Chapter 26

śrīnaranārāyaṇa uvāca |
śṛṇu badrīpriye devi tato'nādinarāyaṇaḥ |
bhaktaṃ nikāmadevaṃ taṃ prāha yogaṃ tu nirbhayam || 1 ||
[Analyze grammar]

śrīkṛṣṇanārāyaṇa uvāca |
śṛṇu nikāmadeva tvaṃ nirbhīkayogamuttamam |
yajjñātvā na bhayaṃ tasya māyākālādyakarmaṇām || 2 ||
[Analyze grammar]

anādiśrīkṛṣṇanārāyaṇasya dhyāturanvaham |
nadānatīrthatapasāṃ puṇyabhogabhayaṃ bhavet || 3 ||
[Analyze grammar]

sarvapuṇyāni vai kṛṣṇe mayi nyastāni yena tu |
tasyā'kṣaraṃ paraṃdhāma nirbhayaṃ prāpyameva hi || 4 ||
[Analyze grammar]

sarvakarmādhikaṃ karmopāsanaṃ mama sarvadā |
smaraṇaṃ cānumananaṃ sarvathā bhayanāśanam || 5 ||
[Analyze grammar]

māyāleśānusaktistu pāpaṃ cātra mahātmanām |
hareḥ smaraṇarūpaṃ tatprāyaścittaṃ mahātmanām || 6 ||
[Analyze grammar]

muhūrtasmṛtimātreṇa mama dhāmā'bhigo bhavet |
kiṃ punaḥ satataṃ bhakto nirbhīko'nyasamāgamāt || 7 ||
[Analyze grammar]

jāgratsvapnasuṣuptānāṃ pāre tiṣṭhati yogavit |
yogaḥ sa eva manaso vṛttirmayyeva sarvadā || 8 ||
[Analyze grammar]

gacchaṃstiṣṭhan śvasan kṛṣṇaṃ nārāyaṇaṃ tu māṃ smaret |
pralapan viviśan bhuṃjan raman māṃ sarvathā smaret || 9 ||
[Analyze grammar]

sarvakarmasu rakto'pi cittaṃ kuryāttu yo mayi |
tasya lepo na bhogānāṃ bhogamadhyā'dhivāsinaḥ || 10 ||
[Analyze grammar]

smṛtirme paramo dharmo dhyānaṃ tapaśca vai makhaḥ |
śuddhiḥ sarvā parā śāntiḥ sarvaṃ me smaraṇe sthitam || 11 ||
[Analyze grammar]

durlabhaṃ yatparaṃ dūramagocaraṃ yadakṣaram |
tathāpi prāpyamevā'sya smarturme kṛpayā mama || 12 ||
[Analyze grammar]

apyadhvaraśatānāṃ yad vaiguṇyaṃ vikramādikam |
nirdoṣaṃ pratyuta pūrṇaṃ śrīkṛṣṇasya smṛtermama || 13 ||
[Analyze grammar]

na smṛtyā sadṛśaṃ me'tra śodhanaṃ cā'dyakāriṇām |
bhavānāṃ dāhikā cāpi mokṣadā sā mama smṛtiḥ || 14 ||
[Analyze grammar]

niṣpannadhyānavṛttestu muktiratraiva janmani |
smarturme'nalavat kakṣaṃ smṛtirdahati vāsanām || 15 ||
[Analyze grammar]

harau cātmasthite cittasthite tu sarvakilbiṣam |
svayaṃ līnaṃ bhavatyeva tato bhayaṃ na vidyate || 16 ||
[Analyze grammar]

kalaho dūṣaṇaṃ doṣo rāga udvejanaṃ kṣayam |
na krāmenmānasaṃ smarturyatastaccittago'smyaham || 17 ||
[Analyze grammar]

tithirmāsaḥ kṣaṇaṃ yogaścandro lagnaṃ śubhaṃ dinam |
tadeva yatra govindaḥ smaryate sarvathā śubhaḥ || 18 ||
[Analyze grammar]

sā kṣatiḥ sā parā hānirvyasanaṃ tatparaṃ tathā |
yatra kṣaṇe'nādikṛṣṇanārāyaṇo na cintyate || 19 ||
[Analyze grammar]

kalau kṛtayugastasya yasya citte janārdanaḥ |
kṛte kaliyugastasya yaccitte na janārdanaḥ || 20 ||
[Analyze grammar]

agre pṛṣṭhe pura ūrdhve'dho'bhito madhyavartule |
hṛdaye yasya govindaḥ kṛtakṛtyo hi so'sti hi || 21 ||
[Analyze grammar]

śubhe'śubhe mano yasyā'nādikṛṣṇanarāyaṇe |
tasya phalaṃ mahat svargaṃ duḥkhadoṣādivarjitam || 22 ||
[Analyze grammar]

asantyajyā'pi gārhasthyaṃ smarate māṃ tu yaḥ sadā |
chinatti pauruṣīṃ māyāṃ mayyarpitakriyo hi saḥ || 23 ||
[Analyze grammar]

yasya citte hariścāste kṣamāvān so'parādhiṣu |
ajñeṣu dayayā yukto modavān dhārmikeṣu saḥ || 24 ||
[Analyze grammar]

smarennārāyaṇaṃ māṃ tu tyāgabhogādikarmasu |
jāgratsvapnasuṣuptyādau duṣkarmasvapi cādhikam || 25 ||
[Analyze grammar]

hṛdayastho'hametasya lābhaṃ jayaṃ yaśo dhanam |
sampādayāmi satataṃ śāntimānandamuttamam || 26 ||
[Analyze grammar]

asaṃkhyapakṣipādapapaśūnāṃ mokṣado'smyaham |
smaratāṃ mama caiśvaryaṃ kiṃ prapannanṛṇāṃ tadā || 27 ||
[Analyze grammar]

śrīkṛṣṇapādapacchāyā śītātapavivarjitā |
amṛtapadadā māyābhīhantrī kiṃ na sevyate || 28 ||
[Analyze grammar]

na śāpasya bhayaṃ tasya na ca rājño bhayaṃ tathā |
na tu yāmyabhayaṃ tasya yasya cittaṃ mayi prabhau || 29 ||
[Analyze grammar]

dhyānaṃ smaraṇasaṃjuṣṭaṃ pavitramuttamaṃ sadā |
yena pāpāśano'pyatra lipyate na kadācana || 30 ||
[Analyze grammar]

yathā tu viṣaye cittaṃ tathā yasya harau mayi |
tathā me satsu satsaṅge sa mukto'tra pramuktidaḥ || 31 ||
[Analyze grammar]

kṛṣṇanārāyaṇabhaktirhṛdaye vāsakāriṇī |
tatsaṅgasaṅgisaṅgāḍhyān tārayatyaghasāgarāt || 32 ||
[Analyze grammar]

tajjñānaṃ śrīhariryatra sā kathā yatra mādhavaḥ |
satkarma tad yatra cāhaṃ taccittaṃ yanmadarpitam || 33 ||
[Analyze grammar]

jihvā sā yā hariṃ stauti sā tvag yā spṛśati prabhum |
tau hastau cāśleṣitau māṃ tadvarṣma yanmadarthakam || 34 ||
[Analyze grammar]

śiraḥphalaṃ namo me'tra pāṇiphalaṃ madarcanam |
manaḥphalaṃ mananaṃ me vacaḥphalaṃ guṇastavaḥ || 31 ||
[Analyze grammar]

merutulyaḥ pāparāśirmatsmṛterdrāgvinaśyati |
sādhvasādhu caritaṃ cārpitaṃ mayi na lepakṛt || 36 ||
[Analyze grammar]

anāthānāṃ harirnātho'balānāṃ tu balaṃ hariḥ |
sakāmānāṃ harirdātā sarveṣāṃ śaraṇaṃ hariḥ || 37 ||
[Analyze grammar]

anādiśrīkṛṣṇanārāyaṇā''śrayo'tra bhūsura |
tīrthaṃ tatparamaṃ māyākālakarmādināśakam || 38 ||
[Analyze grammar]

śūdraṃ carmakaraṃ cāṇḍālaṃ vā bhaktiyutaṃ mama |
vipravat pāvanaṃ manye mama yogaṃ gato hi saḥ || 39 ||
[Analyze grammar]

dhanināṃ stāvakāḥ prāyo yadi stuvanti māṃ tathā |
dhaneśvarāniha kṛtvā mocayāmi ca bandhanāt || 40 ||
[Analyze grammar]

vahnirvane'bhisaṃvyāptaḥ śuṣkā''rdradāhako yathā |
tathā'haṃ hṛdaye nyasto dahāmi vāsanādikam || 41 ||
[Analyze grammar]

prajvalantaṃ mahāraṇyaṃ nāśrayanti mṛgeśvarāḥ |
tathā mayā prakāśantaṃ nāśrayanti madādayaḥ || 42 ||
[Analyze grammar]

yāvadvegena bhaktirme viśvāso'pi yathā mama |
tathā'tra phalamāpnoti kṛpā'tra me viśiṣyate || 43 ||
[Analyze grammar]

putradārakuṭumbādau magnā sīdanti dehinaḥ |
sīdanti mayi te cedvai drāguttaranti madbalāt || 44 ||
[Analyze grammar]

muktimukhaṃ tu pihitaṃ yena sādhuniṣevaṇam |
tasya muktiṃ na paśyāmi kadāpi bhāvisarjane || 45 ||
[Analyze grammar]

pūjayet paramātmānaṃ māṃ sadā hṛdaye bahiḥ |
dhyāyenmāṃ sarvagaṃ mūrtaṃ kāntaṃ śrīvallabham prabhum || 46 ||
[Analyze grammar]

guruṃ patiṃ svāminaṃ māṃ juṣṭaṃ sākṣiṇamacyutam |
parabrahmā'nādi kṛṣṇaṃ nārāyaṇaṃ pareśvaram || 47 ||
[Analyze grammar]

evaṃvidhaṃ tu māṃ dhyāyan pūjya sanmānya mānada |
avāpsyasi dhruvaṃ tāta śāśvataṃ me'kṣaraṃ padam || 48 ||
[Analyze grammar]

ityevaṃ bodhito vipro nikāmadeva ādṛtaḥ |
mahāharṣaṃ samāpannaḥ sāmovāca tu nirbhayam || 49 ||
[Analyze grammar]

nṛtyan gāyan hasan dehaṃ kūrdayan ceṣṭayan muhuḥ |
uvācā''veśayogena nirbhayaṃ sāma gāyanam || 50 ||
[Analyze grammar]

bālakṛṣṇaṃ prapanno'smi kiṃ me kālaḥ kariṣyati |
akṣareśaṃ parameśaṃ brahmeśaṃ puruṣottamam || 51 ||
[Analyze grammar]

śaṃkhacakragadāpadmadhāriṇaṃ parameśvaram |
adhokṣajaṃ prapanno'smi kiṃ me mṛtyuḥ kariṣyati || 52 ||
[Analyze grammar]

anādiśrīkṛṣṇanārāyaṇaṃ śrīpatimacyutam |
gopālajaṃ prapanno'smi kiṃ me māyā kariṣyati || 53 ||
[Analyze grammar]

sarvāvatāriṇaṃ sarvaśaktisevitamādhavam |
kāṃbhareyaṃ prapanno'smi kiṃ me pāpaṃ kariṣyati || 54 ||
[Analyze grammar]

kuṃkumavāpikātīrthaṃ lomaśasya śubhāśramam |
aśvasaraḥ prapanno'smi kiṃ me karma kariṣyati || 55 ||
[Analyze grammar]

bhagavantaṃ sarvadhāmnāṃ nārāyaṇanarāyaṇam |
rādhākāntaṃ prapanno'smi kiṃ me tṛṣṇā kariṣyati || 56 ||
[Analyze grammar]

māyātāraṃ kṛṣṇanārāyaṇaṃ śrīmādhavīpatim |
māṇikīśaṃ prapanno'smi kiṃ me kāmaḥ kariṣyati || 57 ||
[Analyze grammar]

sarvāntaryāmiṇaṃ sākṣād bālayoginīsvāminam |
parameśaṃ prapanno'smi kiṃ me bhrāntiḥ kariṣyati || 58 ||
[Analyze grammar]

akṣareśaṃ ca mukteśaṃ muktānikāpatiṃ harim |
brahmapriyeśaṃ prāpto'smi kiṃ me sampat kariṣyati || 59 ||
[Analyze grammar]

īśvareśaṃ ceśvarāṇīpatiṃ haripriyāpatim |
prabhumpatiṃ prapanno'smi ki me tamaḥ kariṣyati || 60 ||
[Analyze grammar]

padmāvatīsvāminaṃ ca jaḍacetanavartinam |
lakṣmīnāthaṃ prapanno'smi kiṃ vāsanā kariṣyati || 61 ||
[Analyze grammar]

ekarūpaṃ bahurūpaṃ viśvarūpaṃ tu bālakam |
satāṃ patiṃ prapanno'smi kiṃ me bandhaḥ kariṣyati || 66 ||
[Analyze grammar]

oṃnamaḥ śrīkṛṣṇanārāyaṇāya pataye svāhā |
namo'kṣaranivāsāya namo golokavāsine || 63 ||
[Analyze grammar]

namo vaikuṇṭhanāthāya namaḥ śrīpuravāsine |
namo lalitākāntāya sarvakāntāya te namaḥ || 64 ||
[Analyze grammar]

bālayoginīkāntāya badrīkāntāya te namaḥ |
nikāmadevanāthāya vāsudevāya te namaḥ || 65 ||
[Analyze grammar]

namo'mṛtanivāsāya namo'vyākṛtavāsine |
namaḥ kailāsavāsāya hiraṇyagarbhavāsine || 66 ||
[Analyze grammar]

namaḥ siddhādhivāsāya namaḥ surādivāsine |
namaḥ pitṛnivāsāya namo mānavarūpiṇe || 67 ||
[Analyze grammar]

namaḥ sarvanivāsāya namo madātmavāsine |
sureśvarīhṛdisthāya namo'nantasvarūpiṇe || 68 ||
[Analyze grammar]

namo dehendriyaprāṇāntarātmavāsine sadā |
namaste paramānanda namaste jñānasaṃbhṛta || 69 ||
[Analyze grammar]

namaste jñānavijñānaprada śrīpuruṣottama |
namaste viśvakṛdviṣṇo namaste sarvakāraṇa || 70 ||
[Analyze grammar]

namaste gopagopīśa namaḥ sarvārthasādhaka |
namaste'nugrahadātarnamaste mokṣada prabho || 71 ||
[Analyze grammar]

jaya kṛṣṇa jaya viṣṇo mamā'bhayada mādhava |
jaya śānta cidānanda saccidānanda keśava || 72 ||
[Analyze grammar]

jaya jīva jayada tvaṃ jaya sākṣājjanārdana |
jaya śāstrādisannyastabījagarbhādyupāsana || 73 ||
[Analyze grammar]

tvaṃ gurustvaṃ pitā bhrātā suhṛd bandhuḥ prasūrmama |
tvaṃ mokṣastvaṃ parānandastvaṃ me sarvasvamacyuta || 74 ||
[Analyze grammar]

tvamuddhartā ca pātā ca netā tvaṃ viratirbhavān |
jagat sarvaṃ tava rūparūpitaṃ saṃprakāśate || 75 ||
[Analyze grammar]

tvaṃ parabrahma bhagavan devādyaistu durāsadaḥ |
mayā tvāsāditaścā'tra bālayoginīvaibhavāt || 76 ||
[Analyze grammar]

kastvāṃ jānāti cātmeśa muktagamyaṃ parātparam |
sanātanapumāṃsaṃ taṃ purāṇapuruṣottamam || 77 ||
[Analyze grammar]

paraṃ rūpamajānto divaukaso maharṣayaḥ |
avatāramayīmūrtīste bhajanti sugocarāḥ || 78 ||
[Analyze grammar]

avatārā bhajante tvāṃ pumāṃsamavatāriṇam |
nārāyaṇā asaṃkhyāstvāṃ bhajante paramāyaṇam || 79 ||
[Analyze grammar]

nārāyaṇyaśca muktānyastvāṃ bhajante paraṃ patim |
santo muktāstvāṃ bhajante sarvāvasthāsu satpatim || 80 ||
[Analyze grammar]

tavā'jñānena bhagavan mānuṣādinisargataḥ |
kṣantumarhasi sarvaṃ me yat kṛtaṃ na kṛtaṃ tava || 81 ||
[Analyze grammar]

sarvāvasthāsu sarvatra sarvakāleṣu sarvathā |
acalā tu hare bhaktisteṃ'ghriyuge'stu me prabho || 82 ||
[Analyze grammar]

prītistvayyeva satataṃ bhavatvātyantikī mama |
sarvakāmaphaladātastvayi bhaktirdṛḍhāstu me || 83 ||
[Analyze grammar]

stotraṃ kartumanantasya kaḥ śaknoti tu mānavaḥ |
tathāpi vyāpṛtaṃ vākyaṃ kṣamasva nātha te namaḥ || 84 ||
[Analyze grammar]

puruṣottamayogena nirbhayatvaṃ prajāyate |
tava yogena puruṣaḥ puruṣottamatāṃ vrajet || 85 ||
[Analyze grammar]

adhanyo jāyate dhanyastvasādhuḥ sādhutāṃ vrajet |
abhāgyo bhāgyavān syācca te stavāt puruṣottama || 86 ||
[Analyze grammar]

api lokabahiṣkāryā yadi te śaraṇaṃ gatāḥ |
sādhuśīlā hi te sarve jāyante paṃktipāvanāḥ || 87 ||
[Analyze grammar]

yeṣāṃ sarvādhipe kṛṣṇe bhaktiravyabhicāriṇī |
api cāṇḍālakarmāṇaste'pi viprottamottamāḥ || 88 ||
[Analyze grammar]

api śaucasamācārāḥ kṛṣṇe te saṃgavarjitāḥ |
śmaśānavāsāste sarve sarvakilbiṣasaṃbhṛtāḥ || 89 ||
[Analyze grammar]

tava dhyānaparā ye ca tava pūjāparāyaṇāḥ |
tava prasādabhoktāraste sadā vighasāśinaḥ || 90 ||
[Analyze grammar]

ārādhya satataṃ tvāṃ śrīhariṃ sarvasukhapradam |
prāpya tvāṃ paramātmānameṣṭavyaṃ nāvaśiṣyate || 91 ||
[Analyze grammar]

sādhubhiścintyate yaśca sādhvībhiḥ kāmyate tu yaḥ |
pīyate yogamāpannairyaḥ sa kṛṣṇo'stu me hṛdi || 92 ||
[Analyze grammar]

bhāvapuṣpaiḥ pūjayāmi śraddhāñjaliprado'smi ca |
ātmānaṃ dakṣiṇāṃ kṛtvā'rpayāmi te pareśvara || 93 ||
[Analyze grammar]

yathā sarpiḥ śarīrasthaṃ gavāṃ na kurute balam |
nirgataṃ karmasaṃyuktaṃ dattaṃ tāsāṃ balapradam || 94 ||
[Analyze grammar]

tathā tvaṃ hṛdayastho'pi mānavānāṃ balāya na |
tvameva nirgataḥ sākṣād bhūto balāya vidyase || 95 ||
[Analyze grammar]

vinā''rādhanayā kṛṣṇa tvaṃ kṛpāvaśago mama |
pratyakṣaṃ mānavaṃ rūpaṃ dṛṣṭaṃ nārāyaṇācyuta || 96 ||
[Analyze grammar]

sadaiva sevitaṃ cāpi divyaṃ rūpaṃ pradarśaya |
yadyahaṃ pātramasmyatra kṛpāpātraṃ bhavāmi cet || 97 ||
[Analyze grammar]

vipratvaṃ me gataṃ cāpi tvayyeva tatsamarpitam |
muktatvaṃ vartate me cet sarvāṃśe tava bhaktimān || 98 ||
[Analyze grammar]

evaṃ śrībadarīdevi prārthitaḥ parameśvaraḥ |
kṛpayaiva bhūsurāya divyaṃ rūpamadarśayat || 99 ||
[Analyze grammar]

akṣarasthaṃ cā'vatārairasaṃkhyairāprapūritam |
muktairmuktānikābhiśca sevitaṃ kamalādibhiḥ || 100 ||
[Analyze grammar]

tathā śrībālayoginyā badaryā juṣṭamutsukam |
kṛpayā'darśayat kṛṣṇanārāyaṇo nikāmine || 101 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne śrīkṛṣṇanārāyaṇakṛtanirbhayayogopadeśottaraṃ nikāmadevasya divyajñānāptilābhottaraṃ stutirityādinirūpaṇanāmā ṣaḍviṃśo'dhyāyaḥ || 26 ||
[Analyze grammar]