Lakshminarayana Samhita [sanskrit]

by Shwetayan Vyas | 1,169,834 words | ISBN-10: 8170801818 | ISBN-13: 9788170801818

The Lakshminarayana Samhita Chapter 82 (Sanskrit text), including grammatical analysis, glossary and relevant print editions. The Lakshmi-narayana-samhita is an encyclopaedic work devoted to Narayana although it deals with various deities. The work is written in Puranic style and divided into four books according to the four Yugas. In total, the work consists of roughly 120,000 metrical verses.

śrībadrīpriyovāca |
nāgavikramasainyānāṃ kativājigajādayaḥ |
kīdṛśaṃ ca tato yuddhaṃ kṛṣṇasya vada me prabho || 1 ||
[Analyze grammar]

śrīnaranārāyaṇa uvāca |
śṛṇu badrīpriye devi sahasrāṇi tu viṃśatiḥ |
nāgavikramasainyasyā''san yoddhārastu mānavāḥ || 2 ||
[Analyze grammar]

sahasraṃ hastināṃ tatra pañcasāhasravājinaḥ |
uṣṭrāstrīṇi sahasrāṇi vimānāni tu viṃśatiḥ || 3 ||
[Analyze grammar]

aśvatarāstathā pañcasahasrāṇyabhavan mṛdhe |
sarve kṛṣṇapratāpāste kṛṣṇadattabalādhikāḥ || 4 ||
[Analyze grammar]

mahārathinaḥ prabalāḥ sarvarathina ityapi |
vajradehāḥ kṛṣṇanārāyaṇā''veśāttadā'bhavan || 5 ||
[Analyze grammar]

sainyayorubhayostatra sākṣān gocaratā'bhavat |
anādiśrīkṛṣṇanārāyaṇasya śāśvataṃ ratham || 6 ||
[Analyze grammar]

raṇāgre vīkṣya sahasā nandibhillaṃ tu tadguruḥ |
agnirātaṛṣiḥ sarvaśastrāstrakuśalo'pi san || 7 ||
[Analyze grammar]

sandihya vijaye śiṣyaṃ samuvāca hitāvaham |
sarvasṛṣṭimayaṃ kṛṣṇaṃ nandi'bhilla vilokaya || 8 ||
[Analyze grammar]

yoddhukāmaḥ puraścāste pratisainye janārdanaḥ |
yatsaṃkalpe jagat sarvaṃ jāyate līyate'pi ca || 9 ||
[Analyze grammar]

so'yaṃ śastradharaḥ kṛṣṇaḥ sainyāgre tvabhitiṣṭhati |
tasya pārśve jayaścāste tathā''ste vijayo'pi ca || 10 ||
[Analyze grammar]

mā vṛthā tvaṃ prayāsaṃ vai vidhehi vijayecchayā |
nārāyaṇasya jetā na na taṃ jeṣyati kaścana || 11 ||
[Analyze grammar]

rājan rājyaṃ vipulaṃ te kathaṃ kṣipasi bhasmani |
bhuṃkṣva bhogān vihāyaiva matsaraṃ yuddhabhūbhṛtā || 12 ||
[Analyze grammar]

tvamāsse nāgarājyādvai śreṣṭho daśaguṇo'dhikaḥ |
mahatāṃ jāyate hānirnīcaiḥ saha tu dharṣaṇam || 13 ||
[Analyze grammar]

nīcasya vijaye kīrtiḥ śatadhā jāyate drutam |
mahatāṃ vijaye saiva yathā sā'sti tathaiva sā || 14 ||
[Analyze grammar]

svarūpasya na mānasya hāniḥ parājaye'dhikā |
vicāryetthaṃ vihāyaiva yuddhaṃ bhuṃkṣva kṣitiṃ nijām || 15 ||
[Analyze grammar]

na bhāti me vijayo'dya tavā'paśakunādibhiḥ |
madvākyaṃ kuru rājendra mā juhudhyanale prajāḥ || 16 ||
[Analyze grammar]

sukhaṃ rājyaṃ sampadaśca mā juhudhyanale vidan |
gurorvākyaṃ sukhadaṃ vai laṃghane tasya cāpadaḥ || 17 ||
[Analyze grammar]

ehyāgaccha praṇamyainaṃ śrīkṛṣṇaṃ bhaktibhāvataḥ |
āśīrvādān śubhān prāpya kṛtakṛtyaḥ sukhī bhava || 18 ||
[Analyze grammar]

gurvagre mānahānirna kṛṣṇāgre sutarāṃ tu na |
sarvanāśābhisamprāptau tyaktvā kiñcit prarakṣayet || 19 ||
[Analyze grammar]

