Lakshminarayana Samhita [sanskrit]

by Shwetayan Vyas | 1,169,834 words | ISBN-10: 8170801818 | ISBN-13: 9788170801818

The Lakshminarayana Samhita Chapter 48 (Sanskrit text), including grammatical analysis, glossary and relevant print editions. The Lakshmi-narayana-samhita is an encyclopaedic work devoted to Narayana although it deals with various deities. The work is written in Puranic style and divided into four books according to the four Yugas. In total, the work consists of roughly 120,000 metrical verses.

śrīnaranārāyaṇa uvāca |
śṛṇu badrīpriye devi madyapāyā kathāṃ tathā |
bilvapattanavāsāyā liyārīnāmayoṣitaḥ || 1 ||
[Analyze grammar]

bilvākhye pattane markaṭānadeśe tadā'bhavat |
madirāvyavasāyāḍhyaṃ kuṭumbaṃ madyakartṛ tat || 2 ||
[Analyze grammar]

dhvajī tatrā'bhavanmukhyo nāmnā miṣṭāsavadhvajī |
tasya patnī līyāryākhyā putraputrīsamanvitā || 2 ||
[Analyze grammar]

śuśrāva lokamukhataḥ kathāyāḥ paramaṃ balam |
śarkarānagare kṛṣṇasaṃhitāyāḥ kathāṃ tataḥ || 4 ||
[Analyze grammar]

śrotumaicchat pramadā sā svāmine prārthayattataḥ |
patirmiṣṭāsavaḥ patnīṃ prāha dūre kathāsthalam || 5 ||
[Analyze grammar]

vartate dīrghamārgaśca gantavyaṃ sabhayaṃ pathi |
vayaṃ dhanavihīnāśca dāridryaduḥkhapīḍitāḥ || 6 ||
[Analyze grammar]

yāsyāmo vai kathaṃ mārge vartante luṇṭakā janāḥ |
patnī prāha patiṃ śrutvā nāśo dehasya vidyate || 7 ||
[Analyze grammar]

yadvākadācilloke'tra martavyaṃ sarvathā janaiḥ |
adya vā bahuvarṣānte dhruvaṃ tu nidhanaṃ matam || 8 ||
[Analyze grammar]

yena kena nimittena maraṇaṃ saṃbhaviṣyati |
vayaṃ pāpāḥ pāpakarmāṇaśca pāpaparāyaṇāḥ || 9 ||
[Analyze grammar]

pāpināṃ maraṇaṃ pāpe jāyate tattu śokadam |
apāpe puṇyakārye vā jāyate maraṇaṃ yadi || 10 ||
[Analyze grammar]

kaṣṭaṃ vā jāyate tādṛk praśastaṃ lābhadaṃ tu tat |
puṇyasaṃkalpakartārastīrthayātrecchavo'pi ca || 11 ||
[Analyze grammar]

akṛtakāryā api te mṛtāḥ svargaṃ prayānti hi |
vayaṃ madyapibāḥ sarve sadā mahātipāpinaḥ || 12 ||
[Analyze grammar]

tīrthayātrānimittena mṛtāścet svargabhāginaḥ |
luṇṭakairluṇṭitā mārge yadi ced bhikṣayā tataḥ || 13 ||
[Analyze grammar]

utpādya bhojanaṃ cāpi gamiṣyāmaḥ kathāsthalam |
pāpānāṃ nāśanaṃ tena bhāgyānāmudayo bhavet || 14 ||
[Analyze grammar]

yadvā pramokṣaṇaṃ lokādasmāt syānnātra saṃśayaḥ |
sarvathā lābha evā'sti hānistatra na vidyate || 15 ||
[Analyze grammar]

tasmāttīrthaṃ prakartavyaṃ gantavyaṃ ca kathāsthale |
ityuktastu tayā patnyā kuṭumbasahito dhvajī || 16 ||
[Analyze grammar]

sūnī śūnyaṃ gṛhaṃ kṛtvā pratasthe śarkarāyutam |
yathā tu cintitaṃ pūrvaṃ tathaivā'syā'bhavat pathi || 17 ||
[Analyze grammar]

