Chapter 61

dhṛtarāṣṭra uvāca |
śvobhūte kimakārṣuste duḥkhaśokasamanvitāḥ |
abhimanyau hate tatra ke vāyudhyanta māmakāḥ || 1 ||
[Analyze grammar]

jānantastasya karmāṇi kuravaḥ savyasācinaḥ |
kathaṃ tatkilbiṣaṃ kṛtvā nirbhayā brūhi māmakāḥ || 2 ||
[Analyze grammar]

putraśokābhisaṃtaptaṃ kruddhaṃ mṛtyumivāntakam |
āyāntaṃ puruṣavyāghraṃ kathaṃ dadṛśurāhave || 3 ||
[Analyze grammar]

kapirājadhvajaṃ saṃkhye vidhunvānaṃ mahaddhanuḥ |
dṛṣṭvā putraparidyūnaṃ kimakurvanta māmakāḥ || 4 ||
[Analyze grammar]

kiṃ nu saṃjaya saṃgrāme vṛttaṃ duryodhanaṃ prati |
paridevo mahānatra śruto me nābhinandanam || 5 ||
[Analyze grammar]

babhūvurye manogrāhyāḥ śabdāḥ śrutisukhāvahāḥ |
na śrūyante'dya te sarve saindhavasya niveśane || 6 ||
[Analyze grammar]

stuvatāṃ nādya śrūyante putrāṇāṃ śibire mama |
sūtamāgadhasaṃghānāṃ nartakānāṃ ca sarvaśaḥ || 7 ||
[Analyze grammar]

śabdena nāditābhīkṣṇamabhavadyatra me śrutiḥ |
dīnānāmadya taṃ śabdaṃ na śṛṇomi samīritam || 8 ||
[Analyze grammar]

niveśane satyadhṛteḥ somadattasya saṃjaya |
āsīno'haṃ purā tāta śabdamaśrauṣamuttamam || 9 ||
[Analyze grammar]

tadadya hīnapuṇyo'hamārtasvaranināditam |
niveśanaṃ hatotsāhaṃ putrāṇāṃ mama lakṣaye || 10 ||
[Analyze grammar]

viviṃśaterdurmukhasya citrasenavikarṇayoḥ |
anyeṣāṃ ca sutānāṃ me na tathā śrūyate dhvaniḥ || 11 ||
[Analyze grammar]

brāhmaṇāḥ kṣatriyā vaiśyā yaṃ śiṣyāḥ paryupāsate |
droṇaputraṃ maheṣvāsaṃ putrāṇāṃ me parāyaṇam || 12 ||
[Analyze grammar]

vitaṇḍālāpasaṃlāpairhutayācitavanditaiḥ |
gītaiśca vividhairiṣṭai ramate yo divāniśam || 13 ||
[Analyze grammar]

upāsyamāno bahubhiḥ kurupāṇḍavasātvataiḥ |
sūta tasya gṛhe śabdho nādya drauṇeryathā purā || 14 ||
[Analyze grammar]

droṇaputraṃ maheṣvāsaṃ gāyanā nartakāśca ye |
atyarthamupatiṣṭhanti teṣāṃ na śrūyate dhvaniḥ || 15 ||
[Analyze grammar]

vindānuvindayoḥ sāyaṃ śibire yo mahādhvaniḥ |
śrūyate so'dya na tathā kekayānāṃ ca veśmasu || 16 ||
[Analyze grammar]

nityapramuditānāṃ ca tālagītasvano mahān |
nṛtyatāṃ śrūyate tāta gaṇānāṃ so'dya na dhvaniḥ || 17 ||
[Analyze grammar]

saptatantūnvitanvānā yamupāsanti yājakāḥ |
saumadattiṃ śrutanidhiṃ teṣāṃ na śrūyate dhvaniḥ || 18 ||
[Analyze grammar]

jyāghoṣo brahmaghoṣaśca tomarāsirathadhvaniḥ |
droṇasyāsīdavirato gṛhe tanna śṛṇomyaham || 19 ||
[Analyze grammar]

nānādeśasamutthānāṃ gītānāṃ yo'bhavatsvanaḥ |
vāditranāditānāṃ ca so'dya na śrūyate mahān || 20 ||
[Analyze grammar]

yadā prabhṛtyupaplavyācchāntimicchañjanārdanaḥ |
āgataḥ sarvabhūtānāmanukampārthamacyutaḥ || 21 ||
[Analyze grammar]

tato'hamabruvaṃ sūta mandaṃ duryodhanaṃ tadā |
vāsudevena tīrthena putra saṃśāmya pāṇḍavaiḥ || 22 ||
[Analyze grammar]

kālaprāptamahaṃ manye mā tvaṃ duryodhanātigāḥ |
śame cedyācamānaṃ tvaṃ pratyākhyāsyasi keśavam |
hitārthamabhijalpantaṃ na tathāstyaparājayaḥ || 23 ||
[Analyze grammar]

pratyācaṣṭa sa dāśārhamṛṣabhaṃ sarvadhanvinām |
anuneyāni jalpantamanayānnānvapadyata || 24 ||
[Analyze grammar]

tato duḥśāsanasyaiva karṇasya ca mataṃ dvayoḥ |
anvavartata hitvā māṃ kṛṣṭaḥ kālena durmatiḥ || 25 ||
[Analyze grammar]

na hyahaṃ dyūtamicchāmi viduro na praśaṃsati |
saindhavo necchate dyūtaṃ bhīṣmo na dyūtamicchati || 26 ||
[Analyze grammar]

