Chapter 16

śrīnaranārāyaṇa uvāca |
śṛṇu badrīpriye tvaṃ yatprāha śrībālayoginī |
narmakartrīsamākhyānaṃ mātaraṃ brahmarāsanam || 1 ||
[Analyze grammar]

tatte vakṣyāmi kṛṣṇasya brahmarasāśanapradam |
yacchrutvā'pi narā nāryastadrītyā yānti mokṣaṇam || 2 ||
[Analyze grammar]

āsīd grāme kāmayāne nāmnā devalako janaḥ |
tasya bhāryā'bhavat sādhvī narmakāryavicakṣaṇā || 3 ||
[Analyze grammar]

audāsīnyagatasyā'pi mahāduḥkhagatasya ca |
hāsyavinodaśūnyasya hāsyaṃ janayate tu sā || 4 ||
[Analyze grammar]

tatkālocitalāvaṇyapūrṇavākyaistathetaraiḥ |
yāvadrasaprayogaiśca narma janayate drutam || 5 ||
[Analyze grammar]

gṛhe samāgatā lokāḥ prasannamānasā hyati |
jāyante vārtayā tasyāḥ samarpayanti copadāḥ || 6 ||
[Analyze grammar]

dhanaṃ bhūṣā ambarāṇi miṣṭānnāni śubhāni ca |
dhānyāni copakaraṇānyapi sarve'rpayanti ca || 7 ||
[Analyze grammar]

rājā rājasabhāyāṃ ca mahotsave nijotsave |
sūrikāvyottaraṃ tasyā hāsyarasaṃ yunaktyapi || 8 ||
[Analyze grammar]

sabhā prasannā bhavati modante mānavā hyati |
rājā tasyai mahāpāritoṣikaṃ pradadātyapi || 9 ||
[Analyze grammar]

evaṃ sā devalabhāryā nāmnā vinodinī satī |
saurāṣṭre subhage deśe prasiddhā saṃvyajāyata || 10 ||
[Analyze grammar]

hāsyakalābhyasanārthaṃ tvāyānti yoṣito narāḥ |
tān sā yathāyathaṃ sarvān śikṣayatyapi sarvathā || 11 ||
[Analyze grammar]

athaikadā'gamattasyā gṛhe satāṃ sumaṇḍalam |
sādhvīnāṃ maṇḍalaṃ cāpi bhagavadbhaktikārakam || 12 ||
[Analyze grammar]

bhojitā vanditāḥ sarve gṛhe svāgatakarmabhiḥ |
tayā prasevitāścāpi rātrau cakruḥ sukīrtanam || 13 ||
[Analyze grammar]

sādhūnāṃ kīrtanaṃ śrutvā sādhvīnāṃ gītikāstathā |
parameśamatirjātā bhaktidharmaparāyaṇā || 14 ||
[Analyze grammar]

vinodinyā vicāro'bhūd vinodena hariḥ svayam |
yathā satāṃ ca sādhvīnāṃ kītanaiḥ suprasādavān || 15 ||
[Analyze grammar]

santuṣṭo jāyate kṛṣṇanārāyaṇaḥ paraprabhuḥ |
tathā bhavet susantuṣṭo nityaṃ tathā karomyaham || 16 ||
[Analyze grammar]

vicāryetthaṃ brahmarasāyanākhyasādhutastu sā |
jagrāha vaiṣṇavaṃ mantraṃ mokṣadaṃ tūlasīsrajam || 17 ||
[Analyze grammar]

oṃ namaḥ śrīkṛṣṇanārāyaṇāya pataye svāhā |
jajāpa paramaṃ mantraṃ mūrtiṃ jagrāha citrajām || 18 ||
[Analyze grammar]

pupūja tāṃ harermūrtiṃ nityaṃ prasevate mudā |
bhaktā jātā hareḥ śuddhā vinodinī vilāsinī || 19 ||
[Analyze grammar]

sā papraccha guruṃ sādhuṃ brahmarasāyanā'bhidham |
brahmānandamahāmiṣṭānandarasāptisādhanam || 20 ||
[Analyze grammar]

atyādareṇa tāṃ śiṣyāṃ prāha brahmarasāyanaḥ |
sarve rasā yatra caikībhavanti parame rase || 21 ||
[Analyze grammar]

śrīmatsvāmibālakṛṣṇanārāyaṇā'vatāriṇi |
tadāptistadrasāptestu sādhanaṃ bhagavān svayam || 22 ||
[Analyze grammar]

premabhaktyātmasarvasvaniveditā hareḥpriyā |
ātmanivedanenā'yaṃ śrīkṛṣṇaḥ samavāpyate || 23 ||
[Analyze grammar]

ātmanivedanaṃ snehapremānurāgasaṃbhṛtam |
prātikūlyā'lasatvā'śraddhādidoṣavivarjitam || 24 ||
[Analyze grammar]

anyavṛttyapratihataṃ satatasphūrtigocaram |
divyā'parokṣabhānāḍhyaśrīkṛṣṇakāntasaṃśritam || 25 ||
[Analyze grammar]

pañcabhūtaśarīre'syā''veśaḥ kṛṣṇasya sarvathā |
indriyāṇāṃ gocareṣu mūrtistasyaiva tadguṇāḥ || 26 ||
[Analyze grammar]

tadviṣayāstanmādhuryaṃ tatsukhaṃ tatpramoditā |
tadrasastasya saṃsparśastadrūpaṃ tacchravastathā || 27 ||
[Analyze grammar]

tadgandhastasya cādānaṃ tadvihārastatsarjanam |
tadānandaśca mananaṃ tasya sañcintanaṃ matiḥ || 28 ||
[Analyze grammar]

tanmānaṃ tannirṇayaśca tatpramā tatsmṛtistathā |
tatsaṃskārāstadicchā ca sa jñeyo jñaptisaṃgrahe || 29 ||
[Analyze grammar]

sphūrtau bhāne virāme ca sa eva gocaraḥ sadā |
antarbahiśca sa eva kṛṣṇanārāyaṇaḥ prabhuḥ || 30 ||
[Analyze grammar]

gupte prakāśe hṛdaye nirjane sajane'pi saḥ |
kriyāyāṃ nijaceṣṭāyāṃ hāsye pramodane ca saḥ || 31 ||
[Analyze grammar]

sarvathā''bhūṣaṇādau ca śṛṃgāre'pi harirhi saḥ |
snāne svapane dhūlyādau vinode ca vrate'pi saḥ || 32 ||
[Analyze grammar]

svatve pārakyarūpe ca samarpaṇe grahe'pi ca |
ādāne ca pratidāne vinimaye'pi māpatiḥ || 33 ||
[Analyze grammar]

paritaḥ sanmukhe pṛṣṭhe madhye'dhaścārdhake'pi saḥ |
anuyogī pratiyogī saṃsarge'pi harirhi saḥ || 34 ||
[Analyze grammar]

āsvādye rasyavikṛtau tṛptau peye'tiśītale |
kāmye cākarṣaṇe goṣṭhau vinode'pi ca mādhavaḥ || 35 ||
[Analyze grammar]

gṛhe vane catvare ca vitardau maṃcake'pi saḥ |
dolāyāṃ ca vimāne ca yāne ca vāhane'pi saḥ || 36 ||
[Analyze grammar]

iṣyamāṇe ca tadbhinne mahānandātmako hariḥ |
ānukūlyapravāhe ca pracchādye'pi prabhurhi saḥ || 37 ||
[Analyze grammar]

evaṃ sarvatra bhagavān yasyāḥ śrīkṛṣṇa eva hi |
tasyā bhaktiḥ premapūrṇā sādhanaṃ kṛṣṇalabdhikṛt || 38 ||
[Analyze grammar]

kṛṣṇāptau tadrasāptiśca śāśvatī cā'nivartinī |
tadyogajā bhaved divyā cātmārpaṇarasādijā || 39 ||
[Analyze grammar]

anyathā nā''pyate kṛṣṇo nā''pyate tadraso'pi ca |
nāpyate śāśvatānando vinodini kṛpāṃ vinā || 40 ||
[Analyze grammar]

sevayā tvarjayettasya kṛpāṃ snehena tanmanaḥ |
arpaṇenā'rjayet kṛṣṇaṃ kṛṣṇena tanmahārasam || 41 ||
[Analyze grammar]

phalaṃ brahmarasaṃ prāpya prāptavyaṃ nā'vaśiṣyate |
ityuktā guruṇā sādhvī vinodinī tu devalī || 42 ||
[Analyze grammar]

guroḥ sevāṃ tathā cakre yathā śikṣā samarjitā |
nārāyaṇaḥ svayaṃ kṛṣṇo gururnārāyaṇaḥ svayam || 43 ||
[Analyze grammar]

pratyakṣaḥ sarvaphalado yathābhaktānuvartanaḥ |
gururbrahma guruḥ kṛṣṇo gururjīvahariḥ prabhuḥ || 44 ||
[Analyze grammar]

sa eva toṣitaḥ samyak sarvamānuṣanāṭanaḥ |
tayā pratoṣito deveśvarādhipanarāyaṇaḥ || 45 ||
[Analyze grammar]

matvaivaṃ sā guruṃ bhaktyā toṣayāmāsa sundarī |
brahmacaryaparā dharmaparā sevāparāyaṇā || 46 ||
[Analyze grammar]

gurustasyā gṛhe vāsaṃ ciraṃ cakāra śāntimān |
athaikadā dadhārā'sau rūpaṃ devalakasya vai || 47 ||
[Analyze grammar]

atha taṃ sundaraṃ kāntaṃ patiṃ guruṃ vibudhya sā |
uvāca parayā prītyā dhanyā'smyanugrahā'rthinī || 48 ||
[Analyze grammar]

yatheṣṭaṃ gurudeva tvaṃ mama svāmisvarūpadhṛk |
prasevasva nijāṃ matvā brahmarasaṃ prapāyaya || 449 ||
[Analyze grammar]

pātivratyaṃ svāmyadhīnaṃ svāmī tvaṃ vartase'dhunā |
nārāyaṇasvarūpastvaṃ svāmirūpo'si gṛhṇa mām || 50 ||
[Analyze grammar]

atha prasanno gururāḍ vīkṣya sarvāṃ subhāvanām |
agṛhya tāṃ tataścāśīrvādaṃ dadau hṛdā mudā || 51 ||
[Analyze grammar]

bhava dāsī hareḥ patnī bhaktā caikāntinī parā |
divyalakṣmīsamā śiṣyā nārāyaṇī narottamī || 52 ||
[Analyze grammar]

ahaṃ tvatsevayā tuṣṭo dadāmi te'tivaibhavam |
camatkāraṃ divyarūpadhāriṇī sukhinī bhava || 53 ||
[Analyze grammar]

ityuktvā śrīgururbrahmarasāyano vinodinīm |
pasparśa karamātreṇa pāyayāmāsa vāri ca || 54 ||
[Analyze grammar]

tāvad divyā pararūpā rādhālakṣmīsamā satī |
nirāvaraṇadehā ca sambabhūva vinodinī || 55 ||
[Analyze grammar]

evaṃ jātā divyadevī divyakriyā'timānuṣī |
guruḥ pūjāṃ gṛhītvā ca kṛṣṇapūjāṃ samarpya ca || 56 ||
[Analyze grammar]

tirobabhūva sahasā vidyullateva cāmbare |
vīkṣyaivaṃ paramaṃ śreṣṭhaṃ camatkāraṃ gurāvapi || 57 ||
[Analyze grammar]

vinodinī mahāścaryaparā stabdhā'bhavat kṣaṇam |
tarkayāmāsa bahudhā ko'yaṃ gurusvarūpadhṛk || 58 ||
[Analyze grammar]

sākṣānnārāyaṇaḥ kiṃvā naro nārāyaṇā'nujaḥ |
īśvaro vā'ntarātmā vā parabrahma prabhuśca vā || 59 ||
[Analyze grammar]

divyatāṃ saṃgatā yasya kṛpayā sparśanena ca |
tathāpi divyadṛṣṭyā'yaṃ gururmayā na vīkṣyate || 60 ||
[Analyze grammar]

ato'tidivyalokastho bhavennārāyaṇo guruḥ |
māyālokāstu me dṛṣṭergocarāḥ santi cā'dhunā || 61 ||
[Analyze grammar]

dṛśyate na gurustatra tato brahma bhavedayam |
aho prāpto vinodinyā vinodena vinodakṛt || 62 ||
[Analyze grammar]

athāpi dhanyabhāgyā'smi gurvarpitāmamāyikīm |
kṛṣṇamūrtiṃ bhajiṣye'haṃ yatiṣye labdhaye punaḥ || 63 ||
[Analyze grammar]

ityevaṃ sā mahāśāntiṃ matvā dhyāyati cācyutam |
tāvadanye sādhavaśca sādhvyaścāpi tiro'bhavan || 64 ||
[Analyze grammar]

sarve te śrīkṛṣṇanārāyaṇamūrtau layaṃ gatāḥ |
atha prāptā niścayaṃ sā gururmūrtiriyaṃ yataḥ || 65 ||
[Analyze grammar]

sākṣānnārāyaṇe kṛṣṇe sarve'tra vilayaṃ gatāḥ |
gururmūrtiṃ ca me datvā tiro'bhavanna lokyate || 66 ||
[Analyze grammar]

tataḥ so'yaṃ vartate'dya svāmikṛṣṇanarāyaṇaḥ |
evaṃ tvatiprasantuṣṭā prāha devalakaṃ patim || 67 ||
[Analyze grammar]

mūrtiścā'yaṃ svayaṃ sādhurbrahmarasāyanātmakaḥ |
cetano'pi pratimā''ste dhanyaḥ svāmin bhavasyapi || 68 ||
[Analyze grammar]

āvayoḥ paramaṃ bhāgyaṃ vinodena ca dehinām |
antarātmā pratuṣṭaḥ sannasmadgṛhamapāyayau || 69 ||
[Analyze grammar]

vinodayiṣye satataṃ taṃ sākṣātpuruṣottamam |
sevāṃ karotu bhagavan bhavān svāmin sadā'sya vai || 70 ||
[Analyze grammar]

atha mūrtiṃ sajīvāṃ tāṃ sevete tau mudānvitau |
yathoktarītyā deveśaṃ yathāsatkāramānanam || 71 ||
[Analyze grammar]

devalako nityamevā'rcayatyacyutamutsukaḥ |
kintu vinodinī bheje prabhuṃ pratyakṣavat patim || 72 ||
[Analyze grammar]

tathāpi śrīkṛṣṇanārāyaṇaścetanarūpavān |
nā''virbhavati mūrtestu bhāvābhijñaściraṃ kvacit || 73 ||
[Analyze grammar]

asthairyaṃ tu vinodinyāḥ parīkṣituṃ samicchati |
vinodinī gate varṣe mūrteḥ sevanatastataḥ || 74 ||
[Analyze grammar]

vrataṃ jagrāha mūrtyagre'naśanaṃ darśanecchayā |
māsaṃ vrataṃ cakāraiva mūrtyagre kamalāsane || 75 ||
[Analyze grammar]

sanniṣaktā kare mālāṃ dhṛtvā jajāpa keśavam |
netrābhyāṃ tanmūrtirūpaṃ manasā mananaṃ hareḥ || 76 ||
[Analyze grammar]

ātmanā sphuraṇaṃ tasya svapnādau pratimāṃ hareḥ |
ālocayati nānyadvai pūjāyāṃ sparśanaṃ vyadhāt || 77 ||
[Analyze grammar]

yāvadindriyavṛttīḥ sā niyuyojāntare harau |
bāhye harau niyuyoja bāhyabhānā'pi sundarī || 78 ||
[Analyze grammar]

bāhyāntaraikyamāpannā caikatānaparāyaṇā |
abhavat sā satī bhaktā vinodinī vare'cyute || 79 ||
[Analyze grammar]

atha śrībhagavānasyā hāsyarasābhilālasaḥ |
nāvirbhavati vyaktātmā pratīkṣate vinodanam || 80 ||
[Analyze grammar]

māsottaro vyatīyāya samayastvekakā''sane |
tato mūrtervinodaṃ sā kartumārabdhavatyapi || 81 ||
[Analyze grammar]

dṛśyase tvaṃ caikamukho tathāpi vimukho hyasi |
dvimukhyāḥ pañjare nyasto bhaviṣyasyamukho'ntare || 82 ||
[Analyze grammar]

prasravaṇapraśūnyastvaṃ cā'vyaktasravaṇe dhṛtaḥ |
bhaviṣyasyasravo nityaṃ sasravo bhava matkṛte || 83 ||
[Analyze grammar]

evaṃ vinodavākyāni mūrterhāsyāya māninī |
muktakaṇṭhena satataṃ jagāda kṛṣṇasannidhau || 84 ||
[Analyze grammar]

athā'pyāha hariṃ sā ca narmavākyaṃ tataḥ param |
mahadrūpo'si satataṃ vitastimūrtitāṃ gataḥ || 85 ||
[Analyze grammar]

praveṣṭuṃ ca hiraṇgarbhaṃ kimicchasi tathā kuru |
evamābhāṣyāsanāt sā samutthāya nanarta ha || 86 ||
[Analyze grammar]

tāvatprasannatāṃ prāptaḥ svāmikṛṣṇanarāyaṇaḥ |
mūrtiṃ vivṛtya sahasā tejasā vyāptavigrahaḥ || 87 ||
[Analyze grammar]

yuvā kiśoraḥ samabhūddhāsyaṃ kṛtvā puraḥsthitaḥ |
samāśliṣyat satīṃ bhaktāmapāyayad rasaṃ nijam || 88 ||
[Analyze grammar]

mūrteḥ sukhaṃ dadau tasyai sarvendriyādigocaram |
tato vinodinīṃ mūrtau līnībhūtāṃ cakāra saḥ || 89 ||
[Analyze grammar]

yāvat svasya sukhaṃ divyaṃ sarvaṃ tasyai dadau prabhuḥ |
tṛptā'bhavattu sā divyā divyamuktānikā drutam || 90 ||
[Analyze grammar]

abhavanmāyayā hīnā brahmaloke sthitā yathā |
tāvat tatra mahāpuṇyairdevalo'pi samāyayau || 91 ||
[Analyze grammar]

vīkṣya kāntena kṛṣṇena kārṣṇīṃ vinodinīṃ satīm |
nijaṃ cāpi tathaicchat saḥ kṛṣṇe dravamavāptavān || 92 ||
[Analyze grammar]

śrīkṛṣṇo'pi paraṃ bhāvaṃ jñātvā devalakāntare |
sakhīrūpaṃ vinodinyā iva taṃ yoṣitaṃ vyadhāt || 93 ||
[Analyze grammar]

nararūpaṃ vihāyaiva sakhī devalikā'bhavat |
vinodinīsamā rūpe sarvathā kṛpayā hareḥ || 94 ||
[Analyze grammar]

yathā lakṣmīḥpriyā rādhā tathā devalikā'bhavat |
ubhe muktānike jāte divye divyavibhūṣite || 95 ||
[Analyze grammar]

divyabrahmarasāḍhye ca divyakṛṣṇasvarūpike |
līne jāte kṛṣṇanārāyaṇe taddehasaṃsthite || 96 ||
[Analyze grammar]

evaṃ śrīkṛṣṇakāntaste hyubhe dhāma nināya vai |
śāśvate brahmaparamānandasukhe mamajjatuḥ || 97 ||
[Analyze grammar]

mātaścaivaṃ brahmamahārasapānāśanaṃ sadā |
jāyate kṛṣṇabhaktāyāstathā me vidyate'dhunā || 98 ||
[Analyze grammar]

na me'nyatrā'sti bhavanaṃ bhāvanā śrīhariṃ vinā |
brahmaraso harāvastītyuktvā maunaṃ samādadhat || 99 ||
[Analyze grammar]

ityevaṃ badarīdevi parabrahmaraso'vyayaḥ |
yathā''pyate tayā''ptaścobhābhyāmāptastathoditaḥ || 100 ||
[Analyze grammar]

yā cā'nyā vā'nya evāpi sarvasvabhāvanārpaṇāt |
uktarītyā parabrahmānandarasamavā'pnuyāt || 101 ||
[Analyze grammar]

parabrahmarasā'vāptau parabrahmā'sti kāraṇam |
sādhurūpasya sevā'pi parabrahmā''ptikāraṇam || 102 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne bālayoginīgītāyāṃ parabrahmarasāśanāptaye vinodinyā devalakapatnyā vinodena prasāditabhagavato brahmarasāyanasādhurūpeṇa sākṣātprāptirmokṣaṇaṃ devalakasya sakhītvaṃ cetyādinirūpaṇanāmā ṣoḍaśo'dhyāyaḥ || 16 ||
[Analyze grammar]