luṇṭakā militā mārge hṛtaṃ tairbhājanādikam |
pātheyaṃ gardabhaṃ bhāravāhaṃ ca vṛṣabhaṃ kharam || 18 ||
[Analyze grammar]

vastrāṇi cāpi pātrāṇi luṇṭakāḥ samapāharan |
te tu matvā mahatkaṣṭaṃ kintu tīrthanimittakam || 19 ||
[Analyze grammar]

pūrvaṃ vicāritaṃ cāpi nātikaṣṭaṃ tu menire |
hṛtasarvasvakāḥ sarve putrāścaikādaśāpi ca || 20 ||
[Analyze grammar]

putryaḥ saptadaśa kanyāḥ pitā mātā ca te tataḥ |
śanaiḥ śanaiḥ kṛṣṇaparāyaṇāḥ sāyaṃ sarastaṭe || 21 ||
[Analyze grammar]

drumāḍhye bhūtale rātrinirgamāya kṛtādarāḥ |
kṛtāvāsā jalaṃ pītvā sasmaruḥ parameśvaram || 22 ||
[Analyze grammar]

kaṣṭaṃ prāptaṃ paraṃ mārge sarvaṃ hṛtaṃ tu luṣṭakaiḥ |
adya rātrirgatā syāttu śvaḥ kaṣṭaṃ kṣudhayā bhavet || 23 ||
[Analyze grammar]

martavyaṃ vā bhikṣitavyaṃ cā'ttavyaṃ dalapatrakam |
tathāpi tatkathāsthānaṃ gantavyaṃ nātra saṃśayaḥ || 24 ||
[Analyze grammar]

niścityaivaṃ samidhaścāhṛtya vahnimacetayan |
tadādhārā sthitāḥ sarve kīrtanaṃ saṃpracakrire || 25 ||
[Analyze grammar]

priyākṛṣṇaharekṛṣṇapāvannārāyaṇaprabho |
śrīpatilalitākṛṣṇabālakṛṣṇaprabho vibho || 26 ||
[Analyze grammar]

evaṃ pracakrire dhunyaṃ tālīvādanapūrvakam |
rātryardhaṃ vigataṃ yāvattāvat kramelakasthitaḥ || 27 ||
[Analyze grammar]

daśoṣṭrasahitaḥ kaścicchreṣṭhī bhojanavastravān |
āyayau tena mārgeṇa jalaṃ pātuṃ sarastaṭe || 28 ||
[Analyze grammar]

so'pi vahniṃ śubhaṃ vīkṣya mānavāṃstatra saṃsthitān |
jalaṃ pītvā pāyayitvā viśrāmārthaṃ samāyayau || 29 ||
[Analyze grammar]

jaya nārāyaṇakṛṣṇetyuktvā hyavātarat sthale |
uṣṭrān vṛkṣastambamūle baddhvā vahnisthalaṃ śubham || 30 ||
[Analyze grammar]

gatvā papraccha tān sarvān vṛttāntaṃ kvāgamādikam |
miṣṭāsavo vinīto vai bhūtvā yātrāṃ jagāda tam || 31 ||
[Analyze grammar]

luṇṭakairluṇṭitaṃ sarvaṃ tadāpyenaṃ jagāda ha |
atha śreṣṭhī paraṃ śrutvā kaṣṭaṃ dayāparo'bhavat || 32 ||
[Analyze grammar]

dadau vai bhojanaṃ tebhyaḥ kharjurādikamuttamam |
vastrāṇyapi dadau tebhyo'bhayadānaṃ dadau tataḥ || 33 ||
[Analyze grammar]

uvāca tebhyo mudabhṛd yāmyahaṃ cāpi tatsthalam |
kathāṃ śrotuṃ tato yūyamārohadhvaṃ mamoṣṭrakān || 34 ||
[Analyze grammar]

prayāsyāmo'nena pathā prāpsyāmaḥ śvaḥ prage sthalīm |
uṣṭrā mārgavidaḥ santi panthānaṃ vedmi cāpyaham || 35 ||
[Analyze grammar]

