 5 ||
[Analyze grammar]

sanirghātā jvalantyaśca peturulkāḥ samantataḥ |
cacāla ca mahī kṛtsnā bhaye ghore samutthite || 6 ||
[Analyze grammar]

viṣvagvātāḥ sanirghātā rūkṣāḥ śarkaravarṣiṇaḥ |
vavurāyāti kaunteye saṃgrāme samupasthite || 7 ||
[Analyze grammar]

nākulistu śatānīko dhṛṣṭadyumnaśca pārṣataḥ |
pāṇḍavānāmanīkāni prājñau tau vyūhatustadā || 8 ||
[Analyze grammar]

tato rathasahasreṇa dviradānāṃ śatena ca |
tribhiraśvasahasraiśca padātīnāṃ śataiḥ śataiḥ || 9 ||
[Analyze grammar]

adhyardhamātre dhanuṣāṃ sahasre tanayastava |
agrataḥ sarvasainyānāṃ sthitvā durmarṣaṇo'bravīt || 10 ||
[Analyze grammar]

adya gāṇḍīvadhanvānaṃ tapantaṃ yuddhadurmadam |
ahamāvārayiṣyāmi veleva makarālayam || 11 ||
[Analyze grammar]

adya paśyantu saṃgrāme dhanaṃjayamamarṣaṇam |
viṣaktaṃ mayi durdharṣamaśmakūṭamivāśmani || 12 ||
[Analyze grammar]

evaṃ bruvanmahārāja mahātmā sa mahāmatiḥ |
maheṣvāsairvṛto rājanmaheṣvāso vyavasthitaḥ || 13 ||
[Analyze grammar]

tato'ntaka iva kruddhaḥ savajra iva vāsavaḥ |
daṇḍapāṇirivāsahyo mṛtyuḥ kālena coditaḥ || 14 ||
[Analyze grammar]

śūlapāṇirivākṣobhyo varuṇaḥ pāśavāniva |
yugāntāgnirivārciṣmānpradhakṣyanvai punaḥ prajāḥ || 15 ||
[Analyze grammar]

krodhāmarṣabaloddhūto nivātakavacāntakaḥ |
jayo jetā sthitaḥ satye pārayiṣyanmahāvratam || 16 ||
[Analyze grammar]

āmuktakavacaḥ khaḍgī jāmbūnadakirīṭabhṛt |
śubhravarmāmbaradharaḥ svaṅgadī cārukuṇḍalī || 17 ||
[Analyze grammar]

rathapravaramāsthāya naro nārāyaṇānugaḥ |
vidhunvangāṇḍivaṃ saṃkhye babhau sūrya ivoditaḥ || 18 ||
[Analyze grammar]

so'grānīkasya mahata iṣupāte dhanaṃjayaḥ |
vyavasthāpya rathaṃ sajjaṃ śaṅkhaṃ dadhmau pratāpavān || 19 ||
[Analyze grammar]

atha kṛṣṇo'pyasaṃbhrāntaḥ pārthena saha māriṣa |
prādhmāpayatpāñcajanyaṃ śaṅkhapravaramojasā || 20 ||
[Analyze grammar]

tayoḥ śaṅkhapraṇādena tava sainye viśāṃ pate |
āsansaṃhṛṣṭaromāṇaḥ kampitā gatacetasaḥ || 21 ||
[Analyze grammar]

yathā trasanti bhūtāni sarvāṇyaśaninisvanāt |
tathā śaṅkhapraṇādena vitresustava sainikāḥ || 22 ||
[Analyze grammar]

prasusruvuḥ śakṛnmūtraṃ vāhanāni ca sarvaśaḥ |
evaṃ savāhanaṃ sarvamāvignamabhavadbalam || 23 ||
[Analyze grammar]

vyaṣīdanta narā rājañśaṅkhaśabdena māriṣa |
visaṃjñāścābhavankecitkecidrājanvitatrasuḥ || 24 ||
[Analyze grammar]

tataḥ kapirmahānādaṃ saha bhūtairdhvajālayaiḥ |
akarodvyāditāsyaśca bhīṣayaṃstava sainikān || 25 ||
[Analyze grammar]

tataḥ śaṅkhāśca bheryaśca mṛdaṅgāścānakaiḥ saha |
punarevābhyahanyanta tava sainyapraharṣaṇāḥ || 26 ||
[Analyze grammar]

nānāvāditrasaṃhrādaiḥ kṣveḍitāsphoṭitākulaiḥ |
siṃhanādaiḥ savāditraiḥ samāhūtairmahārathaiḥ || 27 ||
[Analyze grammar]

tasminsutumule śabde bhīrūṇāṃ bhayavardhane |
atīva hṛṣṭo dāśārhamabravītpākaśāsaniḥ || 28 ||
[Analyze grammar]

codayāśvānhṛṣīkeśa yatra durmarṣaṇaḥ sthitaḥ |
etadbhittvā gajānīkaṃ pravekṣyāmyarivāhinīm || 29 ||
[Analyze grammar]

evamukto mahābāhuḥ keśavaḥ savyasācinā |
acodayaddhayāṃstatra yatra durmarṣaṇaḥ sthitaḥ || 30 ||
[Analyze grammar]

sa saṃprahārastumulaḥ saṃpravṛttaḥ sudāruṇaḥ |
ekasya ca bahūnāṃ ca rathanāganarakṣayaḥ || 31 ||
[Analyze grammar]

tataḥ sāyakavarṣeṇa parjanya iva vṛṣṭimān |
parānavākiratpārthaḥ parvatāniva nīradaḥ || 32 ||
[Analyze grammar]

te cāpi rathinaḥ sarve tvaritāḥ kṛtahastavat |
avākiranbāṇajālaistataḥ kṛṣṇadhanaṃjayau || 33 ||
[Analyze grammar]

tataḥ kruddho mahābāhurvāryamāṇaḥ parairyudhi |
śirāṃsi rathināṃ pārthaḥ kāyebhyo'pāharaccharaiḥ || 34 ||
[Analyze grammar]

udbhrāntanayanairvaktraiḥ saṃdaṣṭoṣṭhapuṭaiḥ śubhaiḥ |
sakuṇḍalaśirastrāṇairvasudhā samakīryata || 35 ||
[Analyze grammar]

puṇḍarīkavanānīva vidhvastāni samantataḥ |
vinikīrṇāni yodhānāṃ vadanāni cakāśire || 36 ||
[Analyze grammar]

tapanīyavicitrāṇi siktāni rudhireṇa ca |
adṛśyanta yathā rājanmeghasaṃghāḥ savidyutaḥ || 37 ||
[Analyze grammar]

śirasāṃ patatāṃ rājañśabdo'bhūtpṛthivītale |
kālena paripakvānāṃ tālānāṃ patatāmiva || 38 ||
[Analyze grammar]

tataḥ kabandhaḥ kaścittu dhanurālambya tiṣṭhati |
kaścitkhaḍgaṃ viniṣkṛṣya bhujenodyamya tiṣṭhati || 39 ||
[Analyze grammar]

nājānanta śirāṃsyurvyāṃ patitāni nararṣabhāḥ |
amṛṣyamāṇāḥ kaunteyaṃ saṃgrāme jayagṛddhinaḥ || 40 ||
[Analyze grammar]

hayānāmuttamāṅgaiśca hastihastaiśca medinī |
bāhubhiśca śirobhiśca vīrāṇāṃ samakīryata || 41 ||
[Analyze grammar]

ayaṃ pārthaḥ kutaḥ pārtha eṣa pārtha iti prabho |
tava sainyeṣu yodhānāṃ pārthabhūtamivābhavat || 42 ||
[Analyze grammar]

anyonyamapi cājaghnurātmānamapi cāpare |
pārthabhūtamamanyanta jagatkālena mohitāḥ || 43 ||
[Analyze grammar]

niṣṭanantaḥ sarudhirā visaṃjñā gāḍhavedanāḥ |
śayānā bahavo vīrāḥ kīrtayantaḥ suhṛjjanam || 44 ||
[Analyze grammar]

sabhiṇḍipālāḥ saprāsāḥ saśaktyṛṣṭiparaśvadhāḥ |
saniryūhāḥ sanistriṃśāḥ saśarāsanatomarāḥ || 45 ||
[Analyze grammar]

sabāṇavarmābharaṇāḥ sagadāḥ sāṅgadā raṇe |
mahābhujagasaṃkāśā bāhavaḥ parighopamāḥ || 46 ||
[Analyze grammar]

udveṣṭanti viceṣṭanti saṃveṣṭanti ca sarvaśaḥ |
vegaṃ kurvanti saṃrabdhā nikṛttāḥ parameṣubhiḥ || 47 ||
[Analyze grammar]

yo yaḥ sma samare pārthaṃ pratisaṃrabhate naraḥ |
tasya tasyāntako bāṇaḥ śarīramupasarpati || 48 ||
[Analyze grammar]

nṛtyato rathamārgeṣu dhanurvyāyacchatastathā |
na kaścittatra pārthasya dadarśāntaramaṇvapi || 49 ||
[Analyze grammar]

yattasya ghaṭamānasya kṣipraṃ vikṣipataḥ śarān |
lāghavātpāṇḍuputrasya vyasmayanta pare janāḥ || 50 ||
[Analyze grammar]

hastinaṃ hastiyantāramaśvamāśvikameva ca |
abhinatphalguno bāṇai rathinaṃ ca sasārathim || 51 ||
[Analyze grammar]

āvartamānamāvṛttaṃ yudhyamānaṃ ca pāṇḍavaḥ |
pramukhe tiṣṭhamānaṃ ca na kaṃcinna nihanti saḥ || 52 ||
[Analyze grammar]

yathodayanvai gagane sūryo hanti mahattamaḥ |
tathārjuno gajānīkamavadhītkaṅkapatribhiḥ || 53 ||
[Analyze grammar]

hastibhiḥ patitairbhinnaistava sainyamadṛśyata |
antakāle yathā bhūmirvinikīrṇairmahīdharaiḥ || 54 ||
[Analyze grammar]

yathā madhyaṃdine sūryo duṣprekṣyaḥ prāṇibhiḥ sadā |
tathā dhanaṃjayaḥ kruddho duṣprekṣyo yudhi śatrubhiḥ || 55 ||
[Analyze grammar]

tattathā tava putrasya sainyaṃ yudhi paraṃtapa |
prabhagnaṃ drutamāvignamatīva śarapīḍitam || 56 ||
[Analyze grammar]

māruteneva mahatā meghānīkaṃ vidhūyatā |
prakālyamānaṃ tatsainyaṃ nāśakatprativīkṣitum || 57 ||
[Analyze grammar]

pratodaiścāpakoṭībhirhuṃkāraiḥ sādhuvāhitaiḥ |
kaśāpārṣṇyabhighātaiśca vāgbhirugrābhireva ca || 58 ||
[Analyze grammar]

codayanto hayāṃstūrṇaṃ palāyante sma tāvakāḥ |
sādino rathinaścaiva pattayaścārjunārditāḥ || 59 ||
[Analyze grammar]

pārṣṇyaṅguṣṭhāṅkuśairnāgāṃścodayantastathāpare |
śaraiḥ saṃmohitāścānye tamevābhimukhā yayau |
tava yodhā hatotsāhā vibhrāntamanasastadā || 60 ||
[Analyze grammar]