Chapter 34

śrīnaranārāyaṇa uvāca |
śṛṇu badrīpriye devi viṣṭināryāḥ kathāṃ śubhām |
saurāṣṭre dhanadhṛṅnāmni nagare cātiśobhane || 1 ||
[Analyze grammar]

rājño devarddhisiṃhasya śāsane saṃpravardhite |
viṣayo bahavaścāsan manuṣyavāhakottamāḥ || 2 ||
[Analyze grammar]

yatskandheṣu sthitāḥ śibyo na kampaṃ yānti vai manāk |
śivikāsthā na manyante bhedaṃ śibīvimānayoḥ || 3 ||
[Analyze grammar]

viṣṭayaste kṛtābhyāsā vahanti nṛpatiṃ gurum |
mātṝṃśca rājamātṝṃśca vadhūjanān satījanān || 4 ||
[Analyze grammar]

nirvahante śramavāhā vahanodbhavasaddhanaiḥ |
rājñaḥ kuṭumbinaścāpi paricaranti dāsavat || 5 ||
[Analyze grammar]

yātrālumānavānnārīvargān varān vivāhitān |
śreṣṭhinaśca tathā rājyādhikāriṇo vahantyapi || 6 ||
[Analyze grammar]

kvacit sādhūn satīḥ sādhvīrvahanti tvātapādiṣu |
tīrthāt tīrthāntaraṃ cāpi prasevante tu vaiṣṇavān || 7 ||
[Analyze grammar]

devānāmutsaveṣvete vahanti devatāstathā |
paribhramanti nagare devamūrtīḥ samūhya vai || 8 ||
[Analyze grammar]

evaṃ sevāparāḥ sarve viṣṭayo bhoyisaṃjñinaḥ |
dāsavargā narā nāryaḥ prasevante mahajjanān || 9 ||
[Analyze grammar]

satāṃ tannagare tvāsīnmaṇḍalaṃ kṛtamandiram |
saduttamo'bhavattatra svāmī śrīrādhikāyanaḥ || 10 ||
[Analyze grammar]

rādhātulyo harerbhakto virāgavān harau rataḥ |
tatrā'nye sādhavaścāsan pañcāśat śiṣyaśākhinaḥ || 11 ||
[Analyze grammar]

sādhvyaścāsan viṃśatiśca śrīkṛṣṇapratimā'pi ca |
bālakṛṣṇapratimā śrīyutā tanmandire'bhavat || 12 ||
[Analyze grammar]

kīrtanāni bhavantyeva viṣṭīnāṃ sadbhirādarāt |
sahitānāṃ ca sādhvīnāṃ gītikāśca bhavanti vai || 13 ||
[Analyze grammar]

pūjanaṃ protsavāścāpi bhavanti viṣṭibhiḥ kṛtāḥ |
viṣṭayo'pi sahasraṃ te rādhikāyanasevinaḥ || 14 ||
[Analyze grammar]

rādhikāyanaśiṣyāste hyāsan paramavaiṣṇavāḥ |
prātaḥ snānaparā dhyānaparā naivedyabhojanāḥ || 15 ||
[Analyze grammar]

tīrthārcanaparāḥ sādhusevāparāśca te'bhavan |
narā nāryaḥ samastāste bālāśca bālikāstathā || 16 ||
[Analyze grammar]

bālakṛṣṇātibhaktāścā'bhavan niḥsaṃśayā'nugāḥ |
dehena manasā dravyaiḥ sādhusevāparāyaṇāḥ || 17 ||
[Analyze grammar]

yeṣāṃ vai saṃśayo nā'bhūt satāṃ kriyāsu sarvathā |
bhojane śayane snāne mardane cāṃgavāhane || 18 ||
[Analyze grammar]

vihāre hasane divye camatkāre ca laukike |
vivastre vā savastre vā vikāre nirvikāriṇi || 19 ||
[Analyze grammar]

ramaṇe rāmaṇe vāpi bhuvi dolādhirohaṇe |
gamane dhāvane vāpi gāyane kalahe'pi ca || 20 ||
[Analyze grammar]

sarvathā sādhucaryāsu saṃśayo naiva yaddhṛdi |
tādṛśā viṣṭayaścāsan kṛpāpātrāṇi te satām || 21 ||
[Analyze grammar]

rādhāyanasataḥ prāptamantrāḥ śrīparamātmanaḥ |
ātmanivedinaḥ sarve sarvasvārpaṇatatparāḥ || 22 ||
[Analyze grammar]

sādhuṃ sādhvīṃ pramanyante nārāyaṇaṃ narāyaṇīm |
nārāyaṇayoryogena nārāyaṇatvamāpyate || 23 ||
[Analyze grammar]

evaṃvidhānāṃ viṣṭīnāṃ viśvāsavaśago hariḥ |
anādiśrīkṛṣṇanārāyaṇo'pi vaśago'bhavat || 24 ||
[Analyze grammar]

tatra viṣṭikṛtāṃ pūjāṃ gṛhṇāti nityamandire |
gṛhe gṛhe harirgatvā gṛhṇātyarhaṇamuttamam || 25 ||
[Analyze grammar]

pratyakṣasya śrīhareste kurvanti pūjanaṃ mahat |
candanairakṣataistailaiḥ sugandhibhiśca kuṃkumaiḥ || 26 ||
[Analyze grammar]

hārdairbhāvaistathā premṇā snehena hṛdayārpaṇaiḥ |
dehārpaṇaistathā sarvārpaṇairnāryo'rcayantyapi || 27 ||
[Analyze grammar]

śṛṃgārayanti viṣṭīnāṃ kanyakā mugdhamānasāḥ |
bālakṛṣṇaṃ prabhuṃ kāntaṃ vīkṣya sarvāṃgasundaram || 28 ||
[Analyze grammar]

kācit kṛtvā stanayośca caraṇau paramātmanaḥ |
kaṇṭhe kṛtvā karau tasya sukhaṃ bhuṃkte hi śāśvatam || 29 ||
[Analyze grammar]

kācit svasyā mukhe kṛṣṇamukhaṃ cākṛṣya sarvathā |
svamukhaṃ tanmukhe yuktyā svādaṃ bhuṃkte parātmanaḥ || 30 ||
[Analyze grammar]

kācit kṛṣṇaṃ nijaṃ kāntaṃ matvā śayyāgatā satī |
āsajjya sarvathā dehe kāmasukhaṃ samaśnute || 31 ||
[Analyze grammar]

kācit kṛṣṇaṃ nijadehāsane dhṛtvā svapityati |
kācit sparśaṃ gaṇḍayośca sakthnośca jaṃghayostathā || 32 ||
[Analyze grammar]

jaghanasyodarasyāpi karoti modate muhuḥ |
kācid dhṛtvā kṛṣṇapādau saṃvāhanaṃ karoti ca || 33 ||
[Analyze grammar]

kācit svorasi kṛtvaiva tādātmyaṃ yogameti ca |
kācit pracumbate kṛṣṇaṃ kācidāśliṣya tiṣṭhati || 34 ||
[Analyze grammar]

nakhānnārāyaṇaṃ tvanyā śikhāparyantameva tam |
sarvāṃgaṃ tṛṣṇayā divyaṃ vilokayati sundarī || 35 ||
[Analyze grammar]

aparā śrīharaye tu naivedyaṃ miṣṭamuttamam |
dugdhasārādikaṃ kṛtvā saṃbhojayatikanyakā || 36 ||
[Analyze grammar]

itarā śākapatraṃ pācayitvā svādagarbhitam |
polikābhiḥ samaṃ kāntaṃ prabhojayati kanyakā || 37 ||
[Analyze grammar]

parā tu śrīhariṃ kaṇṭhe pādayoḥ karayostathā |
svarṇabhūṣā dhārayati mukuṭādīni sundarī || 38 ||
[Analyze grammar]

tathā'nyā kajjalaṃ kṛṣṇanetrayoḥ pradadātyapi |
candanaṃ bhālaphalake talayoścāpyalaktakam || 39 ||
[Analyze grammar]

oṣṭhayo rañjanaṃ dehe tailaṃ dadāti bhāvukī |
nakharañjanakāryaṃ ca karotyanyā'timohitā || 40 ||
[Analyze grammar]

kṛṣṇamekāntamālambya mahānandaṃ samaśnute |
dadhi bhaktaṃ saha bhuṃkte sthālyāṃ mukhe dadātyapi || 41 ||
[Analyze grammar]

jalaṃ śītaṃ ca pibati tāmbūlaṃ pradadātyapi |
atisnehabharā kāntā bhuṃkte tāmbūlajaṃ rasam || 42 ||
[Analyze grammar]

anyā vṛddhā bālakṛṣṇaṃ vīkṣya vīkṣya tu sundaram |
antaḥsukhaṃ bhuñjate vai dhyāyantyekāgramānasāḥ || 43 ||
[Analyze grammar]

siṃhāsane sukhaṭvāyāṃ śubhāsane narāyaṇam |
upāveśya svayaṃ cāgre hyāsīnā modate kṣaṇam || 44 ||
[Analyze grammar]

vyajanenā'nilaṃ śītaṃ dadāti paramātmane |
puṣpahārān grathitvā taṃ śṛṃgārayati sarvathā || 45 ||
[Analyze grammar]

dehasya mardanaṃ cānyā dravaiḥ kurvanti tatkṣaṇe |
snapayanti jalairgandhaiḥ snehaidravārpaṇaistathā || 46 ||
[Analyze grammar]

śṛṃgāritasya nāthasyā''rārtrikaṃ hyācaranti ca |
avasthāpyoccaparyaṃke puraḥ sthitvā striyo'parāḥ || 47 ||
[Analyze grammar]

nṛtyanti cāpi gāyanti gītikā maṇḍalātmikāḥ |
rāsaṃ kurvanti dehānāmutkṣepaṇā'bhikarṣaṇaiḥ || 48 ||
[Analyze grammar]

kṛṣṇastāsāṃ mānasāni pūrayatyeva sādaraḥ |
nītvā bhāvabharāṃ bhāvaṃ pūrṇaṃ karoti vai rahaḥ || 49 ||
[Analyze grammar]

udyānādau vāṭikāsu kṣetreṣu mandireṣvapi |
vṛkṣastambāntare nadyāṃ pulīneṣu vaneṣvapi || 50 ||
[Analyze grammar]

gṛheṣu goṣṭhabhāgeṣu garteṣu gahvare'pi ca |
gṛhakakṣāsvapi yathā yathecchāvatī tatra ha || 51 ||
[Analyze grammar]

nārāyaṇo bhāvavaśo yāti tasyāṃ sukrīḍati |
bhaktamānasapūro'yaṃ bhaktā''nandapradāyakaḥ || 52 ||
[Analyze grammar]

anādiśrīkṛṣṇanārāyaṇaḥ sukhaṃ dadāti hi |
badrike tvābālavṛddhā viṣṭisundaryaṃ utsukāḥ || 53 ||
[Analyze grammar]

kṛṣṇaṃ bubhujire'tyarthaṃ dehendriyātmamānasaiḥ |
evaṃ viṣṭijanāḥ kṛṣṇaṃ satkārayanti tatkṣaṇe || 54 ||
[Analyze grammar]

rājādhirājavad vṛddhāḥ pūjayanti sma mādhavam |
yuvāno yuvabhāvāḍhyaṃ rañjayanti susevayā || 55 ||
[Analyze grammar]

kumārāstu sakhāyaṃ taṃ prasādayanti khelanaiḥ |
yatheṣṭaṃ sa harirviṣṭijanatoṣaṇamāvahat || 56 ||
[Analyze grammar]

sarvaviṣṭikuṭumbāni pāvitāni hi cakriṇā |
evaṃ bhaktivaśo nātho badrike'pāvayattadā || 57 ||
[Analyze grammar]

saṃkṣepāt kathitaṃ te'tra pratyahaṃ pāvayatyapi |
etādṛśānāṃ bhaktānāṃ kṛṣṇastvekāntatāṃ gataḥ || 58 ||
[Analyze grammar]

na yamā na niyamā nā''mnāyo nāpi ca śāsanam |
na paddhatirna cācāraḥ sarvanāthe pravartate || 59 ||
[Analyze grammar]

sarvanāthena ye bhaktimanto janāstu nāthitāḥ |
tādātmyasvīkṛtāsteṣu pravartante na te tathā || 60 ||
[Analyze grammar]

kṛṣṇācārastadā dharmaḥ kṛṣṇasnehaśca satkṛtiḥ |
kṛṣṇāptiḥ satphalaṃ divyaṃ kṛpā kṛṣṇasya sādhanam || 61 ||
[Analyze grammar]

kṛṣṇakriyā mahāyajñaḥ kṛṣṇārthaṃ puruṣārthakaḥ |
kṛṣṇabhāvo mahāyogo vijñānaṃ kṛṣṇadarśanam || 62 ||
[Analyze grammar]

kṛṣṇasya śayanaṃ dhāma muktistu kṛṣṇabhogitā |
siddhayaḥ śrīkṛṣṇanārāyaṇe sāphalyamuttamam || 63 ||
[Analyze grammar]

jīvanaṃ śrīkṛṣṇapārśve vartanaṃ harisannidhau |
vihāro'pi rahaḥ kṛṣṇe nivṛttiḥ kṛṣṇaśāntatā || 64 ||
[Analyze grammar]

pravṛttiḥ śrīkṛṣṇanārāyaṇaceṣṭānuvartanam |
kartavyaṃ ca vidhiścāpi kṛṣṇaprasādanārthakam || 65 ||
[Analyze grammar]

ratiḥ prītiśca saṃkalpaḥ kāma ānanda utsavaḥ |
sarvaṃ tṛpte harau cātmanivedināṃ tu badrike || 66 ||
[Analyze grammar]

nātmanastatra pārthakyaṃ jānāti bhaktidāsikā |
nāpi kṛṣṇetaraṃ bhuṃkte lāvaṇyavarjitaṃ tu tat || 67 ||
[Analyze grammar]

sarve rasāḥ sarvagandhāḥ sarvasparśā narāyaṇe |
sarvāḥ śrutayaḥ śrīkṛṣṇe sarvārthadarśanaṃ harau || 68 ||
[Analyze grammar]

āhārāśca vihārāśca yeṣāṃ sarve hi mādhave |
ānandāśca pramodāśca nārāyaṇe śriyaḥ patau || 69 ||
[Analyze grammar]

bhāvā hāsā vilāsāśca yugalatvaṃ harau tathā |
varatvaṃ svāmitā kṛṣṇe nāthatā ca vivāhanam || 70 ||
[Analyze grammar]

lagnagranthirharau yeṣāṃ teṣāṃ mokṣe na saṃśayaḥ |
jīvatāṃ bhuktimokṣākhyā mahānandā harergṛhe || 71 ||
[Analyze grammar]

dehānte nityabhogā sā parānandā'kṣare pade |
sarvathā mandire tasya vāso bhaktimatāṃ śubhaḥ || 72 ||
[Analyze grammar]

nirmitaḥ kṛṣṇakāntena śrīkṛṣṇātmanivedinām |
badrike viṣṭayo bhoyibhaktāstvātmanivedinaḥ || 73 ||
[Analyze grammar]

dhanadhṛgvāsinaḥ sarve vaiṣṇavāścā'bhavaṃstathā |
yadgṛheṣu svayaṃ kṛṣṇaḥ sākṣāttiṣṭhan pramodate || 74 ||
[Analyze grammar]

viṣṭikule'bhavannārī nāmnā vidrumiṇī satī |
sā tu bhaktyā turyabhāve vartate kṛṣṇamohitā || 75 ||
[Analyze grammar]

śṛṇu tvaṃ badrike lajjāṃ tyaktvā tyaktvā patiṃ gṛham |
hitvā ca mānavīṃ rītimudvṛttāntā tato'bhavat || 76 ||
[Analyze grammar]

kṛṣṇe tvātmā mano buddhirahaṃ cittaṃ janārdane |
dehendriyāṇi vai kṛṣṇe kṛṣṇaraṃgamayāni ca || 77 ||
[Analyze grammar]

yathā kṛṣṇastathā sāpi divyaceṣṭā babhūva ha |
āścaryajanikā tatra viṣṭīnāṃ sarvato'bhavat || 78 ||
[Analyze grammar]

yathā vicittā yuvatī yathonmattā ca mādinī |
yathā mastānikā vāpi pramadā pramadānvitā || 79 ||
[Analyze grammar]

vartate kṛṣṇakṛṣṇeti gāyatyapi hasatyapi |
kṛṣṇanārāyaṇaṃ kāntaṃ raṭatyapi milatyapi || 80 ||
[Analyze grammar]

janāstāṃ tādṛśīṃ vīkṣya rurudhurbaddhamandire |
pihite'pi kapāṭe sā niryayau divyavigrahā || 81 ||
[Analyze grammar]

gṛhe kṣiptā jale kṣiptā peṭāyāṃ pūritā'pi sā |
nirāvaraṇabhāvā tanniryānti divyavigrahā || 82 ||
[Analyze grammar]

gṛhād gṛhāntaraṃ nirgacchati bhittiṃ vibhidya sā |
evamadṛśyatāṃ yāti paśyatāṃ sarvadehinām || 83 ||
[Analyze grammar]

kvacit kanyā yuvatī vā vṛddhā vā sundarī śubhā |
saumyahāsyavatī kāntā kvacid rudrī bhavatyapi || 84 ||
[Analyze grammar]

prabhākṛṣṇeti kṛṣṇeti svāmikṛṣṇeti gāyati |
ekānte taṃ svāmikṛṣṇaṃ nītvā rahasi modate || 85 ||
[Analyze grammar]

sā vai paśyati kānteśaṃ kāntā kṛṣṇamanasvinī |
kṛṣṇadhyānaparā kṛṣṇaceṣṭā kṛṣṇasvarūpiṇī || 86 ||
[Analyze grammar]

kṛṣṇarūpā kvacid rādhārūpā kvacicca māṇikī |
kvacit priyā tu lalitā pārvatī ca jayā kvacit || 87 ||
[Analyze grammar]

evaṃvidhāṃ tāṃ janatā jñānavatyeva sarvathā |
divyeyaṃ khalu sampannā mahāmuktānikā tviti || 88 ||
[Analyze grammar]

matvā tāṃ siddhadehāṃ ca mahāsādhvīṃ tu rādhikām |
lokā nāryo narāstasyāḥ pūjāṃ cakrustato'rhaṇām || 89 ||
[Analyze grammar]

pādajalaṃ papuścāpi bhojayāmasurutsukāḥ |
prasādaṃ phalapuṣpādi miṣṭānnaṃ jagṛhustathā || 90 ||
[Analyze grammar]

sā'pi māyāmayaṃ spṛṣṭvā divyaṃ karoti tatkṣaṇam |
pāpijanān pāpinārīḥ karoti puṇyaśālinīḥ || 91 ||
[Analyze grammar]

darśayitvā harikṛṣṇaṃ sampreṣayati cā'kṣaram |
vimocayati tṛṣṇāṃ ca prajvālayati vāsanām || 92 ||
[Analyze grammar]

kṛṣṇaprāptiṃ kārayati prasaṃgamayatyacyutam |
mokṣamārgaṃ diśatyeva prāpayatyūrdhvagaṃ padam || 93 ||
[Analyze grammar]

vidrumiṇyāḥ prasaṃgena narā nāryaḥ sahasraśaḥ |
paśavaḥ pakṣiṇaścāpi parāṃ muktimagustadā || 94 ||
[Analyze grammar]

santaḥ sādhvyaśca tacchiṣyā babhūvurvai sahasraśaḥ |
janāśca lakṣaśastasyā mukhānmantrau prajagṛhuḥ || 95 ||
[Analyze grammar]

oṃ namaḥ śrīkṛṣṇanārāyaṇāya pataye svāhā |
anādiśrīkṛṣṇanārāyaṇaḥ svāmī patiśca me || 96 ||
[Analyze grammar]

bālakṛṣṇo harikṛṣṇaḥ śrīpatiḥ puruṣottamaḥ |
sadā'vatu prabhuścāsmān stutiṃ tvevaṃ pracakrire || 97 ||
[Analyze grammar]

evaṃ śrībadrike viṣṭinārī vidrumiṇī satī |
tenaiva varṣmaṇā divyā rādhāsamā vyajāyata || 98 ||
[Analyze grammar]

āyayau sā tīrthavāsaṃ kartuṃ lakṣajanaiḥ saha |
kuṃkumavāpikākṣetraṃ cāśvapaṭṭasarovaram || 99 ||
[Analyze grammar]

tādātmyayogamāpannā bālakṛṣṇe tiro'bhavat |
brahmapriyāsu divyāsu vartamānā'vasat tataḥ || 100 ||
[Analyze grammar]

narā nāryaśca bahudhā nyūṣurnirantaraṃ tataḥ |
tyāgāśramaṃ parigṛhya santaḥ sādhvyaśca tāpasāḥ || 101 ||
[Analyze grammar]

yoginyastāpasinyaśca bhūtvā ca yatayastathā |
ākṣare divyasaṃvāse nyuṣuścā'śvasarastaṭe || 102 ||
[Analyze grammar]

anādiśrīkṛṣṇanārāyaṇasya caraṇāśraye |
bhajitvā saṃprasevitvā prasādya parameśvaram || 103 ||
[Analyze grammar]

yayurdhāmā'kṣaraṃ divyaṃ lakṣaśo viṣayo'pi ca |
vidrumiṇī vimānena yayau dhāmā'kṣaraṃ prabhoḥ || 104 ||
[Analyze grammar]

evaṃ badrīpriye devi sā'bhavad rādhikāsamā |
mahāmuktānikā yasyāḥ smaraṇānmucyate hyaghī || 105 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne dhanadhṛkpattanasthāyā viṣṭināryā vidrumiṇyāḥ prasatsaṃgena lakṣādhimānavānāṃ divyatā mokṣaṇaṃ tasyāśca mokṣaṇamityādinirūpaṇanāmā catustriṃśo'dhyāyaḥ || 34 ||
[Analyze grammar]