Chapter 21

śrīnaranārāyaṇa uvāca |
śṛṇu badrīpriye devi sadā me sahacāriṇi |
tataḥ śrīmātaraṃ prāha yaṃ dharmaṃ bālayoginī || 1 ||
[Analyze grammar]

tyāginīnāṃ vṛṣā ye ca yoginīnāṃ ca ye vṛṣāḥ |
gṛhiṇīnāṃ vṛṣā ye ca te'nuyanti pareśvare || 2 ||
[Analyze grammar]

sādhvīnāṃ ye vṛṣāḥ proktā dāsīnāṃ cāpi ye vṛṣāḥ |
vadhūnāṃ kiṃkarīṇāṃ ye te'nuyanti janārdane || 3 ||
[Analyze grammar]

śobhante te vṛṣāḥ sarve sarvāsāṃ mādhavīśvare |
sarvadhamāśraye kṛṣṇanārāyaṇe sudharmiṇi || 4 ||
[Analyze grammar]

bhogāḥ sarve vilāsāśca kāmāśca sampado'pi ca |
vibhūtayaḥ striyo dāsyo yujyante paramātmani || 5 ||
[Analyze grammar]

vane vāso vivāsāśca jaṭitvaṃ cā'vamānitā |
kāṣāyakṛṣṇaveṣitvaṃ yujyante'pi parātmani || 6 ||
[Analyze grammar]

āśramāścāpi varṇāśca yujyante śrīramāpatau |
śraddhāyutā tato nārī praseveta pareśvaram || 7 ||
[Analyze grammar]

sarvadharmāśrayaṃ jñātvā śrīkāntaṃ kambharāsutam |
alpaprajñā tu gṛhṇīyāt svāṃ tu paṇḍitamāninīm || 8 ||
[Analyze grammar]

nirdoṣāṃ ca bahujñā ca pareśaṃ buddhivarjitam |
sarvakartāramātmānaṃ sarvakartrīṃ pareśvarīm || 9 ||
[Analyze grammar]

lakṣmīpatiṃ badarīśaṃ laliteśaṃ tu kiṃkaram |
śeṣādivanditaṃ kṛṣṇaṃ tathā vṛthābhimāninam || 10 ||
[Analyze grammar]

nigamāgamavandyaṃ taṃ tucchaceṣṭādikāriṇam |
evaṃ doṣān harau kṛṣṇe samudbhāvya vadedghṛṇām || 11 ||
[Analyze grammar]

sā tu dharmānna jānāti dharmamūrtiṃ na vindati |
parameśaṃ na manute manute karmacāriṇam || 12 ||
[Analyze grammar]

etādṛśī mohavatī brahmarasaṃ na vindati |
vindatyevā'rasaṃ kaṣṭaṃ yāmyakṛtaṃ tu dakṣiṇe || 13 ||
[Analyze grammar]

satsaṃgena vaśaṃ yāti prabhuḥ kṛṣṇanarāyaṇaḥ |
harau satsu ca sādhvīṣu tvātmabuddhiḥ sadā śubhā || 14 ||
[Analyze grammar]

yasyāḥ prajāyate prītijananī sārvakālikī |
saiva vaśaṃ harikṛṣṇadhavaṃ karoti kāminī || 15 ||
[Analyze grammar]

ātmabuddhiryathā dehe nāryāṃ patyau ca mandire |
bhavane pratimāyāṃ ca jale nijajanādiṣu || 16 ||
[Analyze grammar]

putre ca viṣaye svaṣṭe tathendriye mukhe śubhe |
rūpe bhoge vilāse ca tathā yasyā harau prabhau || 17 ||
[Analyze grammar]

saiva kṛṣṇarasaṃ pāti pibatyapi muhurvadhūḥ |
saiva kṛṣṇaṃ vaśaṃ sampādayatyeva na cetarā || 18 ||
[Analyze grammar]

yā bhāvinī kṛṣṇakāntā tasyāśceṣṭāpi vaiṣṇavī |
devābhigamanaṃ nityaṃ kṛṣṇadarśanamanvaham || 19 ||
[Analyze grammar]

kṛṣṇanārāyaṇavārtākathārasātimodanam |
satāṃ samāgame vṛttistīrthavāso viśeṣataḥ || 20 ||
[Analyze grammar]

kṛṣṇabhakteṣu ramaṇaṃ śayana kālayāpanam |
nirbhīkatvaṃ māyikeṣu tathaudāsīnyamanvaham || 21 ||
[Analyze grammar]

tulyatā kṛṣṇabhinneṣu kṛṣṇe viśeṣatā sadā |
sārarūpaṃ tu yat kārṣṇaṃ tadanyat sāravarjitam || 22 ||
[Analyze grammar]

satāṃ prasannatārthaṃ ca kriyāḥ sarvāḥ praceṣṭanam |
hareḥ svarūpacintaiva guṇagānaṃ harestathā || 23 ||
[Analyze grammar]

haryarthaṃ kṛtasarvasvaṃ hayarthaṃ jīvanādikam |
śṛṃgārarūpasaundaryaṃ haryarthaṃ sarvameva tat || 24 ||
[Analyze grammar]

yasyā evaṃ sadā vṛttaṃ bhāvinī sā haripriyā |
parabrahmarasavettrī nārāyaṇī ramānibhā || 25 ||
[Analyze grammar]

ante pakvadṛḍhamūlā parabrahmahṛdaṃgatā |
prītiryasyā harau prāptā viśrāntiṃ sā rasāśanā || 26 ||
[Analyze grammar]

yatrā''varaṇaṃ nāstyeva brahmasattātmavartane |
nirāvaraṇā tadyogād brahmanārāyaṇī bhavet || 27 ||
[Analyze grammar]

anyattyāgavatī sādhvī rodhakasya visarjinī |
prāṇeśasyā'bhiyānā ca kalyāṇādeśaśāyinī || 28 ||
[Analyze grammar]

saṃginīnāṃ sakhīnāṃ śreyase yatnopadeśinī |
sveṣṭasvāmicaritrāṇāṃ gāyikā copadeśikā || 29 ||
[Analyze grammar]

satāṃ hareśca kaiṃkarye vetti śreyo nijaṃ param |
yasyāḥ santyadhikāḥ santaḥ śreṣṭhā brahmādito'pyati || 30 ||
[Analyze grammar]

hareḥ satāṃ suyogādvai nānyacchreyaḥ paraṃ matam |
mahāpuṇyavatīnāṃ ca sevāyogaṃ karotyapi || 31 ||
[Analyze grammar]

snehaḥ satsu yathā patnyāṃ patyau putre ca mātari |
sahodare ca pitari gurau dehe dhane tathā || 32 ||
[Analyze grammar]

kārayitrī harau satsu snehaṃ sā rasapātrikā |
kṛtārthā sā nityasaktā snigdhā bhavati bhāminī || 33 ||
[Analyze grammar]

pūrvabhavādibhiḥ sādhorhareḥ sevāparāyaṇā |
punarbhavaṃ prasādārthaṃ sevārthaṃ saṃgatecchayā || 34 ||
[Analyze grammar]

bhajamānāṃ na lokānāṃ vikṣepāḥ pīḍayanti tām |
harerviyogavikṣepāḥ satāṃ viyogarūpiṇaḥ || 35 ||
[Analyze grammar]

pīḍayantyeva tāṃ bhaktāṃ brahmarasaparāyaṇām |
svayaṃ śrūtvā'vamānādi sveṣṭasya ca satāmapi || 36 ||
[Analyze grammar]

udvegaṃ hṛdaye neje prāpnoti svāvamānavat |
śrutvā mānaṃ satāṃ cāpi modate sā haripriyā || 37 ||
[Analyze grammar]

sādhusvāmyaparādhādyasahamānā haripriyā |
śiro datvā'pi kāntasya kṛṣṇasya rañjane sthitā || 38 ||
[Analyze grammar]

kṛṣṇanārāyaṇe bhāve nimnagā na kadācana |
asaṃśayā hareḥ kārye hyupasthitā ca yā bhavet || 39 ||
[Analyze grammar]

sapatnīnāṃ sakhīnāṃ ca snehapakṣābhiyoginī |
haryarthārpitasarvasvā mastakaṃ svaṃ dadātyapi || 40 ||
[Analyze grammar]

ājñāṃ prāpyā'vicāryaiva karoti sarvathā tathā |
parabrahmarasāsvādā drutaṃ sā jāyate sakhī || 41 ||
[Analyze grammar]

dehendriyāntaḥkaraṇairātmanā kriyayā hi sā |
kṛṣṇārpaṇavidhānā vai drutaṃ cāpnoti tadrasam || 42 ||
[Analyze grammar]

manāk vā kṛṣṇasaṃyuktā divyatāṃ yāti tatkṣaṇāt |
sarvaṃ naijaṃ yojayedvai kṛṣṇasevādikarmasu || 43 ||
[Analyze grammar]

varteta śrīkṛṣṇanārāyaṇakāntaparāyaṇā |
sā śrīrādhāramātulyā jāyate'traiva mādhave || 44 ||
[Analyze grammar]

pātivratyena ca tathā hyātmaniṣṭhā'tiśobhinā |
dāsyena yā'pi sevāyāṃ vartate sā'kṣarapriyā || 45 ||
[Analyze grammar]

prakāśamānāṃ satataṃ brāhmī cā'kṣarasannibhā |
brahmabhāve nije rūpe parabrahma prapaśyati || 46 ||
[Analyze grammar]

ataḥ kṛṣṇetarat saukhyaṃ viṣavad bhāsate sadā |
kṛṣṇasaṃge bhavecchāntiritaratra tu tāpanam || 47 ||
[Analyze grammar]

kṛṣṇasaṃgisatāṃ saṃge cāśraye śāntirasti ca |
kṛtārthatā satāṃ saṃgairhareḥ saṃgairviśeṣataḥ || 48 ||
[Analyze grammar]

sevayā'pi mahāmokṣo bhavet prākṛtayoṣitām |
kṛṣṇasattāvatīnāryā māyākālabhayaṃ na vai || 49 ||
[Analyze grammar]

satāṃ sattāvatīnāryā vāsanābandhanaṃ na vai |
ātmaniṣṭhāvatīnāryāḥ punarjanmabhayaṃ na vai || 50 ||
[Analyze grammar]

hareḥ prītimatīnāryā mṛtyupāśo na vidyate |
bhaktasevāvatīnāryā nirayāṇāṃ bhayaṃ na vai || 51 ||
[Analyze grammar]

satāṃ darśanakartryāstu vyādhyādhibhīrna vidyate |
santaḥ santi brahmarūpā brahmamūrtaya uttamāḥ || 52 ||
[Analyze grammar]

teṣāṃ sevāsamaṃ puṇyaṃ mokṣo vā'nyo na vidyate |
balecchā yadi varteta sevanīyā hi sādhavaḥ || 53 ||
[Analyze grammar]

svarūpāḥ śrīhareḥ santo'vatārāḥ śreyasāṃpradāḥ |
paro'nādikṛṣṇanārāyaṇaḥ śrīmādhavīpatiḥ || 54 ||
[Analyze grammar]

svāmī sarvāvatārāṇāṃ muktānāṃ brahmaṇastathā |
svāminīnāṃ ca śaktīnāmīśvarīṇāṃ ca kāraṇam || 55 ||
[Analyze grammar]

vāsudevādayo vyūhāḥ śrīkṛṣṇādyāstu pūrṇakāḥ |
āveśāḥ parśurāmādyā aṃśāḥ pṛthvādayastathā || 56 ||
[Analyze grammar]

sanakādyāḥ kalāścāpi sūryādyāśca vibhūtayaḥ |
nārāyaṇāśca vibhavā arcāstu śaktimūrtayaḥ || 57 ||
[Analyze grammar]

sarve te brahmadehā vai parabrahmodbhavāḥ śubhāḥ |
parabrahmasamāḥ sevyāḥ parabrahmarasāptaye || 58 ||
[Analyze grammar]

sarve te pūrṇasukhadāḥ saṃbhṛtāḥ sukhasadrasaiḥ |
parabrahmānandadāste sevyā yoṣinnarādibhiḥ || 59 ||
[Analyze grammar]

mokṣadāste matāḥ sarve sarvakāmapradāstathā |
divyānandapradāḥ sarve māyāpārakarāstathā || 60 ||
[Analyze grammar]

teṣāṃ sarvāvatārāṇāṃ dhārakaḥ puruṣottamaḥ |
anādiśrīkṛṣṇanārāyaṇo gopālanandanaḥ || 61 ||
[Analyze grammar]

koṭyarbudābjakāntānāṃ kāntaḥ śrīkambharātmajaḥ |
svā'kṣaraparadhāmastho rājādhirājaśāsanaḥ || 62 ||
[Analyze grammar]

dadāti darśanaṃ sṛṣṭau yatrecchā bhaktapūraṇī |
anādisarvasiddhayāḍhyaḥ sarvāścaryaprapūjitaḥ || 63 ||
[Analyze grammar]

anantacamatkāreśo yugapatsarvarūpadhṛk |
koṭyarbudābjamūrtyātmā sarvayogakalānidhiḥ || 64 ||
[Analyze grammar]

rasiko rasikānāṃ saḥ tyāgināṃ tyāgavartanaḥ |
jñānināṃ jñānadaścāpi sarvamānasapūrakaḥ || 65 ||
[Analyze grammar]

sarvabalacchalakalāmāyājālaphalārthakṛt |
sarvoparisthitaḥ śāstā'nādisvāminarāyaṇaḥ || 66 ||
[Analyze grammar]

nirmoho dehideheṣu hyalaukikapratāpavān |
bhaktasevāṃ premayuktāmaṅgīkartuṃ kṛpāvaśaḥ || 67 ||
[Analyze grammar]

bhaktadattān viṣayotthān bhogān bhuṃkte patiryathā |
ajñā doṣān kalpayanti manvate saktameva tam || 68 ||
[Analyze grammar]

prākṛtaṃ mānavaṃ yadvat khalā mahimavarjitāḥ |
eṣā bhrāntiśca māyā ca tādṛśānāṃ harāviha || 69 ||
[Analyze grammar]

na jñānaṃ śrīhareryadvai pratyutā'bhāvadarśanam |
brahmasthitisamāpannā ye tvātmadarśino janāḥ || 70 ||
[Analyze grammar]

na muhyanti harau tatra jānanti parabhāvanām |
nāpi muhyanti māyāyāṃ kuto moho harestadā || 71 ||
[Analyze grammar]

nirlepaḥ sarvadā cāsti kṛṣṇanārāyaṇaḥ prabhuḥ |
sarvabhoktā'pyabhoktā'sti pāvanaḥ pāvako yathā || 72 ||
[Analyze grammar]

nāryaḥ pavitrā jāyante tadbhogairgopikā iva |
narāḥ pavitrā jāyante satsaṃgāttasya sarvathā || 73 ||
[Analyze grammar]

evaṃvido narā bhaktā bhaktānikāśca sarvaśaḥ |
jñānaikāntikatā'nanyadāsyabhaktā matāḥ sadā || 74 ||
[Analyze grammar]

tādṛśānāṃ kṛte kṛṣṇo brahmarasān suśāśvatān |
pravarṣayati mūrtisthān prapāyayati cāśritān || 75 ||
[Analyze grammar]

kṛpā mukhyaṃ sādhanaṃ vai harerbrahmarasāptaye |
āśrayaḥ sādhanaṃ cāpi prapattiḥ sādhanaṃ param || 76 ||
[Analyze grammar]

ananyabhāvanā cāpi dṛḍhopāstiśca sādhanam |
ājñāprapālanaṃ cāpi sevā snehaśca sādhanam || 77 ||
[Analyze grammar]

māhātmyajñānamevāpi smaraṇaṃ ca nirantaram |
sarvasvārpaṇamevā'pi viśvāso nyāsa ityapi || 78 ||
[Analyze grammar]

dāsyaṃ śuśrūṣaṇaṃ pātivratyaṃ sādhutvamityapi |
patnītvaṃ svāminītvaṃ ca premabhāvābhiṣañjanam || 79 ||
[Analyze grammar]

kṛṣṇeṅgitānusaraṇaṃ satāṃ prasannatādikam |
sākṣāt satāṃ susatsaṃgo harerbrahmarasapradaḥ || 80 ||
[Analyze grammar]

yasyāḥ satāṃ bhagavataḥ sākṣātprāptirihā'sti vai |
tasyāsteṣāṃ kathāgānaiḥ smṛtyā kālasya nirgamaḥ || 81 ||
[Analyze grammar]

tryavasthā'tītacaitanyātmakātmano nijasya vai |
brahmarūpasya sākṣāt syād darśanaṃ kṛṣṇamiśritam || 82 ||
[Analyze grammar]

kṛṣṇavajjāyate dhāmni loke'pyatra na saṃśayaḥ |
anādiśrīkṛṣṇanārāyaṇasya caraṇāśraye || 83 ||
[Analyze grammar]

atra paratra sarvatra vasati rādhikā yathā |
svāminī jāyate tatra sevikā'nugrahāddhareḥ || 84 ||
[Analyze grammar]

yāvantaṃ ca mahimānaṃ jānāti paramātmānaḥ |
sukhasāmarthyaśobhābhipratāparūpasadguṇaiḥ || 85 ||
[Analyze grammar]

tāvatsamarthā bhavati kārṣṇī nārāyaṇī yathā |
tathāpi śrīhareḥ patyuḥ sāmarthyāderasīmatā || 86 ||
[Analyze grammar]

apāratā mahaiśvaryasaundaryādestu mādhave |
asaṃkhyakoṭayaḥ santi mādṛśyo bhagavannibhāḥ || 87 ||
[Analyze grammar]

prāptāḥ kṛṣṇasakāśāt tā guṇaiśvaryaprabhādikam |
tathāpi mahimā patyuścāpāro vidyate sadā || 88 ||
[Analyze grammar]

leśo'pi nyūnabhāvo na vidyate paramātmani |
sāmarthyaguṇakarmādisaundaryasukhadāyitāḥ || 89 ||
[Analyze grammar]

kalyāṇadharmayogāśca bhavantyanantasaṃkhyakāḥ |
harestairguṇaleśaiśca bhajanaiśca hareḥ pare || 90 ||
[Analyze grammar]

haritulyāḥ prajāyante hyanantārbudavaiṣṇavāḥ |
tathāpi nāṇumātraśrīharipratāpasadguṇāḥ || 91 ||
[Analyze grammar]

nyūnatāṃ saṃvrajantyeva paripūrṇatamastataḥ |
agādhā'pārasīmādisakhyā'ntachedavarjitaḥ || 92 ||
[Analyze grammar]

vartate śrīkṛṣṇanārāyaṇaḥ śrīpuruṣottamaḥ |
bhajanena gatā dhāmni tatsamā api yoṣitaḥ || 93 ||
[Analyze grammar]

apāratāṃ viditvaiva sevante sevikāḥ sadā |
dāsyaḥ sadā pravartante brahmarasān prabhuñjate || 94 ||
[Analyze grammar]

evaṃ kiṃ bahunoktena prāptā sādhanakoṭibhiḥ |
sādhyaṃ kāntaṃ badarīśaṃ māṇikyeśaṃ satāṃ patim || 95 ||
[Analyze grammar]

bhavāmīti na cānyanme prāptavyamavaśiṣyate |
vidheyaṃ śiṣyate naiva vivāhitāyāścakriṇā || 96 ||
[Analyze grammar]

sarve kāmāḥ samāptā me mātaḥ śrībālamādhave |
tato'haṃ sarvadā dāsī kṛṣṇasya bālayoginī || 97 ||
[Analyze grammar]

badarīśī tāpasī ca brahmaśīlā pareśvarī |
bhavāmi śrīkṛṣṇanārāyaṇakāntarasātmikā || 98 ||
[Analyze grammar]

rasaṃ vindāmi tasyaiva jātā'pi tava putrikā |
varadānaprapūrtyarthamihā'haṃ samupāgatā || 99 ||
[Analyze grammar]

kṛṣṇārdhā'haṃ kṛṣṇakāntā lalitā māṇikī yathā |
rādhā lakṣmīḥ mādhavī ca yathā kṛṣṇasya vai priyāḥ || 100 ||
[Analyze grammar]

bhaja mātastathā taṃ śrīkṛṣṇanārāyaṇaṃ prabhum |
ityuktvā sā kanyakā svāṃ mātaraṃ tu sureśvarīm || 101 ||
[Analyze grammar]

virarāmā'dhikavāṇyai kṛṣṇanārāyaṇasmṛtiḥ |
tataḥ sureśvarī kāntaṃ nikāmadevamāha tat || 102 ||
[Analyze grammar]

putrīyaṃ badarīdevī māṇikyā cākṣare sthitā |
anādiśrīkṛṣṇanārāyaṇapatnī pareśvarī || 103 ||
[Analyze grammar]

putrīrūpā gṛhe'smākaṃ prajātā'sti narāyaṇī |
nānyaṃ cecchati viṣayaṃ śrīkṛṣṇakāntamantarā || 104 ||
[Analyze grammar]

tadyoge cāvayormuktirbhāvinyeva na saṃśayaḥ |
evaṃ vijñāya vipro'pi mumude cābhajaddharim || 105 ||
[Analyze grammar]

bālayoginī bālyādvai babhūva brahmacāriṇī |
sā tvaṃ śrī badarīdevi badaryāśramavāsinī || 106 ||
[Analyze grammar]

badrīprabhe bhavasi badrikā tyāgasvarūpiṇī |
smara sarvaṃ tavaivemaṃ vṛttāntaṃ parameśvari || 107 ||
[Analyze grammar]

mama premarasaḥ prāptastvayā vai śāśvataḥ sadā |
karoṣi tvaṃ yoṣitāṃ ca mokṣaṇaṃ gītayā'nayā || 108 ||
[Analyze grammar]

bālayoginīṃ gītāṃ yā nārī śroṣyati vai tathā |
vadiṣyati harau snehaṃ vidhāsyati vadhūriva || 109 ||
[Analyze grammar]

sā vaṃśaṃ ca dhanaṃ kīrtiṃ sukhaṃ śāśvatajīvanam |
kāntaṃ kṛṣṇaṃ parabrahma samavāpsyati dhāmani || 110 ||
[Analyze grammar]

caturṇāṃ puruṣārthānāṃ siddhistasyā bhaviṣyati |
tāmbūlaṃ prāpya kṛṣṇāṃ'ke bhokṣyatyakṣayyatadrasam || 111 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne bālayoginīgītāyāṃ śāśvatabālayogabrahmarasapradadharmādīnāṃ nirūpaṇanāmaikaviṃśatitamo'dhyāyaḥ || 21 ||
[Analyze grammar]