yuvāṃ śiṣyau samau tasya vinītau bhavatāṃ yadi |
dvayoḥ śreyovidhātā syāt kṛṣṇo dayāparaḥ prabhuḥ || 20 ||
[Analyze grammar]

mānaṃ rakṣyaṃ samānāgre nā'dhikāgre kadācana |
tatrāpi gurudevā'gre mānaṃ rakṣyaṃ na sarvathā || 21 ||
[Analyze grammar]

pūrveṣāṃ pūrvapūrveṣāṃ guruḥ śāstā hi mādhavaḥ |
gurvagre manasā vācā karmaṇā''rpyaṃ nijaṃ vapuḥ || 22 ||
[Analyze grammar]

samastaṃ cārpaṇīyaṃ vai gurvagre sarvasiddhaye |
mātā guruḥ pitā vṛddho gururjñānaprado guruḥ || 23 ||
[Analyze grammar]

hitakṛddhitadaścāpi gururmohavināśakaḥ |
trikālajño guruścāpi daṇḍado'pi gururmataḥ || 24 ||
[Analyze grammar]

śāstāro guravaḥ sarve aihikā'mutrarakṣakāḥ |
bahuśrutānāṃ mantavyaṃ gurūṇāṃ vākyamaiśvaram || 25 ||
[Analyze grammar]

trisandhyaṃ khalu kartavyā guroḥ pūjā hitecchunā |
yo guruḥ sa hariḥ prokto yo hariḥ sa gururmataḥ || 26 ||
[Analyze grammar]

yathā haristathā śarvo yathā śarvastathā guruḥ |
haravidyā harervidyā gurorvidyā hi mokṣadā || 27 ||
[Analyze grammar]

sarvadevamayaḥ sarvaśaktimayo gururyataḥ |
saguṇo nirguṇo vāpi tasyā''jñāṃ pālayet sadā || 28 ||
[Analyze grammar]

śreyorthī yastu gurvājñāṃ manasā'pi na laṃghayet |
gacchestiṣṭhan svapan bhuñjan gāyan yadyat samācaran || 29 ||
[Analyze grammar]

samakṣaṃ vā parokṣaṃ vā sa labhetātmasampadaḥ |
gurordevasya sānnidhye na yatheṣṭāsano bhavet || 30 ||
[Analyze grammar]

gururdevo yataḥ sākṣāt tadgṛhaṃ devamandiram |
guroḥ prasevayā bhaktyā taddharmaphalabhāg bhavet || 31 ||
[Analyze grammar]

yathaivānalasaṃsargānmalaṃ tyajati kāñcanam |
tathaiva gurusamparkātpāpaṃ tyajati sevakaḥ || 32 ||
[Analyze grammar]

yathā vahnisamīpastho ghṛtakumbho vilīyate |
tathā pāpaṃ vilīyeta gurordevasya sannidhau || 33 ||
[Analyze grammar]

yathā prajvalito vahniḥ kaccarādi vinirdahet |
guruḥ prasevitastadvatpāpaṃ dahati sarvathā || 34 ||
[Analyze grammar]

brahmā hariśca śaṃbhuśca devā devyo maharṣayaḥ |
kurvantyanugrahaṃ tuṣṭā gurau tuṣṭe sukhapradāḥ || 35 ||
[Analyze grammar]

karmaṇā manasā vācā guroḥ krodhaṃ na kārayet |
tasya krodhena dahyanti puṇyā''yurjñānaśrīkriyāḥ || 36 ||
[Analyze grammar]

guroḥ krodhaprakartṝṇāṃ kṛtā yajñā hi niṣphalāḥ |
niṣphalāḥ sampadaḥ sarvā niṣphalā niyamā yamāḥ || 37 ||
[Analyze grammar]

gurorvirodhakṛdvākyaṃ vadennaiva kadācana |
vadeccenmūrkhatāyogād rauravaṃ sa vrajed dhruvam || 38 ||
[Analyze grammar]

hṛdā cittena vittena vācā dehena karmaṇā |
parokṣaṃ vā samakṣaṃ vā mithyā na kārayed guroḥ || 39 ||
[Analyze grammar]

durguṇe sthāpite tasya daurguṇyaśatabhāg bhavet |
sadguṇe sthāpite tasya sarvasādguṇyabhāg bhavet || 40 ||
[Analyze grammar]

gurorhitaṃ priyaṃ kuryādādiṣṭo vā na vā sadā |
asamakṣaṃ samakṣaṃ vā guroḥ kāryaṃ samācaret || 41 ||
[Analyze grammar]

