Chapter 20

saṃjaya uvāca |
tato yudhiṣṭhiro droṇaṃ dṛṣṭvāntikamupāgatam |
mahatā śaravarṣeṇa pratyagṛhṇādabhītavat || 1 ||
[Analyze grammar]

tato halahalāśabda āsīdyaudhiṣṭhire bale |
jighṛkṣati mahāsiṃhe gajānāmiva yūthapam || 2 ||
[Analyze grammar]

dṛṣṭvā droṇaṃ tataḥ śūraḥ satyajitsatyavikramaḥ |
yudhiṣṭhiraṃ pariprepsumācāryaṃ samupādravat || 3 ||
[Analyze grammar]

tata ācāryapāñcālyau yuyudhāte parasparam |
vikṣobhayantau tatsainyamindravairocanāviva || 4 ||
[Analyze grammar]

tataḥ satyajitaṃ tīkṣṇairdaśabhirmarmabhedibhiḥ |
avidhyacchīghramācāryaśchittvāsya saśaraṃ dhanuḥ || 5 ||
[Analyze grammar]

sa śīghrataramādāya dhanuranyatpratāpavān |
droṇaṃ so'bhijaghānāśu viṃśadbhiḥ kaṅkapatribhiḥ || 6 ||
[Analyze grammar]

jñātvā satyajitā droṇaṃ grasyamānamivāhave |
vṛkaḥ śaraśataistīkṣṇaiḥ pāñcālyo droṇamardayat || 7 ||
[Analyze grammar]

saṃchādyamānaṃ samare droṇaṃ dṛṣṭvā mahāratham |
cukruśuḥ pāṇḍavā rājanvastrāṇi dudhuvuśca ha || 8 ||
[Analyze grammar]

vṛkastu paramakruddho droṇaṃ ṣaṣṭyā stanāntare |
vivyādha balavānrājaṃstadadbhutamivābhavat || 9 ||
[Analyze grammar]

droṇastu śaravarṣeṇa chādyamāno mahārathaḥ |
vegaṃ cakre mahāvegaḥ krodhādudvṛtya cakṣuṣī || 10 ||
[Analyze grammar]

tataḥ satyajitaścāpaṃ chittvā droṇo vṛkasya ca |
ṣaḍbhiḥ sasūtaṃ sahayaṃ śarairdroṇo'vadhīdvṛkam || 11 ||
[Analyze grammar]

athānyaddhanurādāya satyajidvegavattaram |
sāśvaṃ sasūtaṃ viśikhairdroṇaṃ vivyādha sadhvajam || 12 ||
[Analyze grammar]

sa tanna mamṛṣe droṇaḥ pāñcālyenārdanaṃ mṛdhe |
tatastasya vināśāya satvaraṃ vyasṛjaccharān || 13 ||
[Analyze grammar]

hayāndhvajaṃ dhanurmuṣṭimubhau ca pārṣṇisārathī |
avākirattato droṇaḥ śaravarṣaiḥ sahasraśaḥ || 14 ||
[Analyze grammar]

tathā saṃchidyamāneṣu kārmukeṣu punaḥ punaḥ |
pāñcālyaḥ paramāstrajñaḥ śoṇāśvaṃ samayodhayat || 15 ||
[Analyze grammar]

sa satyajitamālakṣya tathodīrṇaṃ mahāhave |
ardhacandreṇa ciccheda śirastasya mahātmanaḥ || 16 ||
[Analyze grammar]

tasminhate mahāmātre pāñcālānāṃ ratharṣabhe |
apāyājjavanairaśvairdroṇāttrasto yudhiṣṭhiraḥ || 17 ||
[Analyze grammar]

pāñcālāḥ kekayā matsyāścedikārūṣakosalāḥ |
yudhiṣṭhiramudīkṣanto hṛṣṭā droṇamupādravan || 18 ||
[Analyze grammar]

tato yudhiṣṭhiraprepsurācāryaḥ śatrupūgahā |
vyadhamattānyanīkāni tūlarāśimivānilaḥ || 19 ||
[Analyze grammar]

nirdahantamanīkāni tāni tāni punaḥ punaḥ |
droṇaṃ matsyādavarajaḥ śatānīko'bhyavartata || 20 ||
[Analyze grammar]

sūryaraśmipratīkāśaiḥ karmāraparimārjitaiḥ |
ṣaḍbhiḥ sasūtaṃ sahayaṃ droṇaṃ viddhvānadadbhṛśam || 21 ||
[Analyze grammar]

tasya nānadato droṇaḥ śiraḥ kāyātsakuṇḍalam |
kṣureṇāpāharattūrṇaṃ tato matsyāḥ pradudruvuḥ || 22 ||
[Analyze grammar]

matsyāñjitvājayaccedīnkārūṣānkekayānapi |
pāñcālānsṛñjayānpāṇḍūnbhāradvājaḥ punaḥ punaḥ || 23 ||
[Analyze grammar]

taṃ dahantamanīkāni kruddhamagniṃ yathā vanam |
dṛṣṭvā rukmarathaṃ kruddhaṃ samakampanta sṛñjayāḥ || 24 ||
[Analyze grammar]

uttamaṃ hyādadhānasya dhanurasyāśukāriṇaḥ |
jyāghoṣo nighnato'mitrāndikṣu sarvāsu śuśruve || 25 ||
[Analyze grammar]

nāgānaśvānpadātīṃśca rathino gajasādinaḥ |
raudrā hastavatā muktāḥ pramathnanti sma sāyakāḥ || 26 ||
[Analyze grammar]

nānadyamānaḥ parjanyo miśravāto himātyaye |
aśmavarṣamivāvarṣatpareṣāṃ bhayamādadhat || 27 ||
[Analyze grammar]

sarvā diśaḥ samacaratsainyaṃ vikṣobhayanniva |
balī śūro maheṣvāso mitrāṇāmabhayaṃkaraḥ || 28 ||
[Analyze grammar]

tasya vidyudivābhreṣu cāpaṃ hemapariṣkṛtam |
dikṣu sarvāsvapaśyāma droṇasyāmitatejasaḥ || 29 ||
[Analyze grammar]

droṇastu pāṇḍavānīke cakāra kadanaṃ mahat |
yathā daityagaṇe viṣṇuḥ surāsuranamaskṛtaḥ || 30 ||
[Analyze grammar]

sa śūraḥ satyavākprājño balavānsatyavikramaḥ |
mahānubhāvaḥ kālānte raudrīṃ bhīruvibhīṣaṇām || 31 ||
[Analyze grammar]

kavacormidhvajāvartāṃ martyakūlāpahāriṇīm |
gajavājimahāgrāhāmasimīnāṃ durāsadām || 32 ||
[Analyze grammar]

vīrāsthiśarkarāṃ raudrāṃ bherīmurajakacchapām |
carmavarmaplavāṃ ghorāṃ keśaśaivalaśāḍvalām || 33 ||
[Analyze grammar]

śaraughiṇīṃ dhanuḥsrotāṃ bāhupannagasaṃkulām |
raṇabhūmivahāṃ ghorāṃ kurusṛñjayavāhinīm |
manuṣyaśīrṣapāṣāṇāṃ śaktimīnāṃ gadoḍupām || 34 ||
[Analyze grammar]

uṣṇīṣaphenavasanāṃ niṣkīrṇāntrasarīsṛpām |
vīrāpahāriṇīmugrāṃ māṃsaśoṇitakardamām || 35 ||
[Analyze grammar]

hastigrāhāṃ ketuvṛkṣāṃ kṣatriyāṇāṃ nimajjanīm |
krūrāṃ śarīrasaṃghāṭāṃ sādinakrāṃ duratyayām |
droṇaḥ prāvartayattatra nadīmantakagāminīm || 36 ||
[Analyze grammar]

kravyādagaṇasaṃghuṣṭāṃ śvaśṛgālagaṇāyutām |
niṣevitāṃ mahāraudraiḥ piśitāśaiḥ samantataḥ || 37 ||
[Analyze grammar]

taṃ dahantamanīkāni rathodāraṃ kṛtāntavat |
sarvato'bhyadravandroṇaṃ kuntīputrapurogamāḥ || 38 ||
[Analyze grammar]

tāṃstu śūrānmaheṣvāsāṃstāvakābhyudyatāyudhāḥ |
rājāno rājaputrāśca samantātparyavārayan || 39 ||
[Analyze grammar]

tato droṇaḥ satyasaṃdhaḥ prabhinna iva kuñjaraḥ |
abhyatītya rathānīkaṃ dṛḍhasenamapātayat || 40 ||
[Analyze grammar]

tato rājānamāsādya praharantamabhītavat |
avidhyannavabhiḥ kṣemaṃ sa hataḥ prāpatadrathāt || 41 ||
[Analyze grammar]

sa madhyaṃ prāpya sainyānāṃ sarvāḥ pravicarandiśaḥ |
trātā hyabhavadanyeṣāṃ na trātavyaḥ kathaṃcana || 42 ||
[Analyze grammar]

śikhaṇḍinaṃ dvādaśabhirviṃśatyā cottamaujasam |
vasudānaṃ ca bhallena preṣayadyamasādanam || 43 ||
[Analyze grammar]

aśītyā kṣatravarmāṇaṃ ṣaḍviṃśatyā sudakṣiṇam |
kṣatradevaṃ tu bhallena rathanīḍādapāharat || 44 ||
[Analyze grammar]

yudhāmanyuṃ catuḥṣaṣṭyā triṃśatā caiva sātyakim |
viddhvā rukmarathastūrṇaṃ yudhiṣṭhiramupādravat || 45 ||
[Analyze grammar]

tato yudhiṣṭhiraḥ kṣipraṃ kitavo rājasattamaḥ |
apāyājjavanairaśvaiḥ pāñcālyo droṇamabhyayāt || 46 ||
[Analyze grammar]

taṃ droṇaḥ sadhanuṣkaṃ tu sāśvayantāramakṣiṇot |
sa hataḥ prāpatadbhūmau rathājjyotirivāmbarāt || 47 ||
[Analyze grammar]

tasminhate rājaputre pāñcālānāṃ yaśaskare |
hata droṇaṃ hata droṇamityāsīttumulaṃ mahat || 48 ||
[Analyze grammar]

tāṃstathā bhṛśasaṃkruddhānpāñcālānmatsyakekayān |
sṛñjayānpāṇḍavāṃścaiva droṇo vyakṣobhayadbalī || 49 ||
[Analyze grammar]

sātyakiṃ cekitānaṃ ca dhṛṣṭadyumnaśikhaṇḍinau |
vārdhakṣemiṃ citrasenaṃ senābinduṃ suvarcasam || 50 ||
[Analyze grammar]

etāṃścānyāṃśca subahūnnānājanapadeśvarān |
sarvāndroṇo'jayadyuddhe kurubhiḥ parivāritaḥ || 51 ||
[Analyze grammar]

tāvakāstu mahārāja jayaṃ labdhvā mahāhave |
pāṇḍaveyānraṇe jaghnurdravamāṇānsamantataḥ || 52 ||
[Analyze grammar]

te dānavā ivendreṇa vadhyamānā mahātmanā |
pāñcālāḥ kekayā matsyāḥ samakampanta bhārata || 53 ||
[Analyze grammar]