śalyo bhūriśravāścaiva purumitro jayastathā |
aśvatthāmā kṛpo droṇo dyūtaṃ necchanti saṃjaya || 27 ||
[Analyze grammar]

eteṣāṃ matamājñāya yadi varteta putrakaḥ |
sajñātimitraḥ sasuhṛcciraṃ jīvedanāmayaḥ || 28 ||
[Analyze grammar]

ślakṣṇā madhurasaṃbhāṣā jñātimadhye priyaṃvadāḥ |
kulīnāḥ saṃmatāḥ prājñāḥ sukhaṃ prāpsyanti pāṇḍavāḥ || 29 ||
[Analyze grammar]

dharmāpekṣo naro nityaṃ sarvatra labhate sukham |
pretyabhāve ca kalyāṇaṃ prasādaṃ pratipadyate || 30 ||
[Analyze grammar]

arhantyardhaṃ pṛthivyāste bhoktuṃ sāmarthyasādhanāḥ |
teṣāmapi samudrāntā pitṛpaitāmahī mahī || 31 ||
[Analyze grammar]

niyujyamānāḥ sthāsyanti pāṇḍavā dharmavartmani |
santi no jñātayastāta yeṣāṃ śroṣyanti pāṇḍavāḥ || 32 ||
[Analyze grammar]

śalyasya somadattasya bhīṣmasya ca mahātmanaḥ |
droṇasyātha vikarṇasya bāhlikasya kṛpasya ca || 33 ||
[Analyze grammar]

anyeṣāṃ caiva vṛddhānāṃ bharatānāṃ mahātmanām |
tvadarthaṃ bruvatāṃ tāta kariṣyanti vaco hitam || 34 ||
[Analyze grammar]

kaṃ vā tvaṃ manyase teṣāṃ yastvā brūyādato'nyathā |
kṛṣṇo na dharmaṃ saṃjahyātsarve te ca tvadanvayāḥ || 35 ||
[Analyze grammar]

mayāpi coktāste vīrā vacanaṃ dharmasaṃhitam |
nānyathā prakariṣyanti dharmātmāno hi pāṇḍavāḥ || 36 ||
[Analyze grammar]

ityahaṃ vilapansūta bahuśaḥ putramuktavān |
na ca me śrutavānmūḍho manye kālasya paryayam || 37 ||
[Analyze grammar]

vṛkodarārjunau yatra vṛṣṇivīraśca sātyakiḥ |
uttamaujāśca pāñcālyo yudhāmanyuśca durjayaḥ || 38 ||
[Analyze grammar]

dhṛṣṭadyumnaśca durdharṣaḥ śikhaṇḍī cāparājitaḥ |
aśmakāḥ kekayāścaiva kṣatradharmā ca saumakiḥ || 39 ||
[Analyze grammar]

caidyaśca cekitānaśca putraḥ kāśyasya cābhibhuḥ |
draupadeyā virāṭaśca drupadaśca mahārathaḥ |
yamau ca puruṣavyāghrau mantrī ca madhusūdanaḥ || 40 ||
[Analyze grammar]

ka etāñjātu yudhyeta loke'sminvai jijīviṣuḥ |
divyamastraṃ vikurvāṇānsaṃhareyurariṃdamāḥ || 41 ||
[Analyze grammar]

anyo duryodhanātkarṇācchakuneścāpi saubalāt |
duḥśāsanacaturthānāṃ nānyaṃ paśyāmi pañcamam || 42 ||
[Analyze grammar]

yeṣāmabhīśuhastaḥ syādviṣvakseno rathe sthitaḥ |
saṃnaddhaścārjuno yoddhā teṣāṃ nāsti parājayaḥ || 43 ||
[Analyze grammar]

teṣāṃ mama vilāpānāṃ na hi duryodhanaḥ smaret |
hatau hi puruṣavyāghrau bhīṣmadroṇau tvamāttha me || 44 ||
[Analyze grammar]

teṣāṃ viduravākyānāmuktānāṃ dīrghadarśinām |
dṛṣṭvemāṃ phalanirvṛttiṃ manye śocanti putrakāḥ || 45 ||
[Analyze grammar]

himātyaye yathā kakṣaṃ śuṣkaṃ vāterito mahān |
agnirdahettathā senāṃ māmikāṃ sa dhanaṃjayaḥ || 46 ||
[Analyze grammar]

ācakṣva taddhi naḥ sarvaṃ kuśalo hyasi saṃjaya |
yadupāyāttu sāyāhne kṛtvā pārthasya kilbiṣam |
abhimanyau hate tāta kathamāsīnmano hi vaḥ || 47 ||
[Analyze grammar]

na jātu tasya karmāṇi yudhi gāṇḍīvadhanvanaḥ |
apakṛtvā mahattāta soḍhuṃ śakṣyanti māmakāḥ || 48 ||
[Analyze grammar]

kiṃ nu duryodhanaḥ kṛtyaṃ karṇaḥ kṛtyaṃ kimabravīt |
duḥśāsanaḥ saubalaśca teṣāmevaṃ gate api |
sarveṣāṃ samavetānāṃ putrāṇāṃ mama saṃjaya || 49 ||
[Analyze grammar]

yadvṛttaṃ tāta saṃgrāme mandasyāpanayairbhṛśam |
lobhānugatadurbuddheḥ krodhena vikṛtātmanaḥ || 50 ||
[Analyze grammar]

rājyakāmasya mūḍhasya rāgopahatacetasaḥ |
durnītaṃ vā sunītaṃ vā tanmamācakṣva saṃjaya || 51 ||
[Analyze grammar]