gurorhitaṃ priyaṃ kuryānmanovākkāyakarmabhiḥ |
adhaḥ patannapi rājan hitaṃ kuryāt sa vardhate || 42 ||
[Analyze grammar]

gururnārāyaṇakṛṣṇastvayā rājannijālaye |
pūjito vanditaḥ so'yaṃ saṅgare'bhyadhisaṅgataḥ || 43 ||
[Analyze grammar]

ahaṃ rājan guruste'smi vipro rājyaguruḥ sadā |
matvā me śobhanaṃ vākyaṃ nivartasva raṇāṃgaṇāt || 44 ||
[Analyze grammar]

mā vaidhavyaṃ dilāvaryā rājñyā puryāśca mantraya |
nandibhillyāḥ sabhāyā mā nūtneśatvaṃ ca mantraya || 45 ||
[Analyze grammar]

mā roṣaṃ kuru rājendra satyaṃ te nigadāmyaham |
mā svahaste sthitaṃ rāṣṭraṃ parahaste nipātaya || 46 ||
[Analyze grammar]

śūrāṇāṃ mā vināśaṃ vai śūratarairvidhāpaya |
yoddhavyaṃ māyayā sākaṃ māyāvinā samaṃ tathā || 47 ||
[Analyze grammar]

tathāpi naiva kṛṣṇena yoddhavyaṃ paramātmanā |
yatra sarvaṃ yataḥ sarvaṃ yaḥ sarvātmā virājate || 48 ||
[Analyze grammar]

yaṃ sarvaḥ sevate śryarthaṃ taṃ kathaṃ yodhayed raṇe |
sevanīyo vijayārthaṃ toṣaṇīyaḥ pramuktaye || 49 ||
[Analyze grammar]

prasādanīyaḥ kṣeyo'rthaṃ prastotavyaḥ praśāntaye |
labdhavyaḥ śaraṇaṃ gatvā taṃ kathaṃ yodhayed budhaḥ || 50 ||
[Analyze grammar]

pṛthvī hasati rājaṃstvāṃ yamunājalaphenakaiḥ |
sasyapuṣpamayairhāsyaiḥ pṛtanāśastrajaiḥ karaiḥ || 51 ||
[Analyze grammar]

lūnīvāripravāhotthanādaphenabakādibhiḥ |
nimantrayati mṛtyuṃ yannandibhillo dilāpatiḥ || 52 ||
[Analyze grammar]

rājan kāle yathāyogyaṃ mayoktamauṣadhaprabham |
svatantro'si nije kārye yathāyogyaṃ samācara || 53 ||
[Analyze grammar]

ityuktvā taṃ guruścāgnirātarṣirnandibhillakam |
badrike svasti svastyastu vyājahāra punaḥ punaḥ || 54 ||
[Analyze grammar]

pratyuttaraṃ guruṃ natvā nandibhillo dadau tataḥ |
dhṛtamūrddhā dhṛtakeśo mahākālena mṛtyunā || 55 ||
[Analyze grammar]

jānāmyahaṃ samastaṃ tad guro bhavatā noditam |
sarvaṃ tat sādhubhāve'sti rājyavāde na yujyate || 56 ||
[Analyze grammar]

gururvā janako vāpi bhrātā suhṛt suto'pi vā |
saṅgare pratisampannaḥ sa yoddhavyo nṛpeṇa ha || 57 ||
[Analyze grammar]

tṛptistu yatisādhūnāṃ svalpe bhavati yoginām |
rājñāṃ tṛptiḥ pṛthivyāśced rājadharmaḥ kamāśrayet || 58 ||
[Analyze grammar]

jayaśca vijayaścaitau sāmarthyabalakiṃkarau |
naikāntakṛṣṇapārśvasthau sarvagau hi matau mama || 59 ||
[Analyze grammar]

nārāyaṇaḥ sadā jayyaḥ sarvairiva mumukṣubhiḥ |
svārthibhaktā jayantyeva nārāyaṇaṃ muhurmuhuḥ || 60 ||
[Analyze grammar]

agnirnārāyaṇaḥ sākṣāttasmin homo'pi mokṣadaḥ |
nārāyaṇena mahatā nīcasya yodhane mama || 61 ||
[Analyze grammar]

kīrtirvā bahulā syānme mokṣago vā bhavāmyaham |
na me hāniḥ kṛṣṇahastahatasya mama kācana || 62 ||
[Analyze grammar]

sukhaṃ rājyaṃ sampadaśca vahnau juhvati mokṣiṇaḥ |
kṛṣṇe juhomi tatsarvaṃ vṛthā homo na me guro || 63 ||
[Analyze grammar]

gurorvākye hitaṃ loke jīvanaṃ cirameva yat |
avākye yodhanaṃ kṛṣṇe vāsaśca śāśvate pade || 64 ||
[Analyze grammar]

dehapṛthivīnāśe'pi lapsye lābhaṃ tu śāśvatam |
nirṇītaṃ tu mayā kṛṣṇe sarvārpaṇaṃ tu bhāvataḥ || 65 ||
[Analyze grammar]

aihikā'mutrasiddhirme kṛṣṇayogād bhaviṣyati |
nṛpadharmaiḥ pūjayiṣye raṇāṃgaṇe hariṃ prabhum || 66 ||
[Analyze grammar]

kālahastena mṛtyostu kṛṣṇahastādvaro hi saḥ |
guroḥ sevāṃ raṇayogyāṃ kariṣye pādayoḥ patan || 67 ||
[Analyze grammar]

kariṣye vā harermūrdhni śastrapuṣpā'kṣatā'rpaṇam |
tyakṣye malaṃ hareḥ śastrānalasaṅgād dṛḍhaṃ drutam || 68 ||
[Analyze grammar]

yadi tuṣṭo bhavet kṛṣṇo mayi śastranipātanaiḥ |
tadā me pitarastuṣṭāstuṣṭāḥ surā maharṣayaḥ || 60 ||
[Analyze grammar]

gurau nārāyaṇe kṛṣṇe krodhadoṣo na vidyate |
parokṣaṃ vā samakṣaṃ vā kariṣye nṛpadharmataḥ || 70 ||
[Analyze grammar]

guro prasanno bhagavān yanmāṃ yuddhe vilokitum |
āgato'sti hariḥ sākṣāttato bhāgyaṃ kiyanmahat || 71 ||
[Analyze grammar]

gurvagre mūrkhaśiṣyo'pi taratyeva na saṃśayaḥ |
parokṣaṃ vā samakṣaṃ vā kṣātraṃ mithyā na kārayet || 72 ||
[Analyze grammar]

kṣātradharmeṇa ganturme dilāvaryā anāthatā |
bhāvinī naiva viprarṣe tato dharmo hato bhavet || 73 ||
[Analyze grammar]

karomi dharmasaṃgrāmaṃ saṃgrāme śatruvadguruḥ |
āgaccheccharasandhānaiḥ pūjārhaḥ sa gurustadā || 74 ||
[Analyze grammar]

brahmā viṣṇurmaheśo vā mahāviṣṇurnarāyaṇaḥ |
yamaḥ kālo mahākālaḥ purāṇapuruṣottamaḥ || 75 ||
[Analyze grammar]

yo vā ko vā samāgaccheccharapūjārha eva saḥ |
dharme sthitasya vijayo na tvadharme sthitasya vai || 76 ||
[Analyze grammar]

yuddhaṃ rājñāṃ paro dharmo yuddhasthā vadhagocarāḥ |
kṣātradharmāṇa evaite gurudharmāstadā na te || 77 ||
[Analyze grammar]

na pūjyadharmā na śiṣyadharmā na mitradharmiṇaḥ |
na putradharmā na ca vā kuṭumbadharmiṇo'pi te || 78 ||
[Analyze grammar]

na svadharmāṇa evāpi paradharmiṇa eva te |
sākaṃ taiḥ khalu yoddhavyaṃ kṣātradharmaḥ sa śāśvataḥ || 79 ||
[Analyze grammar]

yuddhe cet kṛṣṇahastena gamiṣyāmi parābhavam |
kṛṣṇahaste vijayaḥ sa na vai sa nāgavikrame || 80 ||
[Analyze grammar]

kṛṣṇaṃ hitvā jayenmāṃ sa tadā manye parākramam |
kṛṣṇayuktaṃ jagatsarvaṃ balavadbhāti me guro || 81 ||
[Analyze grammar]

sa dhātā ca vidhātā ca sa merurmedinī ca saḥ |
sa jetā ca vijetā ca parābhāvayitā ca saḥ || 82 ||
[Analyze grammar]

sraṣṭā poṣṭā poṣayitā rakṣayitā'vitā'pi saḥ |
taṃ śaraṇyaṃ ca kāruṇyapūrṇaṃ prāpya samakṣagam || 83 ||
[Analyze grammar]

atra vāpi paratrāpi jayaṃ lapsye na durjayam |
dvayostu kāryayoḥ prāptau nirbalaṃ tatra bādhyate || 84 ||
[Analyze grammar]

gurorvākyaṃ nirbalaṃ vai kṛṣṇāptiryā balānvitā |
kṛṣṇāptau puruṣārthāstu nivartante tadantimāḥ || 85 ||
[Analyze grammar]

grāmaṃ tyajet kulasyā'rthe svasyā'rthe tu kulaṃ tyajet |
svaṃ tyajeccāpi gurvarthe kṛṣṇārthaṃ sakalaṃ tyajet || 86 ||
[Analyze grammar]

jānāti bhagavān māṃ ca jānāti nāgavikramam |
nāgakramaḥ sakāmo'sti na me kāmo hariṃ vinā || 87 ||
[Analyze grammar]

hariryuddhaprasaṃgena niṣkāmaṃ samaneṣyati |
sakāmaṃ niraye loke pratiṣṭhāpya prayāsyati || 88 ||
[Analyze grammar]

yathā vipro guruścāste tathā dharmo'pi sadguruḥ |
dharmo vakti sadā yuddhaṃ kṣatrasya tvapalāyanam || 89 ||
[Analyze grammar]

ārabdhāt karmaṇaścet syāt paścapādo jano yadi |
hāsyapātraṃ bhavatyeva dharmahantā sa eva ha || 90 ||
[Analyze grammar]

vicāryā''rambhaṇīyāni pāraṃ neyāni tāni vai |
phalaṃ vā viphalaṃ vāpi sayatnadaivasātkṛtam || 91 ||
[Analyze grammar]

tasmād yotsye namaskṛtvā dhṛtvā hṛdambare harim |
tava yogabalaṃ tatrā''kāṃkṣe'gnirāta sadguro || 92 ||
[Analyze grammar]

ityuktvā tūrṇamevā'sau dadhmau śaṃkhaṃ mṛdhārthakam |
tāvattūrṇamavādyanta raṇabheryaḥ pṛthak pṛthak || 93 ||
[Analyze grammar]

vigulāni samantācca paṭahā''nakagomukhāḥ |
yoddhṛṇāṃ garjanā vyomavāṇyo yuddhābhidarśikāḥ || 94 ||
[Analyze grammar]

abhavan meghamārge'pi vimānānāṃ pragarjanāḥ |
yuddhārthaṃ vijayārthaṃ ca gajānāṃ bṛṃhitāni ca || 95 ||
[Analyze grammar]

hreṣāśca vājināṃ tatra vṛṣāṇāṃ raṃbhaṇāni ca |
uṣṭrāṇāṃ gāṃgaṇanāśca samantato'bhavan mṛdhe || 96 ||
[Analyze grammar]

mahākālastathā rudro yamo viśveśvaro haraḥ |
ākāśe devatāstatra maharṣayaśca pārṣadāḥ || 97 ||
[Analyze grammar]

vyāpṛtaṃ śrīkṛṣṇanārāyaṇaṃ jñātvā samāyayuḥ |
cakraṃ sudarśanaṃ naijam ājagatkalanaṃ dhanuḥ || 98 ||
[Analyze grammar]

dadhāra bhagavān śīghraṃ śaraṃ ca grasanāhvayam |
nāgavikrama evāpi sarvāstrāṇi dadhāra ha || 99 ||
[Analyze grammar]

senānīrnandakubaro rathastho'gre sthito'bhavat |
evaṃ ba nandibhillo'pi senāpendravrajo'pi ca || 100 ||
[Analyze grammar]

svasvarathau puraḥ kṛtvā'tiṣṭhatāṃ sajyakārmukau |
pratīkṣante ca sainyāni śastramocanasūcakam || 101 ||
[Analyze grammar]

mahāmahādhvaniṃ śāṃkhaṃ svasvasenāpasaṃbhavam |
ityevaṃ badrike tatra sannāho'bhavadācyutaḥ || 102 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne kṛṣṇena saha na yoddhavyamiti guroragnirāttasyopadeśaṃ svānukūlaṃ yodhane nandibhillo matvā yuddhakṣaṇasūcakaśaṃkhadhvānamācarat ubhayasainyadhvānānītyādinirūpaṇanāmā dvyaśītitamo'dhyāyaḥ || 82 ||
[Analyze grammar]

Other print editions:

Also see the following print editions of the Sanskrit text or (alternative) English translations of the Lakshminarayana Samhita Chapter 82

Cover of edition (2011)

Shri Lakshmi Narayana Samhita
by Chowkhamba Sanskrit Series Office (2011)

शेतायनव्यास (Shwetayan Vyas)

Buy now!
Like what you read? Consider supporting this website: