Chapter 20

śrīnaranārāyaṇa uvāca |
śṛṇu badrīpriye devi tataḥ śrībālayoginī |
punaḥ svamātaraṃ prāha yattadvadāmi te tathā || 1 ||
[Analyze grammar]

upāsanāṃ parabrahmarasāsvādanadāyinīm |
ātmanaḥ kiraṇaṃ yadvanmano'ntaḥkaraṇaṃ tathā || 2 ||
[Analyze grammar]

mānasīṃ pratimāṃ kṛtvopāsīta manasi prabhum |
avikṛtaṃ manastadvai yatkṛṣṇe cānusaṃhitam || 3 ||
[Analyze grammar]

tadeva bodhyaṃ paramabhāgavatasatāṃ manaḥ |
āsaktaṃ yaddharau nityaṃ śītoṣṇabhāvavarjitam || 4 ||
[Analyze grammar]

sādhu manastadvijñeyaṃ kṛṣṇe niścalaniṣṭhitam |
akhaṇḍasnehadhārāḍhyaṃ kṛṣṇe viśrāmameti yat || 5 ||
[Analyze grammar]

siddhavad yadivadyogijanavanmuktavanmanaḥ |
vadhūvat kāntavadyacca nijeṣṭatamavattathā || 6 ||
[Analyze grammar]

yanmano vartate kṛṣṇe yatsphūrtiṃ vidadhāti yat |
yanmagna yatsmṛterhetustadaśnute hareḥ rasam || 7 ||
[Analyze grammar]

nirvāsanaṃ mano nityaṃ nirvāsanaharisthitam |
hareḥ satāṃ sevayā ca vāsanā līyate drutam || 8 ||
[Analyze grammar]

sevāyāṃ kiṃkarī bhūtvā rājñyapi vartate tu yā |
dānādhīnasamā dāsī prasādaṃ vindati prabhoḥ || 9 ||
[Analyze grammar]

bhagavataḥ satāṃ cāpi ruceraviṣayaṃ tu yat |
na kartavyaṃ bhaved yasyāḥ kartavyaṃ kṛṣṇarocakam || 10 ||
[Analyze grammar]

antarāyakaraṃ kṛṣṇasevāyāmiṣṭamityapi |
tyaktavyaṃ ca bhaved yasyā hareḥ prasādamṛcchati || 11 ||
[Analyze grammar]

guruvatpitṛvanmātṛvadbhūmipālavattathā |
hariḥ prasannatāmeti śiṣyāyāṃ yā hi rocikā || 12 ||
[Analyze grammar]

śreyase yā satāṃ prasannatārthaṃ yatate sadā |
dayātyāgau kṛṣṇasevopāsanāyāṃ kṣatipradau || 13 ||
[Analyze grammar]

dayātyāgau tato mandīkṛtyā'pi mādhavaṃ bhajet |
puṣpaśṛṃgārahārādyaḥ prasādayet priyampatim || 14 ||
[Analyze grammar]

śayyābhojanapānādyaiḥ toṣayenmādhavīpatim |
sarvasvārpaṇadānādyaiḥ rāmayellalitāpatim || 15 ||
[Analyze grammar]

sarvendriyāntaḥkaraṇairupāsīta śriyāḥ patim |
dehena guṇadharmādyaiḥ prasādayejjayāpatim || 16 ||
[Analyze grammar]

bhaktān prasādayeccāpi sevayā cānusevayā |
bhaktānāmapi bhaktā syād yā sā brahmarasāśanā || 17 ||
[Analyze grammar]

hareḥ prasannatāheturbhaktasevā'pi cottamā |
bhaktasaṃpaprasādau ca bhaktasevā rasapradā || 18 ||
[Analyze grammar]

bhūsthāpi sādhusevāyāṃ raktā yā sā'kṣare sthitā |
na rogāḥ śrīhareḥ saṃge vighnaṃ kurvanti sevane || 19 ||
[Analyze grammar]

sāvadhānā harernāmnāṃ vṛttāntasya śrave'pi ca |
dṛḍhāsaktyā dṛḍhasaṃskāraiśca kṛṣṇamayī bhavet || 20 ||
[Analyze grammar]

brāhmī bhūtvā bhajet kṛṣṇaṃ vallabhaṃ svāminaṃ prabhum |
akṣarātītapuruṣottamaṃ kāraṇakāraṇam || 21 ||
[Analyze grammar]

vāsudevaṃ bhagavantaṃ mahāpuruṣapūruṣam |
pitaraṃ sarvasṛṣṭīnāṃ patiṃ sarvaśarīriṇām || 22 ||
[Analyze grammar]

sākṣiṇaṃ karmiṇāṃ cāntaḥprakāśakaṃ guṇātmanām |
uttamaṃ ca viśeṣaṃ ca puṃsāṃ sarvāvatāriṇam || 23 ||
[Analyze grammar]

svāminaṃ brahmapuruṣairupāsitapadāmbujam |
seveta kambharānandaṃ bālakṛṣṇaṃ narāyaṇam || 24 ||
[Analyze grammar]

kṛṣṇe sambandhamutkṛṣṭaṃ kuryāt sañjīvanī latā |
amṛtāvallikā yadvacchinnā saktā'pi jīvati || 25 ||
[Analyze grammar]

vaṭadruvat prakuryācca snehaṃ śrīmativallabhe |
jaṭāṃ svasmāt samudbhāvya śākhāmūlo'pi jīvati || 26 ||
[Analyze grammar]

tathendriyādiviṣayaiḥ snehaṃ kṛtvā'pi mādhave |
yā jīvet prāṇamarpayya sā kṛṣṇarasamaśnute || 27 ||
[Analyze grammar]

kṛṣṇaṃ kuṭumbinaṃ naijaṃ snigdhaṃ sarvārthapūrakam |
jñātvā dhṛtvā'gragaṃ kṛtvā vihared brahmabhūmiṣu || 28 ||
[Analyze grammar]

dhyātvā sākṣād bālakṛṣṇaṃ saṃkīrtya guṇagāyanaiḥ |
āsevya hṛdaye kāntaṃ rahorasaṃ samarjayet || 29 ||
[Analyze grammar]

smṛtiṃ sadā'ntaḥkaraṇe kuryācchrīkṛṣṇacakriṇaḥ |
prasannatāṃ hareḥ śreṣṭhāmāsādayet prasevayā || 30 ||
[Analyze grammar]

niṣkāmatāṃ prālayecca kṛṣṇārthakṛtaniścayā |
sarvasvārpaṇarūpā sā śrīkṛṣṇe sarvakāmanā || 31 ||
[Analyze grammar]

evaṃ naiṣkarmyamāsādya niṣkāmaṃ kṛṣṇamarjayet |
upāsīta patiṃ kṛṣṇaṃ kriyayā sevayehayā || 32 ||
[Analyze grammar]

snehabhaktyā bhāvanayā nijārpaṇavidhānayā |
āsaktyā prajñayā vāsanayā''tmārpaṇacintayā || 33 ||
[Analyze grammar]

prāṇārpaṇaprakāreṇa rasecchācintanena ca |
sādhvīdharmaviśeṣeṇa tathā'bhyāsena cā'rjayet || 34 ||
[Analyze grammar]

kṛṣṇaṃ kṛṣṇarasaṃ kṛṣṇasatāṃ satsaṃgasadrasam |
kārṣṇīnā ca samastānāṃ rasaṃ divyaṃ samarjayet || 35 ||
[Analyze grammar]

sañcitāni samastāni prabhaukānte vinikṣipet |
dehendriyādi karmāṇi śrīkṛṣṇe nikṣipet satī || 36 ||
[Analyze grammar]

ātmadarśanakartrī syāt paramātmavilokinī |
hareścaritragītyādyaiścopāsanādibhistathā || 37 ||
[Analyze grammar]

smṛtyā santatayā cāpi kṛṣṇarasaṃ samarjayet |
upāsīta hariṃ sākṣāttaccaritrāṇi kīrtayet || 38 ||
[Analyze grammar]

nāmābhibhajanaṃ kuryāt kṛṣṇadharmaṃ prapālayet |
kṛṣṇalīlāmayī bhūtvā kṛṣṇabrahmarasaṃ pibet || 39 ||
[Analyze grammar]

akhaṇḍavṛttiṃ śrīkṛṣṇe samādhinā pravartayet |
śūravīrā bhavet kṛṣṇe snigdhā māhātmyavedinī || 40 ||
[Analyze grammar]

kṛpāpātraṃ bhaveccāpi sevayā sā rasaṃ pibet |
kṛṣṇaṃ vinā'nyatucchārthe sneho māyā hi tāṃ jayet || 41 ||
[Analyze grammar]

kṛṣṇājñāṃ saṃvahenmūrdhnā māyā tasyā layaṃ vrajet |
dhanade putrade loke pratītirjāyate drutam || 42 ||
[Analyze grammar]

sā pratītirharau kṛṣṇe yasyāḥ sā prakṛtiṃ jayet |
svabhāvaṃ svaṃ ca sā tyaktvā śrīkṛṣṇe praviśet sadā || 43 ||
[Analyze grammar]

jīvātmano harau tatra tādātmyaṃ snehasaṃbhṛtam |
divyaṃ vai bandhanaṃ kṛṣṇe praveśo raṭanātmakaḥ || 44 ||
[Analyze grammar]

kṛṣṇaṃ vinā mahāduḥkhavipannadivasān nayet |
kṛṣṇe'nādau pare nārāyaṇe tādātmyamāpnuyāt || 45 ||
[Analyze grammar]

dehānte vā sadehe vā kṛṣṇakāntetibhāvayet |
antardṛṣṭyā harau kānte'parokṣānubhavo bhavet || 46 ||
[Analyze grammar]

tena brahmarasaśreṣṭhasukhacaitanyamāpatet |
kṛṣṇanārāyaṇaḥ sākṣāt svarasaṃ vai samarpayet || 47 ||
[Analyze grammar]

sadā sā kṛṣṇavāmāṃgī rahasyaṃ paramaṃ labhet |
jagatsthityai bhaktatṛptyai vartate bhuvi mādhavaḥ || 48 ||
[Analyze grammar]

anādivāsudevo'pi kṛṣṇo nārāyaṇaḥ prabhuḥ |
dharmārthakāmanāceṣṭāḥ kṛtavān prakarotyapi || 49 ||
[Analyze grammar]

jīvā gāyanti śṛṇvanti tāste mucyanta eva ha |
māyāyā bandhanāt pāpāt prāpnuvanti paraṃ padam || 50 ||
[Analyze grammar]

janma karma ratiḥ kāmo mūrtiśceṣṭā kriyā hareḥ |
mūrtirdivyā mokṣadā ca sarvaṃ kṛṣṇasya mokṣakṛt || 91 ||
[Analyze grammar]

śrīkṛṣṇaparamabrahmopāsanāṃ vidadhati yā |
dṛḍhapratītiyuktā sā vadhūṭīḥ syāt pareśvarī || 52 ||
[Analyze grammar]

satāṃ sevāparā sādhvī bhavet kārṣṇī janārdanī |
bhaktāparādhanirapekṣiṇī kṛṣṇādyapekṣiṇī || 53 ||
[Analyze grammar]

satāṃ sevā'pekṣiṇī ca śrīkṛṣṇarasabhāginī |
mahāsukhābdhimagnā sā sammānārhā ramā yathā || 54 ||
[Analyze grammar]

bhavatyeva sadā sevāguṇagrāhyarthanāvatī |
daṇḍavatprapraṇāmādiparā sādhvādarānvitā || 55 ||
[Analyze grammar]

ajñātadrohaśāntyarthaṃ dīnavatprārthanāparā |
kṛṣṇapremātimagnā ca sādhvāśīrvādapātriṇī || 96 ||
[Analyze grammar]

bhāgyaṃ mahattamaṃ naijaṃ sevāyāṃ manyate satām |
hareḥ prasannatārthaṃ sā nijakalyāṇahetave || 57 ||
[Analyze grammar]

sarvasvaṃ saṃpradāyaiva brahmarasaṃ samaśnute |
pratigopisamarūpo dadāti svaṃ rasaṃ param || 58 ||
[Analyze grammar]

koṭyarbudābjapatnīnāṃ pratirūpo babhūva yaḥ |
vivāhe ca ratau vāse rahasye rasasampradaḥ || 559 ||
[Analyze grammar]

anādiśrīkṛṣṇanārāyaṇo gopālanandanaḥ |
akṣarādhipatiḥ svāmī kāntaḥ śrīkambharātmajaḥ || 60 ||
[Analyze grammar]

svāminīśrīmahālakṣmīlālito mādhavīpatiḥ |
koṭimuktānikāsvāmī pratyātmāntaratatpatiḥ || 61 ||
[Analyze grammar]

sarvakāmapradastasya yogasthā rasamaśnute |
snigdhāṃ mugdhāṃ viyuktāṃ na kadācit kurute prabhuḥ || 62 ||
[Analyze grammar]

guṇātītā nijasattāmātrarūpāṃ samutthitām |
nirguṇāṃ brahmarūpātmaprītiṃ sā mādhave'śnute || 63 ||
[Analyze grammar]

yasyāḥ satāṃ bhagavataḥ saṃgo vā darśanaṃ purā |
jātaṃ tasyā divyabhāvo brahmabhāvaḥ sadā bhavet || 64 ||
[Analyze grammar]

nā'syā māyā naiva rāgo vāsanā na harītarā |
badarīnātharamaṇe sarvathā vartanaṃ bhavet || 65 ||
[Analyze grammar]

nirannabhuktātulyā sā hareḥ prasannatāparā |
bhaktaprasādamāpannā tatparā parame pade || 66 ||
[Analyze grammar]

kṛṣṇanārāyaṇamūrtisaccidānandabhoginī |
satāṃ prasādamāsādya bhuṃkte dhāmā'kṣare sukham || 67 ||
[Analyze grammar]

agnicandrārkavidyudbhiḥ prasāditā hi sādhavaḥ |
tataste saṃprakāśante sadaiva sukhino divi || 68 ||
[Analyze grammar]

śubhaiḥ santastoṣaṇīyā brahmarasāptihetave |
te santi brahmacaitanyarasapūrṇā harau sthitāḥ || 69 ||
[Analyze grammar]

ātmakalyāṇaparamabrahmānandasukhaiṣiṇī |
hareḥ satāṃ prasādaṃ vai sevayā sarvathā'rjayet || 70 ||
[Analyze grammar]

hāniṃ vṛddhiṃ hi lokānāṃ dṛṣṭvā yo na viśocati |
bhajate śrīhariṃ divyaṃ satpuruṣaḥ sa kṛṣṇavat || 71 ||
[Analyze grammar]

ekāntikaṃ mahābhāgavataṃ dharmaṃ samāśritaḥ |
abhāvastādṛśānāṃ tu yasyāḥ sā mṛtasadṛśī || 92 ||
[Analyze grammar]

vindatyatra na saukhyaṃ svaṃ kathaṃ brahmasukhaṃ labhet |
mahāpāpā'pi yā nārī satāṃ guṇaṃ prasannatām || 73 ||
[Analyze grammar]

sevāṃ cājñāṃ pragṛhṇāti sā pūtā'pyakṣaraṃ vrajet |
satāṃ yogena pāpāni praṇaśyanti drutaṃ tviha || 74 ||
[Analyze grammar]

indriyāṇi śarīraṃ ca mana ātmā matistathā |
divyānyatra prajāyante paramokṣakarāṇyapi || 75 ||
[Analyze grammar]

akhaṇḍaṃ śāśvataṃ kṛṣṇasvarūpaṃ satsamāgame |
sthitvā'rjyaṃ paramabrahmarasāvāptyai striyā tataḥ || 76 ||
[Analyze grammar]

kṛṣṇavat kṛṣṇabhaktānāṃ mitho bhaktaiḥ sumānanam |
kartavyaṃ cāpi boddhavyaṃ māhātmyaṃ sevanaṃ tathā || 77 ||
[Analyze grammar]

kṛṣṇanārāyaṇasaṅgād bhaktā bhaktānikāstviha |
divyāste ākṣarāḥ santi muktā nirguṇabhāvanāḥ || 78 ||
[Analyze grammar]

pāvanāḥ sarvalokānāṃ sevanīyā yato mithaḥ |
mokṣadāste prasannāḥ syuḥ kṛṣṇasteṣu virājate || 79 ||
[Analyze grammar]

rādhāramādyā bhaktāsu virājante sadā striṣu |
anādiśrīkṛṣṇanārāyaṇo nareṣu rājate || 80 ||
[Analyze grammar]

prasādanīyāḥ satataṃ kṛṣṇavacchrīryathā mithaḥ |
prasādena hi labhyante parabrahmarasābdhayaḥ || 81 ||
[Analyze grammar]

upāsanā hareryadvat tathā satāṃ sadā śubhā |
bhaktānāṃ cāpi kartavyā brahmānandastato bhavet || 82 ||
[Analyze grammar]

nijānandarasaṃ bhuṃkte sahajānandasadrasam |
kṛṣṇanārāyaṇasvāmirasaṃ kārṣṇī vadhūḥ sadā || 83 ||
[Analyze grammar]

kṛṣṇamūrtyakhaṇḍacintāvatī sādhvī sakhī priyā |
premapūrṇā bālakṛṣṇasvarūpaikyagatā satī || 84 ||
[Analyze grammar]

yā kṛṣṇarasasampūrṇā tasyāṃ kṛṣṇo'pi sarvadā |
prasahya vasati premṇā dātuṃ naijaṃ rasaṃ param || 85 ||
[Analyze grammar]

sādhvīmadhye ramā cāste ramāyāṃ bhagavānapi |
mahānandarasastatra kṛṣṇe nityaṃ virājate || 86 ||
[Analyze grammar]

rase premasakhī cāste premasakhyāṃ tathā hariḥ |
evamaikātmyamevā'sti sakhīkṛṣṇarasātmanām || 87 ||
[Analyze grammar]

sādhvī kṛṣṇamayī yatra janma gṛhṇāti sundarī |
tatprasūstadgṛhaṃ tasyā dhanyāḥ kuṭumbibāndhavāḥ || 88 ||
[Analyze grammar]

brahmavitsādhusaṃgena vārteyaṃ jñāyate parā |
anādiśrīkṛṣṇanārāyaṇasākṣātpradarśanam || 89 ||
[Analyze grammar]

cintanaṃ sphuraṇaṃ brahmavitsatāṃ saṃgamād bhavet |
lābho mānuṣadehasya nānyo haryāptimantarā || 90 ||
[Analyze grammar]

sarvendriyāṇi sādhūnāṃ hareḥ sevārthakāni ca |
tatparāṇi sadā yasyāścaikāntikī hi sā bhavet || 91 ||
[Analyze grammar]

mukhyā sā haribhaktāsu rādhā lakṣmīḥ prabhau yathā |
ekāntaṃ kṛṣṇakāntasya yasyā rasāya rocate || 92 ||
[Analyze grammar]

yasyāḥ kṛṣṇasvarūpasyā''kārasya divyatā matā |
satāṃ ca divyatā yasyāḥ sā'śnute kṛṣṇasadrasam || 93 ||
[Analyze grammar]

yathā nadyaḥ samudreṣu yathā'gnau tu pataṃgakāḥ |
śūrā raṇeṣu satyaśca patyau kṛṣṇe tu gopikāḥ || 94 ||
[Analyze grammar]

līnāḥ sarvasvahomāśca bhavanti hi tathā harau |
ekarase paripūrṇe brahmātmani pareśvare || 95 ||
[Analyze grammar]

līnā yā cākṣarī bhaktā divyā strī puruṣottamī |
akhaṇḍitā'tisnehā ca niḥsīmaprītiyojikā || 96 ||
[Analyze grammar]

sarvadravābhiyogā ca sarvathā kṛṣṇasaṃśritā |
labhate cāśnute kṛṣṇakāntarasaṃ tu śāśvatam || 97 ||
[Analyze grammar]

ātmasattāsvarūpeṇa vartamānā prabhāpatau |
maryādayā'titādātmyamāpannā labhate rasam || 98 ||
[Analyze grammar]

ityuktvā badrike tāvadvirarāma hi sā kṣaṇam |
mātā'pyupāsanāyogād brahmarasecchukī hyabhūt || 99 ||
[Analyze grammar]

bālayoginī bāleśaṃ bālakṛṣṇaṃ balīśvaram |
bālarasātmakaṃ prāpya modate mātṛsannidhau || 100 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne bālayoginīgītāyāṃ śrīkṛṣṇakāntopāsanayā tadrasāvāptiritinirūpaṇanāmā viṃśo'dhyāyaḥ || 20 ||
[Analyze grammar]