jayaṃ me vidyate naivā''rohayadhvaṃ mamoṣṭrakān |
ityuktā badrike sarve tvāruruhuḥ kramelakān || 36 ||
[Analyze grammar]

vegavanto dīrghakaṇṭhā uṣṭrā dīrghapadakramāḥ |
vegavaddhāvanamagnā akrāmannoditāḥ pathaḥ || 37 ||
[Analyze grammar]

yathā vā garuḍā haṃsā vimānaṃ vā gajā iva |
mārgamullaṃghayāmāsuryathā'mbaravihāriṇaḥ || 38 ||
[Analyze grammar]

dinadvayasya mārgaṃ te rātryardhe niryayurjavāt |
prātarjātaṃ mukhadṛśyaṃ tāvattu śarkarāpuram || 39 ||
[Analyze grammar]

te tvapaśyan puraḥ śvetasaudhālikāpraśobhitam |
kathāmaṇḍapasaṃśobhadvyomakalaśarājitam || 40 ||
[Analyze grammar]

bahubhirmunibhiḥ sadbhirvaiṣṇavaiḥ pramadānaraiḥ |
viharadbhiḥ snānapūjādyarthaṃ sañcāribhiḥ prage || 41 ||
[Analyze grammar]

homadhūmraiḥ sūcayadvai kathāsthānaṃ ca ghoṣaṇaiḥ |
brāhmaṇānāṃ mukhamantroccāraṇānāṃ samucchritaiḥ || 42 ||
[Analyze grammar]

nārāyaṇaprabhokṛṣṇanārāyaṇa jagatprabho |
bālakṛṣṇaharikṛṣṇamādhavīramaṇaprabho || 43 ||
[Analyze grammar]

evaṃ saṃkīrtanairvyāptairdhvanivyāptaṃ tu pāvanam |
śarkarānagaraṃ vīkṣyāścaryaṃ paramaṃ lebhire || 44 ||
[Analyze grammar]

sindhutīre drutaṃ gatvā śreṣṭhī sasnau jale muhuḥ |
avatārya samastāṃstān pradarśya mārgamuttamam || 45 ||
[Analyze grammar]

kathāsthalasya vai khyātaṃ svayamuṣṭrān samastakān |
miṣṭaṃ jalaṃ pāyayitvā drutaṃ tvadṛśyatāṃ yayau || 46 ||
[Analyze grammar]

vīkṣyaitat sa dhvajī sūto mahāścaryaparo'bhavat |
aho'yaṃ ko bhaved rakṣākaro'smākaṃ vanāntare || 47 ||
[Analyze grammar]

mahāmārge sukhadātā prāpakaḥ sukathāntike |
nūnaṃ nārāyaṇo yadvā bhavet kaścit sureśvaraḥ || 48 ||
[Analyze grammar]

anyathā na bhavedevamadṛśyavartanaṃ kvacit |
liyārī sā kṛṣṇanārāyaṇaṃ sasmāra tatra ha || 49 ||
[Analyze grammar]

ākāśavāṇyā bhagavānāha tāṃ bhagavānaham |
uṣṭrānādāya bhaktānāṃ rakṣārthaṃ tvāgato'bhavam || 50 ||
[Analyze grammar]

yāta śrotuṃ kathāṃ divyāṃ sevantāṃ lomaśaṃ munim |
svataḥprakāśaṃ sevantāṃ gatiḥ śreṣṭhā bhaviṣyati || 51 ||
[Analyze grammar]

ityuktā badrike sarve tuṣṭā ānandamoditāḥ |
yayuḥ kathāsthalaṃ nītvā kusumānyatibhāvataḥ || 52 ||
[Analyze grammar]

nemuste dūrataḥ sthitvā sabhāyāṃ sampraviśya te |
saṃhitāyāḥ pūjanaṃ vai cakruḥ puṣpādibhistataḥ || 53 ||
[Analyze grammar]

niṣeduḥ śravaṇārthaṃ te yāvat kathāpravācanam |
kathānte lomaśaṃ gatvā nemuḥ pādajalaṃ papuḥ || 54 ||
[Analyze grammar]

