Chapter 22

dhṛtarāṣṭra uvāca |
sarveṣāmeva me brūhi rathacihnāni saṃjaya |
ye droṇamabhyavartanta kruddhā bhīmapurogamāḥ || 1 ||
[Analyze grammar]

saṃjaya uvāca |
ṛśyavarṇairhayairdṛṣṭvā vyāyacchantaṃ vṛkodaram |
rajatāśvastataḥ śūraḥ śaineyaḥ saṃnyavartata || 2 ||
[Analyze grammar]

darśanīyāstu kāmbojāḥ śukapatraparicchadāḥ |
vahanto nakulaṃ śīghraṃ tāvakānabhidudruvuḥ || 3 ||
[Analyze grammar]

kṛṣṇāstu meghasaṃkāśāḥ sahadevamudāyudham |
bhīmavegā naravyāghramavahanvātaraṃhasaḥ || 4 ||
[Analyze grammar]

hemottamapraticchannairhayairvātasamairjave |
abhyavartanta sainyāni sarvāṇyeva yudhiṣṭhiram || 5 ||
[Analyze grammar]

rājñastvanantaraṃ rājā pāñcālyo drupado'bhavat |
jātarūpamayacchatraḥ sarvaiḥ svairabhirakṣitaḥ || 6 ||
[Analyze grammar]

lalāmairharibhiryuktaiḥ sarvaśabdakṣamairyudhi |
rājñāṃ madhye maheṣvāsaḥ śāntabhīrabhyavartata || 7 ||
[Analyze grammar]

taṃ virāṭo'nvayātpaścātsaha śūrairmahārathaiḥ |
kekayāśca śikhaṇḍī ca dhṛṣṭaketustathaiva ca |
svaiḥ svaiḥ sainyaiḥ parivṛtā matsyarājānamanvayuḥ || 8 ||
[Analyze grammar]

te tu pāṭalapuṣpāṇāṃ samavarṇā hayottamāḥ |
vahamānā vyarājanta matsyasyāmitraghātinaḥ || 9 ||
[Analyze grammar]

hāridrasamavarṇāstu javanā hemamālinaḥ |
putraṃ virāṭarājasya satvarāḥ samudāvahan || 10 ||
[Analyze grammar]

indragopakavarṇaistu bhrātaraḥ pañca kekayāḥ |
jātarūpasamābhāsaḥ sarve lohitakadhvajāḥ || 11 ||
[Analyze grammar]

te hemamālinaḥ śūrāḥ sarve yuddhaviśāradāḥ |
varṣanta iva jīmūtāḥ pratyadṛśyanta daṃśitāḥ || 12 ||
[Analyze grammar]

āmapātranibhākārāḥ pāñcālyamamitaujasam |
dāntāstāmrāruṇā yuktāḥ śikhaṇḍinamudāvahan || 13 ||
[Analyze grammar]

tathā dvādaśasāhasrāḥ pāñcālānāṃ mahārathāḥ |
teṣāṃ tu ṣaṭsahasrāṇi ye śikhaṇḍinamanvayuḥ || 14 ||
[Analyze grammar]

putraṃ tu śiśupālasya narasiṃhasya māriṣa |
ākrīḍanto vahanti sma sāraṅgaśabalā hayāḥ || 15 ||
[Analyze grammar]

dhṛṣṭaketuśca cedīnāmṛṣabho'tibaloditaḥ |
kāmbojaiḥ śabalairaśvairabhyavartata durjayaḥ || 16 ||
[Analyze grammar]

bṛhatkṣatraṃ tu kaikeyaṃ sukumāraṃ hayottamāḥ |
palāladhūmavarṇābhāḥ saindhavāḥ śīghramāvahan || 17 ||
[Analyze grammar]

mallikākṣāḥ padmavarṇā bāhlijātāḥ svalaṃkṛtāḥ |
śūraṃ śikhaṇḍinaḥ putraṃ kṣatradevamudāvahan || 18 ||
[Analyze grammar]

yuvānamavahanyuddhe krauñcavarṇā hayottamāḥ |
kāśyasyābhibhuvaḥ putraṃ sukumāraṃ mahāratham || 19 ||
[Analyze grammar]

śvetāstu prativindhyaṃ taṃ kṛṣṇagrīvā manojavāḥ |
yantuḥ preṣyakarā rājanrājaputramudāvahan || 20 ||
[Analyze grammar]

sutasomaṃ tu yaṃ dhaumyātpārthaḥ putramayācata |
māṣapuṣpasavarṇāstamavahanvājino raṇe || 21 ||
[Analyze grammar]

sahasrasomapratimā babhūvuḥ pure kurūṇāmudayendunāmni |
tasmiñjātaḥ somasaṃkrandamadhye yasmāttasmātsutasomo'bhavatsaḥ || 22 ||
[Analyze grammar]

nākuliṃ tu śatānīkaṃ śālapuṣpanibhā hayāḥ |
ādityataruṇaprakhyāḥ ślāghanīyamudāvahan || 23 ||
[Analyze grammar]

kāñcanapratimairyoktrairmayūragrīvasaṃnibhāḥ |
draupadeyaṃ naravyāghraṃ śrutakarmāṇamāvahan || 24 ||
[Analyze grammar]

śrutakīrtiṃ śrutanidhiṃ draupadeyaṃ hayottamāḥ |
ūhuḥ pārthasamaṃ yuddhe cāṣapatranibhā hayāḥ || 25 ||
[Analyze grammar]

yamāhuradhyardhaguṇaṃ kṛṣṇātpārthācca saṃyuge |
abhimanyuṃ piśaṅgāstaṃ kumāramavahanraṇe || 26 ||
[Analyze grammar]

ekastu dhārtarāṣṭrebhyaḥ pāṇḍavānyaḥ samāśritaḥ |
taṃ bṛhanto mahākāyā yuyutsumavahanraṇe || 27 ||
[Analyze grammar]

palālakāṇḍavarṇāstu vārdhakṣemiṃ tarasvinam |
ūhuḥ sutumule yuddhe hayā hṛṣṭāḥ svalaṃkṛtāḥ || 28 ||
[Analyze grammar]

kumāraṃ śitipādāstu rukmapatrairuraśchadaiḥ |
saucittimavahanyuddhe yantuḥ preṣyakarā hayāḥ || 29 ||
[Analyze grammar]

rukmapṛṣṭhāvakīrṇāstu kauśeyasadṛśā hayāḥ |
suvarṇamālinaḥ kṣāntāḥ śreṇimantamudāvahan || 30 ||
[Analyze grammar]

rukmamālādharāḥ śūrā hemavarṇāḥ svalaṃkṛtāḥ |
kāśirājaṃ hayaśreṣṭhāḥ ślāghanīyamudāvahan || 31 ||
[Analyze grammar]

astrāṇāṃ ca dhanurvede brāhme vede ca pāragam |
taṃ satyadhṛtimāyāntamaruṇāḥ samudāvahan || 32 ||
[Analyze grammar]

yaḥ sa pāñcālasenānīrdroṇamaṃśamakalpayat |
pārāvatasavarṇāśvā dhṛṣṭadyumnamudāvahan || 33 ||
[Analyze grammar]

tamanvayātsatyadhṛtiḥ saucittiryuddhadurmadaḥ |
śreṇimānvasudānaśca putraḥ kāśyasya cābhibho || 34 ||
[Analyze grammar]

yuktaiḥ paramakāmbojairjavanairhemamālibhiḥ |
bhīṣayanto dviṣatsainyaṃ yamavaiśravaṇopamāḥ || 35 ||
[Analyze grammar]

prabhadrakāstu pāñcālāḥ ṣaṭsahasrāṇyudāyudhāḥ |
nānāvarṇairhayaśreṣṭhairhemacitrarathadhvajāḥ || 36 ||
[Analyze grammar]

śaravrātairvidhunvantaḥ śatrūnvitatakārmukāḥ |
samānamṛtyavo bhūtvā dhṛṣṭadyumnaṃ samanvayuḥ || 37 ||
[Analyze grammar]

babhrukauśeyavarṇāstu suvarṇavaramālinaḥ |
ūhuraglānamanasaścekitānaṃ hayottamāḥ || 38 ||
[Analyze grammar]

indrāyudhasavarṇaistu kuntibhojo hayottamaiḥ |
āyātsuvaśyaiḥ purujinmātulaḥ savyasācinaḥ || 39 ||
[Analyze grammar]

antarikṣasavarṇāstu tārakācitritā iva |
rājānaṃ rocamānaṃ te hayāḥ saṃkhye samāvahan || 40 ||
[Analyze grammar]

karburāḥ śitipādāstu svarṇajālaparicchadāḥ |
jārāsaṃdhiṃ hayaśreṣṭhāḥ sahadevamudāvahan || 41 ||
[Analyze grammar]

ye tu puṣkaranālasya samavarṇā hayottamāḥ |
jave śyenasamāścitrāḥ sudāmānamudāvahan || 42 ||
[Analyze grammar]

śaśalohitavarṇāstu pāṇḍurodgatarājayaḥ |
pāñcālyaṃ gopateḥ putraṃ siṃhasenamudāvahan || 43 ||
[Analyze grammar]

pāñcālānāṃ naravyāghro yaḥ khyāto janamejayaḥ |
tasya sarṣapapuṣpāṇāṃ tulyavarṇā hayottamāḥ || 44 ||
[Analyze grammar]

māṣavarṇāstu javanā bṛhanto hemamālinaḥ |
dadhipṛṣṭhāścandramukhāḥ pāñcālyamavahandrutam || 45 ||
[Analyze grammar]

śūrāśca bhadrakāścaiva śarakāṇḍanibhā hayāḥ |
padmakiñjalkavarṇābhā daṇḍadhāramudāvahan || 46 ||
[Analyze grammar]

bibhrato hemamālāśca cakravākodarā hayāḥ |
kosalādhipateḥ putraṃ sukṣatraṃ vājino'vahan || 47 ||
[Analyze grammar]

śabalāstu bṛhanto'śvā dāntā jāmbūnadasrajaḥ |
yuddhe satyadhṛtiṃ kṣaimimavahanprāṃśavaḥ śubhāḥ || 48 ||
[Analyze grammar]

ekavarṇena sarveṇa dhvajena kavacena ca |
aśvaiśca dhanuṣā caiva śuklaiḥ śuklo nyavartata || 49 ||
[Analyze grammar]

samudrasenaputraṃ tu sāmudrā rudratejasam |
aśvāḥ śaśāṅkasadṛśāścandradevamudāvahan || 50 ||
[Analyze grammar]

nīlotpalasavarṇāstu tapanīyavibhūṣitāḥ |
śaibyaṃ citrarathaṃ yuddhe citramālyāvahanhayāḥ || 51 ||
[Analyze grammar]

kalāyapuṣpavarṇāstu śvetalohitarājayaḥ |
rathasenaṃ hayaśreṣṭhāḥ samūhuryuddhadurmadam || 52 ||
[Analyze grammar]

yaṃ tu sarvamanuṣyebhyaḥ prāhuḥ śūrataraṃ nṛpam |
taṃ paṭaccarahantāraṃ śukavarṇāvahanhayāḥ || 53 ||
[Analyze grammar]

citrāyudhaṃ citramālyaṃ citravarmāyudhadhvajam |
ūhuḥ kiṃśukapuṣpāṇāṃ tulyavarṇā hayottamāḥ || 54 ||
[Analyze grammar]

ekavarṇena sarveṇa dhvajena kavacena ca |
dhanuṣā rathavāhaiśca nīlairnīlo'bhyavartata || 55 ||
[Analyze grammar]

nānārūpai ratnacitrairvarūthadhvajakārmukaiḥ |
vājidhvajapatākābhiścitraiścitro'bhyavartata || 56 ||
[Analyze grammar]

ye tu puṣkarapatrasya tulyavarṇā hayottamāḥ |
te rocamānasya sutaṃ hemavarṇamudāvahan || 57 ||
[Analyze grammar]

yodhāśca bhadrakārāśca śaradaṇḍānudaṇḍajāḥ |
śvetāṇḍāḥ kukkuṭāṇḍābhā daṇḍaketumudāvahan || 58 ||
[Analyze grammar]

āṭarūṣakapuṣpābhā hayāḥ pāṇḍyānuyāyinām |
avahanrathamukhyānāmayutāni caturdaśa || 59 ||
[Analyze grammar]

nānārūpeṇa varṇena nānākṛtimukhā hayāḥ |
rathacakradhvajaṃ vīraṃ ghaṭotkacamudāvahan || 60 ||
[Analyze grammar]

suvarṇavarṇā dharmajñamanīkasthaṃ yudhiṣṭhiram |
rājaśreṣṭhaṃ hayaśreṣṭhāḥ sarvataḥ pṛṣṭhato'nvayuḥ |
varṇaiścoccāvacairdivyaiḥ sadaśvānāṃ prabhadrakāḥ || 61 ||
[Analyze grammar]

te yattā bhīmasenena sahitāḥ kāñcanadhvajāḥ |
pratyadṛśyanta rājendra sendrā iva divaukasaḥ || 62 ||
[Analyze grammar]

atyarocata tānsarvāndhṛṣṭadyumnaḥ samāgatān |
sarvāṇyapi ca sainyāni bhāradvājo'tyarocata || 63 ||
[Analyze grammar]