Chapter 58

śrīnaranārāyaṇa uvāca |
śṛṇu badrīpriye devi kathāṃ pāpavināśinīm |
karāñcanīpure tvabdhitaṭe sindhumukhe purā || 1 ||
[Analyze grammar]

yavasandhābhidhaḥ kaścid dhenukhādakaghātakī |
nyavasanmāṃsamadirāmatsvādano'tihiṃsakaḥ || 2 ||
[Analyze grammar]

śaśān kapīn varāhāṃśca hariṇān vanapakṣiṇaḥ |
yādāṃsi cāpi hiṃsitvā gavayā'joraṇānapi || 3 ||
[Analyze grammar]

sakuṭumbaḥ pācayitvā vikrīṇāti ca khādati |
evaṃ pāpasamācāraḥ sadā pāpaparāyaṇaḥ || 4 ||
[Analyze grammar]

kukkuṭādaḥ kukkuṭāṇḍarasabhakṣaṇakārakaḥ |
bhraṣṭadeho bhraṣṭakarmā yavasandhīyajātijaḥ || 5 ||
[Analyze grammar]

yavasandhābhidho vārtāṃ śuśrāva nāvikānanāt |
śarkarānagare tatra saṃhitāyāḥ kathā śubhā || 6 ||
[Analyze grammar]

jāyate mokṣadā sarvapāpānāṃ kṣālinī tviti |
jāyante divyadehāśca śrotāro brahmalokagāḥ || 7 ||
[Analyze grammar]

sarvapāpāni bhagavān śaraṇyo bhaktavatsalaḥ |
śaraṇāgatabhaktasya kṣamate'rpayate divam || 8 ||
[Analyze grammar]

hiṃsakā bahavastena tāritāḥ strīnarā api |
tatrāste lomaśarṣiśca svataḥprakāśa īśitā || 9 ||
[Analyze grammar]

tathā santaḥ sādhavaśca sādhvyo viprarṣayo'pi ca |
yeṣāṃ vai darśanāt prasevanāt prasādanāttathā || 10 ||
[Analyze grammar]

śāśvatī jāyate muktirvimānena gatiḥ parā |
naitādṛśo hi samayaḥ punarasmān miliṣyati || 11 ||
[Analyze grammar]

pāpanāśakaraḥ śuddho'nāyāsamokṣaṇapradaḥ |
yavasandho badrike saṃśuśrāvaitāṃ giraṃ śubhām || 12 ||
[Analyze grammar]

mumukṣā'syā'bhavattūrṇaṃ pāpanāśāya tatkṣaṇam |
mayā pāpānyanantāni kṛtāni ghātanāni vai || 13 ||
[Analyze grammar]

teṣāṃ na syāddhi nistāro vinā divyajanāśrayam |
ete naukādharāḥ sarve vadanti ṛtameva tat || 14 ||
[Analyze grammar]

prayāmi śarkarāpuryāmaghāni kṣapayāmi ca |
yadi pāpavināśo me bahuhatyāghanāśanam || 15 ||
[Analyze grammar]

tadā tasmāduttamaṃ me kimatra pariśiṣyate |
karmaṇāṃ cet kṛtānāṃ tu bhūmāvatra nivartanam || 16 ||
[Analyze grammar]

kimasmādaparaṃ sādhyaṃ kartavyaṃ me'vaśiṣyate |
avaśyaṃ tatra gantavyaṃ prāṇamātraṃ tu yatra vai || 17 ||
[Analyze grammar]

avaśyaṃ tatra vastavyaṃ yatra syācchāntirātmanaḥ |
avaśyaṃ tatra dātavyaṃ yatroptaṃ phaladaṃ bhavet || 18 ||
[Analyze grammar]

avaśyaṃ tatra suptavyaṃ yatra nirbhīkatā bhavet |
avaśyaṃ tatra martavyaṃ yatrānandastu śāśvataḥ || 19 ||
[Analyze grammar]

yadi gacchāmi tatraiva saṃhitāyāḥ kathārthakaḥ |
pāpanāśo bhavenme ced gantavyaṃ mokṣameva ha || 20 ||
[Analyze grammar]

punarāvartanaṃ naiva karāñcanīpuraṃ prati |
rocate me pāpakarma naiva naiva ca naiva ca || 21 ||
[Analyze grammar]

kuṭumbasahito yāsye śarkarānagaraṃ prati |
mahatyā naukayā yantragantryā yāsyāmi satvaram || 22 ||
[Analyze grammar]

vicāryetthaṃ yavasandhaḥ patnīṃ nāmnā majāvalīm |
jagāda mānasaṃ sarvaṃ saṃkalpitaṃ śubhāvaham || 23 ||
[Analyze grammar]

sāpi dhanyaṃ nijabhāgyaṃ mene deśāvalokanam |
puṇyāvalokanaṃ cāpi mahotsavapralokanam || 24 ||
[Analyze grammar]

mokṣāvalokanaṃ mene śreṣṭhaṃ hiṃsādyapekṣayā |
badrike sā sammatā'bhūt putrāḥ putryastathāvidhāḥ || 25 ||
[Analyze grammar]

ekaviṃśatisaṃkhyāste kuṭumbino drutaṃ tataḥ |
dhanaṃ dravyaṃ bhūṣaṇānyambarāṇi bhojanānyapi || 26 ||
[Analyze grammar]

gṛhayogyānyauṣadhāni veṣavārāṇi yānyapi |
dehādisādhanakāni pātrāṇyāvaśyakāni ca || 27 ||
[Analyze grammar]

peṭikā copakaraṇaṃ śavayādyaṃ te samutsukāḥ |
ninyire sarvamevāpi yogyaṃ yātrādi yaddhitam || 28 ||
[Analyze grammar]

naukayā yantravegābhigamayitryābdhitīrake |
yayuragre sindhumukhe tato nadyāṃ tu naukayā || 29 ||
[Analyze grammar]

tayaiva sahasā sarve pratipūraṃ yayurmudā |
prāpuḥ śrīśarkarābhūmiṃ snātvā sindhujale tu te || 30 ||
[Analyze grammar]

nītvopadāḥ prajagmuste kathāmaṇḍapamuttamam |
śuśruvuste kathāṃ ramyāṃ sarvapātakanāśinīm || 31 ||
[Analyze grammar]

kathānte vācakaṃ sarve pupūjurvastubhiḥ śubhaiḥ |
lomaśaṃ ca tathā sādhūn praṇemuste tataḥ param || 32 ||
[Analyze grammar]

prārthanāṃ cakrire pāpamokṣārthinīṃ śubhāvahām |
lomaśaśca tadā tebhyo dadau śrībrahmakūrcakam || 33 ||
[Analyze grammar]

vrataṃ ca pañcagavyaṃ ca tathā śrīkṛṣṇanāma ca |
mantraṃ dhunyaṃ bhajanaṃ ca dadau pādāmṛtaṃ tathā || 34 ||
[Analyze grammar]

prasādānnaṃ dadau tebhyaḥ pāpanāśanahetave |
te'pi sarve'tibhāvena cakhadurannamuttamam || 35 ||
[Analyze grammar]

papurvāri vrataṃ cakruḥ kathāśravaṇamācaran |
māsānte pāvanā jātāḥ sarve vigatakalmaṣāḥ || 36 ||
[Analyze grammar]

bhāvanānukūla eṣāmāyuṣyānto'bhavattathā |
dvādaśyāṃ caitrakṛṣṇasya madhyāhne kṛtabhojanāḥ || 37 ||
[Analyze grammar]

sarve te tu niṣedurvai vāsagṛhāṃgaṇe tadā |
akasmāccāgataṃ divyaṃ vimānamambarāt tataḥ || 38 ||
[Analyze grammar]

vimānataijasā spṛṣṭāḥ sarve mūrchāṃ prapedire |
caturbhujo haristeṣāṃ gocaro'pi tadā'bhavat || 39 ||
[Analyze grammar]

anādiśrīkṛṣṇanārāyaṇaḥ śrīmādhavīśvaraḥ |
tān kṛtvā divyadehāṃśca tyājayitvā śavāni ha || 40 ||
[Analyze grammar]

ninye vimānagān kṛtvā naijaṃ dhāmā'kṣaraṃ śubham |
āścaryaṃ paramaṃ dṛṣṭvā maharṣayo'pi vai tadā || 41 ||
[Analyze grammar]

praśasaṃsuḥ priyakṛṣṇanārāyaṇaṃ dayānidhim |
praśasaṃsuśca tān sarvān śaraṇāgatamānavān || 42 ||
[Analyze grammar]

mahāpāpān pāpaśūnyān śaśaṃsurbhaktisaṃbhṛtān |
aho'saṃkhyā'ghakartṝṇāmapi śrībhagavānhariḥ || 43 ||
[Analyze grammar]

kṛpayā cā'nivartinyā karoti mokṣaṇaṃ param |
dhanyo nārāyaṇaḥ kṛṣṇo dhanyāste mokṣabhāginaḥ || 44 ||
[Analyze grammar]

dhanyaṃ śārkaranagaraṃ kathā dhanyā pramuktidā |
badrike evamevā'nye muktiṃ tatra hi lebhire || 45 ||
[Analyze grammar]

paṭhanācchravaṇādasya cintanādaghamokṣaṇam |
bhuktirmuktirbhaveccāpi tathā syācchāśvatī gatiḥ || 46 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne karāñcanīpurīsthasya sadāhatyākarasya yavasandhasya sakuṭumbasya saṃhitākathāśravaṇena mokṣaṇamityādinirūpaṇanāmā'ṣṭapañcāśattamo'dhyāyaḥ || 58 ||
[Analyze grammar]