vṛttāntaṃ kathayāmāsurmārge kṛṣṇakṛtāvanam |
yaścāsīduṣṭraśreṣṭhī vai sa tu kṛṣṇanarāyaṇaḥ || 55 ||
[Analyze grammar]

bhagavān śrīharirasmān kathāsthānaṃ samānayat |
tatprapattiṃ samicchāmo dehi mantraṃ supāvanam || 56 ||
[Analyze grammar]

ityarthito lomaśastān śrāvayāmāsa sanmanum |
oṃ namaḥ śrīkṛṣṇanārāyaṇāya pataye svāhā || 57 ||
[Analyze grammar]

tathā tatraiva dhunyā'rthaṃ dadau nāma harestadā |
kṛṣṇanārāyaṇakṛṣṇanārāyaṇapareśvara || 58 ||
[Analyze grammar]

bālakṛṣṇā'nādikṛṣṇanārāyaṇa rameśvara |
vrataṃ dadau madyahīnaṃ jīvanaṃ tebhya ityatha || 59 ||
[Analyze grammar]

bhojanādivyavasthāṃ ca teṣāṃ śrīlomaśo muniḥ |
rājamahānasāccakre nityaṃ kuṭyāṃ nivāsanam || 60 ||
[Analyze grammar]

evaṃ te badrike tatra samūṣuḥ sarvadā sukham |
sevāṃ cakruḥ satāṃ tatra pātrādimañjanaṃ tathā || 61 ||
[Analyze grammar]

mārjanaṃ kṣālanaṃ vastvānayanaṃ ca kathāsthale |
mahīmānādidehānāṃ saṃvāhanaṃ pracakrire || 62 ||
[Analyze grammar]

śrutvā kathāṃ sevayitvā sādhūnāśīrvaco'mṛtaiḥ |
vidhūya sarvapāpāni kṛṣṇaprasādabhojanaiḥ || 63 ||
[Analyze grammar]

nirmalāste samastā vai jātāḥ kṛṣṇaparāyaṇāḥ |
puṇyātmānaḥ parā bhaktā ātmanivedino yathā || 64 ||
[Analyze grammar]

saṃsmarantyuṣṭrapālaṃ taṃ śrīkṛṣṇaṃ vallabhātmakam |
jagatsvapnasuṣuptyādāvuṣṭrapālo vilokyate || 65 ||
[Analyze grammar]

taccittāstaddhyānamagnāstasminnindriyavṛttayaḥ |
tadyogasthāstatsmarāste tanmayā divyabhāvanāḥ || 66 ||
[Analyze grammar]

abhavan svalpakālena mahābhāgavatottamāḥ |
kṛṣṇanārāyaṇastebhyo badrike svapnagocaraḥ || 67 ||
[Analyze grammar]

bhūtvoṣṭrapālakaḥ sākṣānnārāyaṇaḥ priyaḥpatiḥ |
śaṃkhacakragadāpadmadhārī bhavati tatkṣaṇe || 68 ||
[Analyze grammar]

evaṃ dadāti nityaṃ vai darśanaṃ bhaktibandhanaḥ |
snehapāśadhṛtaḥ kṛṣṇastānnetuṃ samupāyayau || 69 ||
[Analyze grammar]

divyavimānamāruhya divyaprabhāyutaḥ prabhuḥ |
avātarad vimānātsa pauṣasyaikādaśīdine || 70 ||
[Analyze grammar]

śuklapakṣe paśyatāṃ yāvatāṃ vai bhaktadehinām |
miṣṭāsavastathā bhāryā liyārī putraputrikāḥ || 71 ||
[Analyze grammar]

vilokya tvāgataṃ kṛṣṇaṃ vallabhaṃ parameśvaram |
sahasotthāya caraṇau natvā cakrurhi daṇḍavat || 72 ||
[Analyze grammar]

lilihuścaraṇau tasya jihvayā''dhārayan rajaḥ |
śarīreṣu tataḥ kṛṣṇamārthayan mokṣasiddhaye || 73 ||
[Analyze grammar]

kṛpālurbhagavānāha sajjā bhavantu vai drutam |
nayāmi divyadehān vai yuṣmān dhāmā'kṣaraṃ mama || 74 ||
[Analyze grammar]

ityuktamātrāste sarve'rpitāḥ kṛṣṇasya pādayoḥ |
abhavan paśyatāṃ sarvalokānāṃ nyapatan kṣitau || 75 ||
[Analyze grammar]

bhautikāni śarīrāṇi tyaktvā bhūtvā harīcchayā |
divyā muktasvarūpāste kṛṣṇatulyaśarīriṇaḥ || 76 ||
[Analyze grammar]

kṛṣṇājñayā niṣeduste drutaṃ divyavimānakam |
bhajantaḥ śrīkṛṣṇanārāyaṇaṃ natvā sabhāṃ śubhām || 77 ||
[Analyze grammar]

jayaśabdoccārayuktā vimānenā'kṣaraṃ padam |
śrīkṛṣṇena samaṃ badri yayurmuktasvarūpiṇaḥ || 78 ||
[Analyze grammar]

babhūvuḥ kanyakāstāstu mātā muktānikāstathā |
putrāḥ pitā ca muktāste yayurdhāmā'kṣaraṃ hareḥ || 79 ||
[Analyze grammar]

ityevaṃ badrike kṛṣṇanārāyaṇo jagadruruḥ |
dīnā'nāthadaridrāṇāmuddhārako'sti sarvadā || 80 ||
[Analyze grammar]

śaraṇāgatarakṣāyāṃ tatparosti sadā prabhuḥ |
anavekṣya tu pāpāni pāpināṃ durguṇāṃstathā || 81 ||
[Analyze grammar]

śaraṇyaḥ śaraṇāyātān kathāśravaṇapāvanān |
anugraheṇa kṛpayā tānnayatyakṣaraṃ padam || 82 ||
[Analyze grammar]

madyapānaratāṃstāṃśca narānnārīḥ samastakān |
pāvayitvā prabhurninye kṛpayā svā'kṣaraṃ padam || 83 ||
[Analyze grammar]

gaṇayatyeva naivā'yaṃ karuṇāsāgaraḥ prabhuḥ |
pāpāni pāpināṃ loke nayatyavyayamakṣaram || 84 ||
[Analyze grammar]

āścaryaṃ paramaṃ prāptā lokā vīkṣya camatkṛtim |
dīnabandhuraho kṛṣṇaḥ svayamuddhārayatyapi || 85 ||
[Analyze grammar]

dadāti darśanaṃ naijaṃ dadāti vastu vāñchitam |
kṛtvā śuddhān yāmyaduḥkhaṃ vināśya śaraṇāgatān || 86 ||
[Analyze grammar]

svayaṃ nayati divyena vimānena nijaṃ padam |
aho bhāgyamaho bhāgyaṃ kathāśravaṇakāriṇām || 87 ||
[Analyze grammar]

māsamātreṇa muktiṃ sa karoti bhavapāśataḥ |
saṃhitā śrīkṛṣṇarūpā lakṣmīrūpā'sti śābdikī || 88 ||
[Analyze grammar]

pratimā tāṃ sevayitvā svargaṃ mokṣaṃ ca vindati |
paṭhanācchravaṇādasya mukto bhavenna saṃśayaḥ || 89 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne kathāśravaṇena madyapasya miṣṭāsavadhvajikuṭumbasya mārge luṇṭakaprāptakaṣṭasya śrīhariṇā mārge śreṣṭhirūpeṇa rakṣitasya mokṣaṇaṃ kṛtamityādinirūpaṇanāmā'ṣṭacatvāriṃśo'dhyāyaḥ || 48 ||
[Analyze grammar]

Other print editions:

Also see the following print editions of the Sanskrit text or (alternative) English translations of the Lakshminarayana Samhita Chapter 48

Cover of edition (2011)

Shri Lakshmi Narayana Samhita
by Chowkhamba Sanskrit Series Office (2011)

शेतायनव्यास (Shwetayan Vyas)

Buy now!
Like what you read? Consider